Katak 8

Ta Eo Ej Walok ilo Mij?

1. Ta kajjitõk ko ekkã an armij kajjitõk kaki kin mij?

BWELEN kwo jelã kin iñjake eo ej walok ñe juõn eo ejitenburu ibbed emij. Iñjake kin elab buromõj im mõjno ej ibbam! Ebiktokin armij ñõn air kajjitõk: Ta eo ej walok ñõn juõn armij ñe ej mij? Ej mour wõt ke ijoko jet? Ro rej mour ren bar maroñ ke mõnõnõ ion lõl ibben ro remij kiõ?

2. Ta eo ear walok ñõn man eo moktata, Adam, ke ear mij?

² Ñõn uak kajjitõk rot kein, enaj juõn menin jibañ kij ñõn ad jelã ta eo ear walok ñõn Adam ke ear mij. Ke ear jerawiwi, Anij ear jiroñ e: “Kwo [naj] jeblak ñõn budrej, bwe ad bõk yuk jen e. Bwe bũñalñal kwe, im ñõn bũñalñal kwonaj jeblak.” (Genesis 3:19) Lemnak kin ta melelen men in. Mokta jen an kar Anij kõmõnmõne jen bũñalñal, kar ejjelok Adam. Ear jab bed. Innem, elikin an mij, Adam ear jeblak ñõn ejja wãwen eo wõt ilo wãwen an jab bed.

3. (a) Ta in mij? (b) Ta eo Ecclesiastes 9:5, 10 ej ba kake kin wãwen ro remij?

³ Ilo tubidrodroin, mij ej oktan mour. Bible eo ej kwalok men in ilo Ecclesiastes 9:5, 10. Ekkar ñõn Authorized ak Kiiñ James Version, eon kein rej ba: “Bwe ro remour rejelã bwe renaj mij; a ro remij ejjelok air jelã, im ebar ejjelok menin lelok ñõn ir; rejjab ememej ir. Jabdrewõt eo beiũm ej loe bwe en kõmmõne, kwon kõmmõne kin am maroñ; bwe ejjelok jerbal, ak menin kine, ak jelã, ak meletlet, ilo lub eo, ijo kwoj ilok ñõne.”

4. (a) Ta eo ej walok ñõn maroñ in lemnak an juõn armij ñe emij? (b) Etke maroñ otemjej an juõn armij ebwijrak ñe emij?

⁴ Melelen men in ej bwe ro remij rejjab maroñ kõmmõn jabdrewõt im jab maroñ iñjake jabdrewõt. Ejjelok jabdrewõt air lemnak, einwõt an Bible eo ba: “Komin jab liki bwirõk rõn, ak nejin armij, eo ejjelok jibañ ibben. Jitõb eo an ej ilok, ej jeblak ñõn bũdrej; ilo ran eo lemnak ko an rejakolok.” (Psalm 146:3, 4) Ilo ien mij jitõb eo an juõn armij, kajur-in-mour eo an, eo ej wonmanlok wõt kin an menono, ej “ilok.” Ejako an bed. Innem maroñ eo an armij ñõn an roñjake, lo, uñur, ãtbwin, nemak, ko rej atartar ion an maroñ lemnak, aoleb rebwijrak air jerbal. Ekkar ñõn Bible eo, ro remij rej dreloñ ilo juõn wãwen bed eo ejjelok jabdrewõt jelãlokjen ie.

5. (a) Ewi wãwen an Bible eo kwalok bwe wãwen bed eo an armij ro remij im menin mour ko remij rej joñan wõt juõn? (b) Ta “jitõb” eo me ej kõmmõn bwe armij im men in mour ko jimor ren mour?

⁵ Ñe rej mij, armij ro im menin mour ko jimor rej bed ilo wãwen eo ejjelok jelãlokjen ñõn jidrik. Lale wãwen an Bible eo kalikkar men in: “Einwot juõn iair emij, ein drein emij eo juõn; im ibbeir otemjej juõn wõt jitõb, im armij ro ejjelok air utiej jen kidru ko, bwe men otemjej men bata. Ir otemjej rej ilok ñõn juõn jikin. Ir otemjej jen bũñalñal, im ir otemjej renaj jeblak ñõn bũñalñal.” (Ecclesiastes 3:19, 20) “Jitõb” eo me ej kõmmõn an menin mour ko mour ejja eñeo wõt ej kõmmõn an armij ro mour. Ñe “jitõb” in, ak kajur-in-mour in me jejjab loe, ej ilok, armij im menin mour ko jimor rej jeblak ñõn bũñalñal ijo kar kõmmõn ir jene.

