“Jehovah, Juõn Anij Ej Tiriamokake Im Joij”

“Jehovah, Jehovah, juõn Anij ej tiriamokake im joij, erumij an illu, im elap an yokwe im joij im mol.”​—EXODUS 34:6, New World Translation.

1. (a) Ta kainemõn eo Bible ej letok kin ro rar lo an ro air jitenburu ilok jen kabuñ eo erreo? (b) Ewi wãwen an Jehovah lemnak kin ro rej bwid?

“LEDIK EO NEJIÕ ear jiroñ iõ bwe ejako an kõnan bwe en mõttan congregation eo an Christian,” juõn jemen eo ej Christian ej ba. “Ilo elõñ ran ko, week ko, meñe alliñ elikin, I ar eñjake juõn metak ilo enbwiniõ. Ear nanalok jen mij.” Emol ej menin inebata in lo an juõn eo jitenburu jebãbwe jen ial in kabuñ eo erreo. Emwij ke am ione juõn wãwen eo einwõt in? Elañe eindein, kwo naj bõk kainemõn ilo am jelã bwe Jehovah ej lemnak kake yuk. (Exodus 3:7; Aiseia 63:9) Ak ewi wãwen an lemnak kin ro rej kõmman bwid rot in? Bible eo ej kwalok bwe Jehovah ilo tiriamokake ej kir ir bwe ren bar jerbal ñan an buñburuen. E ar kõketak ri Ju ro rar kiblia ilo ran ko an Malachi: “Jeblaktok ñan iõ, im I naj jeblakwaj ñan kom.”​—Malachi 3:7, NW.

2. Ewi wãwen an Bible kwalok bwe tiriamokake ej juõn mõttan bedbed in kadkad in Jehovah?

² Tiriamokake eo an Anij kar kalikare ñan Moses ion Tol Sinai. Ijo, Jehovah ear kwalok e make einwõt ”juõn Anij ej tiriamokake im joij, erumij an illu im elap an yokwe im joij im mol.” (Exodus 34:6, NW) Nan in keãñ in ej kalikar bwe tiriamokake ej juõn mõttan kadkad in Jehovah. Ej “kõnan bwe otemjej ren tõbar ukwelok,” Christian ri jilek Peter ear je. (2 Peter 3:9, NW) Bwebõta, tiriamokake eo an Anij ejjab ejelok joñan. “Ejelok jabdewõt men e naj kõtlok jen an bõk kaje,” kar jiroñlok Moses. (Exodus 34:7; 2 Peter 2:9, NW) Mekarta, “Anij [ej] yokwe,” im tiriamokake ej juõn mõttan elap in kadkad in. (1 Jon 4:8; Jemes 3:17) Jehovah ejamin “debij an illu ñan indio,” im ej “mõnõnõ ilo yokwe-joij.”​—Micah 7:18, 19, NW.

3. Ewi wãwen an kar Jesus lemnak kin tiriamokake ñe keidi ibben eo an skraib im Parisi ro?

³ Jesus kar juõn joñok wãppen in Jemen ilañ. (Jon 5:19) Jerbal in tiriamokake eo an ñan ro rej kõmman nana ear jab juõn menin kejekdon jerawiwi ko air ak juõn wãwen kalikar ejja eñjake in yokwe eo wõt ej kalikar ñan nañinmij ilo kaniek. (Keidi Mark 1:40, 41.) Aet, Jesus ear likit tiriamokake ibiljin “men ko ewõr eddoiir” ilo Kien eo an Anij. (Matthew 23:23, NW) Ilo keidi, lemnak kin skraib im Parisi ro lemnak ko air kin ekajet ekkã air jab najikin tiriamokake. Ke rar lo an Jesus jerbal ibben ri jerawiwi ro, rar abõnõnõ: “Armij in ej bõk dri jerawiwi im mõña ibeir.” (Luk 15:1, 2) Jesus ear uak ro rar naruõn kin jilu wanjoñok ko, kajjojo iair ej kakõlleik tiriamokake eo an Anij.

