Jen Debij Wõt Tõmak Eo Ad Eaorõk!
“Ñõn ro, emwij air jibarek tõmak eaurõk, einwõt kij.”—2 PETER 1:1.
1. Ta eo Jesus ear ba ilo an kakkil ri jilek ro an, ak ta eo Peter ear kemjãje kake?
ILO joten eo mokta jen an Jesus mij, ear ba bwe aolep ri jilek ro an renaj illok jen e. Juõn iair, Peter, ear ba ilo jãjjãj: “Elañe ir otemjej re naj lõkatip kin Kwe, I jamin lõkatip in drio!” (Matthew 26:33) Ak Jesus ear jela bwe ejamin kar eindein. Eñin unin ear jiroñ Peter ilo ejja ien eo wõt: “A I ar jar kin yuk bwe am tõmak e jamin joko; im ñe emwij am bar oktõk, kwon kakajur ro jeõm im jatõm.”—Luke 22:32.
2. Meñe ear tarjen joñan an Peter liki e make, ta kõmmõn ko an rar kalikar bwe tõmak eo an ear mõjno?
2 Peter, eo ear oktak im tarjen joñan an liki e make ikijen tõmak eo an, ear karmijeteik Jesus ilo ejja joten eo wõt. Jilu alen ear riap im ba bwe ear jaje Christ! (Matthew 26:69-75) Ke ear “jeblak,” nan ko an Master eo an ñõn, “kakajur ro jeõm im jatõm,” remaroñ kar jañ ilojilñin ilo ellaj im alikar. Ilo bwen ien mour eo an Peter nan in kakabilek in ear lap an jelete, einwõt an alikar ilo letter ko ruo an ear jei, ko emwij kejbaroki ilo Bible eo.
Etke Peter Ear Je Letter ko An
3. Etke Peter ear je letter eo an kein kajuõn?
3 Enañin 30 yiõ ko elikin an Jesus mij, Peter ear je letter eo an kein kajuõn, im ear je ñõn ro jein im jaten ilo Pontus, Galetia, Cappadocia, Asia, im Bithynia, melan ko rej kiõ ejaake tueañ im turilik in Turkey eo ran kein. (1 Peter 1:1) Ri Jew ro, me jet iair remaroñ kar oktak im Christian ilo Pentecost eo ilo 33 C.E. eo, ejelok bere rar ibwiljin ro Peter ear jeje ñõn ir. (Jerbal 2:1, 7-9) Elõñ rar ri Gentile (ri Ailiñ ko) ro me rar iion melejoñ ko rekakijeekek ilo pein ri jumae ro air. (1 Peter 1:6, 7; 2:12, 19, 20; 3:13-17; 4:12-14) Inem Peter ear jeje ñõn rein jein im jaten ñõn kakajur ir. Kõtõbar eo an kar ñõn jibañ ir bõk “tokjen ami tõmak, lomoren ami.” Kin menin, ilo nan in kõketak eo an mokta jen ear illok, ear rejañ: “Komin jutõk jumae [Devil eo] im bin ilo ami tõmak.”—1 Peter 1:9; 5:8-10.
4. Etke Peter ear je letter eo an kein karuo?
4 Tokelik, Peter ear je letter eo kein karuo ñõn Christian rein. (2 Peter 3:1) Etke? Kinke ear wor juõn menin kalelñoñ elaplok. Armij ro etton wãwen air mour renaj kar kajeoñ kalaplok mwil nana eo air ibwiljin ri tõmak ro im renaj kar telbiloik jet! (2 Peter 2:1-3) Bareinwõt, ear kakkil kin ri kajirere ro. Ear je ilo letter eo an kein kajuõn bwe “jemlokõn men otemjej ej ebaktok,” im kiõ ealikar bwe jet rar kajirere kin lemnak in. (1 Peter 4:7; 2 Peter 3:3, 4) Jen etale letter eo kein karuo an Peter im lale wãwen an kar kakajurlok ro jein im jaten rar bed im bin ilo tõmak eo. Ilo katak in kein kajuõn, jenaj etale 2 Peter jebta 1.
