Christ Ej Tel Congregation Eo An
“Lo! Ij ber ibemi ien otemjej ñõn jemlokõn lõl.”—MATU 28:20.
1, 2. (a) Ke ear lelok nan in jiroñ eo ñan kõmman ri kalor ro, Jesus eo ear jerkakbiji ta eo ear kallimur kake ñan ri kalor ro an? (b) Ewi wãwen an kar Jesus boub ilo tel congregation eo jinoin an Christian?
MOKTA jen an wanliñlok ñan lañ, Jesus Christ, Ri Tel eo ad ear jerkakbiji, ear waloklok ñan ri kalor ro an im ba: “Emwij letok ñõn Iõ kajur otemjej i lõñ im i lõl. Inem komin ilok, im kõmõn dri ailiñ ko otemjej bwe ren dri kalora, im baptais ir ilo etan Jema im Nejin im Jitõb Kwojarjar, im katakin ir bwe ren bokake nan ko otemjej I ar jiroñ kom: im lo, Ij ber ibemi ien otemjej ñõn jemlokõn lõl.”—Matthew 23:10, NW; 28:18-20.
2 Jesus ear jab kabbeik wõt ri kalor ro an kin jerbal in lomor in kõmman elõñlok ri kalor wõt ak ear bareinwõt kallimur ñan an bed ibbeir. Bwebwenato in mour in Christian eo jinoin, einwõt an mwij je ilo Bible ilo book in jerbal, ej lukkun kamol bwe Christ ear kajerbal maroñ eo kar lelok ñane ñan tel congregation eo ekãl emwij ejaake. Ear jilkinlok “ri jibañ” eo kar kallimur kake—jitõb kwojarjar eo—ñan kakajur ri kalor ro an im tel ir ilo jibadbad ko air. (Jon 16:7; Jerbal 2:4, 33; 13:2-4; 16:6-10) Jesus eo ear jerkakbiji ear kajerbal enjel ro an ilo nan in jiroñ eo an bwe ren jurake ri kalor ro an. (Jerbal 5:19; 8:26; 10:3-8, 22; 12:7-11; 27:23, 24; 1 Piter 3:22) Bareinwõt, Ri Tel eo ad ear lelok ialin tel ñan congregation eo ilo karõk eo ñan emaan ro tellokiir bwe ren jerbal einwõt juõn governing body (ro rej bõk eddo im kõmman karõk).—Jerbal 1:20, 24-26; 6:1-6; 8:5, 14-17.
3. Ta kajitõk ko naj konono kake ilo katak in?
3 A ta, kin ien kein ad, “jemlokin jukjuk im bed in”? Ewi wãwen an Jesus Christ tel congregation eo an Christian rainin? Im ewi wãwen ad maroñ kwalok bwe jej bõk jerbal in tel in?
Iroij eo Ewõr Juõn An Ri Karejar Etiljek
4. (a) Wõn ro rej ejaake jar in “dri korijer e tiljek im meletlet”? (b) Ta eo Master eo ear kõmmane ñan kejbãrok dri korijer eo?
4 Ke ear lelok kanan eo kin kakõllan an bed, Jesus ear ba: “Inem wõn eo dri korijer e tiljek im meletlet, eo an Iroij e ar likit e bwe en dri kõmñe ion ro dron, bwe en najirik ir ilo ien emõn? Emõnõnõ dri korijeran eo, an iroij e naj itok im lo an kõmõnmõn ein drein. Emol Ij ba ñõn kom, e naj kairoij e ion men ko otemjelok an.” (Matu 24:45-47) “Iroij” eo ej Ri Tel eo ad, Jesus Christ, im ear kãlet “ri korijer e tiljek im meletlet”—enbwin eo an Christian ro emwij jitõñ ir ion lal—ñan kejbãrok aolep men ko otemjej an ion lal.
5, 6. (a) Ilo juõn vision eo ri jilek John ear bõke, ta eo “jiljilimjuõn jikin lamp gold ko” im “jiljilimjuõn iju ko” rej pijaiki? (b) Ta eo mol eo ej kalikar bwe “jiljilimjuõn iju ko” rej bed anbwijmaroñ in Jesus?
