Family Eo An Jehovah Ej Lõñliñ Kin Burukuk Eo Eaorõk
“Lo! Enañin emõn im men in mõnõnõ, ñe ro jim jein im jim jãtin rej ber iben dron ilo buru juõn!”—PSALM 133:1.
1. Ta wãwen eo ibben elõñ family ko rainin?
FAMILY eo ej bed ilo jorrãn rainin. Ibben elõñ family ko, lokjak in belele ko rej bed ilo kauatata. Jibel ej laplok wõt, im elõñ ajiri ro ejibel jemeir im jineir rej iion elap buromõj. Elõñ million family ko rejjab mõnõnõ im jab burukuk. Ak, ewor juõn family eo ejela kin lõñliñ eo emol im burukuk eo emol. Ej family eo ijoko otemjelok an Jehovah Anij. Ilo family in, thousand im thousand enjel ro jejjab lo ir kin mejed rej kõmmõni jerbal ko emwij kabbeik ir kaki ilo air errã ibben ankil an eo ekwojarjar. (Psalm 103:20, 21) Ak ewor ke juõn family eo ilo lõl in ej lõñliñ kin kain burukuk rot in?
2, 3. (a) Wõn ro rej kiõ mõttan family eo an Anij ijoko otemjelok, im ñõn ta eo jemaroñ kõkkar Ri Kennan ro otemjej an Jehovah ñõn e rainin? (b) Ta kajitõk ko jenaj konono kaki?
2 Ri jilek Paul ear je: “Kin unin in ij bukwelõlõ ñõn Jemer, jen Eo nukin otemjej i lõñ im i lõl emwij naetair.” (Epesõs 3:14, 15) Family otemjej ion lõl emuri kake etan ñõn Anij kinke e ej Ri Kõmõnmõn eo. Meñe ejelok an armij family ilõñ, ilo nan in kõkkar Anij ej belele ñõn dolul eo an ilõñ, im Jesus enaj wor belen ilo jitõb eo ej burukuk ibben ilo lõñ ko. (Isaiah 54:5; Luke 20:34, 35; 1 Korint 15:50; 2 Korint 11:2) Ro emwij kãlet ir im rej tiljek ion lõl rej kiõ mõttan family eo an Anij ijoko otemjelok, im “sheep ro jet” an Jesus kin kejatdikdik eo ñõn mour ilõl, rej ro uan. (John 10:16; Rom 8:14-17; Imõniaroñroñ eo, January 15, 1996, peij 31) Bõtab, aolep Ri Kennan ro an Jehovah rainin remaroñ keiri ir einwõt juõn family eo eburukuk ibelakin lõl.
3 Kwoj mõttan ke family eo emõn ibelakin lõl in ro rej ri karejaran Anij? Elañe kwoj, kwoj lõñliñ kin juõn ian jerammõn ko relap emaroñ wor ibben juõn. Elõñ million armij ro renaj kamol bwe family eo an Jehovah ibelakin lõl—dolul eo an jej lo kin mejed —ej juõn denin kemmourur in ainemõn im burukuk ilo juõn lõl in ene jemaden in bwoktak im jab burukuk. Ewi wãwen air maroñ kalikar family eo eburukuk an Jehovah ibelakin lõl? Im ta men ko rej kalaplok kain burukuk rot in?
Joñan An Emõn im Joñan An Kamõnõnõ!
4. Ilo nan ko am make, ewi wãwen am naj kar kwalok kin ta eo Psalm 113 ej ba kake kin burukuk eo an jimjen jimjatin?
4 Ri jeje psalm David ear mwilõl an kamolol kin burukuk eo an jimjen jimjatin. Kar kakõrmol e ñõn an al kake! Kalmenlokjen kin e ibben harp eo an ke ej al: “Lo! Enañin emõn im men in mõnõnõ ñe ro jim jein im jim jãtin rej ber iben dron ilo buru juõn. Ej einwõt oil e aurõk ion bõran, e ar torlõllok ion kwodeak, aet kwodeak an Aarõn, e ar wõnlõllok ion toreren nuknuk ko an. Einwõt molawi in Hermõn, ej wõnlõltok ion tol ko in Zaiõn. Bwe ijo Jeova e ar kaiñi jerammõn, aet mour in drio.”—Psalm 133:1-3.
