Jehovah Ej Ierõke Kwe
“Komin likit ami inebata otemjej na iben [Anij], bwe Ej ierki kom.”—1 PITER 5:7.
1. Ilo wãwen et eo eaorõk Jehovah im Satan rej einjuõn jen don?
JEHOVAH im Satan relukkun einjuõn jen don. Jabdewõt armij eo ej ebak ñan Jehovah enaj kar kijirãte Devil eo. Oktak in jen don emwij kalikare ilo juõn book ak standard reference work. Ikijen kõmman ko an Satan book in Bible eo Job ej kamelele kake, Encyclopædia Britannica (1970) eo ej ba: ‘Jerbal eo an Satan ej ñan itoitak ilo lal im kinaaklok armij ro; jerbal eo an ej oktan jerbal eo an “mejen Iroij,” eo ej ñan itoitak ilo lal ñan kakajur aolep men ko remõn (II Chron. xvi, 9). Satan ejjab liki jabdewõt armij kin air kõmman emõn ilo ejelok kibbon im emwij an bõk melim ñan melejoñe ir ekkar ñan kien ko Anij ear likiti.’ Aet, ej juõn oktak elap!—Job 1:6-12; 2:1-7.
2, 3. (a) Ewi wãwen melelen nan in “Devil” eo ear alikar ilo ta eo ear walok ñan Job? (b) Ewi wãwen an Bible eo kwalok bwe Satan ej wõnmanlok im kinaak ro ri karejaran Jehovah ion lal?
2 Nan in “Devil” eo ej itok jen juõn nan in kajin Greek eo ej melelen “ri kinaak eo ewan,” “ri ruruwe.” Book in Job ear kalikar bwe Satan ear kinaak Job, ri karejar eo etiljek an Jehovah, bwe ear karejar ñan E kin juõn un ekibbon, ilo an ba: “Ejelok unin an Job mijõk Anij ke?” (Job 1:9) Bwebwenato eo ilo book in Job ej kwalok bwe meñe ear jelmae melejoñ ko, Job ear ebake wõt Jehovah. (Job 10:9, 12; 12:9, 10; 19:25; 27:5; 28:28) Elikin melejoñ eo an, ear ba ñan Anij: “I kar roñjake kin lojilñiõ kin Kwe; a kiõ meja ej kab lo Yuk.”—Job 42:5.
3 Satan ear bõjrak ke jen an kinaaklok ro ri karejaran Anij jen ien eo an Job tok ñan kiõ? Jaab. Book in Revelation ej kwalok bwe ilo ien in jemlokin, Satan ej wõnmanlok wõt im kinaaklok ri kabit ro jatin Christ im ri tiljek ro mõttair bareinwõt. (2 Timote 3:12; Reveles̃õn 12:10, 17) Inem, aikwij eo elap ñan kij aolep einwõt Ri Christian ro remol ej ñan kõttãik kij ñan Anij, Jehovah, eo ej ierki kij, im jerbal ñan e ilo yokwe eo emũlal im kamol bwe nan in kinaak eo an Satan ejjab mol. Ilo ad kõmman eindein, jenaj kamõnõnõik buruen Jehovah.—Jabõn Kennan Ko 27:11.
Jehovah Ej Bukõt Wãwen ko ñan Jibañ Kij
4, 5. (a) Ilo keidi ibben Satan, ta eo Jehovah ej bukõte ion lal? (b) Elañe jekõnan kabuñburuen Jehovah, ta eo jej aikwij kõmmane?
4 Devil eo ej itoitak ion lal, im bukõt unin ñan an kinaaklok im kokkure jabdewõt armij. (Job 1:7, 9; 1 Piter 5:8) Ilo keidi men in, Jehovah ej bukõt ro rej aikwij jibañ im kajur eo an. Ri kanan eo Hanani ear ba ñan King Asa: “Bwe mejen Jeova rej etõrlok im etõrtok ilo aolepen lõl, im mõke kwalok E kajur im jibõñ ro burueir rewãppen ñõn E.” (2 Kronikel 16:9) Men in ej juõn oktak elap ikõtan wãwen an Satan etale armij ilo kijirãt im wãwen an Jehovah kejbãrok ak ierki armij ilo yokwe!
