“Lor Wõt Iõ”

“Im emwij kir kom ñõn menin: bwe Kraist e ar iñtan kin kom, im likit joñok ñõn kom, bwe komin anõke jenkwõn ne ko neen.”​—1 PITER 2:​21.r2

1, 2. Etke wanjoñok eo ewãppen an Jesus einwõt juõn ri kaki ejjab lap an utiej ñan ad kajeoñe?

JESUS CHRIST kar Ri Kaki eo elaptata ear mour. Bareinwõt, ear wãppen, ear jab jerawiwi ilo aolepen ien mour eo an einwõt juõn armij. (1 Piter 2:​22) Melelen menin ke bwe wanjoñok eo an Jesus einwõt juõn ri kaki elap an utiej ñan kij armij jab wãppen ñan ad anõke? Ejjab ñan jidik.

² Einwõt ad kar lo ilo katak eo lok iman, bedbedin katak eo an Jesus kar yokwe. Im yokwe ej juõn men eo kij otemjej jemaroñ kaddeke. Nan in Anij ekkã an kõketak kij ñan ad eddek im kõmanmõnlok yokwe eo ad ñan ro jet. (Dri Pilippai 1:9; Dri Kolosse 3:​14) Jehovah ejjab aikwiji jen menin kõmanman ko an men eo rejjab maroñ kõmmane. Ilo mol, ke “Anij yokwe” im ear kõmanman kij ilo nememen wõt e, jemaroñ ba bwe ear eik kij ñan ad kwalok yokwe. (1 Jon 4:8; Jenesis 1:​27) Inem ñe jej konono nan ko an ri jilek Peter emwij jei ilo unintel in ad, jemaroñ uak ilo liki. Jemaroñ anõk jenkwõn neen Christ. Ilo mol, jemaroñ bokake nan in jiroñ eo an Jesus make: “Lor wõt iõ.” (Luke 9:⁠23, NW) Jen etale ewi wãwen ad maroñ anõk yokwe eo Christ ear kwalok, moktata kin mol ko ear katakin kaki, inem ñan armij ro ear katakin ir.

Kaddek Yokwe ñan Mol ko Jej Katak

3. Etke jet rej lo bwe ebin air katak, ak ta nan in kõketak eo jej lo ilo Jabõn Kennan Ko 2:​1-5?

³ Ñan yokwe mol ko jej katakin ro jet kaki, kij make jej aikwij yokwe katak mol rot kein. Ilo lal in rainin, yokwe katak ejjab ien otemjej bidodo ejaake. Mol rot kein einwõt an jabwe school im manit ko renana rej ejaak ibben jodikdik ro ej kõmman bwe elõñ en etto air jab kõnan katak. Bõtab, elap tokjen bwe jen katak jen Jehovah. Jabõn Kennan Ko 2:​1-5 ej ba: “Nejiõ, elañe kwo kõnan bõk nan ko aõ, im drebij kien ko aõ na ibõm; im ein drein kwon kajirlok lojiliñõm ñõn meletlet, im kabukot jelalokjen kin buruõm; aet, elañe kwo naj kir ñõn maroñ in kili, im koutiej ainikiõm ñõn jelalokjen; elañe kwo naj bukot e einwõt silver, im kabukot e einwõt mweiuk ko retino: inem kwo naj meletlet kake mijõk Jeova, im lo jelalokjen kin Anij.”

4. Ta eo ej melelen “kõnan” an buru, im ta lemnak eo enaj jibañ kij kõmman eindein?

⁴ Lale bwe eon kein 1 ñan 4, rej elij air kõketak kij ñan jibadbad jab ñan wõt ‘bõke’ im ‘debije’ ak bareinwõt ñan “bukõt e” wõt im “kabukot e” wõt. Ak, ta eo ej kamakit kij ñan kõmmane aolepen menin? Eokwe, lale kajin in “kabukot jelalokjen kin buruõm.” Juõn jerbal eo ej jitõñlok ñane ej ba bwe nan in kõketak in “ejjab juõn kajitõk ñan lale wõt; ej juõn nan in kibel ñan juõn lemnak juõn kõnan ñan katak ko.” Im ta eo emaroñ kõmman bwe jen kãbone im kõnan katak men eo Jehovah ej katakin kij? Wãwen eo jej melele kin men ko. Jej aikwij etale “jelalokjen kin Anij” einwõt “silver” im einwõt “mweiuk ko retino.”