Un eo kin Jebta 1
5. Ewi wãwen an Peter keboje ri konono ro an kin juõn konono ikijen abañ ko?
5 Peter ejjab mõkaj im kwalok abañ ko relap. Ak, ej keboje wãwen eo ñõn konono kin abañ kein relap ilo an ejaake kamolol eo an ro rej konono jeje eo an kin men eo rar bõke ke rar erom Christian. Ej kakememej ir kin kallimur ko remõn an Anij im kin kanan ko rekeie ilo Bible. Ej kõmmõne menin ilo an jiroñ ir kin ukõt mõran eo, vision eo e make ear bõke kin Christ ilo kajur in Ailiñ eo.—Matthew 17:1-8; 2 Peter 1:3, 4, 11, 16-21.
6, 7. (a) Ta katak eo jemaroñ katak jen nan in ijjino eo ñõn letter eo an Peter? (b) Elañe jej lelok kakabilek, kain nan in kamol rot eo jet ien emaroñ menin jibañ ñõn ad kõmmõne?
6 Jemaroñ ke bõk juõn katak jen nan in kabellok eo an Peter? Nan in kakabilek ko ejjab laplok an emõn ad bõke ke elañe jej elij mokta ibben ro rej roñjake kin wãwen ko kin kejatdikdik eo elap kin Ailiñ eo me kij jimor jej kejbaroke? Im ta kin kajerbal jela eo an juõn armij? Bõlen, elikin an Jesus mij, Peter ekkã an konono kin an lo vision eo an Christ ilo aibujuij in Ailiñ eo.—Matthew 17:9.
7 Bareinwõt, kememej, bwe ilo an kar maroñ, ilo ien eo Peter ear je letter eo an kein karuo, Gospel eo an Matthew im letter eo an ri jilek Peter ñõn ri Galetia ear lap an ajeded. Inem likjap eo an Peter im bareinwõt tõmak eo an emaroñ kar lap jela kake ibwiljin armij ro ilo tõre ko an. (Matthew 16:21-23; Galetia 2:11-14) Bõtab, menin, ear jab jolok anemkwoj in kennan eo an. Emol, emaroñ kar kõmmõn bwe letter eo an en laplok an karel ro rar jela kin mõjno ko air make. Kin menin, ñe jej jibañ ro ewor air abañ, ejamin laplok an bolemen ke ñõn ad kamol bwe kij bareinwõt jej itok wõt in bar kõmmõn bwid?—Rome 3:23; Galetia 6:1.
Juõn Yokyokwe in Kakajur
8. Ilo wãwen et eo Peter ear kajerbal nan eo “tõmak”?
8 Lemnak kin wãwen nan in yokyokwe eo an Peter. Ear mõkaj im kwalok kin unin tel eo kin tõmak, im ear kwalok ñõn ri konono ro an einwõt “ro emwij air jibadek tõmak eaurõk, einwõt kij.” (2 Peter 1:1) Ijin kajin in “tõmak” emaroñ melelen “karelel eo ebin” im ej jitõñlok ñõn mõttan eo elap kin tõmak im katak ko an Christian, ko ilo Jeje ko jet ien rej naetan “mol eo.” (Galetia 5:7; 2 Peter 2:2; 2 John 1) Nan in “tõmak” ekkã kajerbale ilo wãwen in jen wãwen eo kin liki eo rej likiti ibben juõn armij ak men.—Jerbal 6:7; 2 Korint 13:5; Galetia 6:10; Epesõs 4:5; Jude 3.
9. Etke nan in yokyokwe eo an Peter ear laptata an okmãnãn ñõn ri Gentile ro (ri Ailiñ ko)?
9 Nan in yokyokwe eo an Peter emaroñ kar einwõt okmãnãn ñõn ri konono in Gentile ro. Ri Jew ro ear ejelok air lok kar ibben ri Gentile ro, rar meñe kijirate ir, im kalijeklok eo nae ri Gentile ro rekin bed wõt ibwiljin ri Jew ro im rar oktak im Christian. (Luke 10:29-37; John 4:9; Jerbal 10:28) Ak, Peter, juõn ri Jew ikijen lotak im juõn ri jilek an Jesus Christ, ear ba bwe ri konono ro an—ri Jew ro im ri Gentile ro—rar bõk ejja tõmak eo wõt im lõñliñ kin jerammõn eo uan wõt eo ibben.
