Jesus Ej Jino An Messaia

Ekkã an kar Jon kwal̦o̦k bwe ewõr ‘juon eo el̦apl̦o̦k jãn e ej itok wõt.’ Im ke ear 30 an Jesus iiõ, ear etal jãn Galili ñan Reba Jordan, ijo Jon ear peptaiji armej ro ie. Ear kõn̦aan bwe Jon en peptaiji, ak Jon ear ba: ‘Ejjab ña eo in kar peptaiji eok. En kar kwe eo kwõj peptaiji eõ.’ Jesus ear ba ñane: ‘Jeova ekõn̦aan bwe kwõn peptaiji eõ.’ Innem erro kar tuwaak ilo Reba Jordan im Jon ear katulo̦k Jesus im ear jakol̦o̦k ium̦win dãn eo.

Ãlikin wõt an kar Jesus wal̦o̦ktok jãn ium̦win dãn eo, ear jar. Ilo kar iien in, ear pel̦l̦o̦k lañ im jetõb kwõjarjar eo an Anij ear jok ioon ãinwõt juon m̦ul̦e. Ãlikin, Jeova ear kõnnaan lal̦tak jãn lañ im ba: “Kwe Nejũ jitõnbõro ippa im ebuñbũruõ kõn kwe.”

Ilo iien eo jetõb kwõjarjar ear pãd ioon Jesus, ear jino erom Messaia, ak Christ. Kiiõ emaroñ jino kõm̦m̦ane jerbal eo Jeova ear jilkintoke ñan lal̦ in bwe en kõm̦m̦ane.

Innem ãlikin wõt an kar Jesus peptaij, ear etal ñan ãne jem̦aden im pãd ie ium̦win 40 raan. Tokãlik ear jepl̦aakl̦o̦k im pukot Jon. Im ke Jesus ej etal ñan ippãn, Jon ear ba: ‘Eñin L̦aam̦ eo an Anij. Kõn e, naaj jol̦o̦k jerawiwi ko an lal̦.’ Ilo an kar Jon ba naan kein, ear kaalikkar ñan armej ro bwe Jesus ej Messaia eo. Kwõjel̦ã ke ta eo ear wal̦o̦k ñan Jesus ke ear pãd ilo ãne jem̦aden? Eokwe jen lale.