Ewi Wãwen An Jesus Maroñ Ukõt Mour Eo Am?

JESUS CHRIST ear juõn Ri Kaki ear mour ilo Palestine enañin 2,000 yiõ ko remotlok. Jidik wõt air jelã kin ien an ajiri. Bõtab, ealikar bwe ke ear 30 an yiõ, ear ijjino an jerbal ñan “kennan kin mol” eo. (Jon 18:37; Luk 3:21-23) Ri kalor ro emen rar jeje kin wãwen mour eo an iumin jilu im jimettan yiõ ko.

Ilo ien an jerbal, Jesus Christ ear letok ñan ri kalor ro an juõn nan in kaiñi eo me emaroñ kar einwõt juõn mejelan ñan elõñ ian abañ ko an lal in. Kar ta in? Jesus ear ba: “Kien ekãl Ij lewoj ñõn kom, Komin yokwe dron; einwõt I ar yokwe kom, komin bareinwõt yokwe dron.” (Jon 13:34) Aet, mejelan abañ ko relõñ an lal in ej yokwe. Bar juõn ien, ke kar kajitõkin Jesus kin ta kien eo elaptata, ear uak: “Kwon yokwe Iroij am Anij kin aolepen buruõm im kin aolepen am, im kin am lemnok otemjej. Eñin kien eo elap mokta. Im eo ken ka ruo einwõt in, Kwon yokwe dri turõm im einwõt kwe.”​—Matu 22:37-40.

Ilo nan im jerbal ko Jesus ear kwalok kin ewi wãwen ad maroñ yokwe Anij im armij ro mõttad. Jen lale kin jet wanjoñok ko im lale ta eo jemaroñ katak jen e.

Katakin Ko An

Ilo juõn ian katak ko remõntata iaolepen bwebwenato ko an lal, Jesus Christ ear jiroñ ri kalor ro an: “Ejelok armij e maroñ bokake ruo iroij; bwe e naj kijirãte juõn im yokwe eo juõn; ak e naj drebij juõn im kejekron eo juõn. Kom ban dri korijeran Anij im mweiuk.” (Matu 6:24) Katak ko an Jesus ikijen ad likit mokta Anij ilo mour eo ad ej jerbal wõt ke ilo ran kein, meñe elõñ armij rej tõmak bwe money ej mejelan abañ ko otemjej? Mol, jej aikwij money ñan kabwe aikwij ko ad. (Ekklisiastis 7:12) Ak, elañe jej kõtlok bwe “Mweiuk” en master eo ad, “arõk mõnni” enaj tel kij, iroij ion aolepen mour eo ad. (1 Timote 6:9, 10) Elõñ armij ro me rar lorak ilo aujid in rar luji family eo air, ejmour eo air, im elaptata mour eo air.

Ilo wãwen eo juõn, reilok ñan Anij einwõt Master eo ad ej kalaplok aorõkin mour eo ad. Einwõt Ri Kõmanmõn eo, ej Unjen mour eo, im kin menin, ej make wõt tellokin kabuñ eo ad. (Sam 36:9; Reveles̃õn 4:11) Ro rej katak kin kadkad ko an im yokwe e rej bokake kien ko an. (Ekklisiastis 12:13; 1 Jon 5:3) Ilo air kõmman menin, jej bõk tokjen.​—Aiseia 48:17.

Ilo Katak eo ion Tol eo, Jesus ear katakin ri kalor ro an kin ewi wãwen air maroñ yokwe armij ro mõttair. Ear ba: “Inem men otemjej jabrewõt komij kõnan bwe armij ren kõmõnmõn ñõn kom en ein drein ami kõmõnmõn ñõn ir: bwe men in kien im dri kanan ro.” (Matu 7:12) Nan eo “armij” Jesus ear kajerbale ej koba ri kijirãt ro an juõn armij bareinwõt. Ilo ejja katak in wõt, ear ba: “Komin yokwe ro dri kijirãte kom, im jar kin ro rej matõrtõr kom.” (Matu 5:43, 44) Kain yokwe rot in en kar kamadmõde ke elõñ ian abañ ko jej jelmae ilo ran kein ad? Kar eindein lemnak eo an ri Hindu ri tel eo Mohandas Gandhi. Rar je einwõt an ba: “Ñe [jej] buruõd wõt juõn ilo katakin ko an Christ ilo Katak in ion Tol eo, jenaj namejelan abañ ko . . . iaolepen lal.” Elañe jej jerbali nan in katakin ko an Jesus kin yokwe, inem, jenaj kamadmõde elõñ abañ ko an armij.