AAN EJ MIJ

6. Ewi wãwen an Bible eo kwalok bwe menin mour ko rej aan ro?

⁶ Jet armij rej ba bwe men eo ej kõmmõn an armij oktak jen menin mour ko ej bwe armij eor juõn aan ak menin mour ko ejjelok. Bõtab, Genesis 1:20 im 30 rej ba bwe Anij ear kõmõnmõn “aan ko remour” bwe ren mour ilo dren ko, im bwe menin mour ko eor air “mour einwõt juõn aan.” Ilo eon kein, jet Bible ko rej kejerbal nan kein “men in kõmõnmõn” im “mour” jen air je “aan,” ak ilo nan in kemelele ko ie rej errã bwe nan in “aan” ej men eo ej walok ilo kajin eo jinointata. Ian eon ko Bible eo ej jitõñilok ñõn menin mour ko einwõt aan ko ej Bwinbwin 31:28. Ijin ej konono kin “juõn aan jen limabuki, in armij im cow ko im ass ko im bwijin sheep im goat ko.”

7. Ta eo Bible ej ba ñõn kamol bwe aan menin mour ko im aan armij rej jimor mij?

⁷ Ke menin mour ko rej aan ko, ñe rej mij, aair emij. Einwõt an Bible eo ba: “Im aan ko otemjej rar mij, aet, men ko ilo lometo.” (Revelation 16:3) Ak ta kin aan armij ro? Einwõt ad kar katak ilo chapter ko lok iman, Anij ear jab kõmõnmõn armij im kobbaik aan ibben. Armij eo ej juõn aan. Innem, einwõt jen kar melele, ñe armij ej mij, aan ebar mij. Bible eo ej eliji im bar eliji bwe men in emol. Bible eo ejañin kar ba bwe aan ejaje mij ak bwe ejjab maroñ mij. “Ro otemjej rej wõnlõllok ñõn bũñalñal renaj badrikdrik, im ejjelok en enaj maroñ kejbarok aan bwe en mour wot,” Psalm 22:29 ej ba. “Aan eo e jerawiwi​—enaj mij,” Ezekiel 18:4 im 20 rej kemelele. Im elañe kwonaj kebellok ñõn Joshua 10:28-39, kwonaj lo jiljilimjuõn jikin ko ijo rej konono kin aan einwõt bwe emwij mõne ak kokkure im ejako.

8. Ewi wãwen ad jelã bwe aan armij eo, Jesus Christ, ear mij?

⁸ Ilo juõn kanan kin Jesus Christ, Bible eo ej ba: “Ear lutõklok aan ñõn mij . . . a ear ineklok jerawiwi an elõñ, im ear kõmmõn men in mirik kin ro ri bwid.” (Isaiah 53:12) Katak eo kin binmour eo ej kamol bwe juõn aan (Adam) eo ear jerawiwi, im ñõn binmouri armij kar aikwij bar wor juõn aan (juõn armij) eo einlok wõt ñõn katok kake. Christ, ilo an kar ‘lutõklok aan ilo mij,’ ear kõllãik wõnen binmour eo. Aan armij eo, Jesus, ear mij.

9. Ta melelen nan kein, ‘jitõb eo make ej jeblak ñõn Anij eo ear letoke’?

⁹ Einwõt emwij ad loe, “jitõb” eo ej juõn men eo eoktak jen aad. Jitõb eo ej einwõt kajur-in-mour eo ad. Kajur-in-mour in ej bed ilo kajjojo cell ko (kij ko) ilo enbwinnin armij im menin mour ko jimor. Ej wõnmanlok wõt, ak mour wõt, ikijjen an menono. Innem, ta melelen ñe Bible eo ej ba bwe ilo ien mij “buñalñal ej jeblak ñõn budrej . . . im jitob eo make ej jeblak ñõn Anij eo emol, eo ear letoke”? (Ecclesiastes 12:7) Ilo ien mij kajur-in-mour eo ej ilok jen aoleb cell ko (kij ko) in enbwin eo im enbwin eo ej jino kõt. Ak ejjab melelen bwe kajur-in-mour eo ad ej lukkun ilok jen lõl in im kelok ilo mejatoto ñõn ibben Anij. Ak, jitõb eo ej jeblak ñõn Anij ilo melele eo bwe kiõ kejatdrikdrik eo ad ñõn mour ilo ran ko rej itok ej bed ibben Anij. Ilo kajur eo an wõt, jitõb in, ak kajur-in-mour in, emaroñ bar jeblaktok bwe jen bar mour.​—Psalm 104:29, 30.

