“Jeova E Jamin Jolok Dri Ailiñ Ro An”

“Elõñ iñtan an ro remõn, a Jeova ej lomorir jen ir otemjej.”​—PSALM 34:19.

1, 2. (a) Ewi wãwen an Jehovah kajerammõn armij ro an rainin? (b) Ta eo elõñ Christian ro rej jelmae, im ta kajitõk ko rej walok?

ILO KAJEJJET KITIEN kanan eo ilo Bible, ri kabuñ ro an Jehovah rej jokwe ilo juõn paradis e ilo jitõb. (2 Korint 12:1-4) Ri Kennan ro an Jehovah rej juõn dolul in jimjen jimjatin ibelakin lõl im yokwe im burukuk ej alikar ibbeir. (John 13:35) Rej lõñliñ kin juõn jelalokjen eo emwilõl kin mol ko ilo Bible. (Isaiah 54:13) Elap air kamolol Jehovah bwe ej lelok ñõn ir jerammõn in air ruwainene ilo imõn kabber eo an ilo jitõb!​—Psalm 15:1.

² Ke ro otemjej ilo dolul eo an Jehovah rej lõñliñ kin jerammõn eo ilo jitõb, jet rej einwõt mour ilo ainemõn im jokane ilo juõn joñan ke ro jet rej jelmae inebata ko reinjuõn. Elõñ Christian rej lo ir make ilo juõn wãwen liãjlol iumin juõn ien eo eaetok ilo an ejelok jabdewõt kejatdikdik ñõn rõlok jene. Ekkã an armij ebwer iumin kain wãwen kein. (Jabõn Kennan 13:12) Jorrãn ko rej walok rej menin kalikar ke kin an Anij jab buñburuen kake kij? Jehovah ej letok ke kejbarok eo einjuõn ñõn jet Christian ke ej karmijetek ro jet?

3. (a) Abañ ko armij ro an rej iioni rej jen Jehovah ke? (b) Etke ri kabuñ ro retiljek an Jehovah rej iion iñtan eo an armij bareinwõt?

³ Bible ej uak: “Ejelok armij en ba ñe kabo e Anij ej kabo iõ: bwe men ko renana re ban kabo Anij, im Ej kabo ejelok armij.” (James 1:13) Jehovah ej Ri Kejbarok im Ri Lale armij ro an. (Psalm 91:2-6) “Jehovah e jamin jolok dri ailiñ ro an.” (Psalm 94:14) Ejjab melelen men in bwe ri kabuñ ro retiljek rejamin iion iñtan. Armij ro rar jolete jab wãppen rej iroij ilo jukjuk in bed in an lõl. Elõñ renana, im jejjo relukkun nana. Ejelok iair ej reilok ñõn Jehovah ñõn bõk melelet. Tokjen men in ej walok an lap an armij iñtan. Bible eo ej lukkun kalikar bwe armij ro an Jehovah rejjab maroñ bõpraik tokjen ko rekaburomõjmõj rej walok kin jab wãppen im mõjno eo an armij ien otemjej.​—Jerbal 14:22.

Christian ro Retiljek Rej Kõtmene Iñtan

4. Ta eo Christian ro otemjej remaroñ kõtmene kake toan wõt air mour ilo jukjuk in bed in enana, im etke?

⁴ Meñe rejjab mõttan lõl, ri kalor ro an Jesus rej mour ibwiljin jukjuk im bed in. (John 17:15, 16) Bible eo ej kajerwawaik Satan einwõt kajur eo elap ilikin lõl in. (1 John 5:19) Kin men in, Christian ro otemjej remaroñ kõtmene bwe elañe jab kiõ wõt inem tokelik renaj jelmae abañ ko rekauatata. Ilo an men in bed ilo lemnak eo an, ri jilek Peter ej ba: “Komin jadõr, komin ekil: dri kijirãte kom, devil eo, einwõt laion e rorror, ej etetal wõt im bukot eo ej maroñ in kõñi: Eo komin jutak jumae im bin ilo ami tõmak, bwe kom jela bwe iñtan ekin ro jeiõmi im jãtõmi rej bed i lõl, rej iñtan kaki.” (1 Peter 5:8, 9) Aet, aolepen bed eo an jimjen jimjatin Christian ro remaroñ kõtmene kin iñtan ko.