Jerbal ko An

Jesus ear jab katakin kin mol ko relap ikijen wãwen ad maroñ kwalok yokwe wõt ak ear bareinwõt jerbali men ko ear katakin ro jet kaki. Ñan wanjoñok, ear likit aikwij ko an ro jet iman kõnan ko an make. Juõn ran joñan an Jesus im ri kalor ro an boub ilo air jibañ armij ro ear ejelok ien ñan air mõñã. Jesus ear lo aikwij eo ñan an ri kalor ro an kakije jidik, im ear eñinlok ir ñan juõn jikin emake lok ian. Ak ke rar tõbraklok ijo, juõn jar in armij ear kõttar ir. Ewi wãwen am naj kar uak elañe kwar lo juõn jar in armij ej kõttar yuk im kõtmene bwe kwon jerbal ñan ir meñe kwoj aikwij kakije jidik? Eokwe, Jesus ear “tiriamokake ir,” im ear “jino An katakin ir men ko relõñ.” (Mark 6:34) Lemnak in kin ro jet ear kamakit Jesus ñan jibañ ir.

Jesus ear kõmman elõñlok men ko ñan armij jen an katakin ir wõt. Ear lelok jibañ ñan ir bareinwõt. Ñan wanjoñok, juõn ien ear najidik elõñlok jen 5,000 armij ro rar bed im roñjake e mae joten ran eo. Ejjabto tokelik, ear najidik bar juõn jar in armij​—ilo ien in elõñlok jen 4,000​—ro me rar roñjake e iumin jilu ran ko im kar ejelok jabdewõt mõñã ko kijeir. Ilo ien eo mokta, ear kajerbal lalem bread im ruo ek ko, im tokelik, jiljilimjuõn bread im jejjo wõt ek ko. (Matu 14:14-22; 15:32-38) Menin bwilõñ ko ke? Aet, ear juõn ri kõmman menin bwilõñ eo.

Jesus ear kejmour ri nañinmij ro. Ear kamadmõde ri bilo ro, ri ajkuk ro, ri leper ro, im ri jaroñroñ ro. Emol, ear kajerkak ro ri mij bareinwõt! (Luk 7:22; Jon 11:30-45) Juõn ien juõn ri leper ear eowor e im ba: “Elañe Kwo kõnan, Kwoj maroñ in karreo iõ.” Ewi wãwen an kar Jesus uak? “Kin An tiriamo, Ej erlokwe pein im uñire, im ba ñõn e, I kõnan: kwon erreo.” (Mark 1:40, 41) Ikijen menin bwilõñ kein, Jesus ear kwalok yokwe eo an ñan ro rar eñtan.

Ebin ke am tõmak ilo menin bwilõñ ko an Jesus? Jet armij rejjab tõmak. Bõtab, kememej bwe Jesus ear kõmman menin bwilõñ ko an iman mejen armij ro. Ri jumae ro an bareinwõt, ro rar kajeoñ in naruõn ien otemjej, rar jab maroñ karmijeteik bwe ear juõn ri kõmman menin bwilõñ ko. (Jon 9:1-34) Bareinwõt, kar wõr unin an kõmman menin bwilõñ ko. Rar jibañ bwe armij ro ren kile kajjen einwõt E eo Anij ear jilkintok.​—Jon 6:14.

Ilo an kõmman menin bwilõñ ko Jesus ear jab kautiej emake. Jen an eindein, ear kaibujuij Anij, Unjen kajur eo an. Juõn ien ilo Capernaum ear bed ilo juõn em eobrak kin armij. Juõn armij eakã ear kõnan ejmour ak ear jab maroñ deloñ iloan. Inem ro jeran rar katolallok kinien leo eakã ej babu ion jen kejenwan. Ke ear lo tõmak eo air, Jesus ear kejmour leo emij rãjet in. Kin menin, armij ro rar “wijtake Anij” im ba: “Kim ar jab loe im einwõt in mokta.” (Mark 2:1-4, 11, 12) Menin bwilõñ ko an Jesus kar kaibujuij Jehovah, an Anij, im jibañ ro rar aikwij jibañ.

Bõtab, kamadmõde nañinmij ikijen menin bwilõñ ko, ear jab un eo elaptata kin an Jesus jerbal. Juõn eo ear jeje juõn bwebwenato kin wãwen mour eo an Jesus ear kamelele: “Emwij jeje men kein bwe komin tõmak bwe Jisõs e dri Kraist, Nejin Anij; im bwe kin ami liki, komin bõk mour ilo etan.” (Jon 20:31) Aet, Jesus ear wanlaltak ñan lal bwe armij ro ren tõmak ilo e im bõk mour.

Katok eo An

‘Jesus ear wanlaltak ñan lal ke?’ kwomaroñ kajitõk. ‘Ear itok jen ia?’ Jesus ear make uak im ba: “I ar itok jen lõñ, jab bwe In kõmõnmõn ankil Aõ, a ankil an Eo e ar jilkintok Iõ.” (Jon 6:38) Mokta jen ien eo ear bed ion lal, ear bed einwõt Nejin Anij eo ear keotak e. Inem kar ta ankil an Eo ear jilkintok e ñan lal? “Kin an Anij yokwe lõl, E ar letok juõn wõt Nejin E ar keutak, bwe jabrewõt eo ej liki E en jab joko, a en mour in drio.” (Jon 3:16) Ewi wãwen an kar maroñ walok menin?