5, 6. (a) Ta eo emaroñ walok ilo ien ko rej itok, im ewi wãwen ad maroñ bõprae jen air walok? (b) Etke jej aikwij etal wõt im kobaiklok ñan mweiuk aorõk ko in jelãlokjen eo emwij ad loe ilo Bible eo?

⁵ Ejjab bin tõbar juõn lemnak eo einwõt in. Ñan wanjoñok, “jelalokjen kin Anij” eo emwij am katak kake bõlen ekitibuj mol eo bwe karõk ko an Jehovah bwe armij ro ri tõmak ren mour indio ilo Paradise eo ion lal. (Sam 37:28, 29) Ñe kwar jino katak mol in, ejelok bere kwar lemnak kake einwõt juõn mweiuk aorõk eo emol, juõn mol eo ear deloñ ilo lemnak eo am im buruõm kin kejatdikdik im lañliñ. Ak ta kin kiõ? Ke ien ej ellãlok, kamolol eo am kin mweiuk aorõk eo am emadeñeoñlok ke? Inem kajeoñ, kõmmane ruo men ko. Moktata, kõkãl kamolol eo am, einwõt ba, ekkeini kabinlok lemnak eo am einwõt ñan unin am kaorõk kajjojo mol eo Jehovah ear katakin yuk, meñe ko kwar katak ilo elõñ yiõ ko remotlok.

⁶ Kein karuo, kakobaba waj wõt ñan mweiuk aorõk eo am. Eokwe ke, elañe kwar baj kõp im jojen walok juõn dekã aorõk, kwon kar baj kõbbõjojoiki wõt ke im etal bwe ejuburuõm? Ak kwon kar kõp wõt ke in lale elañe ear lõñ wõt? Nan in Anij eobrak kin mol ko raorõk ko einwõt dekã aorõk gold im mweiuk aorõk ko rittino. Jekdon ewi joñan mol ko raorõk emwij am loi, ej lõñ wõt ko kwo maroñ loi. (Dri Rom 11:33) Ñe kwoj katak juõn wãwen eo ekãl kin mol eo, kajitõkin yuk make: ‘Ta eo ej kõmman bwe en juõn mweiuk aorõk? Ej letok ke ñan iõ jelã eo emũlallok kin Jehovah ak karõk ko an? Ej letok ke ialin tel eo emõn eo emaroñ jibañ iõ ñan anõk jenkwon neen Jesus?’ Kalmenlokjen kin kain kajitõk rot in enaj jibañ yuk kalek yokwe eo am kin mol ko Jehovah ear katakin yuk.

Kwalok Yokwe kin Mol ko Jej Katak

7, 8. Ta jet ian wãwen ko jemaroñ kwalok ñan ro jet bwe jej yokwe mol ko emwij ad katak jen Bible eo? Kwalok juõn wanjoñok.

⁷ Ke jej katakin ro jet, ewi wãwen ad maroñ kwalok bwe jej yokwe mol ko emwij ad katak jen Nan in Anij? Anõk joñok eo an Jesus, jej lukkun atartar ion Bible eo ilo ad kwalok nan im katakin. Ilo ran kein, armij ro an Anij ibelakin lal rej bõk kõketak ñan kalaplok air kajerbal Bible eo ilo jerbal in kwalok nan eo ilobwilij. Ke kwoj jerbale nan in jiroñ in, bukõt wãwen ko ñan am kajelaik ri mweo bwe kwe make kwoj kaorõk men eo kwoj bõk kunam ie jen Bible eo.​—Matu 13:52.

