Jen M̦ool Iien Otemjej

1, 2. Etke Jeova ej m̦õn̦õn̦õ ñe ej loe ad kate kõj bwe jen m̦ool iien otemjej? Jouj im kwal̦o̦k juon waanjoñak.

JEN ba bwe juon kõrã im l̦addik jidikdik eo nejin rej kab diwõjl̦o̦k jãn juon im̦õn wia. Erro ej etetal wõt ak l̦addik eo ekajju bõjrak. L̦addik in elukkuun mijak im kor. Etke? Kõnke ear bõke juon kein iukkure jãn m̦õn wia eo bõtab ear mel̦o̦kl̦o̦k in karo̦o̦le ak kajjitõk ippãn jinen bwe en wiaiki. Kõn an mijak, ej jino jañ. Jinen ej kaenõm̦m̦ane im erro ej jepl̦aak ñan m̦õn wia eo bwe l̦addik eo en karo̦o̦ll̦o̦k kein iukkure eo im jol̦o̦k an bõd. Ke l̦addik eo ej kõm̦m̦ane men in, jinen elukkuun m̦õn̦õn̦õ im utiej bũruon kake. Etke?

² Aolep iien rũtto ro rej lukkuun m̦õn̦õn̦õ ñe rej loe bwe ajri ro nejier rej katak im jel̦ã aorõkin aer aikuj m̦ool iien otemjej. Jemedwõj ilañ ej bar m̦õn̦õn̦õ ñe jej ãindein. Baibõl̦ ej ba bwe Jeova ej “Anij in m̦ool.” (Sam 31:5) Anij ej make kile ñe ej epaakl̦o̦k kõtaan eo ad ippãn. Im el̦ap an m̦õn̦õn̦õ ñe ej lo bwe jej kate kõj ñan m̦ool iien otemjej. Jekõn̦aan kam̦õn̦õn̦õik Anij im jebar kõn̦aan pãd wõt ilo yokwe eo an. Kõn men in, jej errã ilo naan ko an Paul ke ear ba: “Kõm kõn̦aan kõm̦m̦ani men ko rejim̦we iien otemjej.” (Hibru 13:18, UBS) Jen kiiõ etale emãn wãween ko me jet iien emaroñ pen ad kwal̦o̦k m̦ool ie. Innem, jenaaj bar etale jeraam̦m̦an ko rej wal̦o̦k ñe jej kate kõj bwe jen m̦ool ilo wãween kein.

JEN M̦OOL ÑAN KÕJ MAKE

3, 4. Ewi wãween an Naan in Anij kakkõl kõj bwe jen jab m̦on̦e kõj make?

³ Men eo m̦oktata me jenaaj etale ej kõn aorõkin ad aikuj m̦ool ñan kõj make. Kõnke jejjab weeppãn, epidodo ad m̦on̦e kõj make. Ñan waanjoñak, Jijej ear jiroñ Kũrjin ro ilo Leodisia bwe el̦ap aer m̦on̦e er make im ba bwe rem̦weiie ak em̦m̦an kõtaan eo aer ippãn Anij, bõtab ilo m̦ool rej “jeram̦õl, im pilo im keelwaan.” (Revelesõn 3:17) Kõn aer kar m̦on̦e er make, rar kõm̦m̦an bwe en nanal̦o̦k wãween pãd eo aer.

⁴ Rijjelõk Jemes ear kakkõl kõj im ba: “Ewõr ke en̦ ej l̦õmn̦ak bwe e ri tõmak? El̦aññe ejjab kõjparok loõn, ejjel̦o̦k tokjãn tõmak eo an, im ej make m̦on̦e.” (Jemes 1:26, UBS) El̦aññe jej l̦õmn̦ak bwe jemaroñ wõnm̦aanl̦o̦k wõt im karejar ñan Jeova meñe jej kõjerbale loõd ilo wãween ko rejjab jim̦we, eokwe jej m̦on̦e bũruod make. Ñe jejjab kõjparok loõd ak wãween ad kõnnaan, Jeova eban m̦õn̦õn̦õ ñan jidik kõn jabdewõt jerbal ko me jej kõm̦m̦ani ñan e. Ta eo emaroñ jipañ kõj bwe jen jab ãindein?