5 Ilo Bible book in Revelation ej kwalok bwe ri karejar eo etiljek im meletlet ej bed iumin maroñ eo an Jesus Christ. Ilo juõn vision in “ran in Iroij,” ri jilek John ear lo “jiljilimjuõn jikin lamp gold, im iolapin jikin lamp ko, juõn einwõt Nejin armij,” eo “ilo pein anbijmaroñin jiljilimjuõn iju ko.” Ilo an kameleleik vision eo ñan John, Jesus ear ba: “Men eo etino an jiljilimjuõn iju ko kw’ar loi ilo pein anbwijmaroñiõ, im jiljilimjuõn jikin lamp ko gold: Jiljilimjuõn iju ko rej enjel ro an jiljilimjuõn eklisia ko; im jiljilimjuõn jikin lamp ko rej jiljilimjuõn eklisia ko.”—Reveles̃õn 1:1, 10-20.
6 “Jiljilimjuõn jikin lamp gold ko” rej pijaiki aolep congregation ko remol an Christian rej bed ilo “ran eo an Iroij,” eo ear ijjino ilo 1914. Ak ta kin “jiljilimjuõn iju ko”? Ilo jinoin, rar annañe aolep ro rar lotak ilo jitõb, overseer ri kabit ro rar kejbãrok congregation ko ilo ebeben eo kein kajuõn.a Overseer ro rar bed ituanbwijmaroñ in Jesus, einwõt ba, iumin maroñ im tel eo an. Aet, Christ Jesus ear tel class in ri karejar eo ejaak in kajjojo ro uan. Bõtab, kiõ, overseer ri kabit rein jet wõt orair. Ewi wãwen an jerbal in tel eo an Christ laplok ñan elõñlok jen 93,000 congregation ko an Ri Kennan ro an Jehovah ibelakin lal?
7. (a) Ewi wãwen an Jesus kajerbal Governing Body eo ñan letok jerbal in tel eo ilo congregation ko ibelakin lal? (b) Etke jemaroñ ba bwe Christian overseer ro rej ijjitõñ in jitõb kwojarjar eo?
7 Einwõt ilo ebeben eo kein kajuõn, juõn jar edik in emaan ro tellokiir jen ibwiljin overseer ro ri kabit rej kiõ jerbal einwõt Governing Body eo, im ej jutak ikijen ri karejar eo etiljek im meletlet. Ri Tel eo ad ej kajerbal Governing Body in ñan kãlet maan ro tellokiir—meñe ri kabit ro ilo jitõb ak jab—einwõt elder ro ilo congregation ko ilo bukwon ko. Ikijen menin, jitõb kwojarjar eo, Jehovah ear lelok maroñ eo ñan an Jesus kajerbale, im ej jerbale juõn jerbal eo ekanuij aorõk. (Jerbal 2:32, 33) Moktata, overseer rein rej aikwij tõbar menin aikwij ko emwij karõki ilo Nan in Anij, eo jitõb kwojarjar eo ear kakõrmoli. (1 Timote 3:1-7; Taitõs 1:5-9; 2 Piter 1:20, 21) Kãlet im ijjitõñ ko rej kõmmani elikin jar im iumin tel eo an jitõb kwojarjar eo. Bareinwõt, kajjojo ro emwij kãlet ir rej kalikar menin kamol eo kin kwalok leen jitõb eo. (Dri Galetia 5:22, 23) Inem, nan in kakabilek eo an Paul, ej jerbal einlok wõt ñan aolep elder ro, meñe ri kabit ak jab: “Inem komin kejbãrok kom im lale aolepen bwij eo Jitõb Kwojarjar e ar likit kom dri kaki ilo e.” (Jerbal 20:28) Maan rein emwij kãlet ir rej bõk ialin tel eo jen Governing Body eo im rej mõnõnõ in shepherd e congregation eo. Ilo wãwen in, Christ ej bed ibbed kiõ im ej boub ilo tel congregation eo.
