Karejar Wõt Ñan Jehovah Kin Juõn Buru Ebin
“Buruõ ebin O Anij, buruõ ebin.”—SAM 57:7.
1. Etke emaroñ wõr ad liki einwõt eo an David?
JEHOVAH emaroñ kõmman bwe jen bin ilo tõmak eo an Christian, bwe jen maroñ eddeb wõt ñan mour in Christian eo emol einwõt ro ri karejaran emwij air wujleplok. (Dri Rom 14:4) Kin menin, emaroñ wõr ad liki einwõt eo an ri jeje sam David, eo ear emmakit ñan an al: “Buruõ ebin O Anij.” (Sam 108:1) Elañe ebin buruõd, jenaj emmakit ñan ad kajejjet kitien wujleplok eo ad ñan Anij. Im ilo reilok ñan e ñan ialin tel im kajur, jemaroñ kamol ad jab makitkit, bin ilo liki einwõt ri kejbãrok tiljek, “eor tokjemi ien otemjej ilo jerbal an Iroij.”—1 Dri Korint 15:58.
2, 3. Ta aorõk in nan in kõketak eo an Paul emwij je ilo 1 Dri Korint 16:13?
2 Ilo nan in kõketak ko kar lilok ñan ri kalor ro an Jesus ilo Corinth eo etto ak rej bar lukkun jerbal ñan Christian ro ilo tõre kein ran kein, ri jilek Paul ear ba: “Komin ekil, jutõk bin ilo tõmak, komin kõmõn einwõt eman, komin kajur.” (1 Dri Korint 16:13) Ilo Greek kajjojo ian kien kein ej bed wõt ilo tõre in kiõ, kin menin ej kõketak bwe kõmman rot in en wõnmanlok wõt. Ta aorõk in nan in rejañ in?
3 Jemaroñ “ekil” ilo jitõb ilo ad jumae Devil eo im bed ebak wõt ñan Anij. (Jemes 4:7, 8) Ad atartar ion Jehovah ej kamaroñ kij ñan ad bed wõt ilo burukuk im ‘jutak bin ilo tõmak eo an Christian.’ Kij—koba elõñ kõrã ro ibwiljid—“komin kõmõn einwõt eman” ilo karejar ñan Anij ilo beran einwõt ri keañ ro an Ailiñ eo. (Sam 68:11) Jej “kajur” ilo ad etal wõt im reilok ñan Jemed ilañ kin kajur ñan kõmanman ankilan.—Dri Pilippai 4:13.
4. Ta eo ej tellok ñan baptais eo ad einwõt Christian ro?
4 Jej kwalok bwe emwij ad bõk mol eo ke jaar kõmman juõn wujleplok eo eyu ñan Jehovah im kakõlleiki ikijen kõmmane juõn tulok iumin den. Ak ta eo ear tellok kij ñan ad baptais? Moktata jaar bõk jelãlokjen eo ejimwe kin Nan in Anij. (Jon 17:3) Menin ear ejaake tõmak im kamakit kij ñan ukwelok, kalikar buromõj eo emol kin kõmman bwid ilo ien ko lok. (Jerbal 3:19; Dri Hibru 11:6) Jeltokin ear itok oktak im jeblak eo ad, bwe jaar oktaklok jen manit ko rebwid ñan jibadõk juõn mour eo ej errã ibben ankilan Anij. (Dri Rom 12:2; Dri Epesõs 4:23, 24) Menin ear itok ilokantok juõn wujleplok eo kin aolepen buruõd ñan Jehovah ilo jar. (Matu 16:24; 1 Piter 2:21) Jaar kajitõk ibben Anij kin juõn bõklikit emõn im jaar baptais ilo kakõllan wujleplok eo ad ñan e. (1 Piter 3:21) Bõk buñten nee kein enaj jibañ kij ñan bed wõt im kalimjek aikwij eo kin jibadbad eo ej etal wõt ñan mour im kajejjet kitien wujleplok eo ad im etal wõt ilo ad karejar ñan Jehovah kin juõn buru ebin.
