Etke Kwoj Aikwij Katak Bible eo?

BILL kar juõn likao dikdik eo ear bolemen ilo ikkure, katak, im wõr an money. Ak, ear jab juburuen. Ejelok kar ial in tel ilo mour eo an, im menin ear lap an kainebataik e. Ilo an kajeoñ in lo juõn unin mour, ear etale elõñ kajjojo kabuñ ko, ak ear jab lo men eo ear bukõte. Ilo 1991 ear iion juõn ian Ri Kennan ro an Jehovah eo ear likit ibben juõn book eo ej konono kin ta eo Bible ej ba kake kin melelen mour. Kar karõk juõn katak Bible bwe Bill en kar maroñ jerbale katak in im ko jet bareinwõt.

Bill ej kememej: “Kim ar kõmmane katak eo am jinoin, im kinke ekkã am jitõñlok ñan Bible eo, I ar jelã bwe eñin men eo I ar kabukõte. Uak ko ilo Bible eo rar kanuij kairujruj. Elikin katak eo, I ar ettõrlõñlok ñan tol ko, diojlok jen truck eo, im lamõj ilo ellaj kin lañliñ. I ar bwilõñ bwe eliktata I ar katak uak ko ñan kajitõk ko aõ.”

Bwebõta, ejjab jabdewõt eo ej lo mol eo ilo Bible ej lamõj kin mõnõnõ. Ak, katak uak ko ñan kajitõk ko elap tokjeir kin mour ej juõn menin lañliñ me elõñ rej iione. Rej eñjake einwõt leo ilo parable eo an Jesus eo ear lo juõn mweiuk aorõk ettino ilo juõn jikin kallip. Jesus ear ba: “Kin an lõñliñ kake ej ilok im wiakaki men ko otemjej an, im wiaik jikin kallip eo.”​​—⁠Matu 13:⁠44.

Key eo ñan juõn Mour Ewõr Melelen

Bill ear kalmenlokjen kin juõn bedbed in kajitõk, Ta un eo unin mour? Philosopher ro, theologian ro, im scientist ro emwij air kõmman elap jibadbad ko ñan lo juõn uak ñan kajitõk in iumin thousand yiõ ko. Volume in book ko jeban bwine orair emwij an kajjojo armij jei ñan kajeoñ in uake kajitõk in. Jibadbad ko air kar ejelok tõbrakiir, im elõñ emwij air bõk jemlok in bwe kajitõk in ejjab maroñ wõr uak in. Ak, ewõr juõn uak. Meñe uak eo emũlal, ejjab bin. Rej kameleleiki ilo Bible eo. Key eo ñan juõn mour eo ekamõnõnõ, im wõr melelen ej eñin: Ej aikwij wõr juõn ad kõtan eo ejimwe ibben Jehovah, Ri Kõmanman eo ad im Jemed ilañ. Ewi wãwen ad tõbar menin?

Ewõr ruo wãwen ko rej einwõt idaptõk ikijen ruaklok eo ñan Anij. Ro rej ruaklok ñan Anij rej jimor mijak e im yokwe e. Jen etale ruo eon ko rej rejetake ennan in. Ilo ien ko etto, ri meletlet eo King Solomon ear kõmmane juõn katak eo ear lukkun etale kin armij im ear je ilo Bible eo ilo book in Ekklisiastis men ko ear loi. Ilo tarlep in etale eo an, ear je: “Eñin tokjen men eo; emwij roñjake aolepen: kwon mijõk Anij, im bokake kien ko An; bwe eñin aolepen kõmõn emõn an armij ro.” (Ekklisiastis 12:13) Ilo ebeben ko tokelik, ke rar kajitõk ibben Jesus kin kien et eo elaptata ilo Kien eo kar lelok ñan Moses, ear uak: “Kwon yokwe Iroij am Anij kin aolepen buruõm im kin aolepen am, im kin am lemnok otemjej.” (Matu 22:37) Einwõt emenin bwilõñ ke ñan yuk bwe jej aikwij jimor mijak Anij im yokwe e? Jen etale aorõkin mijak im yokwe im wãwen air jerbal ibben don ñan kalek juõn kõtan eo ewõr juburu ie ibben Anij.

Ta Melelen Mijak Anij

Juõn mijak eo ewõr kautiej ie elap tokjen bwe ad kabuñ ñan Anij en buñburuen kake. Bible eo ej ba: “Mijõk Jeova jinoin meletlet.” (Sam 111:10) Ri jilek Paul ear je: “En or joij iber, bwe jen jerbal ñõn Anij im kabuñburuen kake kin ujõke ekwojarjar im mijõk.” (Dri Hibru 12:28) Einlok wõt, juõn enjel ilo lukolbenlañ ri jilek John ear loe ilo vision eo an ear jino nanin keañ eo an kin news eo emõn kin nan kein: “Komin mijõk Anij im lelok aibujuij ñõn E.”​​—⁠Reveles̃õn 14:​6, 7.

