Karuwainene In Christian Ilo Juõn Lõl Ejibel

“Kin men in, jej bed iumin eddo eo ñõn bõk armij rein ilo karuwainene, bwe jen maroñ erom ri jerbal ro mõttair ilo mol eo.”​—3 JOHN 8, New World Translation.

1. Ta men in letok ko elap air emõn Ri Kõmõnmõn eo ear letok ñõn armij?

“IBEN juõn armij ejelok iomin al emõnlok jen bwe en mõña, im irak, im mõnõnõ: bwe men eo e naj ber iben ilo an jerbal ran otemjej in mour eo an, im Anij e ar lelok ñõn e iomin al.” (Ecclesiastes 8:15) Kin nan kein ri kokwelok in Hebrew eo etto ej jiroñ kij bwe Jehovah Anij ejjab kõnan bwe men in kõmõnmõn eo an kin armij en lõñliñ im mõnõnõ wõt ak ej bareinwõt lelok men ko ñõn ir bwe ren eindein. Ilo aolepen bwebwenato in armij juõn kõnan ekkã ibwiljin armij ijoko jabdewõt ej alikar bwe ej ñõn kalõñliñ ir make im ñõn an wor juõn ien ekamõnõnõ.

2. (a) Ewi wãwen an kar armij kabwid air kajerbal men eo Jehovah ear karõk ñõn ir? (b) Ta tokjen eo ej walok?

² Rainin jej mour ilo juõn jukjuk in bed eo ej jibadõk wõt kamõnõnõ ko im armij ro ie reboub kin air bukõt kamõnõnõ ko im ien ko remõn. Elõñ wõt armij emwij air oktak im “ri yokwe ir make, . . . ro rej yokwe men in kabuñburueir elap jen air yokwe Anij,” einwõt an kar Bible kanan. (2 Timothy 3:1-4) Bwebota, men in, ej juõn men enana ej jujurlok men eo Jehovah Anij ear karõke. Ñe jibadbad eo ñõn ien ko remõn ej oktak im juõn mejenkajjik eo elap, ak ñe an juõn kamõnõnõik e make ej oktak im mejenkajjik eo an, ejelok juburu eo emol, im ‘aolepeir rej men bata, einwõt kañ kõto.’ (Ecclesiastes 1:14; 2:11) Kin un in lõl in ej obrak kin armij ro remake iair, im erub burueir, im men in ej tellok ñõn an lõñ abañ ko ilo jukjuk in bed eo. (Jabõn Kennan 18:1) Armij rej oktak im enoik don im oktak im jibel ilo kil, ilo dolul in armij, ilo tel air ibben don, im ilo jerbal in money.

3. Ewi wãwen ad maroñ lo lõñliñ eo emol im juburu?

³ Ewi joñan an naj kar einjuõn men ko elañe armij ro rar kajeoñwe wãwen an Jehovah jerbal ibben ro jet​—ej joij, emmol, karuwainene! Ear kalikar bwe menin ittino eo ñõn mõnõnõ eo emol ejjab bed ilo ad kajeoñ in kaju buruer kin kõnan ko ad make. Ak, eñin key eo: “Mõnõnõ in lelok elap jen bõk.” (Jerbal 20:35) Ñõn lo lõñliñ im juburu eo emol, jej aikwij ellã jen men in kabañbañ ko im jibel ko remaroñ kõmmõn joñan ñõn kij. Elap tokjen bwe jen eoroñ nan in kakabilek in: “Kin menin, jej bed iumin eddo ñõn bõk armij rein ilo karuwainene, bwe jen maroñ erom ri jerbal ro mõttair ilo mol eo.” (3 John 8, NW) Kwalok karuwainene ñõn rein retellokiir, ñõn joñan eo wãwen ko ibbed rej kõtlok, ewor tokjen ilo ruo wãwen ko​—ewor tokjen ñõn irro jimor eo ej lelok im eo ej bõk. Inem, wõn ro, ibwiljin ro tellokin bõk im jej aikwij ‘bõk ir ilo karuwainene’?