10. Ta katak ko jemaroñ katak jen nan in yokyokwe eo an Peter?
10 Lemnak kin katak ko remõn nan in yokyokwe eo an Peter ej katakin kij rainin. Anij ejjab kalijeklok; ejjab yokwe juõn bwij ak ailiñ ion bar juõn. (Jerbal 10:34, 35; 11:1, 17; 15:3-9) Einwõt an kar Jesus make katakin, Christian otemjej rej jimjen jimjatin, im ejelok iad ej aikwij eñjake an utiejlok. Bareinwõt, nan in yokyokwe eo an Peter ej kalikar bwe kij jej juõn dolul in jimjen jimjatin ibelakin lõl, eo emwij air jibadek tõmak “einwõt” eo ear wor ibben Peter im ri jilek ro rejtan.—Matthew 23:8; 1 Peter 5:9.
Jelalokjen im Kallimur ko an Anij
11. Ilokanlok nan in yokyokwe eo an, ta men ko elap tokjeir Peter ej kalikari?
11 Elikin nan in yokyokwe eo an, Peter ej je: “Joij ñõn kom im ainemõn en lõñlok.” Ewi wãwen an joij im ainemõn maroñ laplok ñõn kij? “Ilo jela Anij im Jisõs Kraist ar Iroij,” Peter ej uak. Inem ej ba: “Bwe An kajur einwõt an Anij, e ar letok ñõn kij men ko otemjej rekkar ñõn mour im kõmõn ekwojarjar.” Ak ewi wãwen ad bõk men kein elap tokjeir? “Kin jela Eo e ar kir kij ilo An aibujuij im maroñ.” Ilo wãwen in ruo alen Peter ej kalikar bwe jelalokjen eo ejimwe kin Anij im Nejin elap tokjen.—2 Peter 1:2, 3; John 17:3.
12. (a) Etke Peter ear kalikar aorõkin jelalokjen eo ejimwe? (b) Ñõn lõñliñ kin kallimur ko an Anij, ta eo mokta jej aikwij kar kõmmõne?
12 “Ri kaki wan ro” Peter ear kakkil kake ilo jebta 2 rej kajerbal “nan in etao ko” ñõn mone Christian ro. Ilo wãwen in rej kajeoñ kabo Christian ro liklok ñõn loan mour etton eo rar deod jen e. Tokjen ko ñõn jabdewõt eo emwij lomoren e ikijen “jela Anij im Jisõs ar Iroij” im tokelik rej lelok ir ñõn etao rot in rej jorrãn. (2 Peter 2:1-3, 20) Ealikar ilo an kar kõtmene kin an konono kin abañ in tokelik, Peter ej kalikar ilo jinoin letter eo an kin jerbal eo an jelalokjen eo ejimwe ñõn debij wõt juõn jutak erreo ibben Anij. Peter ej lo bwe Anij “E ar letok muri ko An relaptata im aurõk; bwe ilo ir komin dri bõk mõtõn biktokin Anij.” Ak, ñõn lõñliñ kin kallimur kein, ko rej mõttan tõmak eo ad, Peter ej ba, jej aikwij mokta kar “ko jen kõt eo ej bed ilo lõl kin mõm ko renana.”—2 Peter 1:4.
13. Ñõn ta eo Christian ri kabit ro im “sip ro jet” jimor rar beek ñõn air debij wõt?