4. Ta wanjoñok ko ruo Jesus ear kwaloki, im ta melelen kajjojo iair

⁴ Moktata, Jesus ear konono kin juõn emaan eo ear ilok jen sip ko 99 in bukõt eo ear jako. Melele eo an? “E naj or lõñliñ kin juõn dri jerawiwi eo ej ukwelok iben, elap jen kin druatimjuõn-ñoul im druatim-juõn ro dru wãnik, im ejelok air aikwij in ukwelok.” Jeltokin, Jesus ear konono kin juõn kõrã eo ear bukõt juõn mõttan silver eo ear jako im ear lañliñ ke ear loe. Ta eo ej kõkkar kake? “Lõñliñ [eo] iman mejen enjel ro an Anij kin juõn ri jerawiwi eo ej ukwelok.” Jesus ear kõkkar kin wanjoñok eo an kein kajilu ilo juõn wãwen parable.a Elõñ wõt iad jaar watõke einwõt bwebwenato eo emõn tata im kadu im ejañin kar wõr konono kake. Ad etale parable in enaj jibañ kij kamolol im kajeoñe tiriamokake eo an Anij.​—Luk 15:3-10.

Juõn Nejin eo Ri Jumae Ej Ilok Jen Mweo

5, 6. Ewi wãwen an kar ladik eo edik ilo wanjoñok eo kein kajilu an Jesus kwalok kin juõn jabwe in kamolol?

⁵ “Juõn armij ruo nejin man. Im eo erik iairro e ba ñõn jemen, ‘Jema, kwon letok mõtõn mweiuk ko mweiõm e naj aõ jolit.’ Im ej ajej ñõn ir an men in mour. Im jab elõñ ran tokelik, nejin eo erik ej aini men otemjej, im ilok ñõn ene etolok, im ijo ej jeroani mweiuk ko an kin an tũbloktõk e mõke.”​—Luk 15:11-13.b

⁶ Nejin eo ediklok ear kalikar an jabwe an kamolol. Moktata, ear akwelap kin jolet eo an, inem jerwane “kin juõn mour in tũbloktak e.” Kajin in “mour in tũbloktake” rej ukõt jen juõn nan in Greek eo melelen “mour in ãjãj.” Juõn ri kabel ej ba bwe nan in ej “kalikar joñan eo elaptata ilo jolok kadkad in.” Kin un eo emõn, leo edik ilo parable eo an Jesus ekkã naetan nejin eo ejerwan, juõn nan eo ej kalikar juõn armij eo elap an jerwan.

7. Wõn ro rainin rej einwõt nejin eo ejerwan, im etke elõñ kain armij rot in rej bukõt air beek ir make ilo “juõn ene ettolok”?

⁷ Ewõr ke armij ro rainin rej uanlok wõt nejin eo ejerwan? Aet. Ekaburomõj, bwe juõn oran eo eiet in armij ro rar ilok jen mweo ejokane mweo “imõn” Jemed ilañ, Jehovah. (1 Timote 3:15) Jet ian rein eñjake eo air in bwe melan eo ibelakin mweo imõn Anij elap an bin kien ie, im bwe mejen Jehovah elap wõt an lale ñan kõmman abañ jen an lale ñan kejbãrok. (Keidi Sam 32:8.) Lemnak kin juõn kõrã Christian eo kar lale im rittolok ekkar ñan nan in kaiñi ko ilo Bible ak tokelik ear oktak im lorak ilo kajerbal arkol im unokan kadõk ko ilo bwid. Ilo an reiliklok ñan ien mour eo an ear marok, kõrã eo ej ba: “Iar kõnan kamol bwe I maroñ kar kõmmane juõn mour eo emõnlok ñan ña make. Iar kõnan kõmman men eo ikõnan kõmmane, im I ar jab kõnan bwe jabdewõt en jiroñ iõ einjuõn.” Einwõt nejin eo ejerwan, jiroñ dikdik in ear kõnan bebe ñan e make. Ilo jerata, kin manit ko an rar jab ekkar ñan jeje ko rar bukwelok e jen congregation eo an Christian.​—1 Dri Korint 5:11-13.

8. (a) Ta jibañ eo remaroñ lelok ñan ro rej kõnan mour ilo einjuõn jen kien ko an Anij? (b) Etke juõn ej aikwij lukkun etale kãlet eo an ilo wãwen kabuñ?

⁸ Emol ej menin rub buru ñe juõn eo mõttad ilo tõmak ej kalikar juõn kõnan ñan mour ilo jumae kien ko an Anij. (Dri Pilippai 3:18) Ñe ej walok menin, elder ro im ro jet ewõr kadkad in jitõb ibbeir rej kate ir ñan kajime eo ej bwid. (Dri Galetia 6:1) Mekarta, ejelok juõn en rej jibede ñan an bõk ine eo an Christian ri kalor. (Matu 11:28-30; 16:24) Ñe rej tõbar joñan yiõ eo eritto ekkar ñan kien, meñe jodikdik ro rej aikwij kõmmane juõn jokãlet eo air make ilo wãwen ko kin kabuñ. Elaptata, kajjojo iad jej anemkwoj im juõn armij enaj lelok nan kin e make ñan Anij. (Dri Rom 14:12) Bwebõta, jenaj bareinwõt ‘madmõde men eo jaar jeore’​—juõn katak eo nejin eo ejerwan ilo parable eo an Jesus ejjabto ñan katak.​—Dri Galetia 6:7, 8.

