Aibujuij Eo Elaplok In Mweo Imõn Jehovah

“‘I naj kobrak mwin kin aibujuij,’ Jehovah in inelip eo ear ba.”​—HAGGAI 2:7.

1. Ewi wãwen kõtan eo an jitõb kwojarjar ñõn tõmak im jerbal?

KE ear kwalok nan jen em ñõn em, juõn kõrã in Ri Kennan ro an Jehovah ear iion juõn kõrã in Pentecostal eo ear ba, ‘Kim jitõb kwojarjar eo ebed ibbem, ak kom eo komij kõmmõne jerbal eo.’ Ilo jela kilen, kar kameleleik kõrã eo bwe eo ebed jitõb kwojarjar eo ibben enaj, einwõt eindein an mour, emakit ñõn kõmmõne jerbal eo an Anij. James 2:17 ej ba: “Ein drein tõmak, elañe jerbal ko rej jab iben, e mõke mij.” Kin jibañ eo an jitõb eo an Jehovah, Ri Kennan ro an rej ejake tõmak eo ebin, im ear ‘kobrak mweo imõn kin aibujuij’ ilo an karõk ir bwe ren kõmmõne jerbal ko rewãnik​—elaptata ‘kwalok gospel in ailiñ in lõñ i aolepen lõl kin men in kennan ñõn ailiñ otemjelok.’ Ñe ededelok jerbal im ejuburuen Jehovah, “ilo ien eo enaj itok jemlokin.”​—Matthew 24:14.

2. (a) Lelok kij make ilo jerbal eo an Jehovah enaj bõktok jerammõn et eo? (b) Etke jej aikwij mõnõnõ kin jabdewõt “rumijlok” eo ealikar?

² Jen nan kein an Jesus, jej bõk jemlok in bwe jerbal eo ad rainin ej aikwij lemnakelok jerbal in kwalok nan ñõn ro jet kin “aibujuij an Anij e mõnõnõ,” eo ej kabbeik kij kake. (1 Timothy 1:11) Elak laplok ad lelok kij make ilo mõnõnõ ilo jerbal eo an Jehovah, enaj mõkajlok an jemlokin itok. Ilo Habakkuk 2:2, 3, jej konono nan ko an Jehovah: “Je vision in, im likiti ilo alikar ion paper ko, bwe eo ej konono jene ilo ellaj en maroñ kõmmõn eindein ilo emõn. Bwe vision in ej bojak wõt ñõn ien eo an, im ej etal wõt ñõn jemlokin, im e jamin riap. Meñe ej aikwij rumij, kõtmene wõt kake; bwe enaj mol wõt im jamin likjap. Ejamin rumij.” Aet, “vision eo” enaj mol “meñe ej aikwij rumijlok.” Ke jej bed ilo yiõ eo kein ka 83 in an Ailiñ eo an Jesus iroij, jet remaroñ eñjake bwe jej bed ilo juõn ien eo erumij kiõ. Ak, jejjab aikwij mõnõnõ ke, bwe ejañin itok jemlokin? Ilo yiõ kein 1990 ko, kõmomu eo ikijen kwalok nan kin news eo emõn emwij an jako, ilo kabwilõñlõñ ear eindeinlok ilo Eastern Europe, mõttan ko ilo Africa, im ilo ene ko jet. “Rumij” eo ej kõtlok ien ñõn aintok elõñlok “sheep” jen jikin kein me rej kab bellok ilo ran ko lok.​—John 10:16.

