Jab Kõtlok Bwe Bere Ko Ren Kokkure Tõmak Eo Am
Juõn ran kwoj lemnak bwe kwoj bed ilo ejmour emõn. Ran eo tok juõn kwoj eñjake am nañinmij. Ilo idiñ, ejelok am kajur ak kajur in kijenmij. Emetak bõram im enbwinõm ej eñtan kin metak. Ta eo ear walok? Kij ko rekauwatata ñan enbwin rar deloñe im kamõjnoiki men ko rej jojomare enbwinõm im kokkure mõttan ko raorõk. Ilo air ilok im ejelok kar kamadmõd, kij kein rar deloñe enbwinõm remaroñ kokkure ejmour eo im ejelok jemlokin—ak meñe mõn yuk.
BWEBÕTA, elañe kwoj jab bed ilo an emõn am ejmour ñe kwoj bõk juõn nañinmij, elaplok an bidodo am bõk nañinmij. Elañe, ñan wanjoñok, enbwinõm emõjno kin an jabwe õn, maroñ eo an enbwinõm ñan jumae nañinmij ko ej “oktak im kanuij dik im nañinmij eo emaroñ kõmman jorrãn,” juõn ri jeje in melele ko kin uno Peter Wingate ej ba.
Elañe wãwen eo in, wõn enaj kar kãlet ñan an mour ilo wãwen ko ewõr ñitta ie? Bõlen, kwoj kõmman jabdewõt men eo kwo maroñ ñan an emõn am mõñã im bed ilo ejmour. Bõlen kwo maroñ bareinwõt kõmman joñan wõt am maroñ ñan bõprae am jedmatmat ñan kij ko rej kõmman nañinmij. Bõtab, kwoj kejbãrok wõt ke ñe ej itok ñan bed wõt im “jime ilo tõmak”? (Taitõs 2:2) Ñan wanjoñok, kwoj ekkõl ke kin kauwatata eo ej jarjar jen bere ko elaplok air kauwatata? Men kein emaroñ bidodo air deloñe lemnak eo am im buruõm, kokkure tõmak eo am im kõtan eo am ibben Jehovah. Jet armij einwõt rejjab ekkõl kin kauwatata in. Rej likit ir make bwe en bidodo an bere ko aujidi ir ilo air kakwuliik ir make ilo jitõb. Emaroñ ke eindein bwe kwo maroñ kõmmane menin?
Bere—Ien Otemjej Enana Ke?
Bwebõta, ejjab aolep bere enana. Jet ien, kwoj aikwij kanuij etale mokta jen am tõmak juõn men mae ien kwoj lukkun jelã kin mol ko ie. Nan in rejañ ko an kabuñ bwe kwoj aikwij tõmak wõt im jab bere jabdewõt men ej kauwatata im menin mon. Emol, Bible ej ba bwe yokwe “ej tõmak men otemjej.” (1 Dri Korint 13:7) Juõn Christian eo ej yokwe ej bojak ñan tõmak ro rej kamol air tellokin liki ilo ien ko remotlok. Ak Nanin Anij ej bareinwõt kakkõl nae air ‘tõmak nan otemjej.’ (Jabõn Kennan Ko 14:15) Jet ien lokbook eo an juõn armij ilo ien eo emotlok ej letok un eo emõn ñan bere.
Ri jilek John ej bareinwõt kakkõl Christian ro nae tõmak ilo jab etale kake mokta. “Komin jab tõmak nan in kakõrmol otemjej,” ej je. A, “melejoñ nan in kakõrmol kein elañe rej jen Anij ke jab ke.” (1 John 4:1, New World Translation) Juõn “nan,” juõn katak ak lemnak, emaroñ walok im einwõt ñe ej itok jen Anij. Ak ear lukkun itok ke jen Anij? Jerbale juõn bere emaroñ lukkun juõn menin kejbãrok kinke, einwõt an ri jilek John ba, “elõñ dri kejebwãbweik r’ar drioijlok ilo lõl.”—2 Jon 7.
