Katak 4

Jesus Christ Key Eo Ñan Jel̃ãlokjen Eo Kin Anij

1, 2. Ewi wãwen an kar kabuñ ko an lal ukõte key eo ñan jelãlokjen eo kin Anij?

KWOJ jutak ilo kejam eo, im tolũmi key ko am. Emolo im emarok, im kwokõnan mõkaj in deloñ​—ak key eo ejjab jerbal. Lak lale einwõt ejimwe key eo, ak ejjab maroñ kabellok lock eo. Kwoj inebata! Kwo bar kalimjeke key ko am. Ejimwe ke key eo? Ewõr ke en im ear kokkure key eo?

² Enañin wãwen dein an kabuñ ko an lal in bwokwoj jelãlokjen eo kin Anij. Ilo mol, elõñ rar ukõt key eo ñan kabellok melele ko ralikar kin​—Jesus Christ. Jet kabuñ ko rar jolok key eo, im kajekdon Jesus. Ko jet rar ukõt lajrak eo an Jesus, im kabuñ ñan e einwõt Anij Laplap. Inem jekdon ta, enaj kiilek jelãlokjen kin Anij ñan kij elañe ejelok melele ejejjet kin e in im ebuñbuñ, Jesus Christ.

3. Etke jemaroñ ba bwe Jesus ej key eo ñan jelãlokjen eo kin Anij?

³ Kwomaroñ ememej an kar Jesus ba: “Im men in mour in drio, bwe ren jela Kwe juõn wõt Anij emol, im Jisõs Kraist, eo Kw’ar jilkintok.” (Jon 17:3) Ilo an ba menin, Jesus ear jab kemjãje. Jeje ko ekkã air eliji aikwij eo kin jelãlokjen eo ejejjet kin Christ. (Dri Epesõs 4:13; Dri Kolosse 2:2; 2 Piter 1:8; 2:20) “Ro dri kanan otemjej r’ar kennan kin E [Jesus Christ],” ri jilek Peter ear kile. (Jerbal 10:43) Im ri jilek Paul ear je: “Ilo E [Jesus] re nojõk men in aurõk ko otemjej an meletlet im jelalokjen.” (Dri Kolosse 2:3) Paul ear bar ba bwe aolep kallimur ko an Jehovah rar mol ikijen Jesus. (2 Dri Korint 1:20) Kin menin Jesus Christ ej lukkun key eo ñan jelãlokjen eo kin Anij. Jelãlokjen eo ad kin Jesus ej aikwij mol wõt im jab kakobaik melele ko rebwid kin kadkadin im ijo kunan ilo karõk eo an Anij. Ak etke ri kalor ro an Jesus rej watõk e jeban eo ilo karõk ko an Anij?

MESSIAH EO KAR KALLIMUR KAKE

4, 5. Ta kejatdikdik ko im rar wawa ion Messiah eo, im ewi wãwen ri kalor ro an rar lemnak kin e?

⁴ Jen ran ko an ri tõmak eo Abel, ri karejaran Jehovah rar kijoror im reimanlok ñan Ine eo Jehovah Anij make ear kanan kake. (Jenesis 3:15; 4:1-8; Dri Hibru 11:4) Emwij kalikar bwe Ine eo enaj kõtõbrak karõk ko an Anij einwõt Messiah eo, melelen “Eo Emwij Kabiti.” Enaj “kajemlok jerawiwi,” im aibujuij in Ailiñ eo an kar kanan kake ilo sam ko. (Daniel 9:24-26, New World Translation; Sam 72:1-20) Wõn naj Messiah eo?

⁵ Lemnak kin iruj eo an juõn likao Ri Jew etan Andrew ke ear roñjake nan ko an Jesus ri Nazareth eo. Andrew ear mõkajlok ñan ibben leo jein, Simon Peter im jiroñ e: “Kim ar lo Messaia [eo].” (Jon 1:41) Ri kalor ro an Jesus rar lukkun tõmak bwe e Messiah eo kar kallimur kake. (Matu 16:16) Im Christian ro remol rar mõnõnõ in mij kin tõmak eo air bwe emol Jesus ear Messiah eo kar kanan kake, ak Christ. Ta menin kamol ko kar ibbeir? Jen etale jilu lajrak in kein kamol ko.