5. Ion bedbedin Psalm 113:1, 2, ta keiri eo jemaroñ kõmmõne ikõtan ri Israel ro im ro ri karejaran Anij ran kein?
5 Nan kein rej jerbal ñõn burukuk in jimjen jimjatin eo an armij ro an Anij etto rar lõñliñ kake, ri Israel ro. Ke rar bed ilo Jerusalem kin kwojkwoj ko jilu ilo yiõ ko kajojo, rar jokwe ibben don ilo burukuk. Meñe rar itok jen kajojo bwij ko, rar juõn family. Air kar ibben don kar jelet ir ilo juõn wãwen emõn, einwõt oil in ekabit ekaemlolo kin juõn bwin melu. Ke rar lutõk kain oil rot in ion bõran Aaron, ear torlõllok ion kwodeak ko an im lõllok ñõn tõrerein nuknuk eo an. Ñõn ri Israel ro, air ibben don ear wor juõn emõnin eo ear jededlok ilujen aolep armij. Lakabwokbwok ko rar kajimweiki, im burukuk eo rar kalaploke. Burukuk eo einlok wõt ej bed ibben family eo rainin ibelakin lõl an Jehovah. Ekeini air kobatok ibben don einwõt juõn family ewor juõn emõn in ilo jitõb ñõn ro uan. Jabdewõt lakabwokbwok ko ak abañ ko rej joloki ñe rej jerbali nan in kakabilek ko ilo Nan eo an Anij. (Matthew 5:23, 24; 18:15-17) Armij ro an Jehovah elap air kamolol kin kakajur eo ej walok jen burukuk eo an jimjen jimjatin.
6, 7. Burukuk eo an Israel ewi wãwen kar kõkkar kake einwõt malawi in Tol Hermon im ia eo jemaroñ lo kajerammõn eo an Anij ie rainin?
6 An kar ri Israel ro jokwe ibben don ilo burukuk ewi wãwen an kar bar einwõt malawi in Tol Hermon? Eokwe, ke jeban tol in eutiejlok jen 9,000 ne ilõñin level eo an lojet, ewor snow ion enañin aolep yiõ otemjej. Snow eo ion jeban Hermon ej kõmmõn an molo eo ilo boñ kwalok elap malawi eo ej kejbarok men in eddek ko ilo ien eo ej aetok an mõrã bũdej. Kõto eo emolo jen Hermon ej bõklok molo kein ilo boñ lok ñõn tu-rak in melan Jerusalem, ijo rej oktak im einwõt malawi. Inem ri jeje psalm ear jimwe an konono kin ‘molawi in Hermõn ej wõnlõltok ion Tol Zion.’ Juõn men in kakememej emõn in kaemlolo eo ej kalaplok burukuk eo an family ri kabuñ ro an Jehovah!
7 Mokta jen an kar jutak congregation in Christian eo, Zion, ak Jerusalem, kar tuiolaplap in kabuñ eo emol. Kin men in, kar ijin ilo Jerusalem eo Anij ear kaiñ bwe en jerammõn. Ke Unjen aolep jerammõn ko ear bed ilo temple eo ilo Jerusalem, jerammõn ko renaj kar waloktok jen ijo. Bõtab, kinke kabuñ eo emol ejako kiõ an atartar ion jabdewõt jikin, jerammõn, yokwe, im burukuk eo an ro ri karejaran Anij jemaroñ loe ibelakin lõl rainin. (John 13:34, 35) Ta jet ian men ko rej kalaplok burukuk in?