8. Ewi wãwen an Christ kajerbal enjel ro ñan tel ri kalor ro an?
8 Jesus ej bareinwõt kajerbal enjel ro ñan tel ri kalor ro an rainin. Ekkar ñan wanjoñok eo kin wit im tãõ ko, ien madmad eo enaj itok ilo ien “lokõn lõl.” Wõn eo Master eo enaj kar kajerbale ñan kõmman jonikõn eo? “Dri marmir rej enjel rõn,” Christ ear ba. Ear kobaiktok: “Nejin armij e naj jilkinlok enjel ro An, im re naj ainilok jen ailiñ eo An men otemjej men in latibñil, im ro rej kõmõnmõn nana.” (Matu 13:37-41) Bareinwõt, einwõt an kar juõn enjel tel buñten neen Philip ñan an lo Ri Itiopia eunõk eo, eindein rainin elõñ menin kamol bwe Christ ej kajerbal enjel ro an ñan tel jerbal eo an Christian ro remol ñan tõbar ro emol burueir.—Jerbal 8:26, 27; Reveles̃õn 14:6.
9. (a) Ikijen ta eo Christ ej tel congregation eo an Christian rainin? (b) Ta kajitõk eo jej aikwij lemnak kake elañe jej kõnan bõk tokjen jen jerbal in tel eo an Christ?
9 Ej menin kamol ilo jelã bwe Jesus Christ ej letok ialin tel rainin ikijen Governing Body eo, jitõb kwojarjar eo, im enjel ro! Meñe jet ian ri kabuñ ro an Jehovah rar etal em jebellok ilo jidik ien jen Governing Body eo kin wõt matõrtõr ak un ko eierlok wõt, Christ ej naj kar lelok wõt jerbal in tel eo ikijen jitõb kwojarjar eo im jurake eo an enjel. Bõtab, jej bõk tokjen jen jerbal in tel eo an ilo wõt ad bõke. Ewi wãwen ad maroñ kwalok bwe jej bõk jerbal in tel eo an Christ?
“Bokake . . . Kõttã”
10. Ewi wãwen ad maroñ kwalok kautiej ñan elder ro emwij jitõñ ir ilo congregation eo?
10 Ri tel eo ad ear lelok ñan congregation ko “men in letok ilo armij rõn”—“jet dri evanjel; im jet pastor im dri kaki.” (Dri Epesõs 4:8, 11, 12) Lemnak im kõmman ko ad ñan ir rej kwalok ilo alikar elañe jej bõk jerbal in tel eo an Christ. Ejimwe im ekkar bwe jen ‘kwalok kij make bwe jej kamolol’ kin maan ro tellokiir ilo jitõb Christ ear letok ir. (Dri Kolosse 3:15) Rej bareinwõt tellokin bõk kautiej eo ad. “Ren koutiej wõt elder ro rej iroij jime, im ro rej bareinwõt jerbal ilo nan im katakin, ren kanuij koutiej ir,” ri jilek Paul ear je. (1 Timote 5:17) Ewi wãwen ad maroñ kalikar kamolol im kautiej eo ad kin elder maan ro—elder ro, ak overseer ro—ilo congregation eo? Paul ej uak: “Komin bokake im kõtãik kom ñõn ro rej tel kom.” (Dri Hibru 13:17) Aet, jen bokake ir im kõttã ñan ir.
11. Etke kautiej ñan karõk eo an elder ej juõn wãwen mour ñan baptais eo ad?
11 Ri Tel eo ad ewãppen. Maan ro ear letok ir einwõt menin letok rejjab. Inem remaroñ kõmman bwid jet ien. Ak, elap an aorõk bwe jen bed wõt im tiljek ñan karõk eo an Christ. Ilo mol, jerbal ijelman wujleplok im baptais eo ad melelen bwe jej kile maroñ eo ijjitõñ in jitõb ilo congregation eo im mõnõnõ in kõttã ñane. Baptais eo ad ‘ilo etan jitõb kwojarjar’ ej juõn menin keañ iman mejen armij bwe jejelã ta jitõb kwojarjar eo im jej kamol jerbal eo ej kõmmane ilo karõk ko an Jehovah. (Matu 28:19) Juõn baptais eo einwõt in ej kalikar bwe jej karejar ibben jitõb eo im jab kõmman jabdewõt men eo ej kabañ jerbal eo an ibwiljin ri kalor ro an Jesus. Ke jitõb kwojarjar ej jerbale juõn jerbal eaorõk ilo kãlet im ijjitõñ eo an elder ro, jemaroñ ke lukkun tõmak wujleplok eo ad elañe jej likjap in karejar ibben karõk eo kin elder ilo congregation eo?
