Naan in Ijjino ko ñan Jerbal in Kwal̦o̦k Naan

Ewi wãween jemaroñ jel̦ã kilen jino bwebwenato ko ippãn armej ilo jerbal in kwal̦o̦k naan? Ewõr jilu men ko jej aikuj keememej: (1) Ennaan eo eaorõktata me jej aikuj im kwal̦o̦k kake ej nuuj eo em̦m̦an kõn aelõñ eo. (Matu 24:14) Ñe jej bwebwenato ippãn armej, jej aikuj im keememej bwe el̦ap an armej aikuji nuuj in. Jej aikuj im jipañ er bwe ren kile aorõkin nuuj in ilo mour ko aer. (2) Ãinwõt kar Jijej, jej aikuj in kwal̦o̦k yokwe eo ad ñan armej bwe jen maroñ tõpar bũrueer. (Mark 6:34) Ewi wãween jemaroñ kwal̦o̦k yokwe eo ad ñan armej? Jej aikuj ettõñdikdik ñan er im kõnono ilo jouj. Jej aikuj im pojak in roñjake ñe rej kõnono im uwaake er ekkar ñan men eo rej kõnono kake. Jemaroñ bar kajerbale kajjitõk ko ñan turi bũrueer bwe jen maroñ jel̦ã ta kobban bũrueer. 1 Korint 9:19-23 ej kwal̦o̦k bwe Paul ear jel̦ã ukoktak ekkar ñan aikuj ko an armej ilo wãween an kar kwal̦o̦k nuuj eo em̦m̦an ñan er. (3) Ilo jet jikin ko ipel̦aakin lal̦ in, ñe kwõj kepaake juon armej ilo m̦oko im̦wier ewõr jet m̦anit ko kwõj aikuj l̦oori. Ak ilo jikin ko jet, ejjab ãindein kõnke kwõmaroñ baj jino wõt am bwebwenato ippãer.—Lale Luk 10:5.