Bere Ko Ejelok Bedbediir
Aet, juõn etale eo emol, im ilo ettã ñan ejaake mol eo ekkã an juõn men in aikwij. Bõtab, menin, ejjab einlok wõt ad kõtlok bwe bere ko ejelok bedbediir, im rej kõmman jorrãn ren ejaake ilo lemnak eo ad im buruõd—bere ko rej maroñ kajorrãn tõmak ko ad emwij kamoli im kõtan ko ad. Bere in rej kameleleiki einwõt juõn “jab liki in tõmak ak lemnak eo ekkã an kabañ kõmman bebe.” Kwoj kememej ke wãwen an kar Satan katton lemnak eo an Eve kin bere ko kin Jehovah? “Emol ke Anij e ar ba, komin jab mõña jen wijki otemjej ilo jikin kallip eo?” ear kajitõk. (Jenesis 3:1) Bere eo me ear walok jen kajitõk eo einwõt ejelok nana ie ear kõmman abañ ilo an lio kõmman bebe. Eñin wãwen kilten ko an Satan. E kabel ilo an kajerbal mol ko me rãjet wõt emol im riap ko. Satan ear kokkure kõtan ko relõñ im emõn, im ewõr liki ie ikijen etao in bere ko kar kaddeki ilo wãwen in.—Dri Galetia 5:7-9.
Ri kalor eo James ear alikar an melele kin jorrãn eo kin kain bere rot in. Bere ko ilo kõtan eo ad ibben Anij, James ej kakkõl, ej kõmman bwe jen “einwõt no in lometo e makõtkit im limajnono kin kõto.” Jej oktak im einwõt juõn “armij buruen ruo im bororo ilo ial ko an otemjej.”—Jemes 1:6, 8.
Debij Ejmour eo Emõn ilo Jitõb
Inem, ewi wãwen ad maroñ kejbãrok kij make jen bere ko rej kõmman jorrãn? Uak eo ekabwilõñlõñ an lamwan: ikijen bin ilo kajekdon kareelel eo an Satan im ilo ad kortokjen ilo joñan ad maroñ menin letok ko an Anij ilo jitõb ñan kõmman bwe jen “bin ilo tõmak.”—1 Piter 5:8-10.
Men eo elukkun lap tokjen ej manit emõn an juõn armij ñan bõk mõñã ilo jitõb. Elañe ejelok, tõmak eo ad, einwõt juõn enbwin eo ejjab bõk mõñã, enaj etal wõt ñan an jorrãn im enaj etal im mij. Jesus Christ ear kalikar menin ke ear ba: “Armij e jamin mour kin bred wõt, a kin nan otemjej rej waloktok jen loñin Anij.”—Matu 4:4.
Lemnak kin menin. Ewi wãwen ad kar kalek juõn tõmak eo ekajur ilo jinoin? Melele eo an in bwe jaar jino kalek tõmak im liki eo ad ilo Jehovah, kallimur ko an, im dolul eo an ikijen ad najidik kij kin Nanin Anij. Bwebõta, jaar jab tõmak ilo ejelok etale men otemjej jaar roñjaki. Jaar ‘lukkun kejbãrok ad etali Jeje ko ran otemjej im lale elañe men kein rar eindein.’ (Jerbal 17:11) Jaar ‘kamol ñan kij make ankilan Anij emõn im kabuñburuen im wãppen’ im lukkun kamol bwe men eo jaar roñjake ear mol.—Dri Rom 12:2; 1 Dri Tessalonika 5:21.
Bõprae Kwuli ilo Jitõb
Kiõ aitwerõk eo in ej ñan debij wõt tõmak eo ad ñan bõprae jabdewõt jab liki in tõmak eo me emaroñ kamõjnoiklok liki eo ad ilo Jehovah im dolul eo an. Ñan kõmmane menin jej aikwij etal wõt im etale Jeje ko ran otemjej. Ri jilek Paul ej kakkõl “bwe ilo ien ko elik jet [ro remaroñ ilo jinoin einwõt wõr juõn air tõmak ebin] renaj buñ jen tõmak, im eoroñ jitõb ro rej mon ir, im katak ko an demon rõn.” (1 Timothy 4:1, NW) Nan im katak kein rej tel bilo rej kõmman bere ko ilo lemnak ko an jet im kejebel ir jen Anij. Ta menin kejbãrok eo ad? Etal wõt im “bõk õnen nanin tõmak ko im katak eo emõn eo [kij jaar] lore.”—1 Timothy 4:6, NW.
