Job E Tiljek Ñõn Anij

KWO buromõj ke kin lein e nañinmij? Etan in Job, im kõra in ej lio belen. Kwo jela ke ta in ej ba ñõn Job? Ej ba, ‘Kwon karmijete Anij im mij.’ Jen lale unin an kar lio maroñ ba men in, im unin an kar lap an Job iñtan.

Job e ar juõn armij e tiljek im e ar bokake Jeova. E ar jokwe ilo ene in Uz, ejjab etolok jen Ke’nean. E ar lap an Jeova yokwe Job, ak e ar wor juõn eo e ar drike e. Kwo jela ke wõn eo?

Kar Setan Devil eo. Kememij, Setan ej enjel eo e nana im e drike Jeova. E ar maroñ kõmõn bwe Adam im Iv ren jab bokake Jeova, im e ar lemnõk bwe e maroñ kõmõn bwe aolep ro jet ren jab bokake Jeova bareinwõt. Ak e ar maroñ ke? Jaab. Baj lemnõk mõk kin dri tõmak ro relõñ, man im kõra ro j’ar katak kin ir. Jete kwo maroñ ba etair?

Elikin an kar Jekob im Josep mij ilo Ijipt, Job kar armij eo elap tata an tiljek ñõn Jeova ilo aolepen lõl. Jeova e ar kõnan bwe Setan en jela bwe ejjab maroñ kõmõn aolep armij bwe ren nana, inem e ar ba: ‘Lale mõk Job, joñan an tiljek ñõn iõ!’

‘Ej tiljek,’ Setan e ar akwail, ‘kinke kwoj kajerammõn e im elõñ menko remõn iben. Ak elañe kwo naj bõkilok men kein, e naj karmijete yuk.’

Kin men in, Jeova e ar ba: ‘Kwon etal wõt. Bõkilok men kein. Kõmõn aolep men ko re nana kwo kõnan ñõn Job. Je naj lale elañe e naj karmijete iõ. Men eo wõt, lale bwe kwon jab mõn e.’

Mokta, Setan e ar kõmõn bwe dri nana ro ren itok im kwote aolep kau im kiru kamel im mõn sip ko an Job. Inem e ar mõn 10 nejin ladrik im ledrik ilo juõn kõto elap. Tokelik, Setan e ar kaiñtan Job kin nañinmij in e lukkun nana. E ar lap an Job iñtan. Eñin unin an kar lio belen ba ñõn e: ‘Kwon karmijete Anij im mij.’ Ak Job e ar makoko in kõmõn men in. Bareinwõt, jilu jeran re wan r’ar itok im ba ñõn e bwe e ar nana wãwen an kar mour. Ak Job e ar drebij wõt an tiljek.

Men in e ar lukkun kamõnõnõik Jeova, im tokelik e ar kajerammõn Job, einwõt am maroñ lo ilo pija ne. E ar kemour e jen an nañinmij. E ar bar wor 10 nejin ajiri remõnlok jen ro mokta, im elõñlok ruo alen oran kau, sip, im kiru kamel ko jen mokta.

Kwon tiljek ke ñõn Jeova ien otemjej einwõt Job? Elañe eindrein, Anij e naj kajerammõn yuk bareinwõt. Kwo naj maroñ mour in drio ilo ien eo enaj kõmõn bwe aolepen lõl en aibujuij einwõt jikin kallip in Iden.