⁸ Ñan wanjoñok, ilo tõre eo elikinlok wõt nitbwili eo an terrorist yiõ eo lok ilo New York City, juõn sister ear bõk kunan im konono Sam 46:​1, 11 ñan armij ro ear ion ir ilo jerbal in kwalok nan eo an. E ar mokta kajitõk ibben armij ro ewi wãwen air kar kamadmõd ilo wãwen eo ear walok jen jorrãn eo. E ar kanuij roñjake uak eo air, kamol e, inem ear ba: “I maroñ ke bõk kunaõ kin juõn eon ibbemi eo me ear kanuij kainemõn iõ ilo ien in ear kanuij in bin?” Jejjo wõt rar makoko, im elõñ konono ko remõn ear walok tokjeir. Ilo an kar konono ibben jodikdik ro, ejja sister in wõt ekkã an ba: “I ar katakin kin Bible ilo 50 yiõ ko remotlok tok ñan kiõ, im kwo jelã ta? Ijañin kar ion juõn abañ eo me book in ejjab maroñ jibañ ñan lo mejelan.” Ilo ad kebak armij ro ilo juõn jitõbõn ettã buru, itoklimo, jej kwalok ñan armij ro bwe jej kaorõk im yokwe men eo jaad katak jen Nan in Anij.​—Sam 119:97, 105.

9, 10. Tokjen ñan kajerbal Bible ñe jej uak ñan kajitõk ko kin tõmak ko ad?

⁹ Ñe armij ro rej kajitõk ibbed kin kajitõk ko kin tõmak ko ad, ewõr juõn ad kãlet ien eo emõn ñan kwalok bwe jej yokwe Nan in Anij. Ilo ad anõk joñok eo an Jesus, jejjab baj bedbede wõt uak ko ad ion lemnak ko ad make. (Jabõn Kennan Ko 3:​5, 6) Ak, jej kajerbal Bible eo ilo uak. Kwoj mijak ke bwe juõn armij emaroñ kajitõk ibbam juõn kajitõk eo kwo jamin maroñ uake? Lemnak kin ruo buñten nee ko kwo maroñ kõmmani ñan am ellã jen abañ eo.

¹⁰ Kõmmane men eo kwo maroñ bwe kwon bojak. Ri jilek Peter ear je: “A komin kokwojarjar Christ einwõt Iroij ilo buruemi, im komin bojak ien otemjej bwe komin uak ñan jabdewõt armij ej kajitõk ibemi kin unin kejatrikrik eo ej iloami, a kin inemõn im mũlalin kautiej.” (1 Peter 3:​15, NW) Kwo bojak ke in jojomare tõmak ko am? Ñan wanjoñok, elañe juõn ekõnan jelã etke kwoj jab bõk kunam ilo jet manit ko ejelok ilo jeje ko, en jab juburuõm ilo am baj ba wõt, “Ej nae kabuñ eo aõ.” Juõn uak eo einwõt in emaroñ kalikar bwe kwoj kõtlok an ro jet kõmmani bebe ko am ñan yuk im kin menin kwoj aikwij uan juõn manit in kabuñ. Emaroñ emõnlok ba, “Nan in Anij, Bible eo, ej kamoiki” ak, “Enaj jab kamõnõnõik Anij eo aõ.” Inem lelok juõn kamelele in kõmmanwa kin unin.​—Dri Rom 12:1.

11. Ta kein jerbal in etale eo emaroñ jibañ keboj kij ñan uak kajitõk ko kin mol ko ilo Nan in Anij?

¹¹ Elañe kwoj eñjake bwe kwoj jab bojak, etke kwoj jab bõk jet ien im katak book ne Reasoning From the Scriptures (Kõmmanwa Jen Jeje ko) elañe ewõr ilo kajin eo am?a Kãlet jejjo unintel ko me remaroñ kajitõk kaki, im bõk jet point ko jen Jeje ko im kememeji. Keboje book in Kõmmanwa eo im Bible eo am bwe ren bojak. Jab ãliklik in kajerbali jimor, jiroñ ri kajitõk eo bwe ewõr juõn am kein jerbal in etale eo kwo kõnan kajerbale ñan jibañ lo uak ko jen Bible eo ñan kajitõk ko.