“Lale ro Atajinimjen im ro Ejako Beleir”

4. Ta oktak eo ilo kõtan ko an family ko jej loe meñe ibwiljin jet ian armij ro an Jehovah?

⁴ Family ko retaliir wõt juõn im belele ko rekamõnõnõ rekanuij in jeja rainin. Joñan eo ikijen an ri belele ro jibel ej wõnliñtak im ej laplok oran kõrã ro rejjab belele ak ewor nejiir ibelakin lõl im menin emwij an ukõt manit eo mantin family. Tokjen men in, elõñ ro emwij air oktak im Ri Kennan ro an Jehovah ilo yiõ ko kiõ rej itok jen family ko rerup. Rej ñe jab ri jibel eokwe emwij air illok jen kar ri belele ro rejtair, ak jokwe ilo moko imõn family ko ejako juõn ian ri belele ro. Kobatok ibben men in, einwõt an kar Jesus kanan, mol eo ear katakin kake ej walok tokjen ilo jibel ko ilo elõñ family ko​—Matthew 10:34-37; Luke 12:51-53.

5. Ta eo Jesus ear ba bwe emaroñ juõn unjen kakajur ñõn ro ilo family ko rejibel?

⁵ Ej men in kõmãnãn buruer in lo an ro rekãl bõk juõn jutak bin kin mol eo, im ekkã ad kainemõn ir kin kallimur eo ej kõketak kij an Jesus: “Emol Ij ba ñõn kom, Ejelok armij eo e ar likit im, ak jein im jãtin man im kõrã rõn, ak jemen, ak jinen, ak ro nejin, ak ene ko enen, kin Ña im kin gospel, a e naj bõk jibuki kin juõn ilo ien in, mo ko, im jein im jãtin man im kõrã rõn, im ro jinen, im ro nejin, im ene ko enen, kab matõrtõr ko; im ilo lõl e naj itok mour in dio.”​—Mark 10:29, 30.

6. Ewi wãwen ad maroñ erom ‘jimjen jimjatin man ro im kõrã ro, jined, im ajiri ro’ ñõn “atajinimjen ro im kõrã ro ejako beleir” rej bed ibwiljid?

⁶ Inem, wõn rein ‘jeid im jatid maan im kõrã im ro jined im ro nejid’? Ilo ad baj lo wõt jarlepju in armij ro ilo juõn Kiiñdom Hall, ekkã an buki ak lõñlok, ro rej naetair make brother im sister ro men in ejjab make kõmmõn bwe juõn armij en eñjake bwe rein rej jein im jatin maan im kõrã, ro jinen, im ro nejin. Lemnak kin point in: Ri jilek James ej kakememej kij bwe ñõn an Jehovah buñburuen kin kabuñ eo ad, jej aikwij ‘lolok ro atajinemjen im kõra ejoko beleir ilo air jorran, im bwe en drebij e im jab lipjinjin kin lõl in.’ (James 1:27) Melelen men in bwe jej aikwij jab kõtlok lemnak ko an lõl in kin mweie im utiej bwe ren kil aor in yokwe eo ad ñõn rein einwõt “ro atajinemjen im kõra ejoko beleir.” Ak, jej aikwij jinoe im lelok ñõn ir ibben don im karuwainene eo ad.

7. (a) Ta lukkun un eo ñõn karuwaineneik “ro atajinimjen im kõrã ro ejako beleir”? (b) Wõn ro bareinwõt remaroñ bõk kwunair ilo kwalok karuwainene eo an Christian?

⁷ Kwalok karuwainene ñõn “ro atajinemjen im kõra ejoko beleir” ejjab ien otemjej koba ad lelok men eo ejabwe ibbeir ikijen mweiuk. Family ko juõn wõt jemen elañe jab jinen ak ri mweo rejibel ilo kabuñ ejjab melelen bwe ebin air kabwe air aikwij. Bõtab, kamao eo ekõketak, mejatoto eo an family eo, ibben don ibben armij ro eoktak dettair, bõk kwunair ilo men ko remõn ilo jitõb​—men kein rej wãwen ko mõttan mour im reaorõk. Kin men in, ad kememej bwe ejjab lapin ien eo, ak ej jitibõn yokwe eo im burukuk eo ej men eo elap tokjen, im emõn bwe, jet ien, meñe “ro atajinemjen ak kõra ejoko beleir” remaroñ bõk kwunair ilo kwalok karuwainene eo ñõn Christian ro mõttair!​—Keiri 1 Kiiñ 17:8-16.