5 Jehovah ejjab kejjade kij ñan an bukõt bwid im likjap ko ad. Ri jeje sam ear je: “Elañe Kwe, O Jeova, kwo naj kakõle jerawiwi ko, O Iroij, wõn e naj jutõk?” (Sam 130:3) Uak eo in: ejelok juõn emaroñ jutak. (Ekkisiastis 7:20) Elañe jej ruaklok ñan Jehovah kin aolepen buruõd, enaj lo kij, jab ekajete kij, ak ñan kalimjek kõmman ko ad im uake jar ko ad ñan bõk jibañ im jolok bwid ko ad. Ri jilek Peter ear je: “Mejen Jehovah Iroij rej lale ro remõn, im lojilñin rej ñan jar ko air; ak turin mejen Iroij ej nae ro rej kõmman nana.”—1 Peter 3:12, NW.
6. Ewi wãwen joñok eo an David ej juõn men in kainemõn im kakkõl ñan kij?
6 David ear jab wãppen im ear jerawiwi ilo juõn wãwen elap. (2 Samuel 12:7-9) Ak ear kabellok aolepen buruen ñan Jehovah im ruaklok ñan e im eowor. (Sam 51:1-12, superscription) Jehovah ear roñjake jar eo an im jolok bwid eo an, meñe David ear bõk jerata ko jen jerawiwi ko an. (2 Samuel 12:10-14) Men in ej aikwij juõn men in kainemõn im kakkõl. Ej juõn men in kainemõn bwe Jehovah ej mõnõnõ in jolok bwid ko ad elañe jej ukwelok jen buruõd, ak jej aikwij kememej bareinwõt bwe jerawiwi ekkã an bõktok jerata ko. (Dri Galetia 6:7-9) Elañe jekõnan ruaklok ñan Jehovah, jej aikwij bed etolok jen jabdewõt men ejjab buñburuen kake.—Sam 97:10.
Jehovah Ej Karuaktok Armij ro An ñan E
7. Kain armij rot ro Jehovah ej bukõti, im ewi wãwen ej karuaklok ir ñan e?
7 David ear jeje ilo juõn ian sam ko an: “Bwe meñe Jeova eutiej, Ej lale ro rettã: ro dri jua E jela kajer jen etolok.” (Sam 138:6) Eindeinlok wõt, bar juõn sam ej ba: “Wõn eo einwõt Jeova amuij Anij, eo An ken jijõt eutiej? Eo ej mõke kõtaik E bwe en lo men ko i lõñ kab ilo lõl.” (Sam 113:5-7) Aet, Ri Kõmanman eo eutiejtata ilañ im ion lal ej kõttãik e jen juõn jikin eutiej, im mejen ej lo “eo ettã buruen,” “eo ettã,” armij ro rej “buromõj kin men in jõjõ ko otemjej rar kõmmani.” (Ezekiel 9:4, NW) Ej karuaktok armij rein ñan e ikijen Nejin. Ke ear bed ion lal, Jesus ear ba: “Ejelok armij ej maroñ itok ñõn iba elañe Jema eo E ar jilkintok Iõ E jab ibertok e: . . . Ejelok juõn armij e maroñ itok ñõn iba, elañe Jema e jab lelok ñõn e.”—Jon 6:44, 65.
8, 9. (a) Etke kij aolep jej aikwij ruaklok ñan Jesus? (b) Ta eo ej kõmman bwe binmour eo en juõn karõk ekabwilõñlõñ?
8 Armij otemjej rej aikwij kebak Jesus im tõmak ilo binmour eo emwij katok kake kinke rar lotak ilo jerawiwi, im jenolok jen Anij. (Jon 3:36) Rej aikwij bar jeraik Anij. (2 Dri Korint 5:20) Anij ear jab kõttar mae ien eo ri jerawiwi ro rej eowore bwe en ejaake juõn karõk bwe ren bed ilo ainemõn ibben. Ri jilek Paul ear je: “Anij ej kwalok karkarin An yokwe ñõn kij, ilo men in, ke j’ar dri jerawiwi, Kraist e ar mij kin kij. . . . Bwe elañe, ke j’ar dri kijirãt, mij an Nejin e ar kilajrõk ñõn kij im Anij; en laplok, ke emwij kilajrõk, naj lomoren kij ilo An mour.”—Dri Rom 5:8, 10.