13 Ewi wãwen am lemnak kin kallimur ko an Anij? Ilo wãwen eo bwen Christian ri kabit ro rej lemnak kake ke? Ilo 1991, Frederick Franz, president eo ilo ien eo an Watch Tower Bible and Tract Society, eo ear bed ilo jerbal in kwalok nan full-time iumin elõñlok jen 75 yiõ ko, ear kwalok eñjake eo an ro rar kejatdikdik ñõn air iroij ibben Christ: “Kimij debdeb lõltak wõt ñõn awa in, im kimij etal im debdeb wõt mae ien eo emwij an Anij kamol bwe e ej mol ñõn kallimur ko an ‘muri ko An relaptata im aurõk.’” Brother Franz ear bed wõt ilo an liki kallimur eo an Anij kin juõn jerkakbiji ñõn mour ilõñ, im ear bin wõt ñõn tõmak in mae ien eo ear mij ke ej 99 yiõ dettan. (1 Korint 15:42-44; Pilippai 3:13, 14; 2 Timothy 2:10-12) Ilo wãwen in lok wõt, million armij ro rej debij wõt tõmak in, im kalimjek wõt kallimur eo an Anij kin juõn paradise ilõl ilo eo armij ro renaj mour ñõn indio ilo mõnõnõ. Kwoj juõn ian rein ke?—Luke 23:43; 2 Peter 3:13; Revelation 21:3, 4.
Uak ñõn Kallimur ko an Anij
14. Etke Peter ej kalãjrak mour emõn einwõt kadkad eo moktata ñõn kõke ñõn tõmak?
14 Jej kamolol ke Anij kin men eo emwij an kallimur kake? Elañe eindein, Peter ej kamelele, jej aikwij kwaloke. “Aet, im kin men in” (kinke Anij emwij an letok ñõn kij kallimur ko rekanuij aorõk), jej aikwij kijejeto ilo tõmak eo. Jej jab maroñ jokane ilo ad baj bed wõt ilo tõmak eo ak ilo ad baj jela wõt kin mol eo ilo Bible. Menin ejjab bwe! Bõlen ilo ran ko an Peter jet ilo congregation ko ear lap air konono kin tõmak ak rar lorak ilo manit ko retton. Mantiir ear aikwij erreo, inem Peter ej rejañ: “Ilo ami tõmak komin kõke emõn.”—2 Peter 1:5; James 2:14-17.
15. (a) Etke jelalokjen rej kalãjrake elikin mour emõn einwõt kadkad eo ñõn kõke ñõn tõmak? (b) Ta kadkad ko jet renaj keboj kij ñõn debij wõt tõmak eo?
15 Elikin an kwalok kin manit erreo, Peter ej kalãjrak bar jiljino kadkad ko rej aikwij kwaloki, ak kobaiktok, ñõn tõmak eo ad. Kajjojo men kein ej menin aikwij ñõn ad “jutõk bin ilo tõmak.” (1 Korint 16:13) Kinke ro rar buñ jen tõmak rar ‘kankeke ir im bareinwõt Jeje ko jet’ im jarõk “katak ko retao,” Peter jeltokin ej kalãjrak jelalokjen einwõt men eo eaorõk, ke ej ba: “Ilo ami emõn, [kobaik] jelalokjen.” Inem ej etal wõt: “Ilo ami jelalokjen, [kobaik] jadõr; im ilo ami jadõr, kijenmij; ilo ami kijenmij, wãnik; Ilo ami wãnik, joij ñõn dron, im ilo ami joij yokwe.”—2 Peter 1:5-7; 2:12, 13; 3:16.
16. Ta eo enaj walok elañe kadkad ko Peter ej kalãjraki rej kõke ñõn tõmak, ak ta eo enaj walok elañe rej jab?
16 Ta eo enaj walok elañe men kein jiljilimjuõn rej litok ñõn tõmak eo ad? “Elañe men kein rej ami im lõñlok,” Peter ej uak, “rej kõmõn bwe komin jab jowõn ak jowa ñõn jela eo ejimwe kin ar Iroij Jisõs Kraist.” (2 Peter 1:8) Ijo tu-rãjet, Peter ej ba: “Bwe eo, men kein re jab iben, e bilo, im ej lo men eo wõt ebak, im ej meloklok kin karreo jen jerawiwi ko an mokta.” (2 Peter 1:9) Lale bwe Peter ej ukõt jen an kajerbal “kom” im “ad” ñõn “jabdewõt,” “e,” im “an.” Meñe, ekaburomõjmõj, bwe jet rej bilo, emmãlele, im etton, Peter ilo joij ejjab kwalok bwe ri konono eo ej juõn ian rein.—2 Peter 2:2.