KEIN KAMOL BWE JESUS KAR MESSIAH EO

6. (a) Menmenbwij eo an wõn en kar kwalok Inen kallimur eo, im ewi wãwen ad jelã bwe Jesus ear itok ikijen lajrak in family in? (b) Etke jabdewõt eo im ear mour elikin 70 C.E. eban maroñ in kamol bwe ej Messiah eo?

⁶ Menmenbwij eo an Jesus ej likit bedbed eo moktata ñan kile e einwõt Messiah eo kar kallimur kake. Jehovah ear jiroñ ri karejaran Abraham bwe Ine in kallimur eo enaj walok jen family eo an. Isaac nejin Abraham, Jacob nejin Isaac, im Judah nejin Jacob, kajjojo iair ear bõk ejja kallimur in wõt. (Jenesis 22:18; 26:2-5; 28:12-15; 49:10) Lajrakin bwij eo ilo lain eo an Messiah eo kar alikarlok elõñ buki yiõ ko tokelik ke ar jiroñ King David bwe E naj waloktok jen bwij eo an. (Sam 132:11; Aiseia 11:1, 10) Gospel ko in Matthew im Luke rej kamol bwe Jesus ear itok ikijen lajrak in family in. (Matu 1:1-16; Luk 3:23-38) Meñe ear lõñ ri kijirãt ro an Jesus, ejelok juõn iair im ear aitwerõke menmenbwij eo an im elukkun alikar. (Matu 21:9, 15) Inem, menmenbwij eo an ejelok en emaroñ in jumae. Bõtab, lokbook in family ko an Ri Jew ro rar jorrãn ke Ri Rome rar nitbwili Jerusalem ilo 70 C.E. Ilo ien ko tokelik, ejelok juõn emaroñ kar kamol bwe e eo ej Messiah eo kar kallimur kake.

7. (a) Ta lajrak eo kein karuo in kamol bwe Jesus kar Messiah eo? (b) Ewi wãwen an kar Micah 5:2 jejjet kitien ibben Jesus?

⁷ Kanan ko rejejjet kitieir ej lajrak eo kein karuo in kamol eo. Elõñ kanan ko ilo Jeje ko in Hebrew rej kalikar elõñ wãwen ko kin mour eo an Messiah eo. Ilo century eo kein ka ralitõk buki B.C.E., ri kanan eo Micah ear kanan bwe iroij in elap enaj lotak ilo juõn bukwon edik etan Bethlehem. Kar wõr ruo bukwon ko ilo Israel etan Bethlehem, ak kanan in ear kalikar ewi iair: Bethlehem Ephrathah, ijo King David ear lotak ie. (Micah 5:2, NW) Jemen im jinen Jesus, Joseph im Mary, rar jokwe ilo Nazareth, enañin 90 mile ko itueañin Bethlehem. Bõtab, ke Mary ear bõroru, iroij in Rome etan Caesar Augustus ear kibel aolep bwe ren register ilo bukwon ko air.a Inem Joseph ear aikwij bõklok lio belen ebõroru ñan Bethlehem, ijo Jesus ear lotak ie.​—Luk 2:1-7.

8. (a) Ñããt im kin ta eo “week ko” 69 rar ijjino? (b) Kar ewi aetokin “week ko” 69, im ta ear walok ke rar jemlok?

⁸ Ilo century eo kein ka jiljino B.C.E., ri kanan eo Daniel ear kanan bwe “Messiah ri Tel eo” enaj walok 69 “week ko” elikin an walok kien eo ñan jeblak im bar kalek Jerusalem. (Daniel 9:24, 25, NW) “Week ko” kein kajjojo kar jiljilimjuõn yiõ ko.b Ekkar ñan bwebwenato jen Bible eo im lal in, kien eo ñan bar kaleke Jerusalem kar ijjino ilo 455 B.C.E. (Nihimaia 2:1-8) Inem Messiah eo en kar walok 483 (69 alen 7) yiõ ko elikin 455 B.C.E. Melele in ej bõktok kij ñan yiõ eo 29 C.E., ejja yiõ eo wõt Jehovah ear kabit Jesus kin jitõb kwojarjar. Ilo wãwen in Jesus ear erom “Christ” (melelen “Eo Emwij Kabiti”), ak Messiah.​—Luk 3:15, 16, 21, 22.