5. Ta ko remaroñ jipañ kõj bwe jen m̦ool ñan kõj make?

⁵ Jemes ear bar ba bwe Naan in Anij ej ãinwõt juon kilaaj ak kapjer. Ej rõjañ kõj ñan kõjerbale Baibõl̦ eo ãinwõt juon kilaaj bwe jen maroñ lo likjab ko ippãd. Ãlikin ad loe likjab kein, jej kate kõj im kõm̦m̦an oktak ko ilo mour ko ad. (Jemes 1:23-25, UBS) Baibõl̦ emaroñ jipañ kõj bwe jen m̦ool ñan kõj make im kile ta oktak ko jej aikuj kõm̦m̦ani. (Liaajlo̦l̦ 3:40, UBS; Haggeai 1:5) Jemaroñ bar jar ñan Jeova im kajjitõk bwe en etale bũruod im jipañ kõj ñan kile likjab ko ad bwe jen maroñ kajim̦weik kõj make. (Sam 139:23, 24) Riab im etao relukkuun nana. Ñe juon armej ej riab ak etao, emaroñ pen an make kile ke ej kõm̦m̦ani men kein. Eñin unin jej aikuj bõk l̦õmn̦ak ko an Jemedwõj ilañ kõn men kein renana. Ta l̦õmn̦ak eo an Jeova kõn men kein? Bok in Sam 5:6 (UBS) ej ba: “Kwõj to̦rl̦o̦kboke ri riab otemjej, im kwõj kõjdate ro rellãj im rejel̦ã m̦on̦.” Jeova emaroñ jipañ kõj bwe jen jim̦we im m̦ool ãinwõt e. Emaroñ bar jipañ kõj bwe jen make etale kõm̦m̦an ko ad im lale el̦aññe rejim̦we im m̦ool ekkar ñan l̦õmn̦ak ko an. Keememej bwe Paul ear ba: “Kõm kõn̦aan kõm̦m̦ani men ko rejim̦we.” Meñe jej likjab im jejjab maroñ weeppãn kiiõ, bõtab jej kate wõt kõj kõnke jekõn̦aan m̦ool iien otemjej.

JEN M̦OOL ÑAN EO PÃLEED IM AJRI RO NEJID

6. (1) Etke ri pãlele ro rej aikuj m̦ool ñan doon? (2) Ta m̦anit ko rekauwõtata me ri pãlele ro rej aikuj kõjparok er jãni?

⁶ L̦eo, lio, im ajri ro rej aikuj m̦ool ñan doon. Eñin ej juon iaan kakõl̦l̦e ko raorõktata kakõl̦l̦en baam̦le ko me rej kabuñ ñan Anij. Kõn men in, l̦eo im lio rej aikuj m̦ool im kwal̦o̦k bũrueerro ñan doon. Kũrjin ro me ewõr pãleer rejjab kõm̦m̦ani men ko me remaroñ ko̦kkure pãd eo aer. Ñan waanjoñak, rejjab kattoojoj ippãn ro me ejjab pãleer. Rejjab bwebwenato ippãn armej ro ilo Internet im n̦ooje jãn eo pãleer. Bareinwõt, rejjab alwõji pija ko renana im rettoon ilo Internet, tipi im ilo bok ko. Jet Kũrjin ro me em̦õj aer m̦are rar kõm̦m̦ani men kein renana im n̦ooje jãn eo pãleer. Men in ej kwal̦o̦k joñan aer riab im etao. Kiiñ Devid ear ba: “Ijjab jijet ippãn armej ri riab, im ijamin etal ippãn ro ri jel̦ã m̦on̦.” (Sam 26:4) Ñe kwõj juon ri pãlele, kwõn jab kõm̦m̦ani m̦anit ko me remaroñ kõm̦m̦an menin am̦ riab im jujen n̦ooji m̦akũtkũt ko am̦ jãn eo pãleem̦.

7, 8. Ta bwebwenato ko jãn Baibõl̦ me remaroñ jipañ ajri ro kile aorõkin aer aikuj m̦ool iien otemjej?