Eñtan ilo Juõn Ene Ettolok

9, 10. (a) Ta oktak in wãwen eo nejin eo ejerwan ear ione, im ewi wãwen an kar emmakit ñane? (b) Wanjoñok kin wãwen an jet rainin jolok kabuñ eo emol im rej ion juõn abañ einlok wõt eo an nejin eo ejerwan.

⁹ “Ke [emat an kajerbal] men otemjej, elap ñitta ej walok ilo eneo; im e[ar] jino an [bed ilo] aikwij. Im ej ilok im koba iben juõn dri eneo: im ej jilkinlok e ilo jikin kallip ko an bwe en najirik pig ko [an]. Im e kõnan kobrõk lojen kin mõtõn kijen pig: im ejelok armij ej lelok [jabdewõt] ñõn e.”​—Luke 15:14-16.

¹⁰ Meñe ear lukkun jeramõl, nejin eo ejerwan ear jab lemnak in jeblak ñan mweo imõn. Ak, ear ion juõn ri ene eo eo ear lelok ñan e juõn an jerbal in najidik pig. Ke Kien eo ikijen Moses ear kalikar bwe pig ko rej menin mour ko rejjab erreo, kain jerbal rot in ejamin kar emõn ñan juõn ri Ju. (Livitikõs 11:7, 8) Ak elañe nejin eo ejerwan ear eñjake an kabnõnõik bõklõkõt eo an, ear aikwij in jenliktak jeni. Eokwe ke, ejamin kar watõk an armij eo ej jerbal ñan e, juõn armij in ene eo, inebata kin eñjake ko an juõn ruwamaejet eo ejeramõl. Jorrãn eo an nejin eo ejerwan ej einlok wõt eo an elõñ ro rainin ro rar jolok ial eo ejimwe in kabuñ eo erreo. Ekkã, an rein oktak im lorak ilo makitkit ko moktalok rar lemnak kaki einwõt rettã. Ñan wanjoñok, ke ear 17 yiõ dettan, juõn likao jodikdik ear jumae rittolok eo an ilo mour in Christian. “Mour etton im kajerbal unokan kadõk ilo bwid ear kajet tokjen yiõ in katak ko an rar bedbed ion Bible,” ear ba im kamol. Ejjabto, jodikdik in ear lo e make ilo prison itok jen koot im uror. Meñe tokelik ear bar ejmour lok ilo jitõb, kar juõn wõnãn eo eddo ear aikwij kõllãiki kin “lañliñ in jerawiwi eo iomin jidik ien”!​—Keidi Dri Hibru 11:24-26.

11. Ewi wãwen an kar kãlet eo an nejin eo ejerwan lõñ mõttan, im ewi wãwen an jet rainin lo kabo ko an lal in bwe rej “mon bata”?

¹¹ Jokãlet eo an nejin eo ejerwan ear nanalok kin mol eo bwe “ejelok juõn ear lelok jabdewõt men ñan e.” Ro jeran rekãl ear lo ir rar bed ia? Kiõ ke ear ejelok an cent, ear bed im einwõt ñe ear “juõn menin kijirãt” ñan ir. (Jabõn Kennan Ko 14:20) Eindein, elõñ armij rainin ro rar ellok jen mol eo rej lo bwe menin kabo ko im lemnak ko an lal in rej joñan wõt “mon bata.” (Dri Kolosse 2:8) “I ar eñtan im rub buruõ kin an ejelok tel eo an Jehovah,” juõn kõrã jodikdik ej ba eo iomin juõn ien ear ilok jen dolul eo an Anij. “I ar kajeoñ karõk aõ ñan lal in, ak kinke ear jab mol aõ einwõt ro jet, rar kejekdon iõ. I ar eñjake aõ einwõt juõn ajiri eo ejebãbwe eo ear aikwiji juõn jemen ñan tel iõ. Eñin ien eo I ar kile aõ aikwiji Jehovah. I ar jab kõnan bar mour lok iaõ make jen e.” Nejin eo ejerwan ilo wanjoñok eo an Jesus ear etal em kile an einlok wõt.