9. (a) Ewi wãwen an kar jejjet kitien Sam 2:2? (b) Ta kanan ko jet im rar jejjet ibben Jesus? (Lale lajrak eo ilo page in tok juõn.)

⁹ Ealikar, ejjab aolep rar bõk Jesus einwõt Messiah eo kar kallimur kake, im Jeje ko kar kanan kake. Einwõt emwij je ilo Sam 2:2, King David kin jitõb kwojarjar ear kanan: “Kiñ ro i lõl rej mõke kajutõk ir; iroij ro rej jimor bebe nae Jeova im nae Dri kabit eo An.” Kanan in ear bõkmantak melele kin wãwen ri tel ro jen elõñlok jen juõn ailiñ renaj kuktok im jimor jumae Ri Kabit eo an Jehovah, ak Messiah. Im kar eindein an walok. Ri tel in kabuñ an Ri Jew ro, King Herod, im komja in Rome etan Pontius Pilate rar aolep bõk kunair in mõn Jesus. Ro rekin dike don, Herod im Pilate rar jimjeran don jen ien in im manlok. (Matu 27:1, 2; Luk 23:10-12; Jerbal 4:25-28) Kin kein kamol ko jet bwe Jesus kar Messiah eo, joij im lale chart eo etan “Jet Ian Kanan ko Relap kin Messiah eo.”

10. Ilo wãwen et ko Jehovah ear kamol bwe Jesus kar Ri Kabit eo an eo emwij kallimur kake?

¹⁰ Nan in kennan eo an Jehovah Anij ej lajrak eo kein kajilu ñan rejetake Jesus einwõt Messiah eo. Jehovah ear jilkinlok enjel ro ñan kejelãik armij ro bwe Jesus kar Messiah eo emwij kallimur kake. (Luk 2:10-14) Ilo mol, ilo ien eo Jesus ear mour ilal, Jehovah make ear kennan jen lañ, im kwalok an buñburuen kake Jesus. (Matu 3:16, 17; 17:1-5) Jehovah Anij ear lelok ñan Jesus kajur eo ñan kõmman menin bwilõñ ko. Kajjojo iair kar kamolelok wõt bwe Jesus kar Messiah eo, bwe Anij eban kar lelok kajur ñan kõmman menin bwilõñ ko ñan juõn Messiah wan. Jehovah ear bar kajerbal jitõb kwojarjar eo an ñan kakõrmole bwebwenato in Gospel ko. Inem, kein kamol bwe Jesus kar Messiah eo ear erom mõttan Bible, ukok in book eo ej make wõt lap an jededlok ilo bwebwenato.​—Jon 4:25, 26.

11. Ewi joñan menin kamol ko bwe Jesus kar Messiah eo?

¹¹ Aolep kein kamol kein rej bar kakobaik elõñ buki kein kamol ko jet im rej kalikar Jesus einwõt Messiah eo kar kallimur kake. Inem, ealikar, ejimwe an Christian ro remol watõke einwõt ‘[eo] ro dri kanan otemjej r’ar kennan kin E’ im key eo ñan jelãlokjen eo kin Anij. (Jerbal 10:43) Ak ebar wõr men ko jet ñan katak kin Jesus Christ ijellokin mol eo bwe e eo kar Messiah eo. Mour eo an ear ijjino jen ia? Kar kain armij rot e?

BED EO AN JESUS MOKTA JEN AN BÕK MOUR IN ARMIJ

12, 13. (a) Ewi wãwen ad jelã bwe Jesus ear mour ilañ mokta jen an itok ñan lal in? (b) Wõn ej “Nan eo,” im ta eo ear kõmmane mokta jen an kar erom juõn armij?