3. Etke melele eo ad ekãl kin “ebeben in” ej aikwij kamakit kij ñõn ad bed ilo jerbal in ekaiuriur eo an Anij?

³ “Ejamin rumij,” ri kanan eo ej ba. Jesus ear ba bwe ebeben in kiõ enana ejamin jako mae ien eo “naj jejit men kein otemjej.” (Matthew 24:34) Jela eo ad kiõ kin nan ko an ej melelen ke bwe jerbal in kwalok nan eo ad ejjab men in ekaiuriur?a Mol ko rej kalikar bwe oktak eo ej men eo emol! Ebeben in ad kiõ ej deloñe loan juõn tõre eo enana im jorrãn im ejañin kar wor einlok wõt ilo bwebwenato ko otemjej lok iman. (Keiri Jerbal 2:40.) Jej aikwij ekkeini ad bed ilo jerbal in ekaiuriur in. (2 Timothy 4:2) Aolep kanan ko kin ien iñtan eo elap ej kwalok bwe enaj idiñ an itok, ilo mõkaj, ilo ittino​—einwõt juõn ri kwot. (1 Tessalonika 5:1-4; Revelation 3:3; 16:15) “Kin men in komin bareinwõt pojõk, bwe ilo auõ eo komij jab lemnak, Nejin armij ej itok.” (Matthew 24:44) Ke ebeben in enana an armij ej ebakelok jemlokin ñõn an jebeplok, emol jej aikwij jab kõnan jolok kejatdikdik emõn eo ad kin mour indio ilo ad jeblak im “drabilbil ilo birikõt” in men ko an lõl in rej kamad kij!​—2 Peter 2:22; 3:10; Luke 21:32-36.

4. Ta wãwen eo ej kir ñõn kalaplok aikwij ko kin “mõñã ilo ien eo ekkar,” im ewi wãwen air kõtõbrak aikwij in?

⁴ Ñõn mol in kanan eo an Jesus, ilo 1914 kar wor juõn “jinoin iñtan ko” ke armij rar deloñelok “jemlokin jukjuk in bed in.” Buromõj ko, jorrãn ko, im kõtõrãik kien rar orlok lõltak ñõn rainin. (Matthew 24:3-8, 12, NW) Ilo ejja ien in wõt, Jehovah ear kajerbal class in ri karejar eo etiljek im meletlet ñõn an letok “mõñã ilo ien eo ejejjet,” mõñã ko lor jitõb, ñõn ro ilo mweo imõn Master eo air, Christ (Matthew 24:45-47) Jen throne eo an ilõñ ko, Kiiñ in Messiah in ej kiõ tel juõn program ekabwilõñlõñ in najidik mõñã in jitõb ko ilo belakin lõl in.

Elõñ “Mõñã ko”

5. “Mõñã” eo elap ej bõk ta eo ñõn kalimjeke?

⁵ Lemnak kin “kijeir” rej keboji. (Luke 12:42) Men eo elap ilo lãjrak in mõñã eo an Christian ej Nan in Anij, Bible eo. Ñõn an bolemen katakin kin Bible eo, juõn ukok eo jej maroñ konono im ejimwe ej men in aikwij eo moktata. Iumin elõñ yiõ ko aikwij in ear wõnmanlok ilo an jejjet kitien, elaptata ilo jinoin yiõ eo 1950 eo ke book eo New World Translation of the Christian Greek Scriptures ear tõbrak ilo kajin English. Tok ñõn 1961 eo book eo New World Translation kin aolepen Bible eo ear tõbrak im walok, im ear bar walok ilo kajin ko jet. Volume ko 3 rar kwaloki ilo 1996 yiõ in jerbal eo ear tõbar joñan oran in 27, im 14 ian kein rej Bible eo emwij an dedelok. Ñõn jerbale ukok in Bible in, im bareinwõt book in jibañ melele Bible eo, jet 1,174 Christian ro emwij air wujleplok rej kiõ jerbal full-time ilo jerbal in ukok ilo 77 ra ko an Watch Tower Society.

