Lõmaro Jein Josep Rej Kijirat E

LALE joñan an ladrik in buromõj im ejelok mõnõnõ. Eñin Josep. Ej kap mwij an lõmaro jein wiakake ñõn lõmarein im rej ilok ilo ial eo air ñõn Ijipt. Ijo naj kõmõn Josep bwe en juõn dri kamakoko. Etke lõmaro jein r’ar kõmõn men in e nana? Kinke rej bane Josep.

Jemeir Jekob, e ar lukkun lap an yokwe Josep. E ar kalikar an yokwe e ke e ar jiroñ bwe ren kõmõne juõn an kobe aitok im aibujuij. Ke lõmaro 10 jein r’ar lo joñan an Jekob yokwe Josep, r’ar jino in ebanban im drike Josep. Ak e ar bar wor juõn un in air drike e.

Josep e ar tõnak ruo alen. Ilo aolepen tõnak ko ruo an Josep, lõmaro jein r’ar barikrik ñõn e. Ke Josep e ar jiroñ lõmaro jein tõnak kein, air kijirat e ar laplok wõt.

Juõn ran, ke lõmaro jein Josep r’ar lale sip ko an jemeir, Jekob e ar kajitõk bwe Josep en ilen lale ekijkan air ber. Ke lõmaro jein Josep r’ar lo an itok, jet r’ar ba: ‘Jen mõn e bwe en mij!’ Ak Ru’ben, eo e ridto tata e ar ba: ‘Jaab, komin jab ein dre ne ñõn e!’ Inem r’ar jibwe Josep im jolok e iloan juõn aibij lõl e bããt. Inem r’ar jijõt im bebe ta eo ren kõmõn ñõn e.

Ilo ien in, jet eman in dri Ish’me-el r’ar itok ijintok, Juda e ar ba ñõn ro jein im jatin: ‘Jen wiakake ñõn dri Ish’me-el rõn.’ Im eñin men eo r’ar kõmõne. R’ar wiakake Josep kin 20 mõttõn silver. Enañin nana im ejelok joij ilo men in!

Ta eo lõmaro jein re naj ba ñõn jemeir? R’ar mõn juõn kon in goat im elõñ alen rej katulok kobe eo e aibujuij an Josep ilo bõtõktõk in goat eo. Inem r’ar bõklok nuknuk eo ñõn mweo imweir iben jemeir Jekob im ba: ‘Kim ar lo men in. Kwon kakilin e, kobe eo an nejõm ke, jab ke?’

Jekob e ar kile bwe eñeo. E ar jõñ im ba: ‘Juõn kiru e lej e ar kõñ Josep.’ Im eñin men eo lõmaro jein Josep r’ar kõnan bwe jemeir en lemnõke. E kanuij lap an Jekob buromõj. Ej jõñ iomin elõñ ran. Ak Josep e ar jab mij. Jen lale ta eo e ar walok ñõn e ijo r’ar bõklok e ñõn e.