MOURIN KŨRJIN
Wãween Am̦ Maroñ Juon Eo Eniknik ilo Katak Naanin Anij
Kokõn̦aan ke bwe kwõn tiljek wõt ium̦win mãlejjoñ ko ãinwõt kar Daniel? Daniel ear niknik ilo an katak im liñõri Naanin Anij, ekoba kanaan ko rem̦wilal̦. (Dan 9:2, UBS) Am̦ niknik katak Baibõl̦ emaroñ jipañ eok ñan dãpij wõt am̦ tiljek. Ewi wãween? Ilo am̦ kõm̦m̦ane men in emaroñ jipañ eok ñan kal̦apl̦o̦k am̦ tõmak bwe kallim̦ur ko an Jeova renaaj jejjet im m̦ool. (Jos 23:14, UBS) Emaroñ bar jipañ eok ñan kal̦apl̦o̦k am̦ yokwe Anij, im yokwe in enaaj lujur eok ñan kõm̦m̦ani men ko rejim̦we. (Sam 97:10) Ak ia eo kwõmaroñ jino jãne? Eokwe wãween kein tok jilu remaroñ lukkuun jipañ eok.
Ta eo in katak kake? Juon m̦anit im laajrak em̦m̦an ñan katak ippãd make ej kitibuj ad kõpooji katak ko ñan kweilo̦k ko. Enaaj l̦apl̦o̦k am̦ bõk tokjãn jãn jebta ko jej riiti ilo wiik eo, el̦aññe kwõj bõk iien ñan kappukot mel̦el̦e ko kwaar jab mel̦el̦e kaki ke kwaar riit Baibõl̦. Jet rar pepe ñan kal̦apl̦o̦k aer mel̦el̦e kõn kanaan ko ilo Baibõl̦ im kajjojo iaan leen jetõb ko an Anij. Rar bar pepe ñan katak kõn jikin ko rijjilõk Paul ear etal ie l̦o̦k ke ear mijinede im bareinwõt kõn menin kõm̦anm̦an ko an Anij. El̦aññe ewõr juon am̦ kajjitõk kõn Baibõl̦ me ejiktok ilo l̦õmn̦ak eo am̦ ilo raan eo, je ilo juon peba im etale ilo iien eo tok juon ñe kwõnaaj katak ippam̦ make.
Ia eo imaroñ kappok mel̦el̦e ie? Ñan jipañ eok kõn men in, alwõje pija eo etan Research Tools for Discovering Spiritual Treasures. Em̦m̦an kwõn kajjioñe men in ilo am̦ kappok mel̦el̦e im lale kien ta ko rekajoor an lal̦ me rej pijaikl̦o̦k menninmour ko ilo Daniel jebta 7.
Ewi aetokan aõ aikuj katak ippa make? Keini ad katak ippãd make ej ki eo ñan kõkajoor kõtaan eo ad ippãn Jeova. Kwõmaroñ jino ilo am̦ katak ium̦win jidik iien el̦aññe emenin aikuj bwe en kadu. Jidik kõn jidik, kwõmaroñ kaetokl̦o̦k kũtien am̦ katak ippam̦ make. Katak Naanin Anij ej ãinwõt ñe jej kõb im kappok menin aorõk ko rettino. El̦ak l̦apl̦o̦k am̦ lo men ko raorõk, el̦apl̦o̦k wõt am̦ kõn̦aan kõb im kappukoti! (JK 2:3-6, UBS) Ãindein, enaaj l̦apl̦o̦k am̦ kõn̦aan riiti Naanin Anij, im am̦ keini am̦ katak ippam̦ make enaaj wõnm̦aanl̦o̦k wõt im juon m̦anit kwõj imminene in kõm̦m̦ane.—1Pi 2:2.
TA KO MENNINMOUR KO ILO BOKIN DANIEL JEBTA 7 REJ KÕKKAR KAKE?
Da 7:4
Da 7:5
Da 7:6
Da 7:7
BAR JUON KAJJITÕK:
Ewi wãween an kar jejjet Daniel 7:8, 24?
MEN EO TOK JUON INEJ KATAK KAKE:
Menninmour ko rawiia ilo Revelesõn jebta 13 rej kõkkar kõn ta?