Ta eo Kwonaj Ba ñan juõn Ri Hindu?
1 Einwõt kwoj jelã, elõñ Ri Hindu ro rej jokwe ilo kajjojo mõttan ko ilo lal in, ekoba ailiñ in. Melelen men in bwe juõn ien kwonaj iion juõn Ri Hindu ilo jerbal in kwalok nan eo am. Ñe kwoj iione, ta eo kwonaj kõmmane?
2 Kememej Point Kein: Missionary ro me rar lo tõbrak ke rar kwalok nan ñan Ri Hindu ro rej ba bwe ejjab juõn men in aikwij ñan etale katak ko an kabuñ in Hindu ñan kwalok nan ilo keie ñan Ri Hindu ro. Juõn ennan elamwan kin mol eo ekkã an wõr tõbrak. Mokta kajitõk elañe kwomaroñ konono ibben bõran family eo. Elañe ej mõnõnõ, enaj bidodolok ñan kwalok nan ibben ro jet uan family eo. Ilo jinoin kejbãrok bwe kwon jab ba bwe kwoj bõktok juõn ennan me ej utiejlok jen ta eo ri mweo ej tõmak kake ak bwe kwo kõnan konono ibben kin Anij wõt eo emol ak kin jeje ko rekwojarjar me etto tata air bed. Kinke elõñ Ri Hindu ro rej watõk Bible eo einwõt juõn book eo ej itok jen ailiñ in belle, kwo maroñ kadiklok air kwalok kalijeklok ilo am kameleleik ir bwe ejjab kowõnmanlok colonialism (juõn jar in armij ej iroij ion bar juõn jikin ak armij) ak bwe juõn ailiñ ej utiejlok jen bar juõn.
3 Kajerbal Kein Jerbal ko Rejejjet: Ruo brochure ko kar kõmmani elaptata ilo lemnak kin Ri Hindu ro. Why Should We Worship God in Love and Truth? (Etke Jej Aikwij Kabuñ ñan Anij ilo Yokwe im Mol?) kar jeje ilo kajin Gujarati im Punjabi. Our Problems—Who Will Help Us Solve Them? (Abañ ko Ad—Wõn eo Enaj Jibañ Kij Lo Mejelair?) kar jeje ilo 11 kajin India ko jet. Brochure kein ruo ewõr ilo kajin English. Brochure ko “Look! I Am Making All Things New” (“Lo, Ij Kõmõn Men Otemjej Bwe Ren Ekãl”) im Does God Really Care About Us? (Anij Ej Lukkun Kea Kake Kij Ke?) rej bareinwõt mol air keie ñe kwoj kwalok nan ñan Ri Hindu ro. Jen Kõmmõne brochure eo im book eo Knowledge remõn bareinwõt ñan kõmman Bible study ko.
4 Bukõt Point ko Komirro Jimor Komij Errã Kaki: Ejjab bin ñan lo point ko jej errã kaki ibben Ri Hindu ro. Rej tõmak bwe jej mour ilo juõn ien me elaptata an nana im bwe Anij enaj kamadmõde abañ ko an lal ikijen juõn jorrãn elap im juõn ien mol enaj walok elikin. Kwomaroñ lo bwe tõmak kein ebidodo ñan keidilok ibben katak ko ilo Bible ikijen ran ko eliktata, eñtan eo elap, im lal eo ekãl ej itok. Kinke enañin aolep Ri Hindu ro rej watõk mour einwõt juõn lelkan in abañ ko im ejelok mejelair, rej itoklimo ilo katak ko ikijen mour in family, kowadoñ im wãwen jemaroñ kejbãrok, im ta eo ej walok ñan kij elikin jej mij. Ijin ej ruo wanjoñok in ennan ko kwomaroñ kajerbali.
5 Juõn emaan eo ewõr an family emaroñ reel ibben ennan in:
◼ “Ij lolok armij ro rej itoklimo kin wãwen mour in family ilo elõñ ailiñ ko ilo ran kein. Ta eo kwoj lemnak enaj jibañ family ko bwe ren bed ibben don? [Kõtlok an uak.] Jet armij rej jelã ta eo jeje ko in Ri Hindu ro rej ba ikijen family eo, ak ejañin kar wõr air ien ñan keidi ibben ta eo Bible ej ba. I kõnan kwalok ibbam lemnak eo ilo Dri Kolosse 3:12-14.” Elikin kwoj readi eon eo, kwalok ñan ri mweo katak 15 ilo book eo Knowledge im ba: “I naj mõnõnõ in bõk jidik ien ñan readi katak in ibbam.”
6 Juõn jodikdik emaroñ emmakit ñan ennan in:
◼ “Ejelok bere kwoj tõmak ilo Anij. Ta lemnak eo am ikijen karõk eo an Anij ñan kij?” Kõtlok an uak. Inem readi Jenesis 1:28, im ba: “Ilo elõñ jikin ko, lal in ej obrak kin armij im rej iion elõñ kain abañ ko. Kwoj lemnak ke bwe Ri Kõmanmõn eo enaj mõnõnõ in jibañ kij kamadmõde abañ ko ad?” Elikin am roñjake uak eo an, eliklok ñan juõn book ekkar.
7 Lañliñ kin Tokjen ko Remõn: Juõn Ri Hindu emaan eo ej 22 an yiõ ear kebak juõn sister eo ear kwalok nan ilo juõn jikin mõn wia ko im ear kajitõk kin juõn Bible study. Ear kameleleik e bwe ralitõk yiõ ko remotlok ear roñjake juõn bwebwenato ikõtan jinen im e. Meñe ear bwilõñ kin uak ko rekeie an Bible kin abañ ko an armij, jinen ear jab itoklimo im ear lemnak bwe ear dik ñan an make bukõt mol eo. Kiõ ke ej juõn armij eritto, ear kõnan kalaplok an jelã. Likao eo ear jab kokkure ien. Iloan wõt 23 ran ko, ear kadedelok an katak Knowledge book eo, im emen alliñ ko elikin an kar iion sister eo ilo jikin mõn wia ko, ear baptais!
8 Juõn brother ear jino juõn Bible study ibben juõn Ri Hindu emaan eo ear iione ilo juõn train. Ear wõr abañ ko ilo mour in belele eo an lein. Ear bareinwõt wõr juõn abañ ikijen idak den in kadõk. Emaan eo ear kõtlok bwe Ri Kennan eo en lolok e im jaketo-jaketak nan in kakabilek ko jen Bible ikijen mour in family. Katak ko ilo Bible ikijen mour erreo ear emõn ibben lein, im ear errã ñan katak Bible. E im family eo an rar jino itok ñan kwelok ko. Tokelik rar jaketo-jaketak mol eo ibben ro jerair im ro nukiir. Ñan kiõ, jiljino iair rar bõk mol eo!
9 Ej ankil an Anij bwe en “lomoren armij otemjej, im bwe ren item jela mol.” (1 Tim. 2:4) Men in ej koba maan im kõrã ro rej bed ilo juõn kabuñ ejjab Christian, einwõt kabuñ in Hinduism. Elañe ewõr Ri Hindu ro ilo territory eo am, etke kwojjab lolok ir im kajerbal jet ian ennan ko ilo katak in?