Juõn Paredais Ekãl Ion Lõl

LALE mõk wijiki kein re aitok, wut ko re aibujuij im tol ko re utiej. Ejjab aibujuij ijin ke? Lale wãwen dir eo ej mõña jen pein ladrik eo. Im lale kiru laiõn ko im ors rej jutak ijueo ilo melaj en. Ejab kwo naj kõnan jokwe ilo juõn im ilo juõn jikin einwõt in ke?

Anij e kõnan bwe kwon mour in drio ion lõl ilo juõn paredais. Im ejjab kõnan bwe en wor ibõm jabrewõt ian jorran im men in metak ko me armij ro rej iñtan kaki ranin. Eñin kalimur eo ilo Baibel eo ñõn ro im re naj mour ilo paredais eo ekãl: ‘Anij e naj ber ibeir. E naj joko mij im dren in kemjalal im metak. Men ko mokta re joko.’

Jisõs e naj lale bwe oktak in elap en walok. Kwo jela ke ñat? Aet, elikin an karreoiki lõl jen nana otemjej im armij ro re nana. Kememij, ke Jisõs e ar ber ion lõl e ar kemour armij jen nañinmij otemjej, im e ar kajerkakbiji armij ro jen mij bareinwõt. Jisõs e ar kõmõn men kein bwe en kwalok men ko e naj kõmõni i aolepen lõl ilo ien eo ej erõm Kiñ in ailiñ in Anij.

Baj lemnõk mõk kin joñan an naj emõn ar ber ilo paredais eo ekãl ion lõl! Jisõs, iben jet ian ro ej kãlet ir, e naj iroij i lõñ. Iroij re naj kejbarok ro otemjej ion lõl im lale bwe ren mõnõnõ. Jen lale ta eo jej aikwij in kõmõne bwe Anij en letok ñõn kij mour in drio ilo paredais eo an ekãl.