Wõnmanlok Wõt Ilo Am Bukõt Jelãlokjen eo Ejimwe
5. Etke jej aikwij etal wõt im bõk jelãlokjen eo ilo Jeje ko?
5 Ñan mour ñan wujleplok eo ad ñan Anij, jej aikwij etal wõt ñan tõbar jelãlokjen eo ilo Jeje ko im ej ejaake tõmak. Kar juõn mõnõnõ ñan bõk mõñã eo ilo jitõb ke jaar jino oktak im wõr ad jelã kin mol eo an Anij! (Matu 24:45-47) “Mõñã” kein rar enno—im emõn air kar kejmour kij ilo jitõb. Kiõ eaorõk ñan etal wõt im bõk mõñã ko ilo jitõb elap õn ie bwe jen debij wõt juõn buru ebin ke jej ro ri karejaran Jehovah emwij wujleplok.
6. Ewi wãwen am maroñ kar bõk jibañ ñan ejaake kamolol jen eñjake in buru kin mol eo ilo Bible?
6 Jibadbad ej menin aikwij ñan tõbar jelãlokjen eo elaplok ilo Jeje ko. Ej einlok wõt bukõt mweiuk aorõk ko renojak—juõn men eo ej kir ñan kattikat. Ak ej menin nawõnãn ñan lo “jelalokjen kin Anij”! (Jabõn Kennan Ko 2:1-6) Ñe juõn ri keañ kin Ailiñ eo ej mokta katak Bible ibbam, leo ak lio emaroñ kar kajerbal book eo Knowledge That Leads to Everlasting Life (Jelãlokjen eo Ej Tellok ñan Mour Indio). Emaroñ kar bwe an lap ien eo kar bõke ñan konono kin kajjojo chapter, bõlen elõñlok jen juõn ien katak. Kwar bõk tokjen ke eon ko rar jitõñlok ñani rar read im konono meleleir. Elañe ear bin tõbar juõn melele, inem rar kameleleiki. Eo ej kõmmane katak Bible eo am ear emõn an kebojak, jar kin jitõb eo an Anij, im ear jibañ yuk ñan ejaake kamolol eo jen eñjake in buru kin mol eo.
7. Ta eo ej kõmman an juõn armij tellokin katakin kin mol eo ilo Bible ñan ro jet?
7 Jibadbad in ear ekkar, bwe Paul ear je: “A eo ej dri katak ilo nan en jibõñlok eo dri kaki ilo men otemjej remõn.” (Dri Galetia 6:6) Ijin nan in Greek eo ej kwalok bwe katakin kin Nan in Anij rar likiti ilo lemnak im buruen eo kar “katakin kin nan.” Am kar bõk katak ilo wãwen in ej kõmman bwe kwon tellokin erom juõn ri kaki an ro jet. (Jerbal 18:25) Ñan tiljek ñan wujleplok eo am, kwoj aikwij debij wõt ejmour eo am ilo jitõb im bin ikijen am etal wõt ilo katak Nan in Anij.—1 Timote 4:13; Taitõs 1:13; 2:2.
Kememej Ukwelok im Oktak eo Am
8. Ewi wãwen ñan maroñ debij wõt mwil eo ekkar ñan Anij?
8 Kwoj kememej ke eñjake in rõlok eo am ke kwar katak mol eo, ukwelok, inem bõk juõn eñjake in an Anij jeorlok bwid bedbed ion tõmak ilo katok in binmour eo an Jesus? (Sam 32:1-5; Dri Rom 5:8; 1 Piter 3:18) Emol kwoj jab kõnan jeblak ñan juõn mour in jerawiwi. (2 Piter 2:20-22) Koba ibwiljin men ko renaj jibañ yuk tõbar mejenkajjik in ej, ekkeini jar ñan Jehovah enaj jibañ yuk debij wõt mwil eo ekkar nan Anij, mour ñan wujleplok eo am, im karejar wõt ñan Jehovah ilo tiljek.—2 Piter 3:11, 12.