⁷ Ñe rũtto ro rej katakin ro nejier kõn aorõkin aer aikuj m̦ool iien otemjej, em̦m̦an ñe rej kõjerbal bwebwenato ko ilo Baibõl̦. Remaroñ kwal̦o̦k jet bwebwenato ko kõn armej ro me rar jab m̦ool. Ñan waanjoñak, Ekan ear ko̦o̦t im ear kajjioñ n̦ooji men ko ear ko̦o̦ti. Gihezai ear riab kõn an arõk m̦weiuk. Im Judas ear bar ko̦o̦t im tokãlik riab bwe armej ro ren maroñ m̦ane Jijej.​—Joshua 6:17-​19; 7:11-​25; 2 Kiiñ 5:14-​16, 20-​27; Matu 26:14, 15; Jon 12:6.

⁸ Ebar wõr bwebwenato ko ilo Baibõl̦ kõn armej ro me rar m̦ool. Ñan waanjoñak, Jekõb ear rõjañ l̦õm̦aro nejin bwe ren kajepl̦aak jããn ko rar loi ilo iep ko aer kõnke ear l̦õmn̦ak ewõr kar likjab in jerbal. Ebar em̦m̦an bwebwenato eo kõn Jepta im leddik eo nejin. Jiroñ in ear kaorõk kallim̦ur eo an jemen ñan Anij meñe ear lukkuun pen ñan e. Jijej ear bar kwal̦o̦k m̦ool. Juon iien, ear kwal̦o̦k e make ñan juon jarin armej ro rellãj bwe en maroñ kajejjet juon kanaan im kõjparok ro jeran. (Jenesis 43:12; Ri Ekajet 11:30-​40; Jon 18:3-​11) Erkein ej jet iaan bwebwenato ko jãn Baibõl̦ eo me rũtto ro remaroñ kõjerbali ñan katakin ro nejier bwe ren m̦ool iien otemjej.

9. (1) El̦aññe rũtto ro rekõn̦aan kõm̦m̦ane juon joñak em̦m̦an ñan ro nejier, ta eo rũtto rein rej aikuj kõjparok er jãne? (2) Etke elukkuun aorõk bwe rũtto ro ren kõm̦m̦ane juon joñak em̦m̦an ñan ajri ro nejier?

⁹ Bwebwenato kein remaroñ jipañ ajri ro. Bõtab, rũtto ro rej aikuj bar l̦oore men kein me rej katakin ajri rein nejier. Rijjelõk Paul ear kajjitõk im ba: “Kwe eo kwõj katakin bar juon, kwõjjab make katakin eok ke? Kwe eo kwõj kwal̦o̦k [bwe] ren jab ko̦o̦t, kwõj ko̦o̦t ke?” (Rom 2:21) Jet ajri ro rej pok kõn wãween an rũtto ro katakin er. Rũtto rein rej ba ñan er bwe enana riab, ak er make rej riab im etao. Ñe rej ko̦o̦t men dikdik ko jãn jikin jerbal ko aer, ekkã aer jekpen im ba ñan ajri ro nejier, “Jab inepata, rejel̦ã bwe armej ro renaaj bõki men kein.” Im ñe rej riab, ekkã aer ba, “Ejjel̦o̦k jorrããn ilo men in bwe jidik wõt ad riab.” Bõtab, mel̦el̦e kein relukkuun bõd. Etke? Kõnke enana riab, jekdo̦o̦n ñe el̦ap ak elukkuun dik. Im ebar nana ko̦o̦t, jekdo̦o̦n ñe el̦ap ak elukkuun dik men eo.a (Luk 16:10) Em̦õkaj an ajri ro make kile ñe jineer ak jemãer rej riab im etao. Im ñe ajri rein renaaj rũttol̦o̦k, enaaj pidodo aer anõke m̦anit kein renana an jineer im jemãer. (Epesõs 6:4, UBS) Bõtab, ñe rũtto ro rej m̦ool iien otemjej, ajri ro renaaj katak jãn joñak kein aer rem̦m̦an. Im ñe ajri rein renaaj rũttol̦o̦k, renaaj kabuñbũruon Jeova kõn wõt aer naaj m̦ool iien otemjej meñe lal̦ in eobrak kõn armej ro me reriab im retao.​—Jabõn Kõnnaan 22:6, UBS.