5. Ewi wãwen an kar Jesus kalikar bwe Christian ro retiljek renaj iion iñtan ko ilo air mour?

⁵ Meñe emwilõl ad yokwe Jehovah im jej tiljek ñõn nan in kaiñi ko an, jenaj iion wõt men ko rekaburomõjmõj ilo mour. Jesus ear kalikar men in ilo wanjoñok eo an emwij je ilo Matthew 7:24-27, ijo ear keiri kõtan eo ikõtan ro rej bokake nan ko an im ro rejjab. E ar keiri ri kalor ro an rej bokake ñõn juõn emaan eo emeletlet eo ear kalek juõn em ion bar. Ro rejjab bokake nan ko an ear kõkkar kake ir ñõn juõn emaan bwebwe eo ej kalek mweo imõn ion bok. Elikin juõn lañ ekajur, mweo wõt kar kalek ion bar ej bed wõt. Lale bwe ilo wãwen eo kin mweo imõn leo emeletlet, “e buñ wut, im ibij liplip, im lap kõto, im iun mweo; im ej buñ: im elap an buñ.” Jesus ear jab kallimur bwe leo emeletlet enaj kar lõñliñ kin ainemõn im jokane ilo ien otemjej. Ak, jela eo an lein enaj kar keboj e ñõn lañ ko. Juõn lemnak eo einlok wõt ej walok ilo wanjoñok eo kin ri jeor eo. Ilo wanjoñok in Jesus ej kamelele bwe meñe ri kabuñ ro rej bokake “ro emol im emõn burueir” renaj kar “kijenmij ilo air jebar leen.”​—Luke 8:4-15.

6. Ilo wanjoñok eo an Paul kin kein jerbal ko rebin ñõn jumae kijeek, wõn ro rej jelmae melejoñ eka kijeek ekakijeekek?

⁶ Ilo an kar jejelok ñõn ri Korint ro, ri jilek Paul ear kajerbal kajin kõkkar ko ñõn wanjoñok kin aikwij eo ñõn bõk kadkad ko rebin remaroñ jibañ kij jelmae melejoñ ko. Kain men kein rekeie einwõt gold, silver, im dekã aorõk rej uanlok wõt kadkad ko kadkadin Anij. (Keiri Jabõn Kennan 3:13-15; 1 Peter 1:6, 7.) Ilo wãwen eo tu-rãjet, kadkad ko ilo kanniek rej einwõt men ko eibododo air jorrãn. Inem Paul ej ba: “Jerbal an jabrewõt armij e naj alikar: bwe ran eo e naj kwalok e, bwe e naj walok ilo kijeek; im kijeek en e naj melejoñ jerbal an jabdewõt armij ie ein. Elañe jerbal an jabrewõt armij im e ar kalek na ion, e naj berwõt, e naj bõk jenekjij.” (1 Korint 3:10-14) Bar ijin, Bible eo ej kamelele bwe kij otemjej jej naj jelmae wõt jet wãwen melejoñ eo ekakijeekek.

7. Ekkar ñõn Rome 15:4, ewi wãwen an Jeje ko ilo Bible jibañ kij kijenmij iumin melejoñ ko?

⁷ Elõñ bwebwenato ko ilo Bible kin ri karejar ro retiljek an Anij ro rar kijenmij iumin iñtan ko, jet ien iumin juõn ien eo eaetok. Ak, Jehovah ear jab karmijetek ir. Ri jilek Paul ear einwõt wor wanjoñok rot in ilo an lemnak ke ear ba: “Bwe jabrewõt men ko ar jeje mokta, ar jeje ken katakin kij, bwe kij kin kijenmij, im kin ainemõn jen Jeje ko en maroñ or ar kejatrikrik.” (Rome 15:4) Lemnak kin wanjoñok eo kin lõmaro jilu, ke rar mõnõnõ kin juõn kõtan eo ebak ibben Anij, rar bed ilo elõñ iñtan ko.