Ewor ke Ruamaejet Ibwiljid?

8. Ta oktak eo jej loe ilo elõñ congregation ko an Ri Kennan ro an Jehovah?

⁸ Jej mour ilo juõn ien elap an armij itoitak ie. “Elõñlok jen 100 million armij ibelakin lõl in rej jokwe ilo ailiñ ko rejjab armij iir, im 23 million rej iun ir bwe ren diojlok jen ijoko jikiir ilo ailiñ ko air make,” World Press Review ej ba. Juõn tokjen eo ej walok jen men in ej bwe ilo elõñ melan ko, elaptata ilo bukwon ko relaplok, congregation ko an armij ro an Jehovah me juõn ien kar ejakin armij ro jen juõn wõt kil ak ailiñ kiõ rej bõk armij jen kajojo mõttan ko in lõl in. Bõlen men in emol ilo ijo kwoj bed ie. Ak en ewi wãwen ad lemnak kin “ruamaejet” rein im “ri ailiñ ko jet,” einwõt an lõl in kir ir, rein kajin eo air, manit, im wãwen mour emaroñ oktak jen ko ad?

9. Ta aujir eo ekauaatata emaroñ joñwe kij ikijen lemnak eo ad kin ro “ruamaejet” im “armij ro jen ailiñ ko ilikin” rej itok ñõn loan congregation eo an Christian?

⁹ Ñõn ba ilo lamwan, jej aikwij jab kõtlok jabdewõt lemnak kin mijak ruamaejet ro bwe ren kõmmõn ad bõk eñjake in bwe elaplok tellokin ñõn kij ñõn ad bõk jerammõn in jela kin mol eo jen ro rar itok jen juõn ailiñ in ruamaejet ak juõn ailiñ rej naetan enen pagan; im bareinwõt jej aikwij jab bõk eñjake eo einwõt ñe ri itok rein rekãl rej le ion ad kajerbal Kiiñdom Hall eo ak men ko jet einwõt Assembly Hall ko. Ri jilek Paul ear aikwij kakememej jet ian Christian ri Jew ro ilo ebeben eo kein kajuõn, ro rar bõk kain lemnak rot in, bwe ejelok en lukkun tellokin; bwe kar joij im yokwe eo an Anij me ear kõmmõn bwe jabdewõt en maroñ bõk lomor. (Rome 3:9-12, 23, 24) Jej aikwij lõñliñ bwe joij im yokwe eo an Anij ej kiõ tõbar elõñ armij ro rar, ilo juõn wãwen ak bar juõn, bõpraik air bõk ien emõn ñõn roñjake news eo emõn. (1 Timothy 2:4) Ewi wãwen ad maroñ kwalok bwe yokwe eo ad ñõn ro jet emol?

10. Ewi wãwen ad maroñ kwalok bwe emol ad karuwaineneik “ruamaejet ro” ibwiljid?

¹⁰ Jemaroñ loor nan in rejañ eo an Paul: “Kin men in komin bõk dron, einwõt Kraist e ar bõk kom, ñõn aibujuij an Anij.” (Rome 15:7) Ad jela bwe armij ro jen ailiñ ko jet ak wãwen ko air ekkã air jab emõn, jej aikwij kwalok joij ñõn ir im lemnak kin ir ñe jej maroñ kõmmõn eindein. Jej aikwij karuwaineneik tok ir ñõn ibbed, kõmmõn ñõn kajojo iair “einwõt eo e ar lotak iolapemi,” im “yokwe e einwõt kwoj mõke yokwe yuk.” (Leviticus 19:34) Men in emaroñ jab bidodo kõmmõne, ak jenaj lo tõbrak elañe jej kememej nan in kakabilek eo: “Im komin jab ilo wãwen dri lõl in, a komin kejakilkil kom ilo kõkãle ami lolãtãt, bwe komin melejoñ ta ankil an Anij emõn im kabuñburuen im wãppen.”​—Rome 12:2.