JEN M̦OOL ÑAN RO ILO EKLEJIA EO

10. El̦aññe jekõn̦aan m̦ool iien otemjej ñan ri tõmak ro m̦õttad, ta ko jej aikuj kõjparok kõj jãni?

¹⁰ Ñe jej kõm̦m̦ao ippãn ri tõmak ro m̦õttad, jej aikuj kate kõj bwe jen m̦ool iien otemjej. Ãinwõt ad kar etale ilo Katak 12, jej aikuj kõjparok wãween ad kõjerbale menin letok eo an Anij kõn kõnono. Ñe jej pãd ibwiljin ri tõmak ro m̦õttad, elukkuun aorõk bwe jen kõnono ilo m̦ool. Jet iien ñe jej bwebwenato bajjek, jemaroñ jino ad kõnnaan kõn ro jet im ruruwe er. El̦aññe jej ãliji juon bwebwenato ak jejjab jel̦ã el̦aññe em̦ool, eokwe bõlen jej kajeeded juon men eo me eriab. Kõn men in, em̦m̦anl̦o̦k ñe jej dãpij lo̦ñiid im jab ba jabdewõt. (Jabõn Kõnnaan 10:19, UBS) Bõtab, jet iien emaroñ m̦ool bwebwenato eo. Meñe em̦ool bwebwenato eo, ak ejjab mel̦el̦ein bwe jej aikuj ba ñan ro jet. Ñan waanjoñak, bõlen ejjel̦o̦k ad l̦o̦k ilo bwebwenato eo im ejjab juon men me aolep rej aikuj jel̦ã. (1 Tessalonika 4:11, UBS; 1 Piter 4:15) Ñe jet armej rej kajju im kõnnaan, ekkã aer jekpen im ba bwe ejjel̦o̦k jorrããn ilo wãween aer kõnnaan kõnke rej kwal̦o̦k m̦ool. Bõtab, ejjab jim̦we men in kõnke aolep iien jej aikuj kõnnaan ilo jouj.​—Kolosse 4:6.

11. (1) Ñe jet armej rej kõm̦m̦ane juon jerawiwi el̦ap, ilo wãween et ko rej kal̦apl̦o̦k wõt jerawiwi eo? (2) Ta jet iaan mel̦el̦e ko reriab me Setan ekõn̦aan bwe armej ro ren tõmaki ñe rej kõm̦m̦ane juon jerawiwi el̦ap? (3) Ta ko jemaroñ kõm̦m̦ani bwe jen jab po ilo mel̦el̦e kein reriab an Setan?

¹¹ El̦ap an aorõk bwe jen kwal̦o̦k m̦ool ñan em̦m̦aan ro me rej lale eklejia eo. Ñe jet armej rej kõm̦m̦ane juon jerawiwi el̦ap, armej rein rejjab kadikl̦o̦k jerawiwi eo ak rej kal̦apl̦o̦k wõt. Ilo wãween et? Eokwe, rej n̦ooje jerawiwi in aer im rej riab ñan em̦m̦aan rein ñe rej kajjitõk. Kõn wõt aer riab, ewõr kiiõ ruo miañõn mour eo aer. Rej ba bwe rej karejar ñan Jeova bõtab rej wõnm̦aanl̦o̦k wõt im kõm̦m̦ani men ko renana. Kõn men in, aolep men ko me armej in ej kõm̦m̦ani ilo mour eo an rej itok jãn an riab im etao. (Sam 12:2) Ro jet rej kwal̦o̦k wõt jidikin m̦ool eo im n̦ooji mel̦el̦e ko jet jãn em̦m̦aan ro rej lale eklejia eo. (Jerbal 5:1-11) Ekkã an armej rein riab im etao kõn wõt aer bõk l̦õmn̦ak ko rebõd im reriab me rej itok jãn Setan.​—Lale bo̦o̦k eo etan “Mel̦el̦e ko Reriab an Setan kõn Jerawiwi ko Rel̦l̦ap.”

12. Ewi wãween jemaroñ kwal̦o̦k bwe jej m̦ool ilo ad jerbal ippãn doulul eo an Jeova?

¹² Jej aikuj bar m̦ool ilo ad jerbal ippãn doulul eo an Jeova ñe jej kanne peba ko. Ñan waanjoñak, ñe jej kanne ad awa in kwal̦o̦k naan, jen jab riab. Bareinwõt, jen m̦ool ilo ad kanne peba ko el̦aññe jekõn̦aan kal̦apl̦o̦k ijo kun̦aad ilo doulul in. Ñan waanjoñak, ñe jej kanne peba (ak application) ko, ewõr kajjitõk ko kõn ãjmour ko ad im men ko jet. Ej aikuj m̦ool aolepen uwaak ko ad ñan jabdewõt iaan kajjitõk kein.​​—Jabõn Kõnnaan 6:16-​19.

