Jibañ Ñan Melele Bible eo
BIBLE eo ej juõn book ejej uan. Ri jeje ro an rej ba ear kakõrmol in Anij, im men ko iloan rej letok kamol eo elap bwe men eo rej ba emol. (2 Timote 3:16) Ibwiljin men ko jet ie, Bible eo ej kwalok ia eo jaar itok jene, etke jej bed ijin, im ia eo jej kaioklok. Emol ej juõn book eo tellokin ad lemnak kake!
Bõlen kwar kajeoñ readi Bible eo ak kwar lo bwe ebin am melele. Bõlen kwoj jab jelã ia eo kwon lale ñan am lo uak in kajitõk ko am. Elañe eindein, kwoj jab make iam. Wãwen eo am ej einwõt eo an juõn emaan eo ear mour ilo ebeben eo kein kajuõn. E ar iuwelok ion juõn chariot, etal jen Jerusalem ñan ailiñ eo an, Ethiopia. Ri kien in Ethiopia in ear read ilo ellaj jen kanan in Bible eo ilo book in Aiseia, eo kar je elõñlok jen jiljilimjuõn buki yiõ ko lok iman.
Ilo idiñ, juõn emaan eo ej ettõrlok iturin chariot eo ear yokyokwe e. Emaan eo kar Philip, juõn ri kaloran Jesus, im ear kajitõkin Ri Ethiopia eo: “Kwoj melele ke men eo kwoj konono kake?” Ri Ethiopia eo ear uak: “Ekijkan aõ maroñ, elañe ejelok en ej tel iõ?” Inem ear kir Philip ñan loan chariot eo. Philip ear kamelele melelen men eo leo ej readi im ear etal wõt im keañ ñan e “news eo emõn kin Jesus.”—Acts 8:30-35, New World Translation.
Ejja einwõt an kar Philip jibañ Ri Ethiopia eo ñan melele Nan in Anij ilo ien ko etto, Ri Kennan ro an Jehovah rej jibañ armij ro ñan melele Bible eo rainin. Renaj bareinwõt mõnõnõ in jibañ yuk. Ekkã an emõntata ñan katak Bible eo ilo lajrak, im jino ibben bedbed in katak ko ilo Jeje ko. (Dri Hibru 6:1) Im ke kwoj etal wõt im kõmman wõnmanlok, kwo naj maroñ bõk men eo ri jilek Paul ear naetan “ekõn ko rebin”—einwõt ba, mol ko remũlallok. (Dri Hibru 5:14) Meñe Bible eo kwoj katak, book ko jet—menin jibañ ko ñan katak Bible—remaroñ jibañ yuk bukõt im melele ennan ko ilo Bible kin elõñ kain katak ko.
Juõn katak ekkã karõke ñan juõn ien im jikin eo emõn ñan kwe. Jet rej katak ilo telephone eo bareinwõt. Katak eo ejjab kõmman ilo wãwen katak ilo juõn classroom; ej juõn karõk rej kõmmane ekkar ñan wãwen ko am make, ekoba bedbed im jelã eo am. Kwoj jab aikwij kõllã ñan juõn katak Bible eo einwõt in. (Matu 10:8) Ejelok etale joñan jelã eo am, im rejamin kõmman bwe kwon jab jokane. Kajitõk ko am naj uaki, im kwo naj katak wãwen ruaklok ñan Anij. Inem, etke kwoj aikwij katak Bible? Lemnak kin jet un ko kin etke katak Bible eo emaroñ kobaikwõj lañliñ ñan mour eo am.