Nejin eo Ejerwan ej Ieñaktok An

12, 13. Ta men ko rar jibañ jet rainin ñan an ieñaktok air? (Lale box.)

¹² “Im ke ej ieñaktok an, e ba, E nañin lõñ dri jerbal an jema eor matiir bred ibeir, im ña ij joko ijin kin kwuli! I naj jutõk im ilok ñõn jema, im I naj ba ñõn e: “Jema, I ar kõmõnmõn nana nae lõñ im iman mejõm, Ij betkake bwe ren likit eta nejõm: kwon kõmõn ñõn iõ einwõt juõn ian ro am dri jerbal.”’ Im e jutõk, im itok ñõn jemen.”​—Luk 15:17-20.

¹³ Nejin eo ejerwan “ear ieñaktok an.” Iomin juõn ien, ear lelok e ñan an bukõt kamõnõnõ, im einwõt ñe ej mour ilo juõn lal in ettõnak. Ak kiõ ear oktak im lukkun wõr an jelã kin wãwen eo ej bed ie ilo jitõb. Aet, meñe ear buñ, ear wõr wõt kejatdikdik ñan likao dikdik in. Ewõr jet kadkad ko remõn rar maroñ loi ibben. (Jabõn Kennan Ko 24:16; keidi 2 Kronikel 19:2, 3.) A ta kin ro rej ilok jen bwij eo an Anij rainin? En menin kõmmanwa ke ñan bõk jemlok in bwe ir otemjej emwij air ellãlok jen kejatdikdik, bwe ilo jabdewõt wãwen ial in jumae eo air ej kamol bwe emwij air jerawiwi nae jitõb kwojarjar eo an Anij? (Matu 12:31, 32) Ejjab aikwij. Jet iair rej bõk eñtan kin ial eo air ebwid, im tokelik elõñ ian rein ej ieñaktok air. “I jamin, meñe ilo juõn ran, meloklok Jehovah,” juõn sister ej ba, ilo an kalmenlokjen kin ien eo ear ilok jen dolul eo an Anij. “Ien otemjej I ar jar bwe, juõn ran, en bar bõk im kejeblak iõ ñan mol eo.”​—Sam 119:176.

14. Ta mejelan eo nejin eo ejerwan ear kõmmane, im ewi wãwen an kar kwalok ettã buru ilo an kõmman eindein?

¹⁴ Ak ta eo ro rar jebãbwe remaroñ kõmmane kin wãwen eo rej bed ie? Ilo parable eo an Jesus kin nejin eo ejerwan eo ear beek ñan an jeblak ñan mweo imõn im eowor bwe jemen en jolok an bwid.’ “Kwon kõmõn ñõn iõ einwõt juõn ian ro am dri jerbal,” nejin eo ejerwan ear beek ñan an ba. Juõn ri jerbal kar juõn ri jerbal ñan juõn ran im remaroñ kamõj e ilo ran eo wõt rej kejelãik e ie. Menin ear ettãlok jen juõn ri kamakoko, eo ear, ilo juõn wãwen, einwõt uan family eo. Inem nejin eo ejerwan ear jab lemnak ñan an kajitõk bwe en bar jeblak ñan wãwen eo ear bed ie mokta einwõt juõn nejin. E naj kar mõnõnõ in bõk bed eo ettã ñan kamol an kõkãl tiljek eo an ñan jemen ke kajjojo ran ej ellãlok. Bõtab, nejin eo ejerwan enaj kar bed ilo an ilbõk.

Juõn Mõñã in Kõjab kin Burumãnãn

15-17. (a) Ewi wãwen an kar jemen emmakit ke ej lo leo nejin? (b) Ta aorõk in libororo eo, ring, im juj ko jemen ear lilok ñan leo nejin? (c) An jemen kõmman karõk ñan juõn kwojkwoj ta eo menin ej kwalok kake?

¹⁵ “A ke ej etolok wõt, jemen ej kili e, im tiriamokake, im etõr, im buñ ion kenwan, im mejenmaik e. Im nejin e ba ñõn e, Jema, I ar kõmõnmõn nana nae lõñ, im iman mejõm, ij betkake bwe ren likit eta nejõm. [Kwon kõmõn ñõn iõ einwõt juõn ian ro am dri jerbal.] A jemen ej ba ñõn ro dri korijeran, ‘Komin jabrumij im bõktok liboror eo emõntata, im kanuknuk e kake: im likit luko ion pein, im juj i neen. Im bõktok kon in kau emãtõk, im mõn e; im jen mõña im lõñliñ, bwe e in nejiõ e kar mij im ej bar mour; e kar joko, im ej walok. Im re jino air lõñliñ.”​—Luk 15:20-24.