Bõk Kwunan Ibben ro Rekwojarjar

11, 12. Ta lemnak eo ejej uan kar lelok ñõn jet ian ro ri karejaran Jehovah ilo (a) Israel eo etto (b) ebeben eo kein kajuõn?

¹¹ Ibwiljin rein im emol ej tellokin ad lemnak kin ir im karuwaineneik ir rej Christian ro reritto ro rej kate ir jerbal ñõn emõn eo ad ilo jitõb. Jehovah ear kõmmõn menin letok ko ñõn priest ro im ri Levi ro ilo Israel eo etto. (Bwinbwin 18:25-29) Ilo ebeben eo kein kajuõn, Christian ro rar bareinwõt rejañ ir ñõn kejbarok ro rar jerbal ñõn ir ilo jet wãwen ko reinjuõn. Bwebwenato eo ilo 3 John 5-8 ej letok ñõn kij kar wãwen lokjen yokwe eo ebak ear bed ibwiljin Christian ro jinoin.

¹² Ri jilek eo eritto John ear lap an kaorõk joij im karuwainene eo Gaius ear kwalok ñõn jet reitoitak ro jein im jatin ro kar jilkinlok ir ñõn air lolok congregation eo. Jein im jatin rein​—ekoba Demetrius, eo alikar ear ri bõklok letter​—ir aolep kar ruamaejet ak Gaius ear jab jela kake ir moktalok. Ak rar bõk karuwainene kinke kar ñõn “tokjen eo ñõn etan [Anij] eo rar jilkinlok ir.” John ear likit ilo wãwen in: “Kin menin, jej bed iumin eddo ñõn bõk armij rein ilo karuwainene, bwe jen maroñ erom ri jerbal ro mõttair ilo mol eo.”​—3 John 1, 7, 8.

13. Wõn ro ibwiljid rainin elaptata tellokin air ‘bõk karuwainene’?

¹³ Rainin, iloan dolul eo an Jehovah, elõñ rej jerbal im boub kin tokjen eo ñõn aolepen bed eo an jimjen jimjatin ro. Men in ekoba overseer ro rej ito-itak, ro rej jolok ien im maroñ ko air week elikin week ilo kalek congregation ko; missionary ro, ro rej likit ilikiir family ko im ro jerair ñõn kwalok nan ilo ene ko ilikin; ro rej jerbal ilo moko ilo Bethel ak ran office ko, ro rej lelok ien ko air make ñõn jurake jerbal in kwalok nan eo ibelakin lõl; im ro ilo jerbal in pioneer, ro rej jolok elap wõt ien im maroñ ko air ilo jerbal eo jen em ñõn em. Aolepen jerbal in elap, ejjab ñõn aibujuij ak jerammõn eo an armij eo make, ak jen yokwe eo ñõn jimjen jimjatin Christian ro im ñõn Jehovah. Ej tellokiir ad kajeoñwe ir kin tiljek eo jen aolepen air im rej tellokin ‘bõk karuwainene.’

14. (a) Ewi wãwen bwe jen oktak im Christian ro remõnlok ñe jej kwalok karuwainene ñõn ro retiljek? (b) Etke Jesus ear ba bwe Mary ear kãlet “mõttan eo emõn”?