Men ko Rej Kalaplok Burukuk
8. Ta eo jej katak kake kin burukuk ilo John 17:20, 21?
8 Burukuk eo an ri kabuñ ro an Jehovah ej wawa ion air errã ibben jela eo ejimwe kin Nan in Anij, ekoba katak ko an Jesus Christ. Ikijen an Jehovah jilkintok nejin ñõn lõl bwe en kennan kin mol eo im mij einwõt juõn katok in mij, ial eo ear bellok ñõn ejak eo an congregation eo an Christian eburukuk. (John 3:16; 18:37) An naj kar wor burukuk eo emol ibwiljin ro uan congregation eo men in kar kalikare ke Jesus ear jar: “Ak I jab jar kin rein wõt, a bareinwõt kin ro re naj liki Iõ kin air in nan; bwe ir otemjej ren juõn, einwõt Kwe, Jema ilo Ña, im Ña ilo Kwe, bwe ir bareinwõt ren ilo Kij; bwe lõl en tõmak bwe Kw’ar jilkintok Iõ.”(John 17:20, 21) Ri kalor ro an Jesus rar tõbar juõn burukuk eo uanlok wõt eo ear bed ikõtan Anij im Nejin. Men in ear walok kinke rar errã ibben Nan in Anij im ibben katak ko an Jesus. Ejja lemnak in wõt ej juõn men eo elap ilo burukuk eo an family eo an Jehovah ibelakin lõl rainin.
9. Ta jerbal eo jitõb kwojarjar ej kõmmõne ilo burukuk eo an armij ro an Jehovah?
9 Bar juõn men eo ej kaburukuk armij ro an Jehovah ej kin an bed ibbed jitõb kwojarjar eo an Anij, ak kajur eo ej jerbal. Ej kamaroñ kij ñõn ad melele mol eo ej alikar kin Nan eo an Jehovah im ilo wãwen in jerbal ñõn e ilo burukuk. (John 16:12, 13) Jitõb eo ej jibañ kij bõprae kain jerbal in kanniek ko rejjab kaburukuk einwõt akwail ko, ban ko, illu ko, im jumae ko. Jen an eindein, jitõb eo an Anij ej kõmmõn bwe jen maroñ ejake burukuk in leen jitõb in yokwe, lõñliñ, ainemõn, meanwõr, joij, lejokmen, tiljek, inemõn, im jadõr.—Galetia 5:19-23.
10. (a) Ta wãwen eo einlok wõt jemaroñ kõkkar kake ikõtan yokwe eo ej bed ilo juõn family in armij eburukuk im yokwe eo ealikar ej bed ibwiljin ro rej tiljek ñõn Jehovah? (b) Ewi wãwen an kar juõn uan Governing Body eo kwalok eñjake ko an kin kwelok ibben ro jimjen jimjatin ilo jitõb?
10 Ro uan juõn family eo eburukuk rej yokwe don im rej mõnõnõ in bed ibben don. Eindeinlok, ro ilo family eo eburukuk in ri kabuñ ro an Jehovah rej yokwe e, Nejin, im ri tõmak ro mõttair. (Mark 12:30; John 21:15-17; 1 John 4:21) Einwõt an juõn family ilo kanniek lõñliñ kin air mõñã ibben don, ro rej tiljek ñõn Anij rej mõnõnõ in bed ilo kwalok ko an Christian, assembly ko, im convention ko ñõn bõk tokjen jen kobatok ibben don ko remõn im mõñã eo ilo jitõb elap an emõn. (Matthew 24:45-47; Hebrew 10:24, 25) Juõn uan Governing Body eo an Ri Kennan ro an Jehovah juõn ien ear ba: “Ibba, kwelok ibben ro jeiõ im jatiõ ej juõn ian kamõnõnõ ko relaptata ilo mour im juõn unjen kakajur. Ij yokwe aõ bed ilo Kiiñdom Hall eo ibwiljin ro rej itok moktata, im ibwiljin ro eliktata rej rol jene, ñe ej maroñ. Ij eñjake juõn lõñliñ eo ituloa ñe ij konono ibben armij ro an Anij. Ñe ij bed ibwiljier ij eñjake aõ einwõt ñe ij bed imweo imõ ibben family eo aõ.” Eindein ke wãwen am eñjake?—Psalm 27:4.
11. Ilo jerbal et eo Ri Kennan ro an Jehovah elaptata air lo mõnõnõ ie, im ta tokjen ko rej walok jen air kõmmõne jerbal eo an Anij bwe ej men eo elap tokjen ilo mour ko air?