9. Ke emwij ad ellok jen manit ko rejerawiwi, ta ial eo jej aikwij jibadõke?
9 Ke emwij am oktak im ellok jen manit ko rejerawiwi, kwar etal wõt im bukõt jibañ eo an Anij ilo am debij wõt an bin buruõm. Men eo ej walok, ej bwe kwar wanlallok ilo ial eo ebwid ak am kar etale juõn map eo emõn kwar jino etal ilo ial eo ejimwe. Kwon jab jebwãbwe kiõ. Debij wõt am atartar ion ialin tel eo an Anij, im beek ñan am bed wõt ion ial eo ñan mour.—Aiseia 30:20, 21; Matu 7:13, 14.
Jab Meloklok Wujleplok im Baptais eo Am
10. Ta un ko jej aikwij likiti ilo lemnak eo ad kin wujleplok eo ad ñan Anij?
10 Likit ilo lemnak eo am bwe kwar kõmmane juõn wujleplok ñan Jehovah ilo jar, kin juõn jerbal in tiljek eo ej ñan indio im kwoj kalimjeklok. (Jud 20, 21) Wujleplok ej kalikar juõn jenolok, ak juõn jebellok, kin juõn karõk ekwojarjar. (Livitikõs 15:31; 22:2) Wujleplok eo am ekar jab ñan juõn karõk eo ekadu kitien ak eddo ñan armij. Kar juõn wujleplok eo ñan indio ñan Kajur Bõtata eo Ijoko Otemjelok, im mour ñan wujleplok in ej aikwij tiljek ñan Anij ñan mour. Aet, ‘mour ak mij, kij an Anij.’ (Dri Rom 14:7, 8) Mõnõnõ eo ad ej wawa ion ad lelok kij ñan ankilan im ad wõnmanlok wõt im karejar ñane kin juõn buru ebin.
11. Etke kwoj aikwij kememej baptais eo am im aorõkin?
11 Kememej ien otemjej kin baptais eo am me ej kakõllan wujleplok eo am kin aolepen buruõm ñan Anij. Ear jab baptais eo ewõr ijjibed ie, kinke bebe eo kar am make. Kwoj beek ke kiõ ñan am jerbale ankil am bwe en errã ibben ankil eo ekwojarjar an Anij toan wõt am mour? Kwar kõmmane juõn kajitõk ñan Anij kin juõn bõklikit emõn im kwar baptais ñan kakõlleiki wujleplok eo am ñan e. Kejbãrok bõklikit in emõn ikijen am kajejjet kitien wujleplok eo am, im jerammõn eo emweie an Jehovah enaj bed iom.—Jabõn Kennan 10:22.
Ankil Am Ej Jerbale Juõn Mõttan
12, 13. Ewi wãwen ankilam eo make ej ekkeijaklok ñan wujleplok im baptais eo am?
12 Wujleplok im baptais emol, ear bõktok elap tokjen ko ñan million armij ro ibelakin lal. Ñe jej kakõlleiki wujleplok eo ad ñan Anij ikijen ad baptais ilo den, jej mij ikijen ialin mour eo ad mokta ak ejjab ebwer jen ankilan eo ad make. Einwõt ri tõmak ro ejimwe kar katakin ir, jej lukkun jerbale ankilan eo ad make ñe jej kõmmane juõn wujleplok ñan Anij ilo jar im kar baptais. Wujleplok mour eo ad ñan Anij im baptais ej aikwij bwe jen beek ta eo ej ankilan Anij inem kãlete ñan kõmmane. (Dri Epesõs 5:17) Kin menin jej kajeoñe Jesus, eo ear jerbale ankil an make ke ear bõjrak jen jerbal in kaamtõ, kar baptais, im wujleplok e make ñan kõmanman ankilan Jemen ilañ.—Sam 40:7, 8; Jon 6:38-40.