13. Ewi wãween jemaroñ kwal̦o̦k wõt m̦ool ñe jej jerbal ak kõm̦m̦an ad peejnej ippãn ri tõmak ro m̦õttad?

¹³ Jet iien, ri tõmak ro ilo doulul in rej jerbal ak kõm̦m̦an aer peejnej ippãn doon. Ñe ej wal̦o̦k wãween in, ej aikuj m̦ool im jim̦we aer jerbal ippãn doon. Rej aikuj kõjparok bwe jerbal kein ak peejnej kein aer ren jab jelõt aer kabuñ ñan Anij. Ñan waanjoñak, reban kõnnaan kake men kein ñe rej pãd ilo Im̦õn Kweilo̦k eo ak ñe rej kwal̦o̦k naan. Bõlen peejnej ak kom̦bani eo ej an juon iaan ri tõmak ro m̦õttad. Im bõlen ri tõmak in ej kõjerbal ri tõmak ro jet m̦õttan ilo peejnej in an. Ñe jej kõjerbal ri tõmak ro jet m̦õttad, ej aikuj jim̦we im m̦ool wãween ad jerbal ippãer. Jej aikuj lel̦o̦k kõl̦l̦ã ko aer ilo iien eo ekkar im ilo joñan eo me jaar errã ippãn doon kake. Bareinwõt, jenaaj kõm̦m̦ani jabdewõt men ko jet me kien ej kappeik armej ro bwe ren kõm̦m̦ani ñan ri jerbal ro aer. (1 Timote 5:18; Jemes 5:1-4) Ak ta el̦aññe bo̦o̦j eo ad ej juon iaan ri tõmak ro m̦õttad? Eokwe, jej aikuj kajejjet aolep awa ko im jerbal ko ad bwe en jim̦we im ekkar ñan kõl̦l̦ã ko ad. (2 Tessalonika 3:10) Jen jab bõk l̦õmn̦ak in bwe ej aikuj em̦m̦anl̦o̦k an kõm̦m̦an ñan kõj kõnke jej nukwi ilo tõmak. Im jen jab l̦õmn̦ak bwe ri tõmak in m̦õttad enaaj letok raan in kakkije ko, jeraam̦m̦an ko jet, im jabdewõt wãween ko jet me eban kar lil̦o̦ki ñan ri jerbal ro jet.​—Epesõs 6:5-8, UBS.

14. (1) Ñe ri tõmak ro rej peejnej ak jipañ doon ñan l̦oon, ta eo rej aikuj kõm̦m̦ane m̦okta? (2) Etke ej juon men ejim̦we im ekkar bwe ren kõm̦m̦ane men in?

¹⁴ Jet iien ri tõmak ro rej peejnej ippãn doon ak jipañ doon ñan l̦oon. El̦aññe kwõj l̦õmn̦ak in kõm̦m̦ane men in, Baibõl̦ eo ej letok juon naan in kakapilõk ekanooj aorõk. Ta in? Eokwe, kwõn kõm̦m̦ane juon peba im likũti aolep mel̦el̦e ko me komiro kar errã ippãn doon kaki. Ãlikin, komiro en jaini peba eo. Jeremaia ear kõm̦m̦ane men in. Ñan waanjoñak, ke ear wiaik juon wãto, ear kõm̦m̦ane ruo peba kein kam̦ool. Innem, ear bõktok ri kam̦ool ro bwe ren jaini peba kein. El̦ak m̦õj aolep men, ear kakon̦e peba kein m̦ae bar juon iien me enaaj aikuji. (Jeremaia 32:9-​12; bar lale Jenesis 23:16-​20.) Ñe jej peejnej ak kõm̦m̦an ad l̦oon ippãn juon iaan ri tõmak ro m̦õttad, em̦m̦an el̦aññe jej kõm̦m̦an ad peba. Bareinwõt, jen bõktok jet armej bwe ren ri kam̦ool ilo ad jaini peba eo. Ñe jej ãindein, ej ke mel̦el̦ein bwe jejjab yokwe im lõke doon? Ejjab. Peba kein renaaj jipañ bwe en jab wal̦o̦k mel̦el̦e ko rebõd im kõm̦m̦an menin ad illu ippãn doon. Peba kein renaaj bar jipañ kõm̦m̦an bwe en wõr wõt bõrokuk. Ñe ri tõmak ro rej peejnej ippãn doon, rej aikuj keememej bwe eklejia eo ej juon jikin eaenõm̦m̦an im el̦ap bõrokuk ie. Jen jab kõtl̦o̦k bwe ad jerbal im peejnej ippãn doon en ko̦kkure bõrokuk in ad.b​—1 Korint 6:1-8, UBS.