11 Juõn family eo eburukuk ej lo mõnõnõ ilo an jerbal ibben don. Eindeinlok, ro ilo family in ri kabuñ ro an Jehovah rej lo lõñliñ ilo air burukuk ilo jerbal in kwalok nan kin Ailiñ eo im kõmmõn ri kalor eo air. (Matthew 24:14; 28:19, 20) Ad ekeini ad bõk kwunad ie ej karuaklok kij ñõn Ri Kennan ro jet an Jehovah. Ad kõmmõn bwe jerbal eo an Jehovah en men eo eaorõktata ilo mour eo ad im rejtak makitkit ko otemjej an armij ro an ej bareinwõt kalaplok jitibõn family eo ibwiljid.
Karõk In Theocratic Elap an Aorõk
12. Ta kadkad ko kadkadin juõn family eo emõnõnõ im burukuk, im ta karõk eo ear kalaplok burukuk eo ilo congregation ko an Christian ilo ebeben eo kein kajuõn?
12 Juõn family eo ewor tel eo ekajur ak ewor an yokwe im wor karõk ie enaj wor burukuk im mõnõnõ ie. (Epesõs 5:22, 33; 6:1) Jehovah ej juõn Anij in karõk in ainemõn, im ro otemjej ilo family eo an rej watõk e einwõt “Eo Ekajur Bõtata.” (Daniel 7:18, 22, 25, 27; 1 Korint 14:33) Rej bareinwõt kile bwe emwij an jitõñ Nejin, Jesus Christ, ri jolet eo an men otemjelok im kabbeik e kin maroñ otemjej ilõñ im ilõl. (Matthew 28:18; Hebrew 1:1, 2) Ibben an Christ einwõt Jeban eo an, congregation eo an Christian ej juõn dolul eo ewor karõk im burukuk ie. (Epesõs 5:23) Ñõn lolorjake makitkit ko an congregation ko ilo ebeben eo kein kajuõn, ear wor juõn governing body eo ejak in ri jilek ro im “maan ritto ro” ilo jitõb. Kajojo congregation ko ear wor overseer ro, ak elder im ministerial servant ro. (Jerbal 15:6; Pilippai 1:1) Bokake rein rar bõk jerbal in tel ear kalaplok burukuk eo.—Hebrew 13:17.
13. Ewi wãwen an Jehovah karreltok armij ro, im ta tokjen ko rej walok jen men in?
13 Ak aolepen karõk in jemaroñ ke ba bwe burukuk eo an ri kabuñ ro an Jehovah emaroñ walok jen tel eo ekajur ak ejelok yokwe ie? Ejjab! Ejelok juõn men ejelok yokwe ie kin Anij ak dolul eo an. Jehovah ej karuaklok armij ro ilo an kwalok yokwe, im ilo kajojo yiõ buki thousand armij ro rej make lelok ir im lõñliñ kin air erom mõttan dolul eo an Jehovah ilo air baptais im kalikar wujleplok eo air jen buru ñõn Anij. Jitõb eo air ej einwõt eo an Joshua, eo ear kaketak ri Israel ro mõttan: “Komin kãlet ranin wõn eo kom naj jerbal ñõn e. . . . A kin ña im ro nuku, kim naj jerbal ñõn Jeova.”—Joshua 24:15.
14. Etke jemaroñ ba bwe dolul eo an Jehovah ej theocratic?
14 Einwõt mõttan family eo an Jehovah, jejjab lõñliñ wõt ak jej bareinwõt jokane. Men in ej eindein kinke dolul eo an ej theocratic (kien lõltak jen Anij). Ailiñ eo an Anij ej juõn theocracy (jen nan in Greek eo the·osʹ, anij, im kraʹtos, juõn kien. Ej juõn kien ikijen Anij, ear ejak im kajutake. “Ailiñ eo ekwojarjar” kãlet in Jehovah ej kõttãik e ñõn iroij eo an im kin men in ej bareinwõt theocratic. (1 Peter 2:9) Kin Theocrat eo Elap, Jehovah, einwõt Ri Ekajet eo ad, Ri Letok Kien, im Kiiñ, ewor aolep un ko ibbed ñõn ad eñjake ad jokane. (Isaiah 33:22) Ak, ta elañe jet akwelel ko rar jarõk im kõmmõn kauatata ñõn lõñliñ, jokane, im burukuk eo ad?