6. Ewi wãwen an Society eo tõbar aikwij eo kin book ko rej jei im kamelele kin Bible?

⁶ Jutak ilikin jerbal in an juõn jar elap in ri ukok ro, ej ran ko 24 jikin jeje book ko an Watch Tower Society rej kõmmõn book ko ilo joñan ko relaplok. Ñõn tõbar jemlok in, elõñlok kein jeje book ko elaplok an mõkaj air jeje rej likiti ilo ra ko relap. Kõmmõn magazine in Imõniaroñroñ im Awake! rej lõñlok wõt jen alliñ ñõn alliñ im emwij air tõbar joñan oran in 943,892,500 copy ko, juõn 13.4-percent laplok ñõn yiõ eo. Joñan kobban aolep Bible ko im book ko rar kõmmõni ilo United States, Brazil, Finland, Germany, Italy, Japan, im Mexico wõt emwij air lõñlok kin 40 percent jen 1995 ñõn 76.760.098 copy ko ilo 1996. Ra ko jet rar bareinwõt bõk kwunair ilo aolepen laplok in kõmmõn book ko.

7. Ewi wãwen an Isaiah 54:2 kwalok kin an laplok ekaiuriur kiõ?

⁷  Elap wõt ijo ikijen laplok in kar aikwij kõmmõne ilo yiõ ko 1990 ko kar kin an jako men eo rar kemoiki ion Ri Kennan ro an Jehovah ilo Eastern Europe im Africa. Kwule kin ekan ko lor jitõb elap ilo jikin kein. Kin men in kir eo ej lamõj kin elaplok ekaiuriur jen mokta. “Kwon kalaplok jikin im nuknuk eo am, im ren erlokwe binjen ko binjen mo ko imõm; kwon jab bõprae: kwon kaitoklok to ko am, im kwon kabin jur ko am.”​—Isaiah 54:2.

8. Ta uak eo ilo joij ej jibañ im letok jurake eo kin money?

⁸ Kin men in, ear men in aikwij ñõn kalaplok jikin jerbal ko ilo elõñ ian ra ko 104 an Society. Kin an bin wãwen economy eo ilo elõñ wõt ian territory kein rekãl rej kab bellok, juõn mõttan eo elap in expense eo ñõn laplok in ej kõllã jen jabawõt ko ñõn jerbal eo ibelakin lõl jen elõñ ailiñ ko remweie. Ekamõnõnõ, bwe congregation ko im kajojo armij ro rar uak kin aolepen burueir, ilo jitibõn Exodus 35:21: “Im rar itok, jabrewõt iair ejelok kõtellok i buruen, im jabrewõt jitõb eo an e ar kamõkite, im rar bõktok air men in lelok ñõn Jeova ñõn jerbal otemjej an.” Kimij bõk ien in ñõn kamolol ro otemjej rar bõk kwunair ilo men in lelok in ilo joij.​—2 Korint 9:11.

9. Ewi wãwen an Rome 10:13, 18 jejjet kitien rainin?

⁹ Ilo 1996 book ko an Watch Tower Society rar lukkun kaibujuij etan Jehovah im karõk ko an ñõn jabõn ko jabõn lõl. Ejja einwõt an kar ri jilek Paul kanan. Ilo an eliji kanan eo an Joel im Psalm 19, ear je: “‘Bwe ro otemjej rej kir etan Iroij re naj mour.’ A ij ba, R’ar jab roñ ke? Aet, emol, Ainikeir ej ilok ñõn aolepen lõl, im nan ko air ñõn ijo ko jemlokõn lõl.’” (Rome 10:13, 18) Inem ilo air kautiej ãt eo eaorõk etan Jehovah, armij ro an rar kõmmõne juõn mõttan eo elap tokjen ilo air kobrak mweo imõn kin aibujuij. Ak, ewi wãwen, an kar nan in keañ in jerammõn elaptata ilo 1996 eo? Joij im etale chart eo tok ilokan ilo peij 18 ñan 21.

Jerbal in Jonikõn eo Ibelakin Lõl

10. Ta wãwen ko remõn kwoj loi ilo makitkit eo an armij ro an Jehovah, einwõt air eliji ilo chart eo ilo peij 18—21?

¹⁰ Nan kein an Jesus jej loi ilo Luke 10:2 elaplok kajuriir jen mokta: “Elap jonikõn, a reiet dri marmir. Inem komin jar im kajitõk iben Iroij an jonikõn bwe En jilkinlok ro dri marmir ilo An jonikõn.” Kwoj uak ke ñõn kir in? Million armij ro ibelakin lõl rej. Men in ej alikar jen joñan oran in ekãl 5,413,769 in ri kwalok nan ro an Ailiñ eo ro rar report kin jerbal in kwalok nan ilo yiõ eo 1996. Bareinwõt, 366,579 brother im sister ro rekãl rar baptais. Elap ad kaorõk “men ko remõn an ailiñ ko otemjej,” ro rej kiõ ‘kobrak imõn kabuñ eo an Jehovah kin aibujuij’!​—Haggai 2:7.