¹² Jemaroñ ajeje mour eo an Jesus ilo jilu mõttan ko. Eo kein kajuõn kar ijjino moktalok jen ien an lotak ion lal. Micah 5:2 (NW) ear ba bwe jinoin Messiah eo kar “jen ien ko mokta, jen ran ko rejjab alikar.” Im Jesus ear ba ilo alikar bwe ear itok jen “ijoko ilañ,” einwõt ba, jen lañ. (John 8:23, NW; 16:28) Ewi toan an kar bed im mour ilañ mokta jen an itok ñan lal in?

¹³ Kar naetan Jesus “juõn wõt Nejin E ar keutak” kinke Jehovah make ear kõmanmane. (Jon 3:16) Ke e eo kar “lotak mokta jen men in kõmõnmõn otemjej,” Anij ear kajerbal Jesus ñan kõmanman men ko jet. Dri Kolosse 1:15; Reveles̃õn 3:14) John 1:1 ear ba bwe “Nan eo” (Jesus ke ear bed mokta jen an bõk mour in armij) kar bed ibben Anij “ilo jinoin.” Inem Nan eo kar bed ibben Jehovah ke kar kõmanman “lõñ im lõl.” Anij ear kennan ñan Nan eo ke Ear ba: “Jen kõmõnmõn armij ilo wãwer im einwõt Kij.” (Jenesis 1:1, 26) Ilo ejja wãwen in, Nan eo kar “dri mejerik” ejitenburu an Anij, im kar kamelele kake ilo Jabõn Kennan Ko 8:22-31 einwõt juõn armij im etan meletlet, eo im ear jerbal iturin Jehovah ilo an kõmanman men otemjej. Elikin an Jehovah kõmanman e, Nan eo ear bed ibben Anij ilañ iumin juõn ien eaetok mokta jen an kar erom juõn emaan ion lal.

14. Etke kar ba bwe Jesus ej “ilo nememen Anij eo je ban lo E”?

¹⁴ Unin jeban bwilõñ ke Dri Kolosse 1:15 ej ba bwe Jesus ej “eo ej ilo nememen Anij eo je ban lo E”! Iumin yiõ ko relõñ in airro ebake don, kin kiblie eo an Nejin, ear einwõt Jemen, Jehovah. Eñin bar un eo juõn bwe Jesus einwõt key eo ñan jelãlokjen eo ej letok-mour kin Anij. Men otemjej Jesus ear kõmmane ke ear bed ion lal kar ejja men eo wõt Jehovah en kar kõmmane. Kin menin, ad bõk jelã kin Jesus ej bar melelen kalaplok ad jelãlokjen kin Jehovah. (Jon 8:28; 14:8-10) Inem, ealikar, elap tokjen ñan kalaplok ad katak kin Jesus Christ.

IALIN MOUR EO AN JESUS ION LAL

15. Ewi wãwen an kar Jesus lotak einwõt juõn niñniñ ewãppen?

¹⁵ Ialin mour eo an Jesus kein karuo kar ijin ilal. Ear mõnõnõ in kõtlok bwe Anij en ukõt mour eo an jen lañ ñan lojen Mary, juõn virgin Ri Jew im etiljek. Jitõb kwojarjar ekajur an Jehovah, ak kajur eo ej jerbal, ‘ear kalur’ Mary, bwe en bõroru im lokin jet ien kalotak juõn niñniñ ewãppen. (Luk 1:34, 35) Jesus ear jab jolet mour ejjab wãppen, ke mour eo an ear walok jen Eo ewãppen. Ear rittolok ilo mweo ewõr ettã buru ie einwõt ri kakajiriri nejin Joseph carpenter eo im ej manje ian ajiri ro jet ilo family eo.​—Aiseia 7:14; Matu 1:22, 23; Mark 6:3.

16, 17. (a) Jen ia Jesus ear bõk an kajur ñan kõmman menin bwilõñ ko, im kar ta jet iair? (b) Ta jet ian kadkad ko Jesus ear kwaloki?