13 Jehovah Anij ear karõk bwe Nejin naj “kowãppen kin iñtan ko.” Kin menin Jesus ear aikwij jerbale ankilan einwõt ñan kijenmij ilo kain eñtan rot in ilo tiljek. Ñan jemlok in, ear katok kin “jar ko im akwelap ko im elap An lamij im jõñ . . . im emwij eoroñ E kin an ujõke.” (Dri Hibru 2:10, 18; 5:7, 8) Elañe jej kwalok mijak rot in kin Anij, kij bareinwõt jej liki bwe ej “eoroñ” im jemaroñ liki bwe Jehovah enaj kõmman bwe jen bin einwõt ri kennan ro an emwij wujleplok.—Aiseia 43:10.
Kwo Maroñ Debij Juõn Buru Ebin
14. Etke jej aikwij read Bible ran otemjej?
14 Ta eo enaj jibañ yuk debij juõn buru ebin im ilo wãwen in mour ekkar ñan wujleplok eo am ñan Anij? Ibben karõk eo kin bõk jelãlokjen eo ej laplok kin Nan in Anij, konono Bible ran otemjej. Menin ej juõn men eo “dri korijer e tiljek im meletlet” ekkã an kõketak kij ñan ad kõmmane. Nan in kakabilek rot in rej letok kinke mour ekkar ñan wujleplok eo ad ej aikwij bwe jen etetal wõt ion mol eo an Anij. Elañe dolul eo an Jehovah ilo an jelã kowãppen katak ko rewan, nan in kakabilek eo ñan read Bible rejamin kar lelok ñan Ri Kennan ro an Jehovah im ñan ro rej kwalok nan ñan ir.
15. (a) Ta eo jej aikwij lemnak kake ñe jej kõmman bebe ko? (b) Etke jemaroñ ba bwe jikin jerbal ko ej juõn jerbal an ien ko remotlok an Christian?
15 Ñe kwoj kõmman bebe ko, lemnak ien otemjej kin wãwen air maroñ jelet an jejjet kitien wujleplok eo am ñan Jehovah. Menin emaroñ jitõñlok ñan jikin jerbal eo am. Kwoj kate yuk ke ñan am kõmmane bwe en jibañ yuk ilo wõnmanlok eo am ilo kabuñ eo emol? Meñe armij ro kwoj jerbal ñan ir rej lo bwe Christian ro emwij air wujleplok rej liki ir im elap tõbrak rej kõmmane, rej bareinwõt lo bwe Ri Kennan ro an Jehovah ejjab tarjen joñan air kõnan bwe ren le iman ilo lal in im rejjab aitwerõk ibben ro jet ñan jibadõk ijoko elap orlok in money ie. Menin ej kinke mejenkajjik eo an Ri Kennan ro ejjab ñan tõbar mweie, buñbuñ, utiej, ak maroñ. Ñan ro rej mour ekkar ñan wujleplok eo air ñan Anij, men eo elaptata an aorõk ej kõmanman ankil eo ekwojarjar an Anij. Juõn jikin jerbal eo ej kamaroñ ir ñan bõk menin aikwij ko ilo mour ej juõn jerbal in kamõnõnõ, jerbal eo kein karuo aorõk in. Einwõt ri jilek Paul, jerbal in kabel eo air, ak jerbal eo elap, ej jerbal in kwalok nan eo an Christian. (Jerbal 18:3, 4; 2 Dri Tessalonika 3:7, 8; 1 Timote 5:8) Kwoj likit ke tokjen ko an Ailiñ eo mokta ilo mour eo am?—Matu 6:25-33.
