Ta ko Jej Aikuj Kõm̦m̦ani Ñe Juon Ej Bukwel̦o̦k?

El̦ap ad bũrom̦õj ñe juon ilo baam̦le eo ad, juon nukũd ak juon jerad ej bukwel̦o̦k jãn eklejia eo kõn an jab kõn̦aan bõjrak jãn men eo enana ej kõm̦m̦ane. El̦aññe jej l̦oore naan in tõl ko jãn Baibõl̦ kõn ro me rebukwel̦o̦k, men in ej kwal̦o̦k joñan ad yokwe Anij im joñan ad pokake karõk ko an.a Jen kiiõ etale jet kajjitõk ko kõn men in.

Ta ko jej aikuj kõm̦m̦ani ñe juon ej bukwel̦o̦k? Baibõl̦ ej ba: “Kom̦win jab kobal̦o̦k ippãn armej eo ej make n̦aetan ri Kũrjin ak ej ri lejãn, ak ri an̦kon̦ak, ak ri kabuñ ñan ekjab, ak ri ruruwe, ak ri kadek, ak ri ko̦o̦t. Aet, kom̦win jab jijet im m̦õñã ippãn armej rot in ñan jidik.” (1 Korint 5:11, UBS) El̦aññe juon armej ejjab “pãd wõt ilo katak [ko] an Kũraij,” Baibõl̦ ej jiroñ kõj: “Kom̦win jab bõk e ilo m̦weo im̦õmi, im jab yokyokwe e, bwe eo ej yokyokwe e ej bõk m̦õttan jerbal ko an renana.” (2 Jon 9-11) Jejjab bwebwenato ippãn ro rebukwel̦o̦k kõn jabdewõt iaan men ko jej kõm̦m̦ani ilo ad kabuñ ñan Anij. Jejjab bar kobal̦o̦k ippãer ilo iien kõjota ko ak iien iiãio ko. Ad Jerbal ñan Aelõñ Eo an Okõj 2002 ej ba bwe el̦aññe jej yokyokwe armej in, men in emaroñ kõm̦m̦an bwe jen jino ad bwebwenato ippãn ak m̦õttaiki. Kõn men in, jen kõjparok bwe jen jab yokyokwe ro me em̦õj aer bukwel̦o̦k.

Ewõr ke unin ad jab kõnnaan ñan jidik ippãn ro rebukwel̦o̦k? Aet, elõñ un ko unin ad jab kõnnaanl̦o̦k ñan rein. M̦oktata, jej kaalikkar ad tiljek ñan Anij im pokake naan in jiroñ ko an ilo Baibõl̦. Jej pokake Jeova iien otemjej meñe ilo iien ko reppen. Kõn ad yokwe Anij, jej pokake aolep kien ko an. Jej kile bwe Anij ej yokwe kõj im ej letok kien ko me el̦ap tokjãer ñan kõj. (Aiseia 48:17; 1 Jon 5:3) Kein karuo, ad jab kõnnaan ak kobal̦o̦k ippãn ro me rebukwel̦o̦k ej kõjparok kõj bwe jen jab po ilo kõm̦m̦an ko aer renana. Bareinwõt, enaaj kõjparok bwe en jab jorrããn kõtaan eo ad ippãn Anij im kõm̦m̦an bwe en jab nana etan eklejia eo. (1 Korint 5:6, 7, UBS) Kein kajilu, jej jipañe armej eo ebukwel̦o̦k ilo ad l̦oore wõt naan in kakapilõk ko jãn Baibõl̦. Ewi wãween? El̦aññe jej l̦oore pepe eo me em̦õj an em̦m̦aan ro me rej lale eklejia eo kõm̦m̦ane, bõlen enaaj oktak bũruon armej in. Ilo kar jinoin, ear jab jerbale naan in kakapilõk ko jãn em̦m̦aan rein me rar kajjioñ in jipañ e. Bõtab kiiõ ke ejako ro epaake er jãn iturin, men in emaroñ kõm̦m̦an bwe en “iañaktok aan” ak ajl̦o̦k im make kile joñan an kar nana men ko ear kõm̦m̦ani. Kõn men in, enaaj kate ñan kõm̦m̦an oktak ko bwe en maroñ jepl̦aak ñan Jeova.​—Luk 15:17.

Ak ta kõn ro ilo baam̦le eo ad ak ro nukũd me rebukwel̦o̦k? El̦aññe men in ewal̦o̦k ñan kwe, emaroñ lukkuun pen kõnke kwõj lukkuun epaake armej eo. Men in emaroñ kõm̦m̦an bwe en pen ad tiljek ñan Anij. Ta ko jej aikuj kõm̦m̦ani ñe juon ilo baam̦le eo ad ak juon nukũd ej bukwel̦o̦k? Jejjab maroñ kõnnaan kõn aolep wãween ko jemaroñ iiooni, bõtab jenaaj etale ruo wãween ko ekkã aer wal̦o̦k.

Jet iien, armej eo ebukwel̦o̦k ej em̦m̦aan eo ak kõrã eo, ak bõlen juon iaan ajri ro reddik nejierro. Kõnke armej in ej uwaan baam̦le eo, eokwe remaroñ wõnm̦aanl̦o̦k wõt im mour ippãn doon ãinwõt juon baam̦le. Bõtab, jej aikuj keememej bwe armej in ear make kããlõt ñan ilo̦k jãn Anij im tõmak eo an baam̦le eo an. Kõn men in, ejjel̦o̦k an armej in tok ilo jabdewõt iaan men ko jej kõm̦m̦ani ilo ad kabuñ ñan Anij. Ñan waanjoñak, ñe armej eo ej pãd ilo iien ad katak Baibõl̦, eokwe ejjab maroñ bõk kun̦aan. Ak ta el̦aññe armej in ebukwel̦o̦k ej juon ajri ak jodrikdrik me ej pãd wõt ium̦win pein jemen im jinen? Eokwe, ej an rũtto rein eddo ñan katakin im jipañ e. Kõn men in, jemen ak jinen remaroñ wõnm̦aanl̦o̦k im katak Baibõl̦ ippãn ajri in ak jodrikdrik in nejier.b​—Jabõn Kõnnaan 6:20-22; 29:17, UBS.

Bõlen armej eo ebukwel̦o̦k ejjab jokwe ilo m̦weo im̦õd, bõtab ej nukũd ak ej uwaan baam̦le eo ad. Meñe jemaroñ aikuj kõnnaan ippãn jidik ñe ewõr an baam̦le eo utam̦we, en jab ikkutkut ad kõm̦m̦ane men in. Ro me rej tiljek ñan Anij reban kõm̦m̦an jekpen bwe ren maroñ kõnnaan ak kobal̦o̦k ippãn armej in ebukwel̦o̦k. Kõnke rej tiljek wõt ñan Jeova im doulul in an, eokwe renaaj l̦oore wõt aolep naan in tõl ko jãn Baibõl̦ ikijjeen ro me rebukwel̦o̦k. El̦aññe rej jerbale aolep naan in kakapilõk kein, men in ej kaalikkar bwe relukkuun yokwe armej in me ebukwel̦o̦k. Men in emaroñ jipañ armej in bwe en jerbali aolep naan in jipañ im kauwe ko me ear bõki jãn em̦m̦aan ro rej lale eklejia eo.c​—Hibru 12:11, UBS.