Anij Ej Melejoñ Tõmak An Ebream

KWO maroñ ke lo men eo Ebream ej kõmone ijin? Eor juõn bakbõk iben, im einwõt ñe ej iten mõn leo nejin. Etke ej iten kõmõn men in? Mokta, jen lale ekijkan an kar wor nejin Ebream im Sera.

Kememij, Anij e ar kalimuri ir bwe enaj wor juõn nejiir ladrik. Bõtap, einwõt e ar bin men in, kinke Ebream im Sera r’ar lukkun ridto. Meñe eindrein, Ebream e ar tõmak bwe Anij e maroñ kõmõn menko bwe ren walok meñe iben armij re bin ak ban walok. Inem ta eo e ar walok?

Elikin an Anij kõmõne kalimur eo an, juõn yiõ e ar ellã. Inem, ke Ebream e ar 100 yiõ ridtan im Sera e ar 90 yiõ ridtan, e ar keutak juõn ladrik, etan Aisak. Anij e ar kejbarok an kalimur!

Bõtap ke Aisak e ar ridtolok, Jeova e ar melejoñ tõmak eo an Ebream. E ar kir im ba: “Ebream!” Im Ebream e ar uak: “Na e!” Inem Anij e ar ba: “Kwon bõk ladrik ne nejõm, eo ej mõke wõt nejõm man, Aisak, im ilok ñõn juõn tol me I naj ba kajien ñõn yuk. Na ijen, kwon mõn ladrik eo nejõm im letok e einwõt juõn men in katok.”

E mõke lap an kar nan kein kaburomõj Ebream, kinke e ar lukkun lap an Ebream yokwe leo nejin. Im kememij, Anij e ar kalimur bwe ro nejin Ebream re naj jokwe ilo enen Ke’nean. Ak ekijkan an maroñ eindrein elañe e mij Aisak? Ebream e ar jab melele, ak e ar bokake wõt Anij.

Ke e ar tõbraklok ilo tol eo, Ebream e ar liabe Aisak im kababuik e ion jikin katok eo e ar kaleke. Inem e ar kwalok bakbõk eo bwe en mõn nejin. Ak ilo ien eo, enjel eo an Anij e ar kir im ba: ‘Ebream, Ebream!’ Im Ebream e ar uak: ‘Ña e!’

‘Kwon jab likit peõm ion ladrik eo, im jab kõmõn jabrewõt ñõn e,’ Anij e ar ba. ‘Kiõ I jela bwe kwoj tõmak iõ, bwe kw’ar jab drebij nejõm jen Iõ, eo ej mõke wõt nejõm.’

E nañin lap an kar Ebream tõmak Anij! E ar tõmak bwe ejelok juõn men e bin ñõn Jeova, im bwe Jeova e ar maroñ kajerkak Aisak jen mij. Bõtap e ar jab lukkun ankil an Anij bwe Ebream en mõn Aisak. Kin men in Anij e ar kõmõn bwe juõn sip en lorõk ilo juõn ian mãr ko e ar ebake ijo, im e ar jiroñ Ebream bwe en katok kake im jab katok kin nejin.