LAZARUS​—JUÕN EMMAN EO EAR MIJ IUMIN EMEN RAN KO

10. Meñe Lazarus ear mij, ta eo Jesus ear ba kin bed eo an?

¹⁰ Men eo ear walok ñõn Lazarus, eo ear mij iumin emen ran ko ej jibañ kij ñõn ad melele kin wãwen ro remij. Jesus ear jiroñ ro ri kaloran: “Jerad Lazarus ej kiki, a Ij ilok bwe In karuji jen kiki.” Bõtab, ro ri kaloran rar uak: “Iroij elañe ej kiki enaj mour.” Kin men in, Jesus ear jiroñlok ir: “Lazarus emij.” Etke Jesus ear ba bwe Lazarus ej kiki ke ear lukkun mij? Jen lale.

11. Ta eo Jesus ear kõmmõne ñõn Lazarus eo ear mij?

¹¹ Ke Jesus ear kebakelok jikin eo Lazarus ear jokwe ie, Martha lio jein ak jatin Lazarus ear iione. Ejjab to tokelik ir, im elõñ armij ro jet, rar ilok ñõn lub eo rar likit Lazarus ie. Kar juõn roñ, im juõn ejman ear bed ion. Jesus ear ba: “Jolok ejman eo.” Ke emotlok emen ran jen ke Lazarus ear mij, Martha ear jumae: “Iroij, joñan ne e buõl.” Ak rar kamakit ejman eo, im Jesus ear lamõj: “Lazarus, kwon itok!” Im ear! Ear driojlok ilo an mour, kitimi wõt kin nuknuk in mij. “Komin jelat nuknuk ko jene im kõtloke,” Jesus ear ba.​—John 11:11-44.

12, 13. (a) Etke jemaroñ tõmak bwe Lazarus ear ejjelok an jelã ke ear mij? (b) Etke Jesus ear ba bwe Lazarus ear kiki, ke ilo mol, ear mij?

¹² Kiõ lemnak kin men in: Kar ta bed eo an Lazarus iumin ran ko emen ke ear mij? Ear bed ke ilõñ? Ear juõn emman emmõn. Ak Lazarus ear jab ba jabdrewõt kin an kar bed ilõñ, im emol enaj kar ba elañe ear bed ie. Jab, Lazarus ear lukkun mij, einwõt an kar Jesus ba bwe ear. Innem etke ilo jinoin Jesus ear jiroñlok ro ri kaloran bwe Lazarus ear kiki?

¹³ Eõkwe, Jesus ear jelã bwe Lazarus eo emij ear jajelokjen, einwõt Bible eo ej ba: “Ro remij . . . ejjelok men en rejelã.” (Ecclesiastes 9:5) Ak jemaroñ karuji juõn armij eo emour meñe e kiki im ettoñ. Innem Jesus ear bojak in kwalok bwe, ikijjen kajur eo an Anij emwij lelok ñõne, emaroñ karuji leo jeran Lazarus jen mij.

14. Jelãlokjen kin kajur eo an Christ ñõn kejerkakbije ro remij emaroñ kamakit kij ñõn kõmmõn ta?

¹⁴ Ñe juõn armij ej kiki im ettoñ, ejjelok men ej ememeji. Eindreinlok ibben ro remij. Ejjelok air iñjake ñõn jidrik. Ejako air bed im mour. Ak, ilo ien ejejjet an Anij, ri mij ro me Anij enaj binmouri renaj jerkak ñõn mour. (John 5:28) Emol jelãlokjen in en kar kamakit kij ñõn ad kabuñburuen Anij. Elañe jej eindrein, meñe jenaj mij, Anij enaj kememej kij im kejeblak kij ñõn mour.​—1 Tessalonika 4:13, 14.

[Pija eo ilo peij 76]

ADAM​—kar kõmmõne jen bũñalñal . . . ear jeblak ñõn bũñalñal

[Pija eo ilo peij 78]

Kar ewi wãwen Lazarus mokta jen an Jesus kejerkak e?