Men eo Jej Katak Jen Bwebwenato ko ilo Bible

8. Ta eo Jehovah ear kõtlok ilo case eo kin Joseph, im ewi toõn?

⁸ Jehovah ear buñburuen ibben Joseph leo nejin Jacob ke ear dik wõt. Ak, ikijen ruen eo ear jab jen e make, ear iñtan kin elõñ lãjrak in iñtan ko. Lõmaro jein rar kwot e im lej ñõn e. Rar wia kake e einwõt juõn ri kamakoko ilo juõn enen ruamaijet ijo rar riap nae im naruen im likit e ilo juõn “kalbuj.” (Genesis 40:15) Ijo, “rar kejorran neen kin feter ko, im r’ar likit e ilo tomere ko.” (Psalm 105:17, 18) Ilo ien eo ear ri kamakoko im bed ilo prison, ejelok bere Joseph ear eljinmen an eowor ñõn Jehovah bwe en kõtloke. Ak, ilo enañin 13 yiõ ko, meñe Jehovah ear kakajur e ilo elõñ wãwen ko, ear rujtok wõt jibboñ otemjej einwõt juõn ri kamakoko ak juõn ri kalbuj.​—Genesis 37:2; 41:46.

9. Ta eo David ear aikwij kijenmij kake iumin elõñ yiõ ko?

⁹ Juõn wãwen eo einlok wõt kar kin David. Ke Jehovah ear kãlet juõn emaan eo kadkadin kar tellokin an iroij ñõn Israel, ear ba: “Emwij aõ lo David nejin Jesse, armij buruen einwõt buruõ.” (Jerbal 13:22) Meñe bed eo an ear emõn iman mejen Jehovah, David elap an kar iñtan. Ilo kauatata ñõn mour eo an, ear tilekek iumin elõñ yiõ ko ilo ene jemaden, ilo roñ ko, im ion bũdej in enen ruamaijet. Ke rar kakkiduduiki einwõt men in mour awia, ear iñtan kin an inebata im mijak. Mekarta, ear kijenmij ilo kajur eo an Jehovah. David ear maroñ ba ilo jimwe jen iminene eo an make: “Elõñ iñtan an ro remõn, a Jeova ej lomorir jen ir otemjej.”​—Psalm 34:19.

10. Ta jorrãn eo elap ear walok ñõn Naboth im family eo an?

¹⁰ Ilo ran ko an ri kanan Elijah, ear wor 7,000 wõt ilo Israel ro rar jab bukwelõlõ ñõn anij wan eo Baal. (1 Kiiñ 19:18; Rome 11:4) Naboth, eo ear einwõt juõn iair, ear oktak im jorrãn jen juõn jemlok nana in ekajet eo ear jab jimwe. Ear iñtan kin air naruen kin blasphemy. Ke rar naetan ri nana, ri utiej ro rar keañ bwe ren kade ñõn mij, im bõtõktõkin kidu ko rar nome. Lõmaro nejin bareinwõt rar mõn ir ñõn mij! Ak, kar ejelok ruen kin bwid eo rar naruen kake. Ri kamol ro nae e rar ri riap. Aolepen wãwen eo kar jarjar jen Queen Jezebel bwe king eo en kar bõk jikin kallip in grape eo an Naboth.​—1 Kiiñ 21:1-19; 2 Kiiñ 9:26.

11. Ta eo ri jilek Paul ej jiroñ kij kake kin maan im kõrã ro retiljek ilo bwebwenato in Bible?

¹¹ Joseph, David, im Naboth rej jilu ian maan im kõrã ro relõñ im tiljek kar kwalok kake ir ilo Bible ro rar iñtan jen jorrãn ko. Ri jilek Paul ear je juõn bwebwenato kin juõn lãjrak in ro ri karejeran Jehovah iumin ebeben ko. Ear konono ie kin ro rar “melejoñ ir kin kajirere im dreñlokwe ko, aet, kin kworak ko im prison. Ar kare ir kin dreka, im bukwe ir kin jirben, im kabo ir, im mõn ir kin jãji: r’ar etetal im kõnõk kilin s̃ip im goat ko; ilo jeramel im jorrãn im kokkure, im lõl ej betkake ir, r’ar jebwãbwe i ene jemaren ko im tol ko im roñ ko ilo lõl.” (Hebrew 11:36-38) Ak Jehovah ear jab karmijetek ir.