¹⁶ Buru eo emũlal an Jesus ñan Jehovah Anij kar alikar ke ear 12 yiõ dettan. (Luk 2:41-49) Elikin an rittolok im jino kwalok nan ke ear 30 yiõ dettan, Jesus ear bar kalikar an yokwe armij ro mõttan. Ke jitõb kwojarjar eo an Anij ear kamaroñ e ñan kõmman menin bwilõñ ko, ilo yokwe ear kemour ro rar nañinmij, ro rajkup, ro rejibikbik, ro rebilo, ro rejaroñroñ im ro ri leper. (Matu 8:2-4; 15:30) Jesus ear najidik thousand ro rar kwuli. (Matu 15:35-38) Ear kalur lañin kõto eo ear iten kokkure jokane eo an ro jeran. (Mark 4:37-39) Ilo mol, ear bareinwõt kajerkakbijeik ro remij. (Jon 11:43, 44) Menin kabwilõñlõñ kein emwij kamole ilo bwebwenato. Bar ro ri kijirãte Jesus rar kwalok bwe ear ‘kõmman elõñ kakõlle ko.’​—Jon 11:47, 48.

¹⁷ Jesus ear itoitak ilujen enen kabijuknen, im katakin armij ro kin ailiñ in Anij. (Matu 4:17) Ear bar likit juõn joñok e aibujuij kin meanwõd im kõmmanwa. Meñe ri kaloran rar likjap ibben, ear kamelele ilo joij: “An e kõnan, a kõniek emõjino.” (Mark 14:37, 38) Bõtab, Jesus ear beran im mol ñan ro im rar dike mol eo im rar jibed ro remõjno. (Matu 23:27-33) Ilañin men otemjej, ear wãppen ilo an kajeoñe joñok eo an Jemen kin yokwe. Jesus ear bar mõnõnõ in mij bwe armij ri jab wãppen ren bõk juõn kejatdikdik emõn kin ran ko rej itok. Inem, ejimwe, ad maroñ kennan kin Jesus einwõt key eo kin jelãlokjen eo an Anij! Aet, e ej key eo emour! Ak etke jej ba key eo emour? Jen etale ialin mour eo an kein kajilu.

JESUS RAININ

18. En ewi wãwen ad pijaiklok Jesus Christ rainin?

¹⁸ Meñe Bible eo ej kamelele kin mij eo an Jesus, kiõ emour! Ilo mol, buki armij ro im rar mour ilo century eo kein kajuõn C.E. rar ri kamol kin mejeir kin an kar jerkakbiji. (1 Dri Korint 15:3-8) Einwõt kar kanan kake, elikinlok ear jijet ianbijmaroñin Jemen im kõttar ien ñan bõk kajur in king ilañ. (Sam 110:1; Dri Hibru 10:12, 13) Inem en ewi wãwen ad pijaiklok Jesus rainin? Jen watõk e ke einwõt juõn niñniñ eo ejelok an maroñ ilo juõn manger? Ak einwõt juõn emaan eo ej eñtan im ebojak ñan mij? Jaab. E ej juõn King ekajur, emwij an jino iroij! Im ejjabto jen kiõ, enaj kalikar maroñ eo an ion lal in ad elap bwok ie.

19. Ta eo Jesus enaj kõmmane ilo ran ko rej itok im rebak?

¹⁹ Ilo Reveles̃õn 19:11-15, ej kamelele ilo alikar wãwen King eo Jesus Christ enaj itok kin kajur elap ñan kokkure ro renana. Ewi joñan an Iroij in im elap yokwe ibben kijoror in kajemlok eñtan ko me ej jelet elõñ million rainin! Im ebar kijoror in jibañ ro im rej kate in anõke joñok e wãppen eo an ke ear bed ion lal. (1 Piter 2:21) Ekõnan jibañ rein bwe ren joor jen “tõrinae im ran elap, ran in Anij ekajur otem kajur,” im ekkã air naetan Armageddon, bwe ren mour indio einwõt ro don ilal iumin Ailiñ in Anij ilañ.​—Reveles̃õn 7:9, 14; 16:14, 16.

