Keañ kin News Eo Emõn ilo Jikin Kallip Rice ko ilo Taiwan

Jej Einwõt Ro Ewõr Air Tõmak

Keañ kin News Eo Emõn ilo Jikin Kallip Rice ko ilo Taiwan

TAIWAN ekkã an lañliñ kin elap wõt ie, im men in ej kamaroñe bwe en madmõde rice ruo alen ilo kajjojo yiõ. Ak, jet ien, wõt ko rejjab itok ilo ien eo kar kõtmene kake, im ine ko inen men in eddek ko rej mij. Ñe men in ej walok, ri kallip eo ej ebwer ke? Jaab. Ej jelã bwe ej aikwij kijenmij. Ej bar kaddek ine ko rekãl im kalbwini ilo melaj ko. Inem, elañe wãwen kallip ej emõnlok, ri kallip eo enaj lo juõn madmõd emõn. Jet ien jerbal in kallip im madmõd ilo jitõb rej eindein lok wõt.

Kate Wõt ilo Madmõd eo ilo Jitõb

Iumin elõñ yiõ ko Ri Kennan ro an Jehovah ilo Taiwan ear lap air jerbal ñan kallip im madmõde inen mol ko ilo Jeje ko ilo jet jikin ko rar watõke einwõt elourõ ilo jitõb. Juõn wanjoñok ej ilo Miao-li County. Ilo jikin in ear jab kanuij lap air lo tõbrak ke rar kwalok nan ie. Inem ilo 1973 rar jitõñ juõn leo im lio ri belele me rej special pioneer ro bwe ren jerbal ijo einwõt ri kwalok ro kin Ailiñ eo rej full-time. Ilo jinoin, jet iair rar kwalok air itoklimo kin news eo emõn. Bõtab, ejjabto ear jako itoklimo eo. Inem rar jitõñ special pioneer rein bwe ren jerbal ilo bar juõn jikin.

Ilo 1991 rar jitõñ bar ruo special pioneer ro ñan ijo. Ak men ko rar walok ie rar bar kalikar bwe mejatoto eo ejañin kar jejjet ñan eddeklok eo ilo jitõb. Elikin jejjo yiõ ko, rar jilkinlok special pioneer rein ñan bar juõn jikin me rar kõtmene bwe enaj laplok an kouwa melaj ko ie. Inem, iumin juõn ien ear ejelok jerbal ilo melaj eo.

Jibadbad ko Jet Rej Walok ilo Tõbrak

Ilo September 1998 rar beek ñan kõmman jibadbad ko ñan kabukõt jikin ko emaroñ wõr tõbrak ie ilo jikin ko rejañin kar karõk ñan kwalok nan ie mokta ilo Taiwan. Ekijkan air kar kõmman men in? Ilo air jitõñ 40 ri kwalok ro bwe ren bõk jerbal in temporary special pioneer im kwalok nan ilo jikin ko elõñ armij rar jokwe ie ilo territory kein.

Ruo jikin kwelok ko rej bed turin don ilo Miao-li County kar ian jikin ko rar kãleti ñan jerbal ie. Emen kõrã ro rejañin mare rar jerbal ijo iumin jilu alliñ ñan melejoñe jikin eo. Ejjabto elikin air tõbar ijo, rar jei report ko remõn kin oran armij ro rej itoklimo im rar iion ir. Ilo jemlokin alliñ ko jilu in air kwalok nan ijo, rar jinoe elõñ Bible study ko ilo moko imõn armij ro. Bareinwõt rar kajutak juõn kumi in katak Bible ibben don im juõn elder jen juõn congregation ebak ear etal im jibañ ir.

Jilu ian sister rein rar kalikar bwe rekõnan wõnmanlok im jibañ “ine” kein rekãl me ear emõn air eddeklok. Inem, kar jitõñ ruo iair bwe ren jerbal einwõt special pioneer ro, im eo kein kajilu ej wõnmanlok im jerbal ijo einwõt juõn regular pioneer. Juõn elder jen congregation eo ebak ear emmakit ñan jikin eo ñan jibañ ir. Elõñlok jen 60 rar bed ilo kwelok in public talk eo moktata kar kwaloke ijo. Kiõ congregation eo ebak ej jibañ kumi in ekãl bwe en keini air kõmman kwelok ko ilo Sunday ijellokin jet kwelok ko in book study. Mõttan jidik juõn congregation ekãl enaj jutak ilo jikin eo.

Kijenmij Ej Bõktok Jerammõn ilo Jikin Ko Jet ilo Taiwan

Jikin ko jet rar uak ilo ejja wãwen eo wõt. Ilo jikin kwelok in I-lan County ilo tueañ turear in ene eo, juõn Congregation Book Study ekãl ear jutak ilo jikin eo temporary special pioneer ro rar jerbal ie.

Ke rar kwalok nan jen em-ñan-em juõn jota, juõn temporary special pioneer ear jelmae juõn likao im lelok juõn paper in kejelã eo ej kõlajrak ien kwelok ko an congregation eo. Ilo mõkaj ear kajitõk: “Imaroñ kwelok ke joten ilju? Elañe aet, kain nuknuk rot eo ij aikwij kõnake?” Pioneer in ear katak ibben ralitõk ri katak Bible ro ilo kajjojo week. Ejjabto jet ian ri katak Bible rein rar karõk bwe ren ri kwalok ro kin news eo emõn, im jibadõk mejenkajjik eo bwe ren baptais.

Bar juõn armij ilo ejja jikin kwelok in wõt ear niknik ilo an bed ilo imõn jar eo an iumin elõñ yiõ ko ak ear jab lo juõn armij eo ear maroñ katakin e kin Bible eo. Ke ear roñ kin karõk in katak Bible eo, ear mõnõnõ in bõk kunan. Rar rejañ e bwe en keboje lok iman katak eo an. Ke temporary special pioneer eo ear itok ñan kõmman katak eo, ear lo bwe lien ear keboje “homework” eo an ilo an wiaik juõn notebook im ear je aolep kajitõk ko ñan katak eo an. Inem ear je aolep uak ko an ñan kajitõk ko kajjojo. Ear bareinwõt jeje aolep eon ko ilo Bible me rar bed ilo katak eo an. Ke sister eo ear itok ñan katak ibben ilo katak eo kein kajuõn, ededelok an kõrã eo keboje katak ko jilu tujinoin!

Tõbrak ko einlok wõt rar loi ilo bukwon eo ilo Dongshih ituiolapen Taiwan. Temporary special pioneer ro rar lelok elõñlok jen 2,000 brochure ko ilo alliñ ko jilu rar jerbal ie. Tok ñan alliñ eo kein ka jilu, rar kõmman 16 Bible study ko. Bukwon in ear lap an jorrãn kin juõn makitkit lal eo ear walok ilo tuiolapen Taiwan ilo September 21, 1999, ak jet ian ro rej itoklimo rej wõnmanlok wõt ilo jitõb, meñe rej aikwij itoitak iumin juõn awa ñan bed ilo kwelok ko ilo Kingdom Hall eo ebaktata. Aet, rej aikwij kijenmij im kate wõt ñan lo juõn jonikõn emõn, elañe jab ilo kanniek inem ilo jitõb.

[Map ilo page 30]

(For fully formatted text, see publication)

CHINA

Taiwan Strait

TAIWAN

[Etan eo ej kõmman]