Kõn Katok in Mour eo an Jijej, Ro Remej Remaroñ Bar Mour

Kwõjkwõjin Keememej Mej eo an Jijej ej juon iien em̦m̦an ñan kõl̦mãnl̦o̦kjen̦ kõn jeraam̦m̦an ko renaaj wal̦o̦k ilju im jekl̦aj itok wõt jãn an kar Jijej mej im katok kõn mour eo an kõn kõj. Juon iaaer ej ñe ro remej renaaj bar mour. Ejjab kar karõk eo an Jeova in bwe armej ren mej. Eñin unin, juon iaan men ko me el̦ap aer kabũrom̦õj kõj ej ñe juon eo ejitõnbõro ippãd ej mej. (1Ko 15:26) Ke Jijej ear lo an rũkal̦oor ro an jañũt Lazerõs ke ear mej, ear bũrom̦õj im rup bũruon. (Jon 11:33-35) Innem kõnke Jijej ej nemãmeen wõt Jemãn, ejjel̦o̦k pere bwe el̦ap an bar Jeova bũrom̦õj ñe ej lo ad bũrom̦õj kõn an ro rejitõnbõro ippãd mej. (Jon 14:7) El̦ap an Jeova kijoororetok iien eo enaaj bar kõmour rũkarejar ro an me rar mej. Jen bar bõk ejja eñjake in wõt.​—Job 14:14, 15.

Kõnke Jeova ej Anij in karõk, ewõr unin ad tõmak bwe enaaj laajrak im kon̦ wãween an naaj kõmour ro rar mej. (1Ko 14:40) Ilo raan kein, ekkã an lõñ iien mej ko im armej rej koba ippãn doon ñan aer bũrom̦õj kõn eo emej. Bõtab ijello̦kun ad naaj kõm̦m̦an men in ilo iien en̦, emaroñ naaj wõr iien ko ñan ad baj karwaineneiktok wõt ro Anij enaaj kejerkak er jãn mej. Kwõj ke l̦õmn̦akel̦o̦k iien eo ro remej renaaj bar mour, el̦aptata ilo iien ko kwõj bũrom̦õj kõn juon eo ejitõnbõro ippam̦ me ear mej? (2Ko 4:17, 18, UBS) Kwõj ke kam̦m̦oolol Jeova kõn an kar letok Nejin bwe en mej kõn kõj im likũt ilo Baibõl̦ bwe ro remej renaaj bar mour?​—Kol 3:15, UBS.

• Wõn iaan ro m̦õttam̦ im ilo baam̦le n̦e am̦ me kokijooror in bar loe?

• Wõn iaan ro ilo Baibõl̦ me kwõj kijooror in iioone im bwebwenato ippãn?