Katakin Ro Jet ñan Air Bõk Tokjen ko Remõn
1 Jehovah ekõnan bwe aolep armij ren bõk tokjen ko remõn. (Ais. 48:17) Ejelã ta eo enaj bõktok mõnõnõ eo emol ñan kij. Kõnan eo an elap ej bwe armij ren bõprae air iion jorrãn im ñan lañliñ kin mour ilo air bokake kien ko an. Elap ad naj bõk tokjen ko remõn ilo ad mour ekkar ñan wãwen Anij. (Sam 34:8) Ewi wãwen jemaroñ katakin ro jet ñan kõmman eindein?
2 Ta eo Armij ro Rekõnan? Ta eo ri mweo ro ilo jikin eo kwoj jokwe ie rej itoklimo kake? Ejjab kin jokane ilo mweo imwiir ke, kajur in mour in belele eo air, ilju eo an ajiri ro nejiir, im men ko eierlok wõt? Ñe ewõr abañ ko ibbeir, ia eo rej bukõt jibañ jen e? Remaroñ liki ir make, ilo program ko kin jibañ ir make, ak ilo tel ko an ro jet. Ilo air kõmmane, elõñ rej bwok kin lemnak ko reoktak jen don im rejjab keie kin ewi wãwen remaroñ bõk tokjen ko remõn. Jej aikwij kamol ñan ir bwe men eo Nan in Anij ej letok ikijen nan in tel ej emõnlok. (Sam 119:98) Jemaroñ kõmmane men in ilo ad kwalok ñan ir kin ewi wãwen remaroñ kakõmõnmõnlok emõn in mour ko air meñe kiõ elañe rej kate ir katak Bible eo im jerbale men eo ej ba.—2 Tim. 3:16, 17.
3 Mour in Family eo ej Emõnlok: Eiet armij rej kile joñan an emõn an jerbal nan in kakabilek eo ekakõrmol ilo Dri Epesõs 5:22–6:4 ñan kamadmõde abañ ko ilo family eo. Men in ear mol ibben ruo ri belele ro me, elikin joñoul yiõ ko in air belele ibben don, rar bebe in jebel. Bõtab, kar jino juõn Bible study ibben lio, eo kar katakin e kin nan in kakabilek ko ilo Jeje ko ikijen mour in belele. Ejjab to tokelik leo ear lo oktak ko lio ear kõmmani ke ear jerbale nan in kakabilek ko ilo Bible, im ear koba ibben ilo Bible study eo an. Tokelik leo ear ba: “Kiõ emwij amro lo bedbed in juõn mour in family elukkun mõnõnõ.”
4 Juõn Unin Mour Emol: Ke juõn jodikdik eo ear bõk uno ko rekajur ear bukõt jibañ jen Ri Kennan ro, kar katakin e bwe Jehovah ej kea kake e. Ear ba: ‘Iar katak bwe Ri Kõmanmõn eo ewõr juõn unin ear kõmanmõn armij im ej lelok mour indio ñan ro ej buñburuen kake. Ebin ñan am jelã kin joñan aõ kar mõnõnõ kin men in. Rainin ij lañliñ kin ejmour, ainemõn ilo lemnak, im juõn kõtan ebak ibben Anij.’
5 Aolep remaroñ bõk tokjen jen jibañ eo ekeie jemaroñ loe ilo Nan in Anij. Ilo ad kajerbale einwõt juõn men in tel kij, jej kamol bwe ial eo an Jehovah ej utiejlok jen wãwen ko an lal in. (Sam 116:12) Ej jerammõn eo ad ñan kwalok kin ennan in ñan ro jet, im katakin ir ñan air make bõk tokjen jen e. Ñe jej kõmman eindein, jenaj lo elõñ tokjen ko remõn.