Ñe Armij Ro Rej Jako Jen Mweo Imwiir
1. Ta aitwerõk eo ekkã ad iione ñe jej bõk kunad ilo jerbal in kwalok nan jen em-ñan-em?
1 Ilo elõñ jikin ko elaplok an bin ad lo armij ro ilo moko imwiir. Ilo “ien [kein] renana” elõñ rej aikwij jerbal elõñ awa ko ñan baj kabwe wõt aikwij ko air. (2 Tim. 3:1) Jet remaroñ jako jen moko imwiir kinke rej kaikujkuj ilo mõn wia ko ak ikkure ilo jikin ko jet. Ewi wãwen ad maroñ jibadõk rein kin news eo emõn?
2. Ewi wãwen ad maroñ jibañ aolep ro rar jako jen moko imwiir?
2 Kejbãrok Record ko Remõn: Buñten nee eo moktata ej ñan je juõn record in moko ejelok armij ie. Men in elaptata an aorõk elañe emakijkij am jerbal ilo territory eo am. Kwoj je ke etan ial eo, number in territory eo, etõm, im ran eo? Kwomaroñ likit jidik space ak jikin ñan je kamelele ko jet ilo record eo am ñe kwe ak bar juõn ri kwalok ej jeblak ñan jerbale moko ear ejelok armij ie. Ñe emwij kwalok nan, kememej ñan lelok record eo ñan armij eo ear bõk territory eo, elañe ear jab kajitõk ibbam bwe kwon bar jeblak ñan moko ejelok armij ie. Kajerbal bar juõn peba ñan je etan armij ro rar kwalok air itoklimo me kwar iion ir im kwonaj bar jeblak ibbeir.
3. Ta jet ian wãwen ko jemaroñ lemnak kaki ñan jibadõk ro rar jako jen moko imwiir?
3 Kajeoñ in Jeblak ilo Bar Juõn Ien: Bõlen ro me rar jako ilo ran in jerbal ko remaroñ bed ilo jota ak ilo weekend (Saturday im Sunday) ko. Kwomaroñ ke karõk schedule eo am ñan bar jeblak ilo juõn ien emõnlok? (1 Kor. 10:24) Elañe jab, kwomaroñ lelok record in moko imõn armij ro me rar jako jeni ñan juõn ri kwalok me emaroñ jeblak ilo bar juõn ien. Ak, kwomaroñ je juõn letter ñan ro rar jako jen moko imwiir ak telephone lok ñan ir. Ri kwalok ro me ewõr air abañ kin ejmour im ej kõmman bwe en wõr joñan air maroñ bõk kunair ilo jerbal in jen em-ñan-em remaroñ mõnõnõ in jibañ yuk kin men in.
4. Ta wanjoñok eo ej kwalok kin aorõkin ad bar jeblak ñan aolep moko ear ejelok armij ie?
4 Juõn wanjoñok ej kwalok kin aorõkin ad kajeoñ in kebak aolep ro rar jako. Elikin an kar ri kwalok ro bar jeblak elõñ alen iumin jilu yiõ, eliktata rar iion ri mweo. Rej kab jelã bwe iumin aolepen yiõ kein kõrã eo ear kõttar an juõn Ri Kennan itok ñan an maroñ bar jino an katak kin Bible einwõt an kar kõmmane mokta jen an emmakit ñan jikin eo.
5. Ñããt eo jemaroñ watõk bwe emwij ad jerbal ilo juõn territory?
5 Kamwijlok Am Jerbal ilo Territory Eo: Ñããt eo jemaroñ watõk bwe ededelok ad jerbal ilo territory eo? Emakijkij an eindein, ñe jaar kõmman jibadbad ko joñan wõt ad maroñ ñan kebak juõn armij ilo moko kajjojo. Ilo moko ejelok armij ie, elaptata ilo territory ko ejeja ad jerbal ie, emaroñ ekkar ñan ad door juõn tract ak magazine emor ilo juõn jikin me ro rej etetal bajjek rejjab maroñ loe. Jej aikwij kamwijlok ad jerbal ilo territory eo iumin emen alliñ. Inem jej aikwij karole ñan eo ej lale territory ko bwe en maroñ kõkãl record ko an.
6. Etke jej aikwij kate kij ñan jibadõk aolep armij ro ilo territory eo ad kin news eo emõn?
6 Jekõnan lelok ñan elõñ armij joñan wõt ad maroñ ien eo emõn ñan air katak ñan kir etan Jehovah im bõk lomor. (Rom. 10:13, 14) Men in ej kobaik ro rar jako ke jaar etal ñan mweo imwiir. Einwõt ri jilek Paul, kõmman bwe en kõnan eo am ñan “kennan gospel an joij in Anij.”—Jerb. 20:24.