Jehovah Ej Kea kin Ro Rej Iñtan

12. Ta jet ian jorrãn ko Ri Kennan ro an Jehovah rej iioni rainin?

¹² Ak ta kin armij ro an Jehovah rainin? Einwõt juõn dolul, jemaroñ watõk bwe enaj wor kejbarok eo ekwojarjar im juõn ial eo ejelok kauatata ie ilo ran kein eliktata im iñtan eo elap. (Isaiah 54:17; Revelation 7:9-17) Bõtab, einwõt kajjojo armij, jej kile bwe “ien im men in walok rej itok” ion armij otemjej. (Ecclesiastes 9:11) Rainin elõñ Christian ri tõmak ro rej iñtan jen jorrãn ko. Jet rej kijenmij iumin elap jeramel. Bible ej konono kin Christian “atajinemjen ro im kõra ejoko beleir” ro ewor air iñtan. (James 1:27) Ro jet rej iñtan jen jorrãn ko rej make walok, tarinae ko, kowadoñ ko, kajerbal maroñ ilo bwid, nañinmij, im mij.

13. Ta wãwen ko rebin rar report kaki ilo ran ko kiõ?

¹³ Ñõn wanjoñok, ilo report ko air kin yiõ in jerbal eo 1996 ñõn Governing Body eo an Ri Kennan ro an Jehovah, Watch Tower branch office ko rar kwalok bwe jet ian jimjen jimjatin maan im kõra ro rej iñtan ilo kalbuj ilo wãwen ko rekaburomõjmõj kin air tiljek wõt ñõn nan in kaiñi ko ilo Bible. Jilu congregation ko ilo juõn ailiñ ilo South America rar jibliklok ke kumi in kõmmõn kiojaljal ko rar jibed buki Ri Kennan ro bwe ren diojlok jen melan eo. Ilo juõn ailiñ ilo tueañ in Africa, jet Ri Kennan rar lorak ilo juõn tarinae edik im rar mij. Ilo juõn ailiñ in Central America, jet jimjen jimjatin ro rar bed kadede ilo abañ ko kin wõnãn mour ak rar jelmae juõn kitwõn aire eo ear kalaplok wõt an bin air mour. Ilo jikin ko jet me jeramel im jabwe mõñã emaroñ jab lap abañ ie, karelel ko rewan remaroñ kautameik lõñliñ eo an jet. Ro jet rej inebata kin ijibed ko ilo mour in ran kein. Kin an ejelok an armij itoklimo, ro jet remaroñ ebwer ñe rej kwalok nan kin news eo emõn kin Ailiñ eo.

14. (a) Ta eo jej katak kake jen joñok eo an Job? (b) Jen ad lemnak wan, ta eo jej aikwij kõmmõne ñe jej iion iñtan?

¹⁴ Wãwen kein rejjab melelen bwe Anij ejjab buñburuen kake ir. Kememej wãwen eo kin Job im jumae ko relõñ ear iñtan jeni. E kar “juõn armij e wãppen im wãnik, eo ej mijõk Anij im jeorlok jen nana.” (Job 1:8) Emaroñ kar lap an Job buromõj ke Eliphaz ear naruen kin an kõmmõn bwid! (Job, jebta 4, 5, 22) Jej jab kõnan mõkaj in bõk jemlok in bwe jej iion jorrãn ko kinke jaar kainebataik Jehovah ilo jet wãwen ko ak kinke Jehovah ej bõk kajerammõn eo an. Lemnak wan ilo ien jelmae iñtan emaroñ kamõjnoik tõmak eo ad. (1 Tessalonika 3:1-3, 5) Ñe jej iion iñtan, emõntata kalmenlokjen kin mol eo bwe Jehovah im Jesus rej ebak ñõn eo ewãnik jekdon ta eo ej walok.

