Kajitõk Ko Jen Ro Rej Read

Ia eo Daniel ear bed ie ke Ri Hebrew ro jilu rar melejoñe ir iman ekjap eo elap me Nebuchadnezzar ear kajutake ilo melaj eo ilo Dura?

Bible eo ejjab ba, inem ejelok armij rainin emaroñ kwalok ia eo Daniel ear bed ie ilo ien melejoñ eo.

Jet rar ba bwe lajrak eo an Daniel ak jutak emõn eo an ibben Nebuchadnezzar ear utiejlok jen eo an Shadrach, Meshach, im Abednego im kin menin Daniel ear jab aikwij ilok ñan melaj eo ilo Dura. Daniel 2:​49 (New World Translation) ej kwalok bwe iumin juõn ien bed eo an ear utiejlok jen lõmaro jilu rejetan. Ak jejjab maroñ kamol bwe menin ear kõtlok e jen an kobalok ibben ro jet iman ekjap eo.

Ilo air kajeoñ kamelele kin an Daniel kar jako, ro jet rar ba bwe emaroñ kar etal ñan juõn jerbal in kien ak bwe ear nañinmij im kin menin ear jab maroñ bed. Bõtab, Bible eo ejjab ba menin. Ilo jabdewõt wãwen, ial eo an Daniel emaroñ kar jab tellokin notaiki, bwe elañe ear, ri kien in Babylon ro rej kamo ejelok bere renaj kar kajerbale nae e ñan naruõn. (Daniel 3:​8, NW) Mokta im elikin ien in, Daniel ear kamol e make bwe ej juõn ri kejbãrok tiljek, tiljek ñan Anij jekdon ta melejoñ eo ear jelmae. (Daniel 1:​8, NW; 5:​17, NW; 6:​4, 10, 11, NW) Inem meñe Bible eo ejjab ba etke Daniel ear jab bed ilo melaj eo ilo Dura, jemaroñ liki bwe ear jab ebbururu ilo an tiljek ñan Jehovah Anij.​​—⁠Ezekiel 14:​14, NW; Dri Hibru 11:⁠33.