12. Ewi wãwen ad maroñ uak elañe jejjab jelã uak eo ñan juõn kajitõk ilo Bible?

¹² Kajeoñ jab inebata ilo ejelok tokjen. Ejelok armij jab wãppen ewõr ibben aolep uak ko. Inem ñe rej kajitõk kin juõn kajitõk in Bible eo kwoj jab maroñ uake, ien otemjej kwo maroñ uak ilo wãwen in: “Kommol kin am bõkmantak juõn kajitõk eo ekaitoklimo einwõt in. Ak buromõj bwe Ij jab jelã uak eo, ak Ij tõmak bwe Bible eo ej kwalok kin menin. Ij mõnõnõ in etale menin ilo Bible eo, inem I naj etale kajitõk eo am im bar jeblakwõj ñan ibbam kin juõn uak.” Juõn uak eo ettã einwõt in ilo kebak armij eo emaroñ kõmman bwe konono ko ren wõnmanlok wõt.​—Jabõn Kennan Ko 11:2.

Yokwe ñan Armij ro Jej Katakin Ir

13. Etke jej aikwij debij wõt juõn lemnak eo emol kin wãwen eo an ro jej kwalok nan ñan ir

¹³ Jesus ear kwalok an yokwe armij ro ear katakin ir. Ewi wãwen ad maroñ kajeoñe e ilo wãwen in? Jej aikwij jab ejaake juõn lemnak eo ejelok an eñjake ñan armij ro ibelakiir. Emol, “tõrinae in ran elap ran in Anij ekajur otem kajur” ej ebaktok loe, im elõñ billion ibwiljin armij ro renaj jako. (Reveles̃õn 16:14; Jeremiah 25:​33, NW) Ak, jejjab jelã wõn enaj mour im wõn enaj mij. Ekajet in enaj walok ilo ran ko rej itok im Jesus Christ eo Jehovah ear kãlete enaj kõmmane. Mae ien eo ekajet eo ej kõmman, jen lale kajjojo armij einwõt ro ewõr maroñ ñan oktak im juõn ri karejaran Jehovah.​—Matu 19:24-​26; 25:31-​33; Jerbal 17:31.

14. (a) Ewi wãwen ad maroñ etale kij make ikijen elañe ewõr ad itoklimo kin armij ro? (b) Ilo wãwen et ko remõn jemaroñ kwalok ad itoklimo kin ro jet?

¹⁴ Inem, einwõt Jesus, en wõr ad itoklimo kin armij ro. Jemaroñ kajitõk ibbed make: ‘Ij eñjake ke kin armij ro rej tel biloik ir kin jerbal in etao im riap ko an kabuñ ko an lal in, kien ko, im business ko? Elañe einwõt ewõr air itoklimo kin ennan eo jej bõklok ñan ir, jej etale ke ñan melele etke rej eñjake ilo wãwen eñjake eo rej bed ie? Ij kile ke bwe Ña, ak ro jet rej kiõ karejar ñan Jehovah ilo tiljek, juõn ien kar eindeinlok kar eñjake eo air? Emwij ke aõ bõk wãwen in ilo aõ kwalok nan? Ak Ij kajekdon ke armij ro einwõt rejjab maroñ oktak?’ (Reveles̃õn 12:9) Ñe armij ro rej eñjake mol in itoklimo eo ad, enaj laplok air einwõt uak ñan ennan eo ad. (1 Piter 3:8) Kwalok itoklimo emaroñ bareinwõt kamakit kij ñan kwalok an laplok an itoklimoid ibben armij ro jej ion ir ilo jerbal in kwalok nan eo ad. Jemaroñ je kajitõk ko im lemnak ko air. Ñe jej jeblaklok, jemaroñ kwalok ñan ir bwe jaad lemnak kin nan ko rar kwaloki ilo ien lolok eo ad mokta. Im kajelaik ir elañe ewõr air aikwij eo ej menin ekaiuriur ilo ien eo, bõlen jemaroñ lelok jet jibañ ko remõn.

15. Etke jej aikwij bukõt emõn eo ilo armij ro jet, im ewi wãwen ad maroñ kõmman eindein?

¹⁵ Einwõt Jesus, jej bukõt emõn eo ilo armij ro. Bõlen juõn jemen ak jinen emake ian ej kõmmane juõn jibadbad eo emõn ñan lale ajiri ro nejin. Bõlen juõn emaan ej kate ñan jurake family eo an. Juõn armij eritto ej kwalok an itoklimo ilo men ko ilo jitõb. Jej lo ke kain kadkad rot kein ibben armij ro jej ion ir im nebar ir? Ilo ad kõmman eindein, jej kalikar wãwen eo ikõtad im emaroñ kabellok ial eo ñan lelok juõn nan in kennan kin Ailiñ eo.​—Jerbal 26:​2, 3.