15. Ewi wãwen ad jela bwe Jehovah elap an lemnak kin jorrãn ko armij ro an rej iñtan kaki?

¹⁵ Ri jilek Paul ej kallimur ñõn kij ke ej ba: “Wõn enaj kijbil kij jen yokwe an Kraist? E naj jorrãn ke, ak iñtan, ak mator̃tõr, ak nitta, ak kelwan, ak uõta ak jãji? . . . Bwe Ij lemnõk ejjab mij ak mour, e jab enjel rõn ak jiõb ro, e jab men ko kiõ ak men ko re naj itok, e jab kajur ko, e jab utiej ak imlõl, ak jabrewõt bar juõn men in kõmõn, e naj maroñ in kijbil kij jen yokwe an Anij, eo ilo Kraist Jisõs ar Iroij.” (Rome 8:35, 38, 39) Jehovah ej lukkun lemnak kin kij im ejela kin ad iñtan. Ke ear bed wõt ilo an juõn rikoto-kotak, David ear je: “Mejen Jeova ñõn ro remõn, im lojiliñin rebellok ñõn air kir. Jeova ej ebak ñõn ro eruj burueir.” (Psalm 34:15, 18; Matthew 18:6, 14) Jemed ilõñ ej kea kin kij im ej burumõj kin ro rej iñtan. (1 Peter 5:6, 7) Ej letok men eo jej aikwiji ñõn ad kijenmij, kin jabdewõt iñtan jemaroñ ione.

Menin Letok ko an Jehovah Rej Jurake Kij

16. Ta men in letok eo jen Jehovah ej jibañ kij ñõn kijemij, im ewi wãwen?

¹⁶ Meñe jejjab maroñ kõtmene kin juõn mour in anemkwoj jen abañ ilo jukjuk in bed in, jej “jab mõke iad.” (2 Korint 4:8, 9) Jesus ear kallimur ñõn an letok ñõn ro ri kaloran juõn ri jibañ. E ar ba: “Im I naj jar im kajitõk iben Jema im E naj lewoj ñõn kom bar juõn Dri Kainemõn, bwe En bed ibemi in drio; Jitõb õn mol.” (John 14:16, 17) Ilo Pentecost eo ilo 33 C.E., ri jilek Peter ear jiroñlok ri roñjake ro an bwe remaroñ bõk “men in letok eo, Jitõb Kwojarjar.” (Jerbal 2:38) Jitõb kwojarjar eo ej jibañ ke kij rainin? Aet! Kajur eo ej jerbal an Jehovah ej letok ñõn kij leen eo emõn: “Yokwe, lõñliñ, ainemõn, meanwõr, joij, lejokmen, tiljek, inemõn, jadõr.” (Galetia 5:22, 23) Aolep men kein rej kadkad ko reaorõk me rej jibañ kij kijenmij.

17. Ta jet ian mol ko ilo Bible rej kakajurlok tõmak im bebe eo ad ñõn kõtar wõt Jehovah?

¹⁷ Jitõb kwojarjar eo ej bareinwõt jibañ kij ñõn melele bwe iñtan ko ilo ien in “remera im iumelok” ñe keiri ibben jinekjej eo kin mour indio. (2 Korint 4:16-18) Jej tõmak bwe Anij ejamin meloklok jerbal ko ad im yokwe eo jej kwalok ñõn e. (Hebrew 6:9-12) Ilo ad konono nan in kakõrmol ko ilo Bible, jej bõk kainemõn ikijen joñok ko an ri karejar ro etto retiljek ro rar kijenmij ilo elõñ iñtan ko ak rar mõnõnõ. James ej je: “Ro jatiõ, komin bõk juõn joñok kin iñtan im kijenmij jen ro dri kanan, r’ar konono ilo etan Iroij. Lo, jej likit ir remõnõnõ ro r’ar kijenmij.” (James 5:10, 11) Bible eo ej kallimur kin “maroñ eo ekanuij lap” ñõn jibañ kij kijenmij melejoñ ko. Jehovah ej bareinwõt kajerammõn kij kin kejatdikdik in jerkakbiji eo. (2 Korint 1:8-10; 4:7) Ilo ad konono Bible ran otemjej im kalmenlokjen kin kallimur kein, jenaj kakajurlok tõmak eo ad im bebe eo ad ñõn kõttar wõt Anij ilo inemõn.​—Psalm 42:5.