9 Ri jilek John ear kalikar mol eo emõntata bwe Anij ej jeraik armij, ilo an je: “Ilo men in emwij kwalok ilo kij an Anij yokwe, bwe E ar jilkintok ilo lõl juõn wõt E ar keutak, bwe jen mour kin E. Yokwe ej ilo men in, jab bwe j’ar yokwe Anij, a bwe E ar yokwe kij, im jilkintok Nejin, bwe En ken mirik kin jerawiwi ko ar.” (1 Jon 4:9, 10) Anij eo ear jino emmakit im bõk eddo eo mokta im jab armij. Men in ejjab kamakit yuk ke bwe kwon ruaklok ñan juõn Anij eo elap an yokwe “ri jerawiwi ro,” aet “ri kijirãt ro”?—Jon 3:16.
Aikwij eo ñan Bukõt Jehovah
10, 11. (a) Ta eo jej aikwij kõmmane ñan bukõt Jehovah? (b) En kar ewi lemnak eo ad kin jukjuk im bed eo an Satan?
10 Emol, Jehovah ejjab iun kij bwe jen ruaklok ñan e. Jej aikwij bukõt e, “Bwe ren bukot Anij, elañe rej maroñ in jatol E, im lo E, ijoke E jab etolok jen kij otemjej.” (Jerbal 17:27) Jej aikwij kile bwe ewõr an Jehovah maroñ ñan kajitõkin kij bwe jen kõttãik kij ñan e. Ri kalor eo Jemes ear je: “Inem komin kõtaik kom ñõn Anij; a komin jumae devil im e naj ko jen kom. Komin druaklok ñõn Anij, im E naj druakwoj ñõn kom. Karreo peimi, kom dri jerawiwi; im kokwojarjar buruemi kom dri buru jibil.” (Jemes 4:7, 8) Jejjab aikwij jenliklik jen ad jutak bin nae Devil eo im jutak bin ibben Jehovah.
11 Men in ej melelen bwe jen bed etolok jen jukjuk im bed ko renana an Satan. Jemes ear je: “Kom dri lũñ, kom jab jela ke bwe an lõl yokwe ej kijirãte Anij? Inem jabrewõt e kõnan bwe en jeran lõl ej dri kijirãte Anij.” (Jemes 4:4) Ilo oktan, elañe jekõnan jeraik Jehovah, jej aikwij kõtmene bwe lal eo an Satan enaj kijirãte kij.—Jon 15:19; 1 Jon 3:13.
12. (a) Ta nan in kainemõn ko David ear jeje kaki? (b) Ta nan in kakkõl eo Jehovah ear litoki ikijen ri kanan eo Azariah?
12 Ñe lal eo an Satan ej jumae kij ilo juõn wãwen , jej aikwij lukkun kebak Jehovah ilo jar, kajitõk ibben ñan jibañ kij. David, eo me Jehovah ear lomoren iumin elõñ alen, ear jeje nan kein ñan kainemõn kij: “Jeova ej ebak ñõn ir otemjej rej kir ñõn E, ñõn ro otemjej rej kir ñõn E ilo mol. E naj kamol kõnan an ro remijõk E; e naj bareinwõt roñjake air lamij im lomorir. Jeova ej kejbãrok ir otemjej rej yokwe E; a ro renana otemjej E naj kokkure ir.” (Sam 145:18-20) Sam in ej kwalok bwe Jehovah emaroñ lomoren kij ñe kij kajjojo jej bed ilo melejoñ ko im enaj lomoren armij ro an einwõt juõn dolul ilo ien “Iñtan eo elap.” (Reveles̃õn 7:14) Jehovah enaj bed ebake kij elañe jej bedwõt ebak ñan e. Iumin tel eo an “jitõbõn Anij,” ri kanan eo Azariah ear ba kin ta eo jemaroñ watõke einwõt juõn nan in mol eo ej jerbal ilo elõñ wãwen: “Jeova ej ibemi elañe kom iben: im elañe komij kabukot E, kom naj lo E: a elañe kom illok jen E, E naj ilok jen kom.”—2 Kronikel 15:1, 2.
Jej Aikwij Lukkun Tõmak bwe Jehovah Ej Bed
13. Ewi wãwen ad maroñ kwalok bwe elukkun mol an Jehovah bed?
13 Ri jilek Paul ear jeje kin Moses bwe ear “kijenmij einwõt an lo Eo re ban lo E.” (Dri Hibru 11:27) Emol, Moses ear jab lukkun lo Jehovah kin mejen. (Exodus 33:20) Ak joñan an tõmak bwe Jehovah ej bed bwe ear einlok wõt an lo E. Eindeinlok wõt, elikin an bed ilo melejoñ ko, mejen tõmak ko mejen Job rar lo Jehovah ilo juõn joñan ealikarlok, einwõt juõn Anij eo ej kõtlok bwe ro ri karejaran ren bed ilo melejoñ ko ak ejjab illok jen ir. (Job 42:5) Rar ba kin Enoch im Noah bwe rar ‘etetal ibben Anij.’ Rar kõmman men in ilo air bukõt juõn wãwen kabuñburuen Anij im bokake e. (Jenesis 5:22-24; 6:9, 22; Dri Hibru 11:5, 7) Elañe jelukkun tõmak bwe Jehovah ej bed joñan wõt Enoch, Job, im Moses, jenaj “kwalok E” ilo ial ko ad otemjej, im enaj “bakajen ial ko [ad].”—Jabõn Kennan Ko 3:5, 6.
14. Ta melelen men in bwe jen “edrep” ñan Jehovah?
14 Mokta wõt jen an kar Ri Israel ro deloñlok ñan loan Enen Kallimur eo, Moses ear kakabilek ir: “Komin lor Jeova am Anij, im mijõk E, im lale kien ko An, im bokake ainiken, im komin korijer ñõn E, im edrep ñõn E.” (Duteronomi 13:4) Rar aikwij lor Jehovah, mijak e, bokake e, im eddeb ñan e. Ikijen nan eo “edrep,” juõn ri meletlet in Bible eo ear ba bwe “kajin Hebrew eo ej kalikar juõn kõtan ebak ñan e.” Ri jeje sam ear ba: “Kõtan eo ebak im ittino ñan Jehovah ej bed ibben ro rej mijak e.” (Psalm 25:14, NW) Kõtan in ebak im aorõk ibben Jehovah enaj ad elañe jej tõmak bwe ej bed im elañe elap ad yokwe e enaj kõmman bwe jen jab kaburomõj e ilo jabdewõt wãwen.—Sam 19:9-14.
Kwoj Kile Ke Kejbãrok eo an Jehovah?
15, 16. (a) Ewi wãwen an Sam 34 kwalok bwe Jehovah elap an ierki kij? (b) Ta eo jej aikwij kõmmane elañe ebin ad kememeji jerbal ko remõn Jehovah ear kõmmani ñan kij?
15 Juõn ian etao ko an Satan ej ñan kajeoñ in kõmman bwe jen meloklok mol eo bwe aduij Anij, Jehovah, ej ekkeini an ierõke ro retiljek ri karejaran. David King in Israel ear lukkun jelã kin wãwen an Jehovah kejbãrok e elaptata ke ear wõnmae juõn ien ekauwatata. Ke ear aikwij wudiekek iman mejen Achish King in Gath, ear kine juõn al, juõn al elap an aibujuij, im ear kakobaik nan in tõmak kein: “O komin koutiej Jeova, im jen jimor leliñlok etan. I ar kabukot Jeova, im E ar uak iõ, im E ar lomor iõ jen aõ mijõk otemjej. Enjel an Jeova ej ber iturin ro re mijõk E, im lomorir. O kwon erjoñ im lo bwe Jeova e joij; emõnõnõ eo ej liki E. Jeova ej ebak ñõn ro eruj burueir, im Ej lomoren ro retã wõt ilo air. Elõñ iñtan an ro remõn, a Jeova ej lomorir jen ir otemjej.”—Sam 34:3, 4, 7, 8, 18, 19; 1 Samuel 21:10-15.
16 Kwoj tõmak ke ilo kajurin lomor eo an Jehovah? Kwoj jelã ke bwe ewõr kejbãrok jen enjel ro an? Kwe make kwonañin erjoñ ke im lo bwe Jehovah ej emõn? Kar ñããt eo eliktata kwar lo an Jehovah kõmman juõn men emõn ñan kwe? Kwon lale elañe kwoj kememej wõt. Kar ien eo ke kwar bed ilo mweo eliktata ilo jerbal in kwalok nan jen em ñan em, im kwar lemnak bwe kwo mõk im emaat am maroñ ñan kõmman men ko jet? Inem bõlen ear emõn am bwebwenato ibben juõn ri mweo. Kwar kememej ke in kamolol Jehovah ilo jar kin wãwen an kar kakajur im kajerammõn yuk? (2 Dri Korint 4:7) Ilo bar juõn wãwen, emaroñ bin am kememej kin juõn jerbal emõn Jehovah