Ettã Buru Elap Tokjen ilo Kwalok Yokwe

16. Etke elap tokjen ñan ad bed wõt ilo inemõn im kautiej ñan ro jej kwalok nan ñan ir?

¹⁶ Yokwe armij ro jej katakin ir enaj kamakit kij ñan ad lukkun lemnak kin nan in kakkõl eo emeletlet ilo Bible: “Jelã ej koutiej buru, a yokwe ej kalek.” (1 Dri Korint 8:1) Jesus ear lap an jelãlokjen, ak ear jab kautiej e make. Inem ke kwoj bõk kunam ibben ro jet kin tõmak ko am, bõprae an wõr keojaljal ak juõn mejatoto in lomaan. Mejenkajjik eo ad ej ñan tõbar buruen armij ro im kaal ir ñan mol ko elap ad yokwi. (Dri Kolosse 4:6) Kememej, ke Peter ear kakabilek Christian ro ñan air bojak in kõmmane juõn jojomar, ear kobaik nan in kakememej eo bwe jej aikwij kõmman eindein “ibben don kin juõn inemõn im kautiej.” (1 Peter 3:​15, NW) Elañe jej inemõn im kautiej, enaj laplok ad kaaltok armij ro ñan Anij eo jej karejar ñane.

17, 18. (a) Etke jej aikwij uak ñan lemnak ko rej etale kij kaki kin kadkad ko ad einwõt ri kwalok nan? (b) Etke juõn jelãlokjen kin kajin Bible ko etto ejjab lap tokjeir ñan ri school in Bible ro?

¹⁷ Ejelok unin kabwilõñ armij kin jelãlokjen eo ad ak jikin bõk jelãlokjen eo jaad bed ie. Elañe wõr juõn ilo territory eo am ej makoko in eoroñ jabdewõt eo ejelok an degree in university ak title ko jet, jab kõtlok bwe lemnak eo air en kabwer yuk. Jesus ear kajekdon jumae eo bwe ear jab bed ilo school ko reutiej ilo ran ko an; bareinwõt ear jab lelok e ñan kalijeklok ko rebuñbuñ ñan kabwilõñ armij ro kin katak eo an elap.​—Jon 7:​15.

¹⁸ Ettã buru im yokwe elaplok tokjeir ñan Christian ri kwalok nan ro jen jabdewõt joñan ilo jikin bõk jelãlokjen ko. Ri Katakin eo Elap, Jehovah, ej kamaroñ kij ñan jerbal in kwalok nan. (2 Dri Korint 3:​5, 6) Im jekdon ta eo jet ian ri tel ro an Christendom rej ba, jejjab aikwij katak kajin Bible ko etto bwe en tellokin ad oktak im ri kaki ro an Nan in Anij. Jehovah ear kakõrmol Bible eo bwe ren je ilo wãwen alikar, ilo kajin alikar bwe jabdewõt en maroñ melele mol ko raorõk ie. Mol kein rej bed wõt ilo ejelok oktak meñe rej ukõti ñan buki ion buki kajin ko. Inem juõn jelãlokjen in kajin ko etto, meñe jet ien ewõr tokjeir, ejjab menin aikwij. Bareinwõt, utiej buru ilo maroñ in kajin emaroñ kõmman an juõn luji kadkad eo elap tokjen ñan Christian ro remol​—maroñ katakin.​—1 Timote 6:4.

