Lelok ñõn Ro Jet Kejatdikdik eo kin Mour Indio
1 Meñe armij rar bukõt elõñ wãwen ko ñõn karumijlok air rittolok im kaetoklok mour eo air, rittolok im mij rej itok wõt. Elap ad kamolol bwe Bible eo ear kamelele kin taunin armij rej rittolok im mij, im bareinwõt ewi wãwen jorrãn ko kin rittolok renaj bar oktaklok im mij enaj jako. Mol kein rej kwalok kake ilo book eo Kwo Maroñ Mour Indrio ilo Paradise ion Lõl. Book eo ej uak ilo alikar kajitõk ko rekabwokbwok kin mour im mij, im kareilok ri konono eo ñõn ien eo Paradise eo enaj bar jeblak.
2 Ilo April jenaj lelok book eo Mour Indrio ibben mejenkajjik eo ñõn jino katak kin Bible ko. (Mat. 28:19, 20) Inem jenaj kõmmõn bar jeblak ko ibben aolep ro rar kwalok air itoklimo ilo ennan in Ailiñ eo. Ilo wãwen in jemaroñ lelok ñõn ro jet kejatdikdik eo kin mour indio. (Titus 1:2) Ñõn kõtõbrak men in, kwomaroñ lo bwe nan in rejañ kein tok remaroñ jibañ.
3 Ilo ien lolok eo moktata, kwomaroñ bõkmantak kajitõk in:
◼ “Kwo nañin lemnak ke kin taunin armij ro rekõnan juõn mour eaetoklok? [Kõtlok an uak.] Buddhist ro, Christian ro, Hindu ro, Muslim ro, im ro jet aolep ewor juõn kejatdikdik kin mour elikin mij.” Kabellok book eo Mour Indrio ñõn peij 10, im konono paragraph 9. Elikin am kammanwa ion eon eo rej kwalok kake, kwomaroñ kajitõk: “Inem, etke armij rej mij? Im ewi wãwen mij ear walok ilo lõl in?” Kajitõk ibben ri mweo elañe ekõnan lo uak eo. Elañe ekõnan, eliklok ñõn peij 74 im bwebwenato kin katak eo edik “Etke Jej Rittolok im Mij.” Kwoj jino juõn katak kin Bible! Elañe jab, door book eo bwe en maroñ readi, im kõmmõn karõk ko ñõn bar jeblak, emõnlok iloan juõn ak ruo wõt ran ko, ñõn bwebwenato kin uak ko.
4 Ñe kwoj bar jeblak ibben juõn eo kwar lelok book eo “Mour Indrio,” kwomaroñ ba:
◼ “Iar jeblak ñõn etale ruo kajitõk ko kin mij me jaar jab uaki.” Kakememej ri mweo kin kajitõk ko. Inem bwebwenato kin kamelele ko ilo paragraph 14 ilo peij 74. Elañe ewor ien, kwomaroñ wõnmanlok kin katak eo ak kajerbal kajitõk eo ilo jinoin paragraph 15 ñõn kõmmõn bedbed in katak eo tok juõn. Kõmmõn karõk ko ñõn bar jeblak. Lelok ñõn ri mweo juõn handbill, im ilo tu-kadu kameleleik e kin ewi wãwen rej kõmmõni kwelok ko an congregation eo. Ilo okmãnãn kirtok e ñõn bed ilo kwelok.
5 Ilo jerbal eo jen em-ñõn-em ak kwalok nan ilo jabdewõt ien emõn tok, kwomaroñ kajutak juõn bwebwenato ilo am ba:
◼ “Kwo nañin lemnak ke ta ilju eo ej bed iman ñõn kij im kin lõl in? [Kõtlok an uak.] Bible eo ej ba kin ilju eo ilo juõn wõt nan—Paradise! Ej kamelele bwe ilo jinoin, Anij ear kõmmõn juõn mõttan in lõl in juõn paradise eaibujuij ijo ear likit armij ro ruo moktata ear kõmmõni. Rar aikwij karmije aolepen lõl in, im jidik kin jidik renaj kar kõmmõne bwe en juõn paradise. Lale wãwen eo ej kwalok kin paradise eo.” Kabellok book eo Mour Indrio ñõn peij 10, im konono paragraph 11, iumin katak eo edik “Kain Mour Rõt Eo Kwo Kõnan.” Jen Bible eo am kwalok ñõn ri mweo eon eo ej kwalok kake, Isaiah 35:5, 6, inem bwebwenanto kin point ko ilo paragraph 12. Ba bwe kwoj mõnõnõ ñõn wõnmanlok ilo bwebwenato eo kin ewi naj wãwen mour ilo paradise eo im ñõn etale paragraph 13-14 ibben don. Ak rejañ armij eo ñõn an make konono book eo, im kõmmõn karõk ñõn bar iion don im bwebwenato kake.
6 Elañe kar jab kajutak juõn katak kin Bible ilo ien eo moktata, kwomaroñ kajeoñ in kõmmõn eindein ilo ien bar jeblak ilo am ba:
◼ “Einwõt jaar bwebwenato mokta, ej karõk eo an Anij bwe aolepen lõl in en oktak ñõn juõn paradise. Men in ej bõkmantak juõn kajitõk, “Ewi naj wãwen Paradise eo?” Kabellok book eo Mour Indrio ñõn peij 13, im katak paragraph 13-14. Tokelik kwalok pija eo ilo peij 12-13, im kajitõk ibben armij eo elañe ekõnan mour ibwiljin melan rot kein reaibujuij. Inem konono sentence eo moktata ilo paragraph 19 ilo peij 15. Elañe ewor ien, kwomaroñ wõnmanlok ilo katak eo ak ba bwe ilo ien in tok kwonaj kameleleik e kin ta eo ej men in aikwij elañe juõn armij ekõnan mour ilo Paradise. Door juõn handbill, kamelele kin schedule eo an congregation eo week otemjej, im ilo okmãnãn kirtok armij eo ñõn bed ilo kwelok ko ilo Kingdom Hall eo.
7 Book eo Mour Indrio ej juõn kein jerbal emõn jemaroñ kajerbale ñõn kwalok ñõn ro jet kin “mour indrio” eo Anij ear kallimur kake. Am tel katak kin Bible ko ilo mweo ibben armij emaroñ lelok ñõn ir kejatdikdik in emõn me Anij eo “E ban riõp” emwij an kakõrmole.”