16. Ta eo jemaroñ kõmmane elañe inebata ej kõmman an bin ñan ad mour ekkar ñan wujleplok eo ad ñan Anij?
16 Jet emaroñ kar lokjenair kin elõñ abañ ko mokta jen air kar katak mol eo. Ak burueir ear emõn kin lañliñ, kamolol im yokwe eo ñan Anij ke rar bõk kejatdikdik eo kin Ailiñ eo! Kalmenlokjen kin tokjen ko ear kõmman air lañliñ jen ien eo bwe emaroñ jibañ ir ñan air mour ekkar ñan wujleplok eo air ñan Jehovah. Ilo wãwen eo juõn, ta elañe inebata kin abañ ko ekkã ilo mour ilo jukjuk im bed in kiõ rej kalelñoñ ñan kautameik “nan eo an Anij,” einwõt an kãliklik ko kabõjrak wijki jidik ko jen air rittolok im kalle leen? (Luk 8:7, 11, 14; Matu 13:22; Mark 4:18, 19) Elañe kwoj lemnak bwe menin ej jino iten walok ñan yuk ak family eo am jolok inebata ko am ion Jehovah im jar bwe enaj jibañ yuk ñan am rittolok ilo yokwe im kamolol. Elañe kwoj jolok eddo eo am ion, enaj kejbãrok yuk im lewõj kajur ñan yuk ñan am etal wõt im karejar ñan e ilo mõnõnõ kin juõn buru ebin.—Sam 55:22; Dri Pilippai 4:6, 7; Reveles̃õn 2:4.
17. Ewi wãwen an juõn maroñ anjo ion melejoñ ko relap?
17 Etal wõt im ekkeini am jar ñan Jehovah Anij ñe kwoj kõmmane wujleplok eo am ñan e. (Sam 65:2) Ñe rej kabo yuk ñan kõmman bwid ak ñe jelmae juõn melejoñ elap, bukõt ialin tel eo an Anij im jibañ eo an ñan lore. Likit ilo am lemnak kin aikwij eo ñan tõmak, bwe ri kalor Jemes ear je: “A elañe jabrewõt iami ej aikwij meletlet [ñan anjo ion juõn melejoñ], en kajitõk kin e iben Anij, eo Ej wujlep ñõn armij otemjej, im jab enoik kake, im naj lelok ñõn e. A en kajitõk ilo tõmak im jab berre: bwe eo ej berre ej einwõt no in lometo e makõtkit im limajnono kin kõto. Bwe armij eo en jab lemnok bwe e naj bõk jabrewõt jen Iroij; E armij buruen ruo im bororo ilo ial ko an otemjej.” (Jemes 1:5-8) Elañe juõn melejoñ elukkun lap, jemaroñ tõmak menin: “Ejelok men in kabo e ar bõk kom, a eo armij rej maroñwe: a Anij e tiljek, im E jamin likit bwe ren kabo kom elap jen ami maroñ; a ilo men in kabo E naj kõmõn ial in ko, bwe komin maroñwe.”—1 Dri Korint 10:13.
18. Ta eo jemaroñ kõmmane elañe juõn jerawiwi elap enojak ej kamõjnoik ad lo mejelan ad mour ekkar ñan wujleplok eo ad ñan Jehovah?
18 Ta elañe jerawiwi eo elap im enojak ej kabõnõnõik bõklikit eo am im kamõjnoik am lo mejelan am mour ekkar ñan wujleplok eo am ñan Anij? Elañe kwoj ukwelok, kwo maroñ bõk ainemõn ilo jelãlokjen eo bwe Jehovah ‘ejamin kajekdon juõn buru erup im bedakilkil.’ (Sam 51:17) Bukõt jibañ eo an Christian elder ro rej yokwe, jelã bwe ir—ilo air kajeoñe Jehovah—rejamin kadiklok kõnan eo am ñan am lo bar jeblak eo ñan kõtan eo am ibben Jemõm ilañ. (Sam 103:10-14; Jemes 5:13-15) Inem kin juõn kãl in jitõb eo ekajur im juõn buru ebin, kwo naj maroñ kõmman ial ko rejimwe ñan neem im lo am maroñ mour ekkar ñan wujleplok eo am ñan Anij.—Dri Hibru 12:12, 13.
Karejar Wõt Kin Juõn Buru Ebin
19, 20. Etke elap tokjen bwe jen etal wõt im mour ekkar ñan wujleplok eo ad?
19 Ilo ien kein ebin mour ie, jej aikwij kate kij jerbal ñan mour ekkar ñan wujleplok eo ad im etal wõt im karejar ñan Anij kin juõn buru ebin. Jesus ear ba: “A eo e naj kijinmij ñõn jemlokõn, e in e naj mour.” (Matu 24:13) Ke jej mour ilo “ran ko eliktata,” jemlokin emaroñ itok jabdewõt ien. (2 Timote 3:1) Bareinwõt, ejelok juõn iad emaroñ lukkun jelã bwe jenaj mour ilju. (Jemes 4:13, 14) Inem elap tokjen bwe jen etal wõt im mour ekkar ñan wujleplok eo ad rainin!
