Setan Ej Kajjioñ Kapo Jesus

Ãlikin an kar Jesus peptaij, jetõb kwõjarjar eo an Anij ear tõle l̦o̦k ñan ãne jem̦aden. Im ium̦win 40 raan ke ear pãd ijin, ear jab m̦õñã ñan jidik, kõn men in ear lukkuun kwõle. Innem, Setan ear itok im kajjioñ kapo Jesus. Ear ba ñan e: ‘El̦aññe Nejin Anij kwe, kwõn jiroñ dekã kein bwe ren erom pilawã.’ Ak Jesus ear uwaake jãn Jeje ko im ba: ‘Em̦õj kar je bwe kwõjjab aikuj mour kõn m̦õñã wõt. Ak kwõj aikuj roñjake im pokake aolep naanin jiroñ ko an Jeova.’

Kiiõ Setan ear bar kajjioñ kapo Jesus im ba: ‘El̦aññe m̦ool bwe kwe Nejin Anij, kwõn kãlal̦l̦o̦k jãn ijo eutiejtata ilo tampel̦ eo. Bwe em̦õj je, Anij enaaj jilkinwaj enjel̦ ro an bwe ren bo̦ur eok.’ Ak Jesus ear bar uwaake jãn Jeje ko im ba: ‘Em̦õj kar je, kwõn jab mãlejjoñe Jeova.’

Innem, Setan ear kaalwõje Jesus aelõñ ko otemjej ilo lal̦ in kab joñan aer m̦weiie im aiboojoj. Ear ba: ‘Inaaj lewaj aelõñ kein im aer aiboojoj ñan eok el̦aññe kwõnaaj kabuñ ñan eõ juon wõt alen.’ Ak Jesus ear uwaake im ba: ‘Ilo̦k Setan! Em̦õj kar je bwe kwõn kabuñ ñan Jeova Anij wõt.’

Setan ear kiiõ ilo̦k, im enjel̦ ro rar itok ñan ippãn Jesus im lel̦o̦k kijen m̦õñã. Innem jãn iien eo m̦aanl̦o̦k, Jesus ear kwal̦o̦k nuuj eo em̦m̦an kõn Aelõñ eo an Anij. Eñin jerbal eo kar jilkintok e ñan lal̦ in bwe en kõm̦m̦ane. Ear lukkuun em̦m̦an ippãn armej ro katak ko an Jesus, im rar l̦oorel̦o̦k ñan aolep jikin ko ear etal ie l̦o̦k.