¹⁴ Ñe jej “bõk armij rein ilo karuwainene,” ri jilek John ear jitõñlok, jej “erom ri jerbal ro mõttair ilo mol eo.” Ilo juõn wãwen jej oktak im Christian ro remõnlok itok wõt jen men in. Men in ej kinke jerbal ko an Christian ekoba kõmmõn emõn ñõn ri tõmak ro mõttad. (Jabõn Kennan 3:27, 28; 1 John 3:18) Ewor jinekjej ko bareinwõt ilo bar juõn wãwen. Ke Mary im Martha rar bõk Jesus ñõn loan mweo imweir, Martha ear kõnan bwe en juõn ri karuwainene emõn ilo an keboji “elõñ men ko” ñõn Jesus. Mary ear kwalok karuwainene ilo juõn wãwen eoktaklok. Ear “jijet lõllok ituren neen Iroij eo im roñjake wõt nan eo an,” im Jesus ear nebar e kin an kar kãlet “mõttan eo emõn.” (Luke 10:38-42) Bwebwenato im konono ko ibben ro elõñ yiõ in iminene ko air ekkã air ien ko relap ilo juõn jota jej jolok im kamao ibbeir.​—Rome 1:11, 12.

Ilo Jet Ien Ko Reinjuõn

15. Ta ien ko reinjuõn emaroñ mol air ien ko rekamõnõnõ ñõn armij ro an Jehovah?

¹⁵ Meñe Christian ro remol rejjab anõk manit ko rebuñbuñ ak kememej ran in kakije im kwojkwoj ko an lõl in, ewor ien ko ñe rej ibben don ñõn air kuktok ibben don. Ñõn wanjoñok, Jesus ear bed ilo juõn kwojkwoj in belele ilo Cana im ear lelok kwunan ñõn lõñliñ eo an ien eo ilo an kar kõmmõne menin bwilõñ eo jinoin tata ear kõmmõne. (John 2:1-11) Einlok wõt rainin, armij ro an Jehovah ewor ien air mõnõnõ ibben don ilo ien ko reinjuõn, kemem im kwojkwoj ko rekkar rej kalaplok ien rot kein. Ak, ta, eo ekkar?

16. Ta ialin tel ko ewor ibbed ñõn manit ko rejimwe meñe ilo ien ko reinjuõn?

¹⁶ Jen ad katak Bible eo, jej katak ta manit eo ekkar ñõn Christian ro, im men in jej lore ien otemjej. (Rome 13:12-14; Galetia 5:19-21; Epesõs 5:3-5) Kuktok ko ibben don, meñe ñõn belele ko ak ñõn jabdewõt un ko jet, ejjab kanemkwoj kij bwe jen illok jen kien Christian ko ad ak kõmmõne juõn men eo jejjab kein kõmmõne; im ejjab juõn ad eddo ñõn anõk manit ko an eneo jej jokwe ie. Elõñ wõt ian wãwen kein rej bedbed ion mantin kabuñ eo ewan, tõmak ilo jitõb ko rekajur, im bar men ko jet rejelet manit eo ealikar an jab emõn ñõn Christian ro.​—1 Peter 4:3, 4.

17. (a)Ta men ko rej kwalok bwe kwojkwoj in belele eo ilo Cana ear emõn karõke im jimwe kebelake? (b) Ta eo ej kwalok bwe Jesus ear kamelim ien eo?

¹⁷ Ikijen John 2:1-11, ejjab bin ñõn ad lo bwe ien eo kar juõn ien eo ear lap keboje im bwe ear bwe an lõñ armij ri lolok ro rar bed ijo. Bõtab, Jesus im ri kalor ro an rar ri lolok ro rar “kir” ir; rar jab baj illok wõt, meñe jet iair kar nukin ro rar kõmmõn karuwainene. Jej lo bareinwõt bwe ear wor ro “dri korijer” im bareinwõt juõn “ri tel,” eo enaj kar tel ñõn lale ta eo ren ajeje ak kõmmõne. Aolepen men in ej kalikar ien eo ear kwon im lolorjake ilo jimwe. Bwebwenato eo ej kajemlok ilo an ba bwe kin men eo ear kõmmõne ilo kwojkwoj eo, Jesus “kwalok An aibujuij.” En kar kãlet ke ien eo ñõn an kõmmõn eindeo elañe kwojkwoj eo rar jab maroñ bebeke? Alikar jab.