12. Ta wanjoñok ko kin jab kautiej maroñ Jude ej kwalok, im ta eo rej katakin kij?
12 Ebed ilo Jeje ko joñok ko rej katakin kij aorõkin bokake im kõttã. Ilo an jitõñlok ñan ro rej konono nana nae maan ro emwij kãlet ir ilo congregation eo, ri jilek Jude ej jitõñlok ñan jilu wanjoñok in kakkõl ko, ke ej ba: “Ekanuij nana ñan ir, kinke rar etal ilo ial eo an Cain, im rar mõkajlok ñan loan ial eo ebwid an Balaam kin wõnãn, im rar jakolok ilo konono in jumae eo an Korah!” (Jude 11, NW) Cain ear kejekdon kakabilek in yokwe eo an Jehovah im kõnan jibadõk juõn ial in uror kin kijirãt. (Jenesis 4:4-8) Meñe ear bõk elõñ alen kakkõl ko rekwojarjar, Balaam ear kajeoñ kole armij ro an Anij kin juõn wõnãn. (Bwinbwin 22:5-28, 32-34; Duteronomi 23:5) Korah ear wõr an make eddo eo emõn ilo Israel, ak e ear jab juburuen kake. Ear kõmman jumae nae Moses ri karejar eo an Anij, leo ettãtata ion lal. (Bwinbwin 12:3; 16:1-3, 32, 33) Jorrãn ear wõtlok ion Cain, Balaam, im Korah. Ekajur wanjoñok kein rej katakin kij ñan roñjake nan in kakabilek ko an ro Jehovah ej kajerbal ir ilo bõk eddo im ñan kautiej ir!
13. Ta jerammõn ko ri kanan Isaiah ear kanan kaki ñan ro rej kõttãik ir ñan karõk eo ñan elder?
13 Wõn ejamin kar kõnan bõk tokjen jen karõk eo elap kin bõk eddo me Ri Tel eo ad ear karõke ilo congregation eo an Christian? Ri kanan Isaiah ear kanan kin jerammõn ko an karõk in kin bõk eddo, ilo an ba: “Lo! juõn kiñ e naj iroij ilo wãnik, im iroij ro re naj iroij ilo ekajet jime. Im juõn emaan e naj einwõt jikin tilekek jen kõto, im juõn ken tõrak jen lañ eo, einwõt river in dren ko ilo jikin e mõra, im einwõt lurin juõn dreka elap ilo juõn ene in mõk.” (Aiseia 32:1, 2) Kajjojo elder ej einwõt “juõn jikin” kejbãrok im lomor. Meñe kõttã ñan eo ej bõk maroñ ebin ñan kij, jen ilo ad jar jerbale ilo kij make ñan bokake im kõttã ñan maroñ eo ekwojarjar emwij karõke iloan congregation eo.
Wãwen an Elder ro Kõttã ñan Jerbal in Tel eo an Christ
14, 15. Ewi wãwen an ro rej tel ilo congregation eo kwalok bwe rej kõttãik ir ñan jerbal in tel eo an Christ?
14 Jabdewõt Christian—elaptata elder ro—rej aikwij anõk jerbal in tel eo an Christ. Overseer ro, ak elder ro, ewõr juõn joñan maroñ eo ibbeir ilo congregation eo. Ak rejjab jibadõk bwe ren ‘master ro ion tõmak eo an ri tõmak ro mõttair’ ilo air kajeoñ kajur ion mour ko air. (2 Dri Korint 1:24) Elder ro rej bõk ñan burueir nan ko an Jesus: “Kom jela bwe iroij ro an dri ailiñ ko, rej iroij wõt ioir, im ro relap rej iroij wõt ñan ir. A en jab einwõt ibemi.” (Matu 20:25-27) Ke elder ro rej kajejjet kitien eddo eo air, rej kõttã ilo air kajeoñ jerbal ñan ro jet.