Governing Body Eo Ej Jerbale
15, 16. Ta iakwelel eo ear jarjar ilo ebeben eo kein kajuõn, im etke?
15 Ñõn kejbarok burukuk eo an juõn family, ilo jet ien juõn akwel emaroñ aikwij wor mejelan. Inem, jen baj ba, bwe juõn abañ eo ilo jitõb rar aikwij kamadmõde ñõn kejbarok wõt burukuk eo an family in ri kabuñ ro an Anij ilo ebeben eo kein kajuõn C.E. Ta eo rej aikwij kar kõmmõne? Governing Body eo ear aikwij jerbal, im kõmmõn bebe ko kin men ko ilo jitõb. Ewor juõn lokbok ilo Jeje ko kin jerbal rot in.
16 Ilo iturenlok yiõ eo 49 C.E., governing body eo ear kwelok ilo Jerusalem ñõn bukõt mejelan juõn abañ eo elap im ilo wãwen in kejbarok wõt burukuk eo an “mweo imõn Anij.” (Epesõs 2:19) Enañin 13 yiõ ko lok iman, ri jilek Peter ear kwalok nan ñõn Cornelius, im ri Gentile ro moktata, ak armij in ailiñ ko, rar oktak im ri tõmak ro rar baptais. (Jerbal, jebta 10) Ilo trip in missionary eo jinointata an Paul, elõñ ri Gentile ro rar bõk mour in Christian. (Jerbal 13:1–14:28) Ilo mol, juõn congregation in Christian in ri Gentile ro ear jutak ilo Antioch, Syria. Jet Christian in ri Jew rar tõmak bwe ri Gentile ro rar oktak rar aikwij mwijmwij im kejbarok Kien eo ikijen Moses, ak ro jet rar jab errã. (Jerbal 15:1-5) Iakwelel in emaroñ kar tel ñõn rupe burukuk eo, meñe ñõn jarõk an wor jibel ilo congregation ko an ri Jew ro im ri Gentile ro. Kin men in Governing Body eo ear mõkaj im jerbal ñõn kejbarok wõt burukuk eo an Christian.
17. Ta wãwen eo ekwon ilo theocratic Jerbal jebta 15 ej kwalok kake?
17 Ekkar ñõn Jerbal 15:6-22, “dri jilik im elder ro rej kweloklok bwe ren bebe kin men in.” Bareinwõt ear wor ro jet rar bed, ekoba juõn jar jen Antioch. Peter mokta ear kamelele bwe ‘jen loñiõ dri ailiñ ren roñ nan in gospel im tõmak.’ Inem “jar otemjej” rej roñjake ke Barnabas im Paul rej kwalok kin “elõñ kakõle ko im men in bwilõñ ko an Anij kõmõnmõn iben dri ailiñ kin irro,” ak ri Gentile ro. Jeltokin James ej kwalok kin wãwen kar lo mejelan kajitõk eo. Elikin an governing body eo kõmmõne juõn bebe, rej jiroñ kij: “Dri jilik im elder ro, kab ri eklisia otemjej, rej lemnok emõn bwe ren kãlet armij jen jar eo air im jilkinlok ir iben Paul im Barnebas ñõn Antiok.” “Maan rein kar kãlet ir”—Judas im Silas—rar bõklok juõn letter in kaketak ñõn ri tõmak ro mõttair.
18. Ta bebe eo governing body eo ear kõmmõne im ejelet Kien eo ikijen Moses, im ewi wãwen an kar men in jelet Christian in ri Jew ro im ri Gentile ro?
