Jej Kwalok ibben Ro Jet Kin Kejatdikdik Eo Ad kin Ailiñ Eo
1 Ilo ran kein eliktata, elõñ armij ro ilo lal in ejelok kejatdikdik ibbeir. (Ep. 2:12) Ro jet, ilo jab meletlet rej likit air liki ilo mweiuk ko, ibben ri tel ro an lal in, meletlet in science ilo ran kein, im men ko eierlok wõt. Jelukkun mõnõnõ bwe ewõr ibbed juõn kejatdikdik emol kin ilju im jeklaj, kejatdikdik eo ej “einwõt ankõr in ar, ebin im e jamin makõtkit”!—Hib. 6:19.
2 Iumin iroij in Ailiñ eo an Anij, lal in enaj oktak ñan juõn paradise. Ro rejitenburu ibbed rar mij renaj jerkakbiji. (Jerb. 24:15) Jeramel, jab ekajet jimwe, nañinmij, rittolok, im mij renaj jako. (Sam 9:18; Mat. 12:20, 21; Rev. 21:3, 4) Erkein ej jet ian kallimur ko an Jehovah mõttan jidik renaj jejjet kitieir. Ta mõttan kejatdikdik kein kwoj lukkun reimanlok kaki?
3 Keañ kin News eo Emõn: Jejjab aikwij debij wõt ibbed make kejatdikdik in kin Ailiñ eo. Yokwe Anij im ri turid ej kamakit kij ñan anõk Jesus im “kwalok gospel ñõn ro dri jeramel, . . . [ñan] kwalok kõtlok ñõn matõn iri, im lolokjen ñõn ro rebilo, bwe [jen] kõtlok ro ar kokkure ir.” (Luk 4:18) Ri jilek Paul ear kwalok kin news eo emõn ilo jikin wia ko im ijoko jabdewõt ewõr armij ro ie. Ear jolok aolep ien ko an ilo jerbal in kwalok nan. (Jerb. 18:5) Ad lore joñok eo an ilo ad kijejeto in bõk kunad ilo jerbal in kwalok nan enaj bõpraik “inebata ko an lõl in, im mon an mweiuk ko” jen air kadiklok kejatdikdik eo ad.—Mark 4:19.
4 Ejjab diklok kejatdikdik eo ad kin Ailiñ eo ñe jej iion armij ro rej kwalok air jab kea, ro rej kwalok jidik wõt itoklimo kin ennan in Ailiñ eo, ak ro rej jumae kij. Jej “drebij wõt [ad] kwalok ar kejatrikrik bwe en jab makõtkit.” (Hib. 10:23) Jejjab “jok kin gospel.” (Rom. 1:16) Bõlen tõmak im tiljek eo ad ealikar air loe enaj kamakit jet ñan roñjake tokelik.
5 Meñe jej kwalok kin wãwen ko renana ilo lal in me rej kajejjet kitien kanan ko ilo Bible, jejjab ri kwalok kin jorrãn ko. Jen men in, jerbal in kwalok nan eo ad ej jitõñlok armij ro ñan kejatdikdik eo kin Ailiñ eo—news eo emõn kin Ailiñ eo an Anij. Jen kwalok kin news in emõn kin tõmak im kijejeto “ñõn obrõk in kejatrikrik, aet, ñõn jemlokõn.”—Hib. 6:11.