15 Christian ro rej kõketak ir: “Komin kememej ro r’ar ami dri tel, . . . im komin kajeoñwe air tõmak.” (Dri Hibru 13:7) Ke mol eo in bwe elder ro rej bõk jerbal in tel ejjab un eo in unin an Christian ro bõk kõketak ñan kajeoñwe ir. Jesus ear ba: “Juõn ami Ri Tel, Christ.” (Matthew 23:10, NW) Ej tõmak eo an elder ro eo ñan kajeoñwe kinke rej ri kajeoñwe Ri Tel eo ad emol, Christ. (1 Dri Korint 11:1) Lemnak kin jet wãwen ko elder ro rej kate ir bwe ren einwõt Christ ilo kõtan eo air ibben ro jet ilo congregation eo.
16. Meñe ear bed maroñ eo ibben, ewi wãwen an kar Jesus kõmman ñan ri kalor ro an?
16 Meñe Jesus ear kajurlok jen armij jab wãppen ilo jabdewõt wãwen im bõk maroñ eo ejelok einwõt jen Jemen, ear inemõn ilo an jerbal ibben ri kalor ro an. Ear jab kabwilõñ ri roñjake ro an kin juõn menin kabwilõñlõñ kin an kwalok jelãlokjen. Jesus ear kwalok eñjake im yokwe ñan ri kalor ro an, im lemnak kin aikwij ko air aikwij ko an armij. (Matu 15:32; 26:40, 41; Mark 6:31) Ear jab aikwiji elaplok jen joñan eo ri kalor ro an rar maroñ lelok, im ear jab likit ioir elaplok jen air maroñe. (Jon 16:12) Jesus ear “inemõn im etã buru.” Kin menin, ear jab menin kailbõk, ke elõñ rar lo e bwe ej kaemololo.—Matu 11:28-30.
17. Ewi wãwen an elder ro aikwij kwalok inemõn einwõt eo an Christ ilo kõtan eo air ibben ro jet ilo congregation eo?
17 Elañe Christ Ri Tel eo ear inemõn, en ewi joñan an aikwij laplok ibben ro rej tel ilo congregation eo! Aet, rej kejbãrok bwe ren jab kajerbal ilo bwid maroñ eo emwij kabbeik ir kake. Im rej “jab konono im meletlet e kanuij emõn,” ñan kajeoñ in kabwilõñ ro jet. (1 Dri Korint 2:1, 2) Jen an eindein, rej kate ir konono nan in mol ko ilo Jeje ko ilo tubidodoiir im mol. Bareinwõt, elder ro rej kate ir kõmmanwa ilo kõtmene ko air kin ro jet im lemnak kin aikwij ko air. (Dri Pilippai 4:5) Air jelã bwe kajjojo ewõr joñan maroñ ko air, rej ilo yokwe lemnak kin joñan maroñ kein ilo wãwen eo rej kõmman ñan ri tõmak ro mõttair. (1 Piter 4:8) Im elder ro rej ettã buru im inemõn ejjab mol ke bwe rej kaemololo? Emol rej.
18. Ta eo elder ro remaroñ katak jen wãwen eo Jesus ear kõmmane ñan ajiri ro?
18 Jesus ear bidodo kebake, meñe ñan ro rettã. Lemnak kin uak eo an ke ri kalor ro an rar kauweik armij ro kin air “añintok ñõn iben ajiri redrik.” “Komin likit ajiri rõn bwe ren itok ñõn iba,” Jesus ear ba, “komin jab boprae ir.” Im “Ej jiburlep ir, im likit pein ioir, im jar kin ir.” (Mark 10:13-16) Jesus ear okmãnãn im joij, im ro jet rar kañal lok ñan e. Armij ro rar jab mijak Jesus. Meñe ajiri ro rar jokõmman ñe ej bed. Elder ro bareinwõt ebidodo kebak ir, im ke rej kwalok okmãnãn in yokwe im joij, ro jet—meñe ajiri—rej eñjake air jokõmman ibbeir.
