Ewi Wãwen Am Maroñ Tõbar Mejenkajjik Ko Ilo Jitõb
1. Ta mejenkajjik ko ilo jitõb ewõr ibben elõñ jodikdik ro?
1 Einwõt juõn jodikdik, ejelok bere bwe yokwe eo am ñan Jehovah im nan ko an Jesus ñan aolep Ri Christian ro ñan ‘bukõt mokta ailiñ eo’ rej jelet mejenkajjik ko am ilo mour. (Mat. 6:33) Mejenkajjik eo am emaroñ ñan kalaplok am jerbal einwõt juõn pioneer ak jerbal ijo elap aikwij ri kwalok ro ie. Jet remaroñ lemnak in bõk kunair ilo jerbal in ekkal eo ibelakin lal, ñan jerbal ilo ra eo, ak ñan jerbal einwõt juõn missionary. Mejenkajjik kein rekamõnõnõ im emol air kajuburu!
2. Ta eo emaroñ jibañ yuk ñan am tõbar mejenkajjik ko am ilo jitõb?
2 Juõn menin jibañ ñan tõbar mejenkajjik ko am ilo jitõb ej ñan jei ilo juõn lajrak. Ilo Watchtower eo ilo July 15, 2004, ilo kajin English ear ba: “Juõn lemnak ej oktak im alikar ñe kwoj kãlet nan ko ñan kalikare. Inem kwomaroñ kõnan jei mejenkajjik ko am ilo juõn lajrak im karõk ñan am kõtõbraki.” Bareinwõt, mejenkajjik ko ituiolap remaroñ jibañ yuk ñan am etale wõnmanlok eo am im debij wõt am reimanlok ñan am kõtõbar mejenkajjik eo eaetok kitien.
3. Kwalok jet ian mejenkajjik ko ekadu kitieir me remaroñ jibañ juõn ñan an maroñ baptais.
3 Mejenkajjik ko Ekadu Kitieir: Elañe kwojañin baptais, lemnak kin ta eo kwoj aikwij kõmmane ñan am tõbar mejenkajjik in. Bõlen kwoj aikwij kalaplok am melele kin katak ko raorõk Bible ej katakin kake. Elañe eindein, kõmman bwe en mejenkajjik eo am ñan katak ilo tibdikin book eo Bible Teach (Bible ej Katakin), im etale aolep eon ko ie. (1 Tim. 4:15) Kõmmane juõn mejenkajjik bareinwõt ñan am readi aolepen Bible eo jen Jenesis ñan Reveles̃õn, einwõt ro rej jerbal ilo Bethel im ri school ro ilo Gilead rej aikwij kõmmane. Elikin menin, kejbãrok wõt lajrak eo ñan am readi Bible eo ran otemjej. (Sam 1:2, 3) Lemnak kin ewi joñan an menin maroñ jibañ yuk ñan am rittolok ilo jitõb! Kabellok im kajemlok kajjojo ien read Bible im ien katak kin juõn jar jen buru, im aolep ien kajeoñ in jerbale ta eo kwoj katak.—Jem. 1:25.
4. Ta mejenkajjik ko ekadu kitieir juõn Ri Christian ej aikwij kõmmane elañe mejenkajjik eo an eaetok kitien ej ñan jerbal ilo Bethel ak jerbal einwõt juõn missionary?
4 Elañe ededelok am baptais, bar ta mejenkajjik ko kwomaroñ kõtõbari? Kwoj aikwij ke kakõmõnmõnlok kabel eo am ilo jerbal in kwalok nan? Ñan wanjoñok, kwomaroñ ke kajeoñ in kõmman bwe kwon erom juõn eo ekabel ilo kajerbal nan in Anij ilo jerbal in kwalok nan? (2 Tim. 2:15) Ewi wãwen am maroñ kalaplok jerbal in kwalok nan eo am? Kõmman jet mejenkajjik ko ekadu kitieir im jejjet ekkar ñan joñan dettam im wãwen ko ibbam me remaroñ jibañ yuk ñan am tõbar mejenkajjik ko am eaetok kitieir.
5. Ewi wãwen kõmman juõn mejenkajjik ekadu kitien ear jibañ juõn brother ñan an tõbar mejenkajjik eo ñan jerbal ilo Bethel?
5 Juõn Bwebwenato ewõr Tõbrak Ie: Ke Tony eo ej 19 yiõ dettan ear lolok ra eo an Ri Kennan ro an Jehovah, juõn kõnan ñan jerbal ilo Bethel ear ejaak ilo e. Bõtab, wãwen mour eo an ear nana, im ejañin kar wujleplok mour eo an ñan Anij. Tony ear bebe ñan an kajimwe mour eo an ekkar ñan ial ko an Jehovah im kõmman bwe en an mejenkajjik ñan tõbar menin aikwij eo ñan baptais. Elikin an tõbar mejenkajjik in, ear bar kõmman mejenkajjik eo ñan auxiliary pioneer inem regular pioneer, im ear jeje ilo calendar eo an ran eo ear kõnan jinoe. Lemnak kin joñan lañliñ eo an elikin an pioneer iumin jet yiõ ko, kar kir e ñan an jerbal ilo Bethel!
6. Ta eo emaroñ jibañ yuk ñan am tõbar mejenkajjik ko am ilo jitõb?
6 Kwe bareinwõt kwomaroñ tõbar mejenkajjik ko am ilo jitõb ilo am bukõt mokta Ailiñ eo. Likit “jerbal ko am” ibben Jehovah ilo jar im kõmman joñan wõt am maroñ ñan kõtõbraki.—Ken. 16:3; 21:5.