²⁰ Iumin Thousand yiõ in an Jesus Iroij in ainemõn, enaj kõmman menin bwilõñ ko kin armij ro otemjej. (Aiseia 9:6, 7; 11:1-10; Reveles̃õn 20:6) Jesus enaj kemour nañinmij ko otemjej im enaj kajemlok mij. Enaj kajerkakbiji elõñ billion ro bwe ren maroñ bõk mour indio ion lal bareinwõt. (Jon 5:28, 29) Ilo katak kein tok kwonaj mõnõnõ in bõk katak ko jet kin Ailiñ in Messiah eo. Kwon jelã menin: Je ban anlokelok joñan emõnin mour ko ad iumin kien Ailiñ eo. Elap tokjen ad kõtõbar melele ko remõnlok kin Jesus Christ! Aet, lale bwe jen jab meloklok Jesus, key eo emour ñan bõk jelãlokjen eo kin Anij eo ej tel ñan mour indio.

[Kõmel̦el̦e ko itulal̦]

ETALE JELÃLOKJEN EO AM

Ewi wãwen menmenbwij eo an Jesus ear rejetake an ba bwe ej Messiah eo?

Ta jet ian kanan ko kin Messiah im rar jejjet kitieir ibben Jesus?

Ewi wãwen an Anij make kalikar bwe Jesus kar Ri Kabit Eo an?

Etke Jesus ej key eo emour ñan jelãlokjen eo kin Anij?

20. Ta men ko Jesus enaj kõmmani ñan armij iumin ien an Iroij kin Thousand Yiõ?

[Jaat ilo peij 37]

JET IAN KANAN KO RELAP KIN MESSIAH EO

KANAN EO TA EAR WALOK AN JEJJET KITIEN

Mour Eo An Ke Ear Dik

Aiseia 7:14 Lotak jen juõn virgin Matu 1:18-23

Jeremiah 31:15 Kar mõn ajiri ro elikin Matu 2:16-18

an lotak

Jerbal In Kwalok Nan Eo An

Aiseia 61:1, 2 Ear bõk jerbal eo an jen Anij Luk 4:18-21

Aiseia 9:1, 2 Jerbal in kwalok nan ear Matu 4:13-16

kõmman bwe armij ro ren lo

juõn meram elap

Sam 69:9 Kijejeto elap kin Imõn Jehovah Jon 2:13-17

Aiseia 53:1 Rar jab tõmak e Jon 12:37, 38

Zechariah 9:9; Ear deloñ ilo Jerusalem ion Matu 21:1-9

Sam 118:26 juõn kon in ass; lamõj ñan

karuwaineneik e einwõt king

im eo ej itok ilo etan Jehovah

Ketak Im Mij Eo An

Sam 41:9; 109:8 Ri jilek eo ear jab tiljek; Jerbal 1:15-20

ear ketake Jesus im bar juõn

ear binej jenkwon tokelik

Zechariah 11:12 Rar ketake kin Matu 26:14, 15

30 mõttan silver

Sam 27:12 Rar kajerbal ri kennan Matu 26:59-61

ro re riap nae e

Sam 22:18 Rar dice kin nuknuk ko an Jon 19:23, 24

Aiseia 53:12 Rar bwini e ibben ri Matu 27:38

jerawiwi ro

Sam 22:7, 8 Rar kajirere kake ke ej Mark 15:29-32

iten mij

Sam 69:21 Rar lelok vinegar ñan e Mark 15:23, 36

Aiseia 53:5; Rar wãkare Jon 19:34, 37

Zechariah 12:10

Aiseia 53:9 Rar kalbwine ibben ro ri mweie Matu 27:57-60

Sam 16:8-11, ftn. Ear jerkakbiji mokta jen an Jerbal 2:25-32;

lo kõt 13:34-37

[Pija eo ilo peij 35]

Anij ear lelok ñan Jesus kajur eo bwe en kemour ro rar ñañinmij