18. Ta lemnak eo jej aikwij lukkun etale kin jabdewõt ien kuktok ibben don ko?

¹⁸ Inem, ta, kin jabdewõt ien ko reinjuõn me emaroñ kij eo jej karuwainene? Jekõnan kememej bwe unin bõktok ro jet kin karuwainene ej bwe kij aolep jen maroñ “erom ri jerbal ro mõttan don ilo mol eo.” Kin men in, ejjab bwe ñõn baj ba wõt kin ien eo bwe ej juõn ien kuktok an “Ri Kennan ro.” Kajitõk eo jemaroñ kajitõk ej, Ilo mol ej juõn kennan ke kin wõn kij im ta eo jej tõmak? Jen jab lemnak kin ien rot kein einwõt ien emõn ñõn lo ewi joñan ad maroñ etal ilo aitwerõke lõl in im men ko kõbwebweien, ilo an koba “mõm an kõniek, mõm an mej ko, im wuj wan an mour in.” (1 John 2:15, 16) Jen men in, ien kein rej aikwij jimwe air jelet jerbal eo ad einwõt Ri Kennan ro an Jehovah, im jej aikwij lukkun lale bwe men eo jej kõmmõne ej bõktok aibujuij im nebar ñõn Jehovah.​—Matthew 5:16; 1 Korint 10:31-33.

‘Kwon Karuwainene ilo Ejelok Ellotan’

19. Etke jej aikwij in “karuwaineneik don ilo ejelok ellotan”?

¹⁹ Ke wãwen ko ilo lõl in rej nanalok wõt im armij ej laplok air jibel, jej aikwij kõmmõn joñan wõt ad maroñ ñõn kakajurlok lokjen yokwe eo ebak me ej bed ibwiljin Christian ro remol. (Kolosse 3:14) Ñõn tõbar jemlok in jej aikwij “kanuij yokwe don,” einwõt an kar Peter rejañ kij. Inem, ilo wãwen ko jet, ear kobaiktok: “Komin karuwaineneik don ilo ejelok ellotan.” (1 Peter 4:7-9, NW) Jej mõnõnõ ke bwe kij eo jen jino karuwaineneik ro jeid im jatid, im kate kij bwe jen joij im maroñ jibañ? Ak jej ellotan ke ñe ien rot in ej waloktok? Elañe jej, jej kowan lõñliñ eo jemaroñ kar bõke im bareinwõt luji jinekjej in mõnõnõ eo ñõn kõmmõn emõn.​—Jabõn Kennan 3:27; Jerbal 20:35.

20. Ta jerammõn ko rej kõtar kij elañe jej jerbale karuwainene ilo lõl in ejibel rainin?

²⁰ Jerbal ebak ibben Christian ro mõttad, kwalok joij im karuwaineneik don, enaj bõktok elap jerammõn. (Matthew 10:40-42) Ñõn rein Jehovah ear kallimur bwe enaj “erlokwe em nuknuk eo an ioir. Rejamin bar kwuli rejamin bar maro.” Ñõn bed ilo em nuknuk eo an Jehovah ej ñõn lañlõn kin kejbãrok im karuwainene eo an. (Revelation 7:15, 16, NW; Isaiah 25:6) Aet, ebed imad jerammõn eo ñõn lõñliñ ilo karuwainene eo an Jehovah ñõn indio.​—Psalm 27:4; 61:3, 4.

Kwo Maroñ ke Kamelele?

◻ Ta eo jej aikwij jab likjap in loe elañe jekõnan lo lõñliñ eo emol im juburu?

◻ Wõn ro rej “ro atajinemjen im kõrã ro ejoko beleir,” im ewi wãwen ad aikwij “lale” ir?

◻ En ewi wãwen ad lemnak kin “ruamaejet ro” im “armij ro jen ailiñ ko ilikin” rej bed ibwiljid?

◻ Wõn ro elaptata tellokin ad lemnak kake ir rainin?

◻ En ewi wãwen an ien ko reinjuõn kalikar jitõb in karuwainene eo emol?

[Pija ko ilo peij 26, 27]

Ilo ien kwojkwoj ko jemaroñ kwalok karuwainene ñõn ruamaejet ro, ajiri ro ejelok jemeir, ro rej jerbal full-time, im ri lotok ro jet