¹⁶ Jabdewõt jemen im jinen eo ewõr an yokwe enaj kõnan kejeblak ejmour eo ilo jitõb an juõn ajiri. Kin menin, jemaroñ baj kalmenlokjen kin jemen nejin eo ejerwan ilo an kalimjõk wõt ial eo iman mweo imõn ran otemjej, ilo kejatdikdik in kõnan eo an kin jeblaktok eo an leo nejin. Kiõ ej lo an itok ilo ial eo tok! Jedetok eo an ladik eo ejelok bere ear einjuõn. Ak, jemen ear kile e ke “ej ettolok wõt.” Ej kejekdon an bebotaktak nuknuk eo an im jitõb in ebwer; ej lo leo nejin, im ej ettõr in ion e!

¹⁷ Ke jemen ej tõbar leo nejin, ej buñ ion kenwan leo nejin im mejenmaik e. Inem ear jiroñ ri jerbal ro an bwe ren lelok ñan leo nejin juõn liboror, juõn ring, im juj. Liboror in ear jab baj nuknuk bajjõk, ak “juõn eo emõntata”​—bõlen juõn eo emwij kõmman inõkan im rej kõnan lelok ñan ruwamaejet rot en rej kile im kautieje. Ke juõn ring im juj ejjab ekkã lo ibben ri kamakoko ro, jemen ear kalikar bwe leo nejin ear karuwaineneiki tok einwõt eo lukkun uan family eo. Ak elõñlok men jemen ear kõmmane. E ar kaiñ ñan juõn kwojkwoj in kememe jeblaktok eo an leo nejin. Alikar, lein ear jab jolok an leo nejin bwid kin ebbanban ak kinke jeblaktok eo an leo nejin ear kõmman bwe en juõn eddo ñan jolok bwid; e ar kõnan erakelok jolok bwid. Menin ear kõmman an lañliñ.

18, 19. (a) Ta eo parable eo kin nejin eo ejerwan ej katakin yuk kake kin Jehovah? (b) Einwõt an walok ilo jerbal ko an ibben Judah im Jerusalem, ewi wãwen an Jehovah “kõtmene wõt” kin juõn ri jerawiwi eo ej jeblak?

¹⁸ Kin menin, ta eo parable in kin nejin eo ejerwan ej katakin kij kake kin Anij eo jej jerammõn in kabuñ ñan e? Moktata, bwe Jehovah ej “tiriamokake im joij, erumij an illu im elap an yokwe, joij im mol.” (Exodus 34:6, NW) Emol, tiriamokake ej juõn kadkad in Anij ejeded jelã kake. Ej wãwen eo ej emmakit ie ñan ro rej bed ilo aikwij. Inem parable eo an Jesus ej katakin kij bwe Jehovah ej “bojak in jolok bwid.” (Sam 86:5) Ej lukkun kalimjek, einwõt ilo nan in kõkkar, ñan an lale jabdewõt oktak in buru ibben armij ro ri jerawiwi eo ej letok juõn bedbed in an erakelok tiriamokake.​—2 Chronicles 12:12; 16:9, NW.

¹⁹ Ñan wanjoñok, lemnak kin jerbal ko an Anij ibben Israel. Ri kanan Isaiah ear bõk kakõrmol jen Anij ñan an kwalok kin Judah im Jerusalem einwõt ‘nañinmij jen bõran ñan neen.’ Ak, ear ba: “Jehovah enaj watõk wõt an kwalok an joij ñan kom, im kin menin enaj jutak lõñtak in kwalok tiriamokake ñan kom.” (Aiseia 1:5, 6; 30:18; 55:7; Ezekiel 33:11, NW) Einwõt jemen eo ilo parable eo an Jesus, Jehovah ‘ej lale ial eo,’ einwõt ilo nan in kõkkar. Ej reimanlok ñan jeblak eo an jabdewõt ro rar ilok jen mweo imõn. Ejjab men eo jenaj kar kõtmene kake in ke kin juõn jemen eo ej yokwe?​—Sam 103:13.

20, 21. (a) Ilo wãwen et eo elõñ rainin tiriamokake eo an Anij ej kamakit ir? (b) Ta eo naj konono kake ilo katak in tok ilokan?