20 Ri jilek Peter ear kalikar menin ilo letter eo an kein karuo. E ar kwalok bwe einwõt jakolok eo an ro rar jab tõmak Anij ilo Ibwijleplep eo, eindein lal in kõkkar in, ak jukjuk im bed eo enana an armij, enaj jako ilo “ran eo an Jehovah.” Kin menin Peter ear lamõj: “Kain armij rot kom ilo kõmman mwil kwojarjar im jerbal ko retiljek ñan Anij”! E ar bareinwõt kõketak ir: “Inem komeo, ro jitenburu, bwe kom jela mokta kin men kein, komin lale ñe kab bõklok kom [ikijen ri kaki wan ro im maan ro rejjab ekkar ñan Anij] im kom buñ jen ami bin.” (2 Piter 3:5-17) Emenin kaburomõjmõj elañe juõn eo emwij an baptais rar tel e im ejebwãbwe im ej itok ñan jemlokin mour eo an einwõt juõn eo ear likjap in debij wõt juõn buru ebin!
21, 22. Ewi wãwen nan ko ilo Sam 57:7 rar kamol mol in wãwen eo an David im eo an Christian ro remol?
21 Bebe eo am ñan mour ekkar ñan wujleplok eo am ñan Anij emaroñ emõn an kajurlok elañe kwoj likit ilo am lemnak ran eo ekamõnõnõ in baptais eo am im bukõt jibañ eo an Anij bwe nan ko im jerbal ko am ren kalañliñ buruen. (Jabõn Kennan Ko 27:11) Jehovah ejamin likjap ñan armij ro an, im emol jej aikwij tiljek ñan e. (Sam 94:14) E ar kwalok an tiriamokake im buromõj ilo an kar kabañ karõk eo an ri kijirãt ro im kõtlok David. Ilo an kamolol kin menin, David ear keañ ilo bin, jab makitkit, kin yokwe eo an ñan Ri Kõtlok eo an. Kin mũlal in eñjake, ear al: “Buruõ ebin, O Anij, buruõ ebin. I naj al, aet I naj al im nebar.”—Sam 57:7.
22 Einwõt David, Christian ro remol rejjab makitkit jen air tiljek ñan Anij. Kin bin in buru, rej kile bwe rõlok im lomor eo air ej jen Jehovah, eo rej ilo lañliñ al im lelok nebar ñane. Elañe buruõm ebin, enaj atartar ion Anij, im kin jibañ eo an kwo naj maroñ kajejjet kitien wujleplok eo am. Aet, kwo maroñ einwõt “ro dru wãnik” kin ir ri jeje sam ear al: “E jamin mijõk kin nan in kennan ko renana; erim buruen; ej liki Jeova.” (Sam 112:6, 7) Kin tõmak ilo Anij im atartar ion, kwo maroñ mour ekkar ñan wujleplok eo am im debij wõt am karejar ñan Jehovah kin juõn buru ebin.
Kwoj Kememej Ke?
• Etke jej aikwij etal wõt im bõk jelãlokjen eo ejimwe kin Bible eo?
• Etke jej aikwij likit wõt ilo lemnak eo ad ukwelok im oktak eo ad?
• Ewi wãwen jej bõk tokjen jen ad kememej wujleplok im baptais eo ad?
• Ta eo enaj jibañ kij debij wõt ad karejar ñan Jehovah kin juõn buru ebin?
[Pija ko ilo peij 28]
Kõmman bwe jerbal in kwalok nan eo an Christian jerbal eo ad elap en jibañ kij debij wõt ad karejar ñan Jehovah kin juõn buru ebin
[Pija eo ilo peij 28]
Kwoj kejbãrok wõt ke ejmour eo am ilo jitõb ilo am read Nan in Anij ran otemjej?