19. Ilo wãwen et eo jerbal in kwalok nan in Christian eo ad ej juõn jerbal in karejar?

¹⁹ Ejelok bere bwe jerbal in kwalok nan in Christian eo ad ej juõn jerbal eo ej aikwiji juõn lemnak in ettã buru. Ekkã ad kajedmatmate kij make ñan jumae, ejelok itoklimo, meñe matõrtõr. (Jon 15:20) Ak, ilo ad tiljek im jerbale wõt jerbal in kwalok nan eo ad, jej kõmmane juõn jerbal eo elap tokjen. Elañe jej etal wõt im jerbal ilo ettã ñan ro jet ilo jerbal in, jej kajeoñe yokwe eo Jesus Christ ear kwalok ñan armij ro. Lemnak: Elañe jaad aikwij in tõbar juõn thousand armij ro ejelok air itoklimo, ak armij ro rej jumae ñan ad maroñ tõbar juõn armij eo einwõt sheep, menin ejamin kar juõn jibadbad eo ewõr aorõkin ke? Emol! Inem niknik wõt ilo jerbal in, jab ebwer, jej ilo tiljek karejar ñan ro einwõt sheep im jejañin tõbar ir. Ejelok bere Jehovah im Jesus renaj lale bwe en lõñlok wõt kajjojo kain armij rot in eaorõk jenaj lo ir im jibañ ir mokta jen an jemlokin itok.​—Haggai 2:​7, NW.

20. Ta jet ian wãwen ko jemaroñ katakin ikijen wan joñok?

²⁰ Katakin ikijen wanjoñok ej bar juõn wãwen kwalok ad mõnõnõ in karejar ñan ro jet. Ñan wanjoñok, jej kõnan katakin armij ro bwe karejar ñan Jehovah, “Anij e mõnõnõ,” ej emõntata, elap an kajejjet kitien wãwen mour bwe en maroñ. (1 Timote 1:​11) Ke rej lale mwilid im jerbal ko ad ibben ro ri turud ibelakid, ri school ro rejetad, im ri jerbal ro rejetad, ren maroñ ke lo bwe jej mõnõnõ im juburuõd? Ilo wãwen in lok wõt, jej katakin ri school in Bible ro bwe congregation eo an Christian ej juõn jikin kone in yokwe ilo juõn lal in kõmman nana im bwoktak. Ri school ro ad ren maroñ ke bojak in lo bwe jej yokwe aolep ro ilo congregation eo im niknik ilo jerbal in kejbãrok ainemõn ibben don?​—1 Piter 4:8.

21, 22. (a) Etale kij make ikijen jerbal in kwalok nan eo ad emaroñ tellok kij ñan bõk ien et ko remõn? (b) Ta eo naj konono kake ilo katakin tok juõn?

²¹ Juõn kõnan ñan jerbal in kwalok nan eo ad emaroñ, jet ien, kamakit kij ñan ad bar etale kij make. Ilo air kõmman eindein ilo mol, elõñ rej lo bwe rej bed ilo juõn wãwen eo ñan kalaplok jerbal eo air ilo air bõk jerbal in kwalok nan full-time ak emmakitlok in jerbal ijo elaplok aikwij ie. Ro jet rar beek ñan katak juõn kajin eo ejjab air ñan jerbal ilo territory eo ilo bukwon eo air im ej lõñlok ruwamaejet ro rej emmakittok ñane. Elañe kain wãwen in ebellok ñan kwe, kanuij etali im lemnak kaki ilo am jar. Juõn mour in karejar ej bõktok elap lañliñ, juburu, im ainemõn in lemnak.​—Ekklisiastis 5:​12.

²² Ilo jabdewõt wãwen, jen etal wõt im kajeoñe Jesus Christ ilo ad kalek yokwe eo ad ñan mol ko jej katakin kaki im ñan armij ro jej katakin ir. Ejaake im kalikar yokwe ilo wãwen kein ruo enaj jibañ kij likit juõn bedbed ñan ad einwõt Christian ro rej ri kaki. Ak, ewi wãwen ad maroñ ekkal ion bedbed in? Katak in tok juõn enaj konono kin kilen katakin ko Jesus ear kajerbali.

[Kamelele ko itulal]

Ewi Wãwen Am Naj Kar Uak?

• Ta kamol eo ewõr ibbed bwe joñok eo an Jesus einwõt juõn ri kaki ejjab lap an utiej ñan kij ñan ad kajeoñe?

• Ewi wãwen ad maroñ kwalok bwe jej yokwe mol ko emwij ad katak jen Bible eo?

• Etke elap tokjen ñan bed wõt ilo ettã ke jej eddeklok ilo jelãlokjen?

• Ta jet ian wãwen ko jemaroñ kwalok yokwe ñan armij ro jej kate kij ñan katakin ir?

[Pija eo ilo peij 14]

Jej kwalok yokwe ñan armij ro ilo bõk kunad kin news eo emõn ibbeir