18. (a) Ilo 2 Korint 1:3, 4, ta eo rej kõketak kij kake ñõn ad kõmmõne? (b) Ewi wãwen an Christian overseer ro kamol air unjen kainemõn im kaemlolo?

¹⁸ Kobatok ibben men kein, Jehovah ear letok ñõn kij paradise eo ilo jitõb ijo jemaroñ lõñliñ kin yokwe eo emol an Christian ro jeid im jatid maan im kõra. Kij otemjej ewor juõn ad jerbal ñõn kõmmõne ilo kainemõn don. (2 Korint 1:3, 4) Christian overseer ro elaptata remaroñ juõn unjen elap ñõn kainemõn im kaemlolo. (Isaiah 32:2) Einwõt “men in letok ko ilo armij,” rej jerbal ñõn kalek ro rej iñtan, ñõn “kaberan ro rej kũmkũm,” im “jibañ ro re mõjino.” (Epesõs 4:8, 11, 12, NWT; 1 Tessalonika 5:14) Elder ro rej kõketak ir ñõn air kajerbal Imõniaroñroñ im Awake magazine ko ilo wãwen ewor tokjeir, bareinwõt book ko jet “ri karejar eo e tiljek im meletlet” ej litoki. (Matthew 24:45-47) Men kein ebed ie juõn kakabilek eo emõn ej bedbed ion Bible eo emaroñ jibañ kij lo mejelan​—im meñe bõpraiki​—jet ian abañ ko rej kõmmõn ad inebata. Jen kajeoñwe Jehovah ilo ad kainemõn im kakajur don ilo ien kein rebin!

19. (a) Ta eo ej jibañ kij bõprae jet jorrãn ko? (b) Ilo jemlokin, wõn eo wõt jej aikwij liki, im ta eo enaj kamaroñ kij ñõn jelmae melejoñ ko?

¹⁹ Ke ej mwilõllok wõt ad toloñelok loan ran ko eliktata im wãwen ko ilo jukjuk im bed in rej nanalok wõt, Christian ro rej kõmmõn men eo remaroñe ñõn bõprae jorrãn ko. (Jabõn Kennan 22:3) Bebe emõn, lemnak emõn, im jelalokjen eo kin kien ko ilo Bible remaroñ jibañ kij kõmmõn bebe ko ilo meletlet. (Jabõn Kennan 3:21, 22) Jen eoroñ Nan eo an Jehovah im bokake ñõn bõprae bwid ko ejelok tokjeir. (Psalm 38:4) Mekarta, jej kile bwe ejelok joñan jibadbad ilo ijo kwunar emaroñ jolok iñtan jen mour ko ad. Ilo jukjuk im bed in, elõñ ro rewãnik rej jelmae jumae ko relap. Bõtab, jemaroñ kijenmij ilo melejoñ ko ad ilo ad liki bwe “Jehovah e jamin jolok dri ailiñ ro an.” (Psalm 94:14) Im jejela bwe jukjuk im bed in im jorrãn ko rej walok ie ejjabto renaj jako. Kin men in, jen kabin ilo burued bwe jen jab “mõk ilo kõmõn emõn, bwe ilo ien ekar je naj marmir elañe je jab bãrõk.”​—Galetia 6:9.

Ta eo Jar Katak Kaki?

◻ Ta melejoñ ko aolepen dolul eo an Christian ej iioni?

◻ Ta wanjoñok ko ilo Bible rej jibañ kij melele bwe jorrãn ko rejjab men in kamol kin an Jehovah jab buñburuen kake in?

◻ Ewi wãwen an Jehovah eñjake kin jorrãn ko armij ro an rej iñtan kaki?

◻ Ta jet ian men in letok ko jen Jehovah rej jibañ kij kijenmij kin melejoñ ko?

[Pija ko ilo peij 22]

David, Naboth, im Joseph rej ro jilu rar iñtan jen jorrãn ko