11. Etke kij aolep ewor un eo ibbed ñõn an lap ad lõñliñ?

¹¹ Report ko kin laplok eo ilo melan kein rekãl rej kab bellok rekabiwlõñlõñ. Kij ro jet jej lalorjede ke Ri Kennan ro jet ro rej kiõ lõñliñ kin eddeklok in? Jen ad eindein, jej lõñliñ ibbeir. Aolep ailiñ ko ijjino eo air ear dik. Ri kanan eo mõttan Haggai ilo tõre eo, Zechariah, ear je: “Wõn ear kajekdon ran eo ran in men ko redik?” (Zechariah 4:10) Elap ad lõñliñ bwe ilo ailiñ ko jerbal in kennan emwij an dedelok im jutak, ewor kiõ million ri kwalok ro an Ailiñ eo, im emakijkij air jerbal ilo territory ko ie, im meñe kajojo week ilo elõñ bukwon ko relaplok. Ewor ke unin bwe jen kadikdiklok ilo ien in kiõ ke Jehovah ej kaetoklok ien in emõn ñõn lomor ñõn jikin ko mokta im ear mo kwalok nan ie? Ejelok! “Lõl e jikin kallip,” Jesus ear ba. (Matthew 13:38) Juõn kwalok nan eo elet rej wõnmanlok wõt im kõmmõne, einwõt kar ri kalor ro jinoin ear let air kennan im kwalok nan ilo jemlokin jukjuk im bed eo an ri Jew ro.​—Jerbal 2:40; 10:42; 20:24; 28:23.

Wõnmanlok Wõt

12. Ta un eo ewor ibbed ñõn emakit “manlok wõt ilo jimwe”?

¹² Aet, jej aikwij debij wõt joñan kõtan eo, im emakit im “jimwe manlok wõt” ibben chariot in enjel ro ilõñ an Jehovah. (Ezekiel 1:12) Jej kememej nan ko an Peter: “Iroij e jab kemmer kin an kalimur, einwõt jet rej watõk rumij, a Ej meanwõr ñõn kom, im jab kõnan bwe jabrewõt en jako, a bwe ren otemjej itok im ukwelok ibeir.” (2 Peter 3:9) Jen kõtlok bwe wanjoñok in kijejeto eo an ro jeir im jatir ilo ene ko rejerata en itok iod im lujur kij. Jabdewõt men in rumijlok eo ej alikar ilo an iten waloktok Armageddon ej kõtlok ien bwe buki thousand ren aintok ir ilo ailiñ kein im bareinwõt ebar lõñ ro jet ilo territory ko emõn jerbal ie. Jab bwid ilo am lemnak bwe: “Ran eo elap an Jehovah ebaktok. Ej ebak, im ewor juõn ekaiuriur elap kake.” (Zephaniah 1:14) Jej aikwij ekaiuriur kake ijo kwunad bareinwõt ilo ad kõmmõne juõn nan in kennan eo elet im eliktata!

13, 14. (a) Ta eo jemaroñ ba kake kin leto-letak book ko ilo yiõ eo 1996? (b) Ta karõk eo einjuõn congregation ko remaroñ kõmmõne kajojo yiõ, im ewi wãwen am karõk ñõn am bõk kwunam?