19. Ta eo ekoba ilo bõk “lolãtãt an Christ,” im ta jibadbad eo menin ej aikwiji?
19 Joñan eo elder ro remaroñ kajeoñe Christ Jesus ej wawa ion ewi emõn in air jelã e. “Bwe wõn e ar jela lolãtãt an Iroij, bwe en katakin E?” Paul ear kajitõk. Inem ear kobaiktok: “A lolãtãt an Kraist ej iber.” (1 Dri Korint 2:16) Jelã lolãtãt an Christ ejelet jelã kin lemen wãwen an lemnak im kin aolepen kadkadin bwe jen jelã ta eo emaroñ kõmmane ilo juõn wãwen eo ealikar. Kalmenlokjen kin joñan in an emõn jela kin Ri Tel eo ad! Aet, menin ej aikwij ad kanuij lale bwebwenato ko ilo Gospel eo im ekkeini ad kobrak ad lemnak kin jelã mour im joñok eo an Jesus. Ñe elder ro rej kõmman jibadbad ñan anõk jerbal in tel eo an Christ ñan joñan in, ro ilo congregation eo ej itok wõt in laplok air kajeoñe tõmak eo air. Im elder ro rej mõnõnõ ilo air lo an ro jet lañliñ ilo air anõk buñten nee ko an Ri Tel eo.
Etal Wõt Iumin Jerbal in Tel eo An Christ
20, 21. Ke jej reimanlok ñan lal eo ekãl emwij kallimur kake, ta eo ej aikwij bwe en bebe eo ad?
20 Elap an aorõk bwe kij otemjej jen etal wõt im kõttãik kij ñan jerbal in tel eo an Christ. Ke jej ebaklok jemlokin jukjuk im bed in, wãwen eo jej bed ie ej einlok wõt eo an Ri Israel ro ilo Komlal in Moab ilo 1473 B.C.E. eo. Rar bed itõrerein Enen Kallimur eo, im ikijen ri kanan Moses, Anij ear keañ: “Kwe [Joshua] kwo naj dreloñlok iben jar in ilo eneo Jeova e ar kanõjnij ñõn ro jimair bwe En lelok ñõn ir.” (Duteronomi 31:7, 8) Joshua ri tel eo kar kãlete. Ñan deloñ ñan loan enen kallimur eo, Ri Israel ro rar aikwij kõttãik ir ñan jerbal in tel eo an Joshua.
21 Bible eo ej ba ñan kij: “Juõn ami Ri Tel, Christ.” Christ wõt kar kallimur kake bwe enaj tel kij ñan loan lal eo ekãl eo kwojarjar ej jokwe iloan. (2 Piter 3:13) Kin menin jen beek ñan kõttãik kij ñan jerbal in tel eo an ilo wãwen ko otemjej ilo mour.
[Kamelele ko itulal]
a “Iju ko” ijin rejjab annañe enjel ro. Jesus ejamin kar kajerbal juõn armij ñan jei melele ko ilo jeje ñan tokjen eo ñan jitõb in kõmanman ko jejjab loi. Kin menin “iju ko” rej aikwij jutak ikijen overseer ro an armij, ak elder ro, ilo congregation eo, ro ilo lale rej einwõt ri keañ ro an Jesus. Ke orair ej jiljilimjuõn ej kalikar an likieo ekkar ñan kien eo an Anij.
Kwoj Kememej Ke?
• Ewi wãwen an kar Christ tel congregation eo jinoin?
• Ewi wãwen an Christ tel congregation eo rainin?
• Etke jej aikwij kõttãik kij ñan ro rej tel ilo congregation eo?
• Ilo wãwen et ko elder ro rej kalikar bwe Christ ej Ri Tel eo air?
[Pija eo ilo peij 15]
Christ ej tel congregation eo im likit overseer ro ianbwijmaroñin
[Pija ko ilo peij 16]
“Bokake ro rej tel ibwiljimi im kõttã ñan ir”
[Pija eo ilo peij 18]
Jesus ear okmãnãn im bidodo kebake. Christian elder ro rej kate ir bwe ren einwõt e