Mijak in kin Anij, elukkun lap tokjen ñan juõn mour eo ewõr melelen, ejjab einwõt mijak eo ekalelñoñ. Jemaroñ eñjake ad lelñoñ ñe juõn ri nana eo elej im kauwatata ej kamijak kij. Ak mijak Anij​​—⁠ej mijak eo ewõr kautiej ie ñan Ri Kõmanman eo. Ej bareinwõt kitibuj mijak eo ñan jab kamõnõnõik Anij kinke e ej Ri Ekajet eo Elaptata im Kajur Bõtata, eo ewõr ibben men kein jimor kajur im maroñ ñan kaje ro rejjab bokake.

Mijak im Yokwe Rej Jerbal Ibben Don

Mekarta, Jehovah ejjab kõnan bwe armij ro ren karejar ñan e kin wõt air mijak e. Jehovah ej juõn Anij in yokwe. Ri jilek John ear emmakit ñan an je: “Anij yokwe.” (1 Jon 4:⁠8) Jehovah Anij ear jerbal ibben armij ilo yokwe, im ej kõnan oktan eo bwe armij ren uak ilo air yokwe e. Inem, ewi wãwen an yokwe rot in errã ibben mijak Anij? Men kein ruo rej ebake don. Ri jeje Sam ear je: “Kõtan eo ebak ibben Jehovah ej an ro rej mijak e.”​​—⁠Psalm 25:​14, NW.

Baj lemnak kin eñjake in kautiej im mijak eo ewõr ibben juõn ajiri kin kajur im meletlet eo an jemen. Ilo ejja ien eo wõt, juõn ajiri eo einwõt in enaj uak ñan yokwe eo an jemen. Ajiri eo enaj liki jemen im reilok ñan e ñan ialin tel, im liki bwe ialin tel in enaj bõktok tokjen ko remõn. Einlok wõt, elañe jej yokwe im mijak Jehovah, jenaj bokake ialin tel eo an, im menin enaj wõr tokjen ñan kij. Lale ta eo Jehovah ear ba kin ri Israel ro: “O, e nañin emõn elañe buru eo iloir bwe ren mijõk Iõ, im bokake kien otemjej Aõ, ien otemjej, bwe en emõn ibeir, im iben ro nejir in drio!”​​—⁠Duteronomi 5:​29.

Aet, mijak Anij ej tellok jab ñan kamakoko ak ñan anemkwoj, jab ñan buromõj ak ñan lañliñ. Isaiah ear kanan kin Jesus: “Im An lõñliñ e naj ilo mijõk Jeova.” (Aiseia 11:⁠3) Im ri jeje Sam ear je: “Emõnõnõ armij eo ej mijõk Jeova, ej lõñliñ kake kien ko An.”​​—⁠Sam 112:⁠1.

Alikar, jemaroñ jab mijak Anij ak yokwe e elañe jejjab jelã e. Eñin unin juõn katak Bible elap tokjen. Juõn katak eo einwõt in ej jibañ kij ñan melele kin kadkadin Anij im kile kin kamolol meletlet eo ilo lor ialin tel eo an. Ke jej ruaklok ñan Anij, jej kõnan kõmanman ankil an im jej emmakit ñan bokake kien ko an, ilo ad jelã bwe enaj wõr tokjeir ñan kij.​​—⁠1 Jon 5:⁠3.

Ej juõn lañliñ ñan jelã bwe juõn ej bed ilo ial eo ejimwe ilo mour. Menin emol ibben Bill, eo kar kwalok kake ilo jinoin. Ilo ien kein ear ba: “Ilo ratimjuõn yiõ ko emwij air ellãlok jen ien eo jinoin in aõ katak Bible, kõtan eo aõ ibben Jehovah emwij an eddeklok. Jarjarin lañliñ eo I ar eñjake ilo jinoin ear ejaak ñan juõn lañliñ eo emol in ialin mour. Ekkã an wõr ibba juõn lemnak emõn kin mour. Ran ko aõ rej obrak kin makitkit eo ewõr melelen, jab kin juõn jibadbad eo ejelok tokjen kin men in kamõnõnõ. Jehovah emwij an erom juõn eo emol ñan iõ, im I jelã bwe ewõr an itoklimo eo emol kin tokjen ko remõn ñan iõ.”

Ilo katak in tok ilokan, jenaj etalelok wõt wãwen an juõn jelãlokjen eo kin Jehovah ej bõktok lañliñ im tokjen ko ñan ro rej jerbale ilo mour ko air.

[Kareelel]

Ruaklok Ñan Anij Ej Melelen Bwe Jej Jimor Yokwe E Im Mijak E

[Pija]

Jesus ear lañliñ ilo mijak Jehovah