JEN M̦OOL ILO JIKIN JERBAL

15. (1) Ta l̦õmn̦ak eo an Jeova kõn ro me reriab im rekõm̦aak ilo aer peejnej? (2) Ta eo Kũrjin ro renaaj kate er ñan kõm̦m̦ane meñe elõñ armej rej kõm̦m̦ani men ko rebõd?

¹⁵ Kũrjin ro rej m̦ool aolep iien, im ejjab ilo eklejia eo wõt. Paul ear ba: “Kõm kõn̦aan kõm̦m̦ani men ko rejim̦we iien otemjej.” (Hibru 13:18, UBS) Ejim̦we im ekkar bwe jen m̦ool ilo jikin jerbal ko ad im Anij enaaj lukkuun m̦õn̦õn̦õ ñe jej ãindein. Bok in Jabõn Kõnnaan ej lukkuun kaalikkar men in kõnke emãn alen an kwal̦o̦k bwe Anij ej diki kein bo̦un ko reriab. (Jabõn Kõnnaan 11:1; 16:11; 20:10, 23) Ilo iien ko etto, ekkã an armej ro kõjerbal kein bo̦un ko ñe rej peejnej. Rej kõjerbale bo̦un kein ñan lale joñan jããn rej aikuj jol̦o̦k ñan wia m̦õñã, m̦weiuk, im men ko ãierl̦o̦kwõt. Ri wiakake ro me retao rekõn kõjerbale kein bo̦un ko renana bwe ren maroñ ko̦o̦te ro rej wia ippãer. Jeova elukkuun diki jerbal rot in! Bwe jen maroñ pãd wõt ilo yokwe eo an, jenaaj kate kõj bwe jen jab riab im kõm̦aak ñe jej peejnej.

16, 17. (1) Ta wãween ko reriab me ekkã an armej ro ilo lal̦ in kõm̦m̦ani? (2) Ta eo Kũrjin ro rem̦ool em̦õj aer jek ilo bũrueer bwe ren kõm̦m̦ane?

¹⁶ Setan ej irooj in lal̦ in. Eñin unin jejjab bwilõñ bwe elõñ wõt im lõñ armej relukkuun riab im etao ilo lal̦ in. Jej aikuj kate kõj kõnke aolep raan jej iioon wãween kein. Ñe armej ro rej kanne aer peba in jerbal, ekkã aer riab ak kõl̦l̦apl̦ap. Ekkã an bar armej ro riab ñe rej kanne aer peba in eowõj, insurance, peba in jipañ ko jãn kien, peba in aer del̦o̦ñe bar juon aelõñ, ak wãween ko jet. Elõñ ri jikuul̦ ro rej bar ko̦o̦t ñe rej teej ak ñe rej kõm̦m̦an aer ripoot ñan jikuul̦. Ñan waanjoñak, rej bõki mel̦el̦e ko jãn Internet im riab im ba bwe ej aer make. Ejjab men kein wõt ak ebar l̦ap riab im ko̦o̦t ilo kien. Ekkã an armej ro wiaik bũruon ri jerbal ro an kien bwe en maroñ tõprak kõn̦aan ko aer. Meñe ej wal̦o̦k aolep wãween kein, bõtab jejjab bwilõñ. Etke? Kõnke jej mour ilo juon lal̦ me elõñ iaan armej ro rej ‘yokwe er make, ri arõk m̦weiuk, im dike em̦m̦an.’​—2 Timote 3:1-5.