18 Letter eo ej kwalok kin bebe eo an governing body eo ej jino kin nan kein: “Ro dri jilik im elder ro, jimjãn jimjãten ñõn jimjãn jimjãten jen dri ailiñ ilo Antiok, im Siria im Silisia: Yokwe kom!” Ro jet rar bar bed ilo kwelok in, ak ealikar governing body eo kar ejak in “dri jilik im elder ro.” Jitõb eo an Anij ear tel ir, bwe letter eo ej ba: “Bwe Jitõb kwojarjar im kim ar lemnok, emõn bwe kimin jab likit iomi men ko relap jen men kein remon, bwe komin kejbãrok kom jen men in katok ñõn ekjõp ko, im jen bõtõktõk, im jen men ko remij kin lukwoj burueir, im jen lũñ.” (Jerbal 15:23-29) Christian ro rar jab aikwij bwe ren mwijmwij im kejbarok Kien eo ikijen Moses. Bebe in ear jibañ Christian in ri Jew im ri Gentile ro ñõn air kõmmõn im konono ilo burukuk. Congregation ko rar lõñliñ, im burukuk eo eaorõk ear wõnmanlok wõt, ejja einwõt ilo family eo an Anij ibelakin lõl rainin iumin tel eo ilo jitõb an Governing Body eo an Ri Kennan ro an Jehovah.—Jerbal 15:30-35.
Jerbal ilo Burukuk in Theocratic
19. Etke burukuk ear eddeklok ilo family in ri kabuñ ro an Jehovah
19 Burukuk ej emõn an eddeklok ñe ro uan juõn family rej karejar ibben don. Men in ej bareinwõt mol ilo family eo an ri kabuñ ro an Jehovah. Kin air theocratic, elder ro im ro jet ilo congregation eo ilo ebeben eo kein kajuõn rar karejar ñõn Jehovah ilo air lukkun karejarlok ibben governing body eo im bõk bebe ko an. Kin jibañ eo an governing body eo, elder ro rar ‘kwalok nan’ im ro uan congregation ko rar ‘konono einwõt juõn.’ (2 Timothy 4:1, 2; 1 Korint 1:10) Inem ejja mol kein wõt ilo Jeje ko rar kwaloki ilo ien kwalok nan im ilo kwelok ko an Christian, meñe ilo Jerusalem, Antioch, Rome, Corinth, ak ijoko jabdewõt. Burukuk in theocratic rot in ewor rainin.
20. Ñõn kejbarok burukuk in Christian eo ad, ta eo jej aikwij kõmmõne?
20 Ñõn kejbarok wõt burukuk eo ad, kij otemjej ro rej mõttan family eo ibelakin lõl an Jehovah jej aikwij kate kij ñõn ad kwalok yokwe in theocratic eo. (1 John 4:16) Jej aikwij lelok kij ñõn ankil an Anij im kwalok kautiej eo emwilõl ñõn ‘ri karejar eo etiljek’ im Governing Body eo. Einwõt wujleplok eo ad ñõn Anij, bokake eo ad, ej itok jen kõnan im lõñliñ ko ad. (1 John 5:3) Ejejjet an ri jeje psalm kobaik lõñliñ im bokake! Ear al: “Emõnõnõ armij eo ej mijõk Jeova, ej lõñliñ kake kien ko An.”—Psalm 112:1.
21. Ewi wãwen ad maroñ kamol kij make bwe jej theocratic?
21 Jesus, bõran congregation eo, ej lukkun theocratic im ien otemjej ej kõmõnmõn ankil an Jemen. (John 5:30) Kin men in, jen anõk Ri Joñok eo ad ilo ad kõmõnmõn ankil an Jehovah ilo juõn wãwen theocratic im burukuk ilo ad lukkun karejarlok ibben dolul eo An. Inem kin lõñliñ in buru im kamolol, jemaroñ eliji al eo an ri jeje psalm: “Lo! Enañin emõn im mõnõnõ, ñe ro jim jein im jim jãtin rej ber iben dron ilo buru juõn!”
Ewi Wãwen Am Naj Kar Uak?
◻ Ewi wãwen an burukuk in Christian eo ad maroñ wor kilan ñõn Psalm 133?
◻ Ta jet ian men ko rej kalaplok burukuk?
◻ Etke karõk in theocratic eo elap tokjen ñõn burukuk eo an armij ro an Anij?
◻ Ewi wãwen an kar governing body eo ilo ebeben eo kein kajuõn jerbal ñõn kejbarok burukuk?
◻ Ta eo jerbal ilo burukuk in theocratic eo ej melelen ñõn yuk?
[Pija eo ilo peij 11]
Governing body eo ear jerbal ñõn kejbarok burukuk eo