Kakajurlok ro Jein Im Jaten
17. Ta eo emaroñ kar kamakit eowor eo an Peter ñõn kõmmõni “men kein”?
17 Bõlen ilo an kile bwe ro rekãl elaptata emaroñ bidodo air mone ir, Peter ej kõketak ir: “Kin men eo, ro jãtiõ, en laplok ami kate kom im kamol an kir im kãlet kom; bwe elañe komij kõmõn men kein kom jamin tibñil.” (2 Peter 1:10; 2:18) Christian ri kabit ro rej kõke ñõn tõmak eo air men kein jiljilimjuõn renaj lõñliñ kin juõn ãjinkij elap, einwõt an Peter ba: “Bwe ein drein naj wujlepwõj ñõn kom dreloñ eo ñõn loan ailiñ in drio an ar Iroij im Dri Lomorer Jisõs Kraist.” (2 Peter 1:11) “Sip ro jet” renaj bõk juõn jinekjej eo ej indio ilo melan lõl in an Ailiñ in Anij.—John 10:16; Matthew 25:33, 34.
18. Etke Peter ej bojak “ien otemjej ñõn kakememej” ro jein im jaten?
18 Peter ilo ettã buru ear kõnan kain jinekjej rot in elap ñõn ro jein im jaten. “Kin men in,” ej jeje, “ien otemjej I naj pojõk in kakememej kom kin men kein, meñe kom jela kajeir, im bin wõt ilo mol eo ej bed ibemi.” (2 Peter 1:12) Peter ej kajerbal nan in Greek in ste·riʹzo, ijin rej ukõte “rej ejaak ilo bin” ak ej ukõte “kakajurlok” ilo nan in kõketak eo an Jesus lok iman ñõn Peter: “Kakajur ro jeõm im jatõm.” (Luke 22:32) An kajerbal nan in emaroñ kalikar bwe Peter ej kememej kajur in nan in kõketak eo ear bõk jen Iroij eo an. Kiõ Peter ej ba: “Ij lemnok bwe ejime aõ kakijejetoik kom kin kememej; Bwe I jela e naj mokõj an wutik aõ imõn kaber.”—2 Peter 1:13, 14.
19. Ta men in jibañ ko jej aikwiji rainin?
19 Meñe Peter ej ba ilo joij bwe ri konono ro an rej “bin wõt ilo mol eo,” ej kile bwe tõmak eo air emaroñ rup im mejõljõllok. (1 Timothy 1:19) Ke ejela bwe ejjabto enaj mij, ej kakajurlok ro jein im jaten ikijen an kwalok men ko me tokelik remaroñ kememeji ñõn kejbarok ir make bwe ren bin wõt ilo jitõb. (2 Peter 1:15; 3:12, 13) Ilo wãwen in lok wõt, kij rainin jej aikwij keini ad bõk nan in kakememej ko ñõn bed wõt im bin ilo mol eo. Jekdon wõn kij ak ewi toan ad bed ilo mol eo, jej jab maroñ kajekdon ad keini ad konono Bible, katak ibbed make, im bed ilo kwelok ko an congregation eo. Jet rej jekben kin air jab bed ilo kwelok, ilo air ba bwe elap air mõk ak bwe kwelok ko relijinmen ak rejjab kaitoktoklimo, ak Peter ear jela ewi joñan an mõkaj an juõn iad maroñ luji an tõmak elañe jej etal im tarjen joñan ad liki kij make.—Mark 14:66-72; 1 Korint 10:12; Hebrew 10:25.
Bedbed eo Ebin ñõn Tõmak eo Ad
20, 21. Ewi wãwen an kar ukõt mõran eo kakajurlok tõmak eo an Peter im ri konono ro an letter ko an, ekoba kij rainin?