¹⁷ Ro rej m̦ool in Kũrjin rej jek ilo bũrueer bwe ren jab bõk kun̦aaer ak kõm̦m̦ani jabdewõt iaan m̦anit im kõm̦m̦an kein renana. Bõtab, jet iien ebwe an pen men in. Etke? Kõnke el̦ap an armej ro m̦weiie im jeraam̦m̦an meñe enana im eriab wãween aer jerbal. (Sam 73:1-8) Jet iien, ebwe an pen an Kũrjin ro mour kõnke rekõn̦aan wõt bwe en m̦ool im jim̦we kõm̦m̦an ko aer “iien otemjej.” Bõtab, ewõr ke tokjãn aer eñtaan ilo mour in kõn wõt aer jim̦we im m̦ool? Aet! Ta tokjãn ak jeraam̦m̦an kein me rej wal̦o̦k ñan er? Eokwe jen lale.

TOKJÃN AM̦ M̦OOL IIEN OTEMJEJ

18. Ta tokjãn ko remaroñ wal̦o̦k ñe ej em̦m̦an etad kõn ad m̦ool?

¹⁸ Ñe jej m̦ool im armej ro wõj rej lõke kõj, men in ej kaalikkar joñan an em̦m̦an etad. Ilo m̦ool, eñin ej juon iaan men ko raorõktata ilo mour in. (Jouj im lale bo̦o̦k eo etan “Ij Ke M̦ool Iien Otemjej?”) Wõn ro remaroñ kate er bwe en em̦m̦an etaer? Jabdewõt armej. Ñe jekõn̦aan bwe jen m̦ool im armej ro ren lõke kõj, men in ejjab wawa ioon joñan kapeel im jããn ko ad kab joñan ad wũlio ak deo̦. Men in ejjab bar wawa ioon joñan an utiej im buñbuñ baam̦le eo am̦, ak jabdewõt men ko jet me jejjab maroñe. Bõtab, ejjab aolep armej ro ilo lal̦ in em̦m̦an etaer. Elukkuun jeja armej ro me rem̦ool im epidodo ad maroñ lõke er. (Maika 7:2, UBS) Ñe kwõnaaj m̦ool iien otemjej, enaaj wõr ro im renaaj kajjirere kake eok. Bõtab, enaaj bar wõr ro im renaaj kam̦m̦oolol eok kõn am̦ m̦ool. Kõn wõt men in, renaaj lõke eok im kwal̦o̦k kautiej ñan eok. Elõñ iaan Ri Kõnnaan ro an Jeova rar lo el̦ap tõprak ko im tokjãn ko ilo jikin jerbal kõn wõt an jim̦we im m̦ool aer jerbal. Ñan waanjoñak, elõñ rej jol̦o̦k er jãn jikin jerbal ko aer kõn an nana im riab wãween aer jerbal. Bõtab, Ri Kõnnaan ro an Jeova rej pãd wõt im jerbal ilo jikin kein. Bareinwõt, elõñ iaaer rar ellolo aer jerbal ilo jikin jerbal ko me el̦ap aer aikuji ri jerbal ro me ejim̦we im em̦ool wãween aer jerbal.

19. Ta eo enaaj wal̦o̦k ñan kõj im ñan kõtaan eo ad ippãn Jeova el̦aññe jej m̦ool iien otemjej?

¹⁹ Meñe kwõmaroñ jab iioon wãween kein ilo jikin jerbal eo am̦, bõtab kwõnaaj make kile aolep tokjãn ko jet me renaaj wal̦o̦k ñan kwe kõn wõt am̦ m̦ool. Ñan waanjoñak, ñe kwõj m̦ool iien otemjej, kwõnaaj make kile im jel̦ã bwe kwõj erreo im̦aan mejãn Anij. Paul ear ba: “Kõm lukkuun jel̦ã bwe am bõklõkõt [maroñ in jel̦ã em̦m̦an im nana, NW] em̦m̦an.” (Hibru 13:18, UBS) Bareinwõt, Anij ej loe am̦ kate eok bwe kwõn m̦ool iien otemjej. Jeova elukkuun yokwe armej ro me rej kwal̦o̦k m̦ool iien otemjej. (Sam 15:1, 2; Jabõn Kõnnaan 22:1, UBS) Ilo am̦ kate eok bwe kwõn m̦ool iien otemjej, men in enaaj jipañ eok bwe kwõn pãd wõt ilo yokwe eo an Anij. Ewõr ke jeraam̦m̦an en̦ el̦apl̦o̦k jãn men in? Ejjel̦o̦k. Ak kiiõ, ta l̦õmn̦ak eo an Jeova kõn jerbal? Jenaaj etale men in ilo katak in tok juon.