Ak, ekaburomõj, bwe rainin jet rar kãlet ñan air jab bõk “õnen nanin tõmak ko”—meñe ebidodo bõk kain õn kein im ewõr ilo ejelok wõnãn. Einwõt an juõn ian ri jeje ro an book in Jabõn Kennan Ko kalikar, mõñã ko remõn ilo jitõb remaroñ kabol kij, juõn kwojkwoj ilo jitõb, ilo nanin kõkkar, ak jejjab lukkun mõñã im mei mõñã ko.—Jabõn Kennan Ko 19:24; 26:15.
Eñin men eo ear walok ñan jet ilo congregation eo an Christian jinoin. Bõlen, rar kajekdon air katak ibbeir make, im rar oktak im mõjno ilo jitõb. (Dri Hibru 5:12) Ri jilek Paul ear kamelele kin kauwatata eo ilo kõmman eindein ke ear jeje ñan Christian Ri Hebrew ro: “Kin men in, emõn jen kalaplok ar kejbãrok men kein j’ar roñjaki ñe j’ab elãlok jen ir jabrewõt ien.” E ar jelã joñan an bidodo deloñ ilo manit ko renana elañe jej “kejole lomor elap einwõt in.”—Dri Hibru 2:1, 3.
Ekaitoklimo, bwe juõn armij eo ej eñtan jen an jabwe õn ejjab alikar an nañinmij ak mõ. Eindeinlok, emaroñ jab mõkaj an alikar an juõn armij eñtan jen an kwuli ilo jitõb. Baotokõm ilo jitõb emaroñ emõn lale meñe ejjab jimwe am bõk õn—ak iumin jidik wõt ien! Kwo naj etal im oktak im mõjno ilo jitõb, bõk bere ko ejelok bedbediir, im jab maroñ tarinae kin tõmak eo. (Jud 3) Kwo jelã—meñe ejelok juõn ejelã—mol in joñan am bõk mõñã ilo jitõb.
Kin menin, kejbãrok wõt am katak ibbam make. Kwon kate im tarinaik bere ko. Elañe ejelok men en kwoj kõmmane kin bere ko ekkã air kõmman inebata, emaroñ walok tokjen ko ewõr jorrãn ie. (2 Dri Korint 11:3) ‘Jej lukkun mour ke ilo ran ko eliktata? Kwo maroñ ke tõmak men otemjej ko Bible ej ba? Eñin ke dolul eo emol an Jehovah?’ Satan enaj kõnan kaddek bere ko einwõt kein ilo kalmenlokjen eo am. Jab kõtlok bwe juõn lemnak in kajekdon mõñã ilo jitõb en likit yuk bwe en bidodo an katak ko an retao joñwe yuk. (Dri Kolosse 2:4-7) Lor nanin kakabilek eo kar lelok ñan Timothy. Kwon juõn ri school eo emõn in “jeje ko rokwojarjar” bwe kwon maroñ “berwõt ilo men ko kw’ar katak im rel buruõm kaki.”—2 Timote 3:13-15.
Bedwõt im “Ejmour ilo Tõmak”
Juõn eo ear kajekdon an katak Bible emaroñ aikwij elap jibañ im kõketak ñan an bar ijole an mõñã ilo jitõb. Elañe wãwen eo in kwoj bed ie, bukõt jibañ im mõnõnõ in bõk jabdewõt jibañ rej lewõj ñan yuk ñan kalek ejmour im kajur eo am ilo jitõb.—Jemes 5:14, 15.
Kanuij lemnak kin kauwatata eo kin bere ko. Elañe kwoj kajekdon am bõk mõñã eo emõn ilo jitõb ilo am katak Bible im bed ilo kwelok ko an Christian, kwoj kajedmatmat yuk ñan tarinae ko an Satan. Kwon kortokjen bwe ko relap im jejjet in mõñã eo ilo jitõb letok in “dri korijer e tiljek im meletlet.” (Matu 24:45) Etal wõt ñan “bõk nan ko remõn” im bed wõt im “ejmour ilo tõmak.” (1 Timothy 6:3, NW; Titus 2:2, NW) Jab kõtlok bwe bere ko ren kokkure tõmak eo am.
[Pija]
Ewi emõn in am najidik yuk make ilo jitõb?