Lo Aenõm̦m̦an Meñe Ewõr Tarin̦ae im Poktak Ko
Gary, eo me ear juon rũttarin̦ae m̦okta, ej ba: “M̦okta jãn aõ kar katak Baibõl̦, iar jab jel̦ã etke elukkuun l̦ap lãj, wãween ko rejjab jim̦we, im jorrããn ilo lal̦ in. Ak kiiõ e aenõm̦m̦an bũruõ. Ijel̦ã bwe Jeova Anij enaaj kõm̦m̦an bwe lal̦ in en juon jikin ejokwane.”
Gary ejjab make iaan. Lale wãween an Baibõl̦ eo jipañ ro jet.
BAIBÕL̦ EO EJ BA: “Bwe Kwe Irooj Kwõj em̦m̦an, im kõn̦aan jol̦o̦k bõd.”—Sam 86:5.
WÃWEEN AN EOON IN JIPAÑ: “Eoon in ej kam̦ool ñan eõ bwe Jeova ej juon Anij in tũriam̦o. Ijel̦ã bwe ekõn̦aan jol̦o̦k aõ bõd kõn men ko iar kõm̦m̦ani kar m̦okta ke iar tarin̦ae.”—Wilmar, Colombia.
BAIBÕL̦ EO EJ BA: “Ij kõm̦m̦an lañ ko rekããl im lal̦ ekããl; im jãmin keememej men ko m̦okta.”—Aiseia 65:17.
WÃWEEN AN EOON IN JIPAÑ: “Ij eñtaan kõn nañinmejin inepata (post-traumatic stress disorder) im nañinmejin bũrom̦õj kõn men ko ikar iiooni ilo tarin̦ae. Ak eoon in ej kakeememej eõ bwe m̦õttan jidik Jeova enaaj julo̦k aolep inepata ko ilo bũruõ im kõm̦m̦an bwe in mel̦o̦kl̦o̦k aolep men ko renana. Reban bar wal̦o̦k ilo aõ l̦õmn̦ak ak ilo bũruõ. Men in ej juon jeraam̦m̦an el̦ap!”—Zafirah, America.
BAIBÕL̦ EO EJ BA: “Ilo raan ko an ro rem̦m̦an renaaj jeraam̦m̦an, im enaaj l̦ap aenõm̦m̦an m̦ae iien ejako allõñ.”—Sam 72:7.
WÃWEEN AN EOON IN JIPAÑ: “Ekkã aõ l̦õmn̦ak kõn naan kein. M̦õttan jidik ettõn̦ak ko rekaamijak kõn tarin̦ae renaaj jako, im jejjãmin bar inepata kõn an ro rejitõnbõro ippãd pãd ilo kauwõtata.”—Oleksandra, Ukraine.
BAIBÕL̦ EO EJ BA: “Ro Am̦ remej renaaj mour . . . Kom̦win ruj im al, kom̦ eo kom̦ij jokwe ilo bũñal.”—Aiseia 26:19.
WÃWEEN AN EOON IN JIPAÑ: “Enañin aolep ro ilo baam̦le eo aõ rar mej ilo iien eo ro ilo bwij eo juon rar kajjioñ m̦ane aolep ro ilo bwij eo an Tutsi. Bõtab eoon in ear jipañ eõ ñan tõmak bwe inaaj bar lo er. Ij reim̦aanl̦o̦k in roñ ainikien aer em̦m̦õn̦õn̦õ ñe renaaj jerkakpeje!”—Marie, Rwanda.
BAIBÕL̦ EO EJ BA: “Bwe jidik wõt iien, im eo enana enaaj jako . . . A ro ettã bũrueer renaaj jolõt ãne eo, im renaaj m̦õn̦õn̦õ kõn aenõm̦m̦an el̦ap.”—Sam 37:10, 11.
WÃWEEN AN EOON IN JIPAÑ: “Meñe tarin̦ae eo ear jem̦l̦o̦k, ak ear wõr wõt jab ekajet jim̦we im armej ro renana. Eoon kein rar lukkuun kõkajoor ña. Jeova ej lo men otemjej im emel̦el̦e kõn men eo ij iioone. Ej kallim̦ur bwe m̦õttan jidik aolep eñtaan enaaj jako im jeban bar keememeji.”—Daler, Tajikistan.
Armej ro me rar kwal̦o̦k l̦õmn̦ak ko aer ilo katak in rej uwaan elõñ milien Ri-Kõnnaan ro an Jeova me rar bõk jipañ jãn Baibõl̦ ñan lo aenõm̦m̦an. Rar katak ñan jab kalijekl̦o̦k kõn kil, aelõñ, bwij, im kõjdat. (Epesõs 4:31, 32) Ri-Kõnnaan ro an Jeova rejjab bõk kun̦aaer ilo men ko an kien im rej m̦akoko in bõk kun̦aaer ilo kowadoñ.—Jon 18:36.
Ri-Kõnnaan ro an Jeova rej bareinwõt bõk jipañ jãn ro jeier im jatier ipel̦aakin lal̦ me el̦ap yokwe ippãer. (Jon 13:35) Ñan waanjoñak, Oleksandra, eo kar kõnono kake m̦oktal̦o̦k, ear aikuj ko ippãn ledik eo jatin ñan bar juon aelõñ kõn an wõr tarin̦ae. Ej ba: “Ke kõmar tõpar aelõñ eo juon, kõmar kajju lo Ri-Kõnnaan ro an Jeova me rar itok in karwaineneik kõm. Aer jipañ im rejetak kõm ear kõm̦m̦an bwe en pidodo am katak ñan mour ilo juon aelõñ ekããl ãinwõt ro ri-jipo̦kwe.”
Kõm kõn̦aan kũr eok ñan kweilo̦k ko am ijo kõmij katak kõn ennaan eo ekaenõm̦m̦an jãn Baibõl̦ eo im wãween ad jerbale. Etal ñan jw.org/mh ñan pukot jikin kweilo̦k eo epaake eok ak ñan kajjitõk bwe juon iaan Ri-Kõnnaan ro an Jeova en katak Baibõl̦ ippam̦, ilo bok eo M̦õn̦õn̦õ kõn Mour ñan Indeeo!