Bible eo ej kalikar kin wãwen an kar mij erom juõn menin walok ejelok juõn armij emaroñ ko jen e. Armij ro ruo moktata rar maroñ bõk mour indio jen Anij. Bõtab, rar kãlet ñan jumae Ri Kõmõnmõn eo air. (Jenesis 3:1-19) Kin air kõmman menin, jerawiwi eo kein kajuõn an armij, ro nejin Adam im Eve rar jolet men in jolet eo enana, mij. (Dri Rom 5:12) Ñan lelok ñan armij mour eo emol, jerawiwi im mij rej aikwij jako.

Ejelok jabdewõt scientist emaroñ kajerbal kabel eo air ñan kakõmõnmõnlok enbwinid im jolok mij ikijen genetic engineering. Ak, ewõr ibben Ri Kõmõnmõn eo an armij, maroñ eo ñan kõmman bwe armij ro rekiblie ren wãppen im mour indio. Ilo Bible eo ear naetan menin letok in einwõt binmour. Armij ro ruo moktata rar wiakake ir make im ro nejiir im erom ri kamakoko ro ñan jerawiwi im mij. Rar kõrrã air mour einwõt armij ro rewãppen im kiblie ñan Anij im bõk juõn mour eanemkwoj jen Anij, bwe ren make beek kin ta eo emõn im ta eo enana. Ñan bar wiaik mour eo ewãppen, rar aikwij kõllã juõn wõnãn ej joñan wõt wõnãn mour eo ewãppen armij ro ruo moktata rar luji. Kin air jolet mour eo ejjab wãppen, kar ejelok maroñ ibben armij ro ñan kõllã wõnãn.​—Sam 49:7.

Inem Jehovah Anij ear bõk eddo eo ñan jibañ ir. Ear likit mour eo ewãppen an Nejin eo ear keotak e ñan loan lojen juõn virgin, eo ear keotak Jesus. Elõñ yiõ ko lok mokta, kwomaroñ kar karmijeteik lemnak in kin an juõn virgin keotak juõn ajiri. Bõtab, ran kein, ewõr an scientist ro maroñ ñan copyiki menin mour ko jen bar juõn menin mour im wãkare cell ak gene ko jen juõn menin mour ñan bar juõn menin mour. Inem, wõn eo emaroñ bere ilo jimwe kin maroñ eo an Ri Kõmõnmõn eo ñan jerbale maroñ eo ñan baj keotak ajiri?

Kin juõn mour in armij ewãppen, wõnãn wiaik armij otemjej jen jerawiwi im mij ear walok. Ak, niñniñ eo ear lotak ion lal einwõt Jesus ear aikwij rittolok im erom “dru uno” eo ear maroñ lelok “uno” ñan kamadmõde nañinmij eo an armij otemjej. Ear kõmman menin ilo an mour einwõt juõn armij ewãppen in ejelok jerawiwi ibben. Jesus ear jab lo eñtan eo an armij iumin jerawiwi wõt ak bareinwõt eñjake inebata ko ilo kanniek ke ear erom juõn armij. Menin ear kalaplok tiriamokake eo an einwõt juõn doctor ak ri uno. (Dri Hibru 4:15) Menin bwilõñ ko ear kõmmani ke ear bed ion lal rar kamol e bwe ewõr kõnan im kajur ñan jolok nañinmij.​—Matu 4:23.

Elikin an jerbal iumin jilu im jimettan yiõ ko ion lal, ri jumae ro rar man Jesus. Ear kwalok bwe juõn armij ewãppen emaroñ bokake Ri Kõmõnmõn eo ilo melejoñ ko relaptata bareinwõt. (1 Piter 2:22) Mour eo an einwõt armij ewãppen im emwij katok kake ear erom wõnãn binmour eo, eo ear maroñ wiaik armij otemjej jen jerawiwi im mij. Jesus Christ ear ba: “Ejelok yokwe iben armij elap jen yokwe in, bwe armij en lelok an mour kin ro jeran.” (Jon 15:13) Ilo ran eo kein ka jilu elikin an kar mij, im jejjo week ko tokelik ear wanliñlok ñan lañ ñan lelok wõnãn binmour eo ñan Jehovah Anij. (1 Dri Korint 15:3, 4; Dri Hibru 9:11-14) Ilo an kõmman menin, Jesus ear maroñ lelok tokjen katok in binmour eo ñan aolep armij ro rar lor e.

Kwokõnan ke bõk tokjen jen ial in kamadmõde nañinmij ko otemjej ilo jitõb, eñjake, im kanniek? Ej aikwij wõr tõmak ilo Jesus Christ ñan kõmman menin. Etke kwojjab itok ñan Doctor ak Ri Uno eo? Kwomaroñ kõmman menin ilo am katak kin Jesus Christ im jerbal eo an ñan lomoren armij ro retiljek. Ri Kennan ro an Jehovah renaj mõnõnõ in jibañ yuk.

[Pija eo ilo peij 5]

Ewõr an Jesus kõnan im kajur ñan kejmour ri nañinmij ro