20 Tõmak eo ad ej baj bedbed wõt ion inoñ ko ealikar air kar ejaki ilo meletlet ke? “Jab,” Peter ej uak, “Bwe kim ar jab kajeoñwe bwebwenato wan ko an dri kabel, ke kim ar kajelaik kom kajur im itok an ar Iroij Jisõs Kraist, a kim ar dri kalimjek An wuj põtata.” Peter, James, im John rar bed ibben Jesus ke rar lo juõn vision kin e ilo kajur in Ailiñ eo. Peter ej kamelele: “Bwe E ar bõk jen Anij Jemen nebar im aibujuij, ke ainiken eo e ar itok ñõn E jen wuj eo emõn põtata: ‘E in Nejiõ jitenburu iba, im Eo ej buñburuõ kake.’ Im ainiken in kim ar roñjake itok jen lõñ ke kim ar ber iben ilo tol ekwojarjar.”—2 Peter 1:16-18.
21 Ke Peter, James, im John rar lo vision eo, Ailiñ eo ear oktak im lukkun mol ñõn ir! “Kin menin,” Peter ej loe, “iber nan in dri kanij, ar kabinlok e, eo emõn ami kõmõn elañe komij kejbãroke.” Aet, ri konono ro in letter eo an Peter, ekoba kij rainin, ewor un eo ekajur ñõn lale wõt kanan ko kin Ailiñ in Anij. Ilo wãwen et eo jej aikwij lale wõt? Peter ej uak: “Einwõt maram ej romak ijo e marok, mae ien rantak, im iju ran ej tak ilo buruemi.”—2 Peter 1:19; Daniel 7:13, 14; Isaiah 9:6, 7.
22. (a) Ñõn ta eo burued ej aikwij ekkil kake? (b) Ewi wãwen ad lale im kejbarok nan in kanan eo?
22 Burued enaj marok elañe ejelok emeramram in nan in ri kanij. Ak ilo air lale im kejbarok buruen Christian ro rar ekiljake wõt rantak in ran eo ñe “iju ran” eo, Jesus Christ, ej wanliñtak ilo aibujuij in Ailiñ eo. (Revelation 22:16) Kij rainin ewi wãwen ad lale im kejbarok nan in kanan eo? Ilo ad katak Bible, ilo ad kebojak ñõn bõk kwunad ilo kwelok ko, im ilo ad ‘owõn ilo men kein, im mõke lelok yuk ñõn ir.’ (1 Timothy 4:15) Bwe nan in kanan eo en juõn lamp ej romak ilo juõn “jikin emarok” (ilo burued), jej aikwij kõtlok bwe en mwilõl an jelet kij—kõnan ko, eñjake ko, makitkit ko, im mejenkajjik ko ad. Jej aikwij bwe jen ri school in Bible, bwe Peter ej kajemlok ilo jebta 1: “Bwe ejelok nan in drikanij an Jeje ko an dri kanan ro kemeleleiklok iair. Bwe ejelok nan in drikanij e ar itok kin ankil an armij: a armij r’ar konono jen Anij, kin an Jitõb Kwojarjar kokononoik ir.”—2 Peter 1:20, 21.
23. Jebta eo kein kajuõn in 2 Peter kar keboje ri konono ro kin ta?
23 Ilo jinoin jebta eo ilo letter eo an kein karuo, Peter ear letok nan in kairujruj ekajur bwe jen debij wõt tõmak eo ad eaorõk. Jej kiõ bojak ñõn juõn etale eo kin wãwen ko rebin tok ilokan. Katak in tok juõn enaj etale jebta 2 in 2 Peter, ijo ri jilek eo ej jerbal kin aitwerõk eo kin karelel ko kin mour etton ko rar toloñwe congregation ko.
Kwoj Kememej Ke?
◻ Etke Peter ej kalikar aorõkin jelalokjen eo ejimwe?
◻ Ta eo emaroñ un eo bwe mour emõn rej kalãjrake einwõt kadkad eo moktata ñõn kobaiklok ñõn tõmak?
◻ Etke Peter ej bojak ien otemjej ñõn lelok nan in kakememej ñõn ro jein im jaten?
◻ Ta bedbed eo ebin Peter ej letok ñõn tõmak eo ad?
[Pija eo ilo peij 16]
Likjap ko an Peter rar jab kõmmõn menin an bõjrak jen tõmak eo an