Anij Ej Kalimur Kin Juõn Paredais

PIJA in ej kwalok juõn paredais eo me enañin einwõt paredais eo me Anij e ar kwalok ñõn dri kanan eo, Aiseia. Aiseia e ar mour elikin an Jo’na mour.

Nan in, paredais, ej melelen “jikin kallip” ak “jikin le mõnõnõ.” Ej men in kakememij yuk ke kin juõn men me emwij ar kar loe iloan buk in? Ein jekjek in wõt jikin kallip eo e aibujuij me Jeova Anij e ar kõmõne ñõn Adam im Iv, ejjab ke? Ak aolepen lõl in en juõn paredais ke?

Jeova e ar jiroñ Aiseia, dri kanan eo an, bwe en jeje kin paredais eo ekãl im ej itok ñõn ro dron Anij. E ar ba: ‘Kiru wulf im sip re naj mour iben dron ilo ainemõn. Kon in kau im kon in laiõn ko re naj mõña iben dron, im ajiri ro redrik re naj lale ir. Juõn niñniñ e jamin jorran meñe ej ikkure iturin juõn serpent e poisen.’

‘Men kein re jamin walok,’ elõñ re naj ba. ‘E ar wor jorran ion lõl in jen jinoin, im e jamin joko jorran.’ Ak kwon baj lemnõk kake men in: Jikin jokwe rõt eo Anij e ar lelok ñõn Adam im Iv?

Anij e ar dror Adam im Iv ilo juõn paredais. Kin wot airro jab bokake Anij, jikin jokwe eo air e aibujuij e ar joko jen ir, im r’ar ridtolok im mij. Anij ej kalimur bwe e naj lelok ñõn armij ro rej yokwe e ejja men ko wõt im r’ar joko jen Adam im Iv.

Ilo paredais eo ekãl im ej itok, e jamin wor men in kajorran ak kokkure. E naj wor ainemõn e mol. Aolep armij ro re naj ejmour im mõnõnõ. E naj einwõt an kar Anij kõnan ilo jinoin. Ak tokelik je naj katak kin wãwen an naj Anij kõmõne men in.