¹³ Meñe tibdik ko rejjab walok ilo chart in jerbal eo, ewor laplok ilo joñan leto-letak Bible ko, book ko, im magazine ko ilo yiõ eo lok. Ñõn wanjoñok, magazine ko rar likiti ibben armij ibelakin lõl ear walok joñan in 19-percent laplok, juõn tarlep in joñan in 543,667,923 copy ko rar likiti ibben armij ro. Magazine ko ad rej kõmmõn an bidodolok jerbal in kwalok nan​—ilo ial ko, ilo jikin park ko, ilo jikin bõjrak ko an bus, ilo melan jikin business ko. Report ko rej kwalok bwe ilo jet territory ko me ekkã kwalok nan ie, armij ro rekabel rej bwilõñ kin baotokin magazine ko ad im aorõkin melele ko ie, im rej uak ñõn kõmmõn karõk in katak Bible.

¹⁴ Kajojo yiõ ilo alliñ in April, congregation ko ekkã air kõmmõn karõk kin jerbal in leto-letak magazine, ilo aetokan juõn ran in karelel jen em ñõn em im ilo jikin ko armij rej bed ie. Congregation eo am en bõk ke kwunan ilo April ilo yiõ en 1997? Magazine ko remõn emwij keboji ñõn yuk, im jerbal in lelok magazine in naj kõmmõne ilo juõn wõt ien ibelakin lõl emol enaj men in kabwilõñlõñ! Ilo ailiñ in Cyprus, congregation ko ie, ilo air kajerbal eon in einwõt kajin eo ñõn jibadbad im kõtõbar eo air “jibadõk jabdewõt armij joñan wõt ad maroñ kin ennan eo an Ailiñ eo,” rar etal wõt kake aolep alliñ kin karõk eo ikijen jerbal in magazine eo, im tõbar juõn oran eo ekãl kin joñan in 275,359 rar leto-letak ilo yiõ eo, juõn laplok eo ej 54-percent.

Ennan ko an Haggai Eliktata

15. (a) Etke Jehovah ear jilkinlok bar ennan ko jet ikijen Haggai? (b) Ta katak eo ennan eo kein kajilu an Haggai ej aikwij jaketok ñõn kij?

¹⁵ Jehovah ear jilkinlok Haggai, 63 ran ko elikin an kwalok ennan eo an kein karuo, ibben juõn nan in keañ eo kein kajilu eo jemaroñ bõk ñõn buruer rainin. Haggai ear konono einwõt ñe ri Jew ro rar ejake bedbedin temple eo, eo rar lukkun ejake 17 yiõ ko lok iman. Bar juõn alen Jehovah ear lo bwe ekkar ñõn kõmmõne juõn jerbal in karreo. Priest ro im armij ro rar jerwan ilo air kejbarok jerbal ko air; im kin men in rar etton ilo mejen Jehovah. Emaroñ ke bwe jet ian armij ro an Jehovah rej kallemaj peiir rainin, ilo air keboub ir make ilo wãwen anemkwoj im arok mweiuk ko an lõl in? Ej men in ekaiuriur bwe kij otemjej jen bõk ñõn buruer nan ko “jen rainin im wõnmanlok” ñõn bõktok aibujuij ñõn etan Jehovah, im liki kallimur eo an: “Jen rainin I naj lewoj jerammõn.”​—Haggai 2:10-19; Hebrew 6:11, 12.

16. Ta “ididik” eo ej ebaktok, im ta eo enaj walok?

¹⁶ Ilo ejja ran eo wõt, nan eo an “Jehovah in inelip eo” ear itok ñõn ibben Haggai alen eo kein kemen im eliktata. Ear kõjela kin ta eo ekoba ilo an “kamakitkit lõñ ko im lõl,” ilo an ba: “I naj lukkun kokkure throne eo an ailiñ ko im jolok malkan kajur eo an ailiñ ko; im I naj jolok chariot eo im ri uwe ro ion, im horse ko im ri uwe ro ioir renaj lukkun wõnlõltak, kajojo iair jen jãje eo an jein im jatin.” (Haggai 2:6, 21, 22) Ilo wãwen in “ididik” eo enaj tõbar joñan kajur in ñe Jehovah ej kadedelok an karreoik lõl in ilo Armageddon. “Men ko remõn an ailiñ ko otemjej” enaj dedelok air deloñtok, ñõn ejake iolaplapin jukjuk im bed eo an armij ñõn lõl eo ekãl. Rej un ko relap ñõn lõñliñ im lelok nebar ñõn Jehovah!​—Haggai 2:7; Revelation 19:6, 7; 21:1-4.

