Lal Baj Juõn Jikin Melejoñ Ke?

JUÕN tõbrak elap! Ear ellã. Juõn ri school eo ear bed ilo elõñ test in katak ko rebin iumin ruo week ko ear bõk juõn report emõn. Kiõ ear maroñ wõnmanlok im bõk juõn job ear kõnan.

Elõñ armij rej watõk mour ijin ion lal ilo ejja wãwen in wõt. Rej lemnak kake men in einwõt juõn melejoñ ilo jinoin eo me armij otemjej rej aikwij bõke. Ro rej “ellã jen melejoñ eo” rej wõnmanlok ñan juõn men emõnlok ilo juõn wãwen Mour-Elikin-Mij. Emol, enaj juõn men ekaburomõj, elañe mour in kiõ​—juõn ien bed bajjek ñan elõñ armij​—ej mour eo emõntata rej kõtmene kake. Meñe ear emõn ejmour eo an im mweie ilo enañin aolepen ien an mour, armij in Bible eo Job ear lo: “Armij, eo ej lotak jen kõra, reit wõt ran ko an, im rej obrõk kin jorran.”​—Job 14:1.

Ñan kwalok lemnak ko an elõñ armij, New Catholic Encyclopedia eo ej ba: “Aibujuij eo ilañ ej jikin eo Anij ekõnan bwe armij ren bed ie. . . . Mõnõnõ eo an armij emaroñ bed ilo an bõk mõnõnõ ilañ.” Juõn katak in etale eo kabuñ eo Church of Christ ilo United States ear kõmmane ear ba bwe 87 percent ian ro rar kwalok lemnak eo air ilo etale in rar tõmak bwe renaj etal ñan lañ elikin air mij.

Bareinwõt elõñ ro rejjab Christian rej tõmak bwe renaj ilok jen lal ñan juõn jikin emõnlok elikin air mij. Ñan wanjoñok, ri Muslim ro, rar kejatdikdik bwe renaj etal ñan juõn paradise ilañ. Ri kalor ro an kabuñ in Ene eo Erreo an Buddha ilo China im Japan rej tõmak bwe elañe rej elij ñan indio “Amitabha,” ãt eo etan Buddha in Meram eo Ejelok Joñan, renaj bar lotak ilo Ene eo Erreo, ak Paradise Iturilik, ijo renaj mour ilo mõnõnõ tata ie.

Ekaitoklimo bwe, Bible eo, book eo elaptata rar ukõte im jaketo jaketak ie, ejjab kwalok bwe lal in ej juõn jikin jej aikwij ko jen e, einlok wõt juõn dekã in kijone. Ñan wanjoñok, ej ba: “Ro rewãnik renaj jolet lal eo, im renaj mour iloan ñan indio.” (Psalm 37:​29, New World Translation) Bareinwõt ilo Bible eo jej lo nan ko rebuñbuñ an Jesus: “Jerammõn ñan ro ettã burueir: bwe renaj jolet lal”​—Matthew 5:5, King James Version.

Lemnak eo ekkã an bed ibben armij ej bwe ad bed ilo lal ej juõn jikin deloñ ñan juõn jikin ekamõnõnõ elikin mij. Elañe ej eindein, inem mij ej juõn jerammõn. Ak ej eindein ke wãwen an armij ro lemnak kin mij, ak rej kate wõt ir ñan kaetoklok mour eo air? Men in kamol ko rej kwalok bwe ñe armij ro rej lo emõn joñan air ejmour im jokane, rejjab kõnan mij.

Mekarta, kinke mour ion lal ej obrak kin nana im eñtan, elõñ armij rej lemnak bwe jikin eo wõt ewõr ainemõn eo emol im mõnõnõ ie ej ilo lañ. Lañ ej ke baj juõn jikin ainemõn im mõnõnõ, ijo ejelok nana im bwok ñan jidik ie? Kwomaroñ bwilõñ kin uak ko an Bible eo. Joij im read manlok.