Jisõs Ej Kajerkakbiji Ro Re Mij

LEDRIK in kwoj lo ijin ej 12 yiõ ridtan. Jisõs ej jibwe pein, im jinen im jemen rej jutak ebake. Kwo jela ke ta unin an kanuij mõnõnõ turin mejeir? Jen lale.

Jemen ledrik eo ej juõn armij e utiej, etan Ja’i-rõs. Juõn ran, ledrik eo nejin e ar nañinmij, im rej kababu e ion kinien. Ak ejjab emõnlok an mour. Elaplok wõt an nañinmij aolep ran. Ja’i-rõs im lio belen rej lukkun inebata, kinke ilo airro lale, e naj mij ledrik eo nejiir. Ej mõke wõt nejiir ledrik. Kin men in Ja’i-rõs ej ilem kabukõt Jisõs. E ar roñ kin men in kabwilõñlõñ ko Jisõs ej kõmõni.

Ke Ja’i-rõs ej lo Jisõs, eor juõn jar elap in armij ro rej kabol e. Ak Ja’i-rõs ej driblok jar in armij ro im buñbero turin neen Jisõs. ‘Ledrik eo nejiõ e kanuij lap an nañinmij,’ ej ba. ‘Kwon joij im itok im kemour e,’ ej akwelap. Jisõs ej ba bwe e naj etal.

Ke irro ej ilok ilo ial eo lok, jar in armij ro relõñ rej kobaj dron bwe ren kebaklok Jisõs. Ilo ien in Jisõs e bwijrak. ‘Wõn eo e ar uñir iõ?’ ej kajitõk. Jisõs e ar iñjake an driojlok kajur jen iben, inem e jela bwe eor juõn eo im e ar uñir e. Ak wõn eo? Ej juõn kõra eo me e ar lukkun nañinmij iomin 12 yiõ. E ar item uñir nuknuk ko an Jisõs, im mour!

Men in ej lukkun kainemõn Ja’i-rõs, bwe ej kile joñan an biruru an Jisõs kemour juõn armij. Ak ilo ien in juõn dri kõjella ej itok. ‘Kwon jab bar kainebataik Jisõs,’ ej jiroñ Ja’i-rõs. ‘E mij ledrik eo nejõm.’ Jisõs ej roñ an ba men in im ej ba ñõn Ja’i-rõs: ‘Kwon jab inebata, e naj mour.’

Ke r’ar tõbar mweo imõn Ja’i-rõs, armij ro rej lukkun jõñ kin air buromõj. Ak Jisõs ej ba: ‘Komin jab jõñ. Ajiri eo e ar jab mij. Ej kiki.’ Ak rej ettõñ im kajerere kake Jisõs, kinke re jela bwe e mij ledrik eo.

Inem Jisõs ej ãñin jemen im jinen ledrik eo kap jilu ian dri jilik ro an na iloan rum eo me ledrik eo ej babu ie. Ej jibwe pein im ba: ‘Kwon jerkak!’ Im e mour ledrik eo, einwõt am lo ijin. Ej jerkak im etetal! Eñin unin an jinen im jemen kanuij mõnõnõ.

Ledrik in ejjab moktata ian ro me Jisõs e ar kajerkakbiji ir jen ro re mij. Eo ken ka juõn me Baibel eo ej konono kake ej likao eo nejin juõn kõra me ejoko belen im ej jokwe ilo jikin kwelok eo etan Ne’in. Tokelik, Jisõs ej bareinwõt kajerkakbiji Laz’e-rõs, leo jatin Meri im Marta, jen ro re mij. Ñe Jisõs ej iroij einwõt kiñ eo an Anij, e naj kajeblak bwijin, bwijin ro re mij ñõn mour. Ejab je maroñ mõnõnõ kin men in ke?