Kõmel̦el̦eik Ta in Aelõñ eo an Anij
Baat 1: Ewi wãween ad kajejjet jerbal eo ad ñan kwal̦o̦k kõn Aelõñ eo an Anij? Eokwe, jemaroñ kõm̦m̦an bwe armej ro ren itoklimo in roñjake ilo ad jino bwebwenato ippãer kõn jabdewõt men. Bõtab, mejãnkajjik eo ad ej bwe ilo ad bwebwenato ippãer jen jitõñl̦o̦k ñan Aelõñ eo an Anij.
Men eo el̦ap an aorõk ilo ad kõm̦m̦ane jerbal in ej bwe jen kwal̦o̦ki ak riiti eoon ko jãn Baibõl̦ me rej kõnono kõn Aelõñ eo an Anij. Ñe jej kõnnaan kõn Aelõñ eo, jen lale bwe armej eo jej kõnnaan ippãn en mel̦el̦e ta in Aelõñ eo an Anij. Ijello̦kun ad baj ba bwe Aelõñ eo an Anij ej juon kien, jen lukkuun kõmel̦el̦eiki kõn men in. Jet armej epen aer tõmak bwe emaroñ wõr juon kien me jejjab loe. Kwõmaroñ kõjerbal waanjoñak ko ñan kõmel̦el̦eiki. Ñan waanjoñak, kwõmaroñ ba bwe meñe jejjab loe kõto ak jejel̦ã bwe ej jelõt mour ko ad. Jejjab maroñ lo Eo ear kõm̦m̦an kõto, ak jejel̦ã bwe el̦ap an kajoor. Baibõl̦ ej ba bwe ej “Kiiñ eo Ej mour wõt jãn indeeo ñan indeeo.” (1 Ti. 1:17) Ak bõlen kwõmaroñ ba bwe ilo aelõñ ko rel̦l̦ap, elõñ armej rejjañin etal ñan kiãptõl̦ (capital) eo aer ak iioone irooj ak rũtõl eo aer. Unin aer jel̦ã kõn men kein ej ilo aer kar roñ ak alwõji ilo nuuj ko. Ãindein, em̦õj ukote Baibõl̦ ñan elõñl̦o̦k jãn 2,200 kajin ko im ej kwal̦o̦k ñan kõj kõn Aelõñ eo an Anij. Ej kwal̦o̦k wõn eo kar lel̦o̦k maroñ ñane bwe en tõl Aelõñ eo an Anij im ta eo Aelõñ eo ej kõm̦m̦ane kiiõ. Naan in Keeañ ej bok eo me el̦apl̦o̦k an wal̦o̦k ilo elõñ kajin ko jãn jabdewõt bok ilo lal̦ in. Im unleplep in kar kõm̦m̦ane ej ñan “Keeañ kõn Aelõñ eo an Jeova,” ãinwõt an wal̦o̦k itum̦aanin bok in.
Ñan jipañ armej ro mel̦el̦e kõn ta in Aelõñ eo an Anij, kwõmaroñ kwal̦o̦k kõn jet iaan men ko me rekõn̦aan bwe kien ko ren kõm̦m̦ani ãinwõt: kõm̦m̦an bwe en ejjel̦o̦k jeram̦õl, en wõr aenõm̦m̦an, ejjel̦o̦k m̦anm̦an armej im kowadoñ, ejjel̦o̦k kalijekl̦o̦k kõn an oktak aelõñ ak kil ko kilid, en l̦ap jel̦ãl̦o̦kjen̦, im ejjel̦o̦k nañinmej. Kwal̦o̦k bwe Aelõñ eo wõt an Anij emaroñ kõm̦m̦ani men kein im kabwe aolep aikuj im kõn̦aan ko an armej ro.—Sam 145:16.
Kate eok ñan kareel bũruon armej ro bwe ren kõn̦aan mour ium̦win kien ak Aelõñ eo me Jijej Kũraij ej tõle ãinwõt juon Kiiñ. Jitõñl̦o̦k ñan menin kabwilõñlõñ ko Jijej ekar kõm̦m̦ani me rej kwal̦o̦k jidikin ta ko enaaj lukkuun kõm̦m̦ani ãinwõt juon Kiiñ ilañ. En l̦ap am̦ kwal̦o̦k kõn men ko rem̦m̦an kõn Jijej. (Matu 8:2, 3; 11:28-30, UBS) Kõmel̦el̦e bwe ear mej im aje mour eo an kõn kõj im bwe tokãlik Anij ear kajerkakpejeiki bwe en mour indeeo ilañ. Eñin ijo ej pãd ie im tõl ãinwõt juon Kiiñ.—Jrb. 2:29-35, UBS.
Baat 2: Kwal̦o̦k bwe Aelõñ eo an Anij ej kiiõ tõl ilañ. Keememej bwe enañin aolep armej rejjab kile bwe men ko rej wal̦o̦k ilo lal̦ in rej kam̦ool bwe em̦õj an Aelõñ eo jino an tõl. Kõn men in, kwõn kajjitõk el̦aññe rejel̦ã ta ko Jijej Kũraij ear ba bwe renaaj kakõl̦l̦en an itok ãinwõt juon Kiiñ. Kwal̦o̦k jet iaan men kein me rej pãd ilo Matu 24 jebta, Mark 13 jebta, ak Luk 21 jebta. Innem kajjitõk etke men kein renana renaaj kar wal̦o̦k ilo iien eo Kũraij ej jino an Kiiñ. Im riitil̦o̦k eoon eo ilo Revelesõn 12:7-10, 12.
Kwõmaroñ riitil̦o̦k Matu 24:14 ñan kam̦ool ta eo Aelõñ eo an Anij ej kõm̦m̦ane kiiõ im kwal̦o̦k kõn jerbal in kwal̦o̦k naan im jikuul̦ in katak Baibõl̦ ko rej wal̦o̦k ipel̦aakin lal̦ in. (Ais. 54:13) Karoñ armej ro kõn jikuul̦ in Baibõl̦ ko Ri Kõnnaan ro an Jeova rej bõk tokjãn jãni me aolepeer rej pedped wõt ioon Baibõl̦ im ejjel̦o̦k on̦ãn del̦o̦ñ ilo jikuul̦ kein. Bar kwal̦o̦k bwe ñe jej kwal̦o̦k naan jãn em̦ ñan em̦, jej m̦õn̦õn̦õ in katak Baibõl̦ ippãn kajjojo armej ak ippãn baam̦le ko ilo ejjel̦o̦k on̦ãn. Im jej kõm̦m̦ane men in ilo elõñl̦o̦k jãn 230 aelõñ ko. Ejjel̦o̦k bar juon kien me ej m̦õn̦õn̦õ in kõm̦m̦an jikuul̦ rot in ñan katakin ejjab armej ro wõt an ak aolep armej ro ilo lal̦ in. Kũrtok armej ro ñan kobatok ippãd ilo M̦õn Kweilo̦k eo, ekoba ilo kweilo̦k ko rel̦l̦ap an Ri Kõnnaan ro an Jeova, bwe ren loe wãween an jikuul̦ in katak Baibõl̦ kein jipañ armej ro ilo mour ko aer.—Ais. 2:2-4; 32:1, 17; Jon 13:35.