Box In Kajitõk

◼ Ekkar ke ñan ad lelok jabawõt ñan ro jej uwe ibbeir?

Jet iad ewõr wãwen ko ibbed me rej kõmman bwe jen aikwij atartar ion ro jet ñan bõk jibañ bwe jen keini ad bed ilo kwelok ko im bõk kunad ilo jerbal in kwalok nan. Elõñ brother im sister ro rej mõnõnõ in kajerbal ien ko air, wa ko wair, im men ko mweieir ñan letok ial in ad ito-itak. Meñe rej aikwij mõkajlok air kebojak jen ke rar karõk ñan kõmmane im erumijlok air rol ñan moko imwiir, rej letok ial in ad ito-itak kin juõn jitõb in mõnõnõ.

Einwõt an eindein ilo wãwen ko jet kin jerbal in Christian, kakabilek eo jej loe ilo Galetia 6:5 ej jerbal: “Bwe jabrewõt armij e naj mõke inek kwonan.” Kin men in, elañe juõn armij ej keini an letok ial in ad ito-itak, jej aikwij kwalok ad kamolol ejjab ilo nan ko ad wõt ak bareinwõt, elañe jemaroñ, ikijen ad lelok jidik jabawõt ñan jibañ kõllã kin wõnãn ko.​—Mat. 7:12; 1 Kor. 10:24.

Meñe armij eo ej kajerbal wa eo waan ejjab kajitõk kin jibañ im emaroñ jab aikwij, ien otemjej rej kamolol ñe emol an armij lelok jabawõt. Ri kattõr eo emaroñ jab bõk jabdewõt men; im, emol, jej aikwij kõtlok bwe en make bebe. Ak ekkar bwe kwon mõnõnõ in lelok. Elañe kwojjab maroñ lelok jabdewõt jabawõt ilo ien eo, kwomaroñ kememeje; bõlen kwomaroñ kalaplok jidik am lelok ilo ien eo tok juõn ñe kwoj uwe ibben.​—Luk 6:38.

Ej juõn men in yokwe ilo an ro ewõr wa ko wair kõmman ial ñan ro jet me reban kar maroñ bed ilo kwelok ko ak bõk kunair ilo jerbal in kwalok nan. (Ken. 3:27) Ilo ejja ien eo wõt, ej bareinwõt men in yokwe ñe ro rej bõk tokjen jen joij eo an rein rej kwalok air kamolol ilo air lelok jabawõt ekkar ñan wãwen ko ibbeir.​—Kol. 3:15.