²⁰ Kajjojo yiõ, tiriamokake eo an Jehovah ej kamakit elõñ ñan an ieñaktok air im jeblak ñan kabuñ eo emol. Juõn lañliñ menin ej bõktok ñan ro air jitenburu! Bõk, ñan wanjoñok, jemen eo ej Christian kar kwalok kake ilo jinoin. Ear menin kamõnõnõ ñan e, ke ledik eo nejin ear bar jeblak im ejmour ilo jitõb im kiõ ej jerbal einwõt juõn full-time ri kwalok nan. “Ij mõnõnõ joñan wõt aõ maroñ ilo jukjuk im bed in,” leo ej ba. “Dennin kemjalal in buromõj ko aõ emwij air oktak ñan dennin kemjalal in lõñliñ.” Emol, Jehovah ej bar lañliñ!​—Jabõn Kennan Ko 27:11.

²¹ Ak ebar lõñ men ko ñan parable eo kin nejin eo ejerwan. Jesus ear wõnmanlok wõt ilo bwebwenato eo an bwe en kar maroñ keidi tiriamokake eo an Jehovah ibben ekajet ko rebin rej kabwid armij kaki im rar kajur ibiljin skraib im Parisi ro. Ewi wãwen an kar kõmman eindein​—im ta melelen menin ñan kij​—naj konono kake ilo katak in tok ilokan.

[Kamelele ko itulal]

Ilo Elij

◻ Ewi wãwen kar lemnak eo an Jesus kin tiriamokake ñe keidi ibben eo an Parisi ro?

◻ Wõn ro rainin rej einwõt nejin eo ejerwan, im ewi wãwen?

◻ Ta wãwen ko rar bõktok nejin eo ejerwan ñan an ieñaktok an?

◻ Ewi wãwen an kar jemen kwalok tiriamokake ñan leo nejin ear ukwelok?

[Bo̦o̦k eo ilo peij 21]

EAR IAÑAKTOK AIR

Ta eo ear jibañ jet ro rar bukwelok jen congregation in Christian bwe ren iañaktok air? Ennan kein tok remaroñ kameramlok kin men in.

“Ilo buruõ iar jelã wõt tu-ia mol eo ear bed ie. Aolep yiõ ko in aõ katak Bible im etal ñan kwelok ko in Christian rar jelet iõ ilo juõn wãwen elap. Ewi wãwen iar maroñ elikinjepjepe Jehovah? Ear jab ilok jen iõ; iar ilok jen e. Eliktata, iar kile ewi joñan aõ kar bwid im kijñeñe buruõ im bwe Nan eo an Jehovah ear jimwe ien otemjej​—‘jabrewõt eo armij ej jeor e, men in e naj bareinwõt marmir e.’”​—C.W.

“Ledik eo nejiõ ear jino jelã kennan, im men in ear jelet buruõd ke iar kõnan katakin e men ko einwõt wõn in Jehovah im ewi wãwen jemaroñ jar ñan e. Iar jab maroñ kiki, im juõn boñ iar ettõr ilo wa eo ñan juõn jikin kallip im baj jañ. Iar jañ, im ij kab bar jar ñan Jehovah elikin juõn ien eaetok. Men eo dein im iar jelã kar bwe iar aikwiji Jehovah ilo aõ mour, im iar kejatdikdik bwe enaj jolok aõ bwid.”​—G.H.

“Ke armij rar konono kin kabuñ, iar jiroñ ir bwe elañe iar aikwij kãlet kabuñ eo ear katakin mol eo, I naj kar juõn ian Ri Kennan ro an Jehovah. Inem iar ba bwe iar juõn iair, ak iar jab maroñ kejbãrok aolep men ko rar katakin, inem iar ilok jen ir. Ilo aõ kile men in, ekkã an abõnõnõ bõklikit eo aõ im iar jab mõnõnõ. Eliktata iar kamol: ‘Ij buromõj. Ij aikwij kõmman oktak ko relap.’”​—C.N.

“Jilñul-lalem yiõ ko remotlok ña im leo beleiõ kimro kar bukwelok. Inem, ilo 1991, kim ar bwilõñ ke ruo elder ro rar lotok kimro im rar kejelãik kim kin maroñ eo ñan bar jeblak ñan Jehovah. Jiljino alliñ ko tokelik, kim ar lañliñ bwe kimro ar bar jeblak ñan dolul eo. Ña im leo beleiõ kimro ej 79 im 63 yiõ dettam.”​—C.A.