17. Ewi wãwen air kar likit Jesus einwõt juõn “ring in seal”?

¹⁷ Ilo an kejemlok bwebwenato eo an, Haggai ej je: “‘Ilo ran en,’ ej nan eo an Jehovah in inelip eo, ‘I naj bõk yuk, O Zerubbabel . . . , im I naj lukkun likit yuk einwõt juõn ring in seal, kinke kwoj juõn eo I ar kãlete,’ ej nan eo an Jehovah in inelip eo.” (Haggai 2:23) Christ Jesus ej kiõ einwõt Kiiñ in Messiah im Priest eo Elap an Jehovah, ej kobaiktok office ko ilo lõñ ko me Komja eo Zerubbabel im Priest eo Elap Joshua rar jenolok im jerbal ie ilo Jerusalem eo ilõl. Einwõt juõn ring in seal in kien ion anbwijmaroñin Jehovah, Jesus ej e eo emwij an erom “Aet” einwõt men eo Jehovah ej kajerbale in bõktok ñõn an mol elõñ “kallimur ko an Anij.” (2 Korint 1:20; Epesõs 3:10, 11; Revelation 19:10) Likieo in ennan in kanan eo ilo Bible ej jitõñlok ñõn men in letok eo an Jehovah kin Christ einwõt Kiiñ im priest in Ri Binmour eo.​—John 18:37; 1 Peter 1:18, 19.

18. Ewi wãwen nan in kejemlok eo kin “nan eo an Jehovah in inelip eo” enaj wor juõn jejjet kitien ekalõñliñ?

¹⁸ Emol ilo ran in ad, aibujuij eo elaptata jej maroñ loe ilo temple eo ilo jitõb eromak an Jehovah! Im ejjabto, elikin an Jehovah torelok aolepen jukjuk im bed eo an Satan, Haggai 2:9 enaj bar jejjet ilo kitien eo elaplok: “‘Ilo jikin in I naj lelok ainemõn,’ ej nan eo an Jehovah in inelip eo.” Ainemõn eliktata!​—juõn ainemõn etto an bed, ijoko otemjelok, eo Jehovah ear jortoklik kake ikijen “ring in seal eo,” Christ Jesus, “Iroij in Ainemõn,” eo emwij jeje kake: “E naj ejelok jemlokõn orlok in men in iroij eo An . . . Kijejeto an Jehovah in inelip eo e naj kõmõn men in.” (Isaiah 9:6, 7) Ñõn indio aibujuij eo an imõn kabuñ eo an Jehovah enaj alikar iaolepen jikin eainemõn in iroij bõtata eo an ijoko otemjelok. Jen bed im tõt wõt ilo mwin!​—Psalm 27:4; 65:4; 84:10.

[Kamelele eo itulal]

Kwo Maroñ ke Kamelele?

◻ Rainin, ewi wãwen an mweo imõn Jehovah ‘obrak kin aibujuij’?

◻ Etke ejañin kar wor joñan an laplok ekaiuriur ñõn kwalok kin news eo emõn?

◻ Ta un eo ñõn kwalok nan ilo ekaiuriur 1996 Report in Yiõ in Jerbal eo ej letok?

◻ Ewi wãwen an Christ jerbal einwõt “ring in seal” eo an Jehovah?

[Jaat ilo peij 16-19]

1996 SERVICE YEAR REPORT OF JEHOVAH’S WITNESSES WORLDWIDE

(Lale bok in)

[Pija ko ilo peij 14, 15]

“Men ko remõn an ailiñ ko otemjelok” rej ainitok ilo Ene ko ilo Lometo (1), South America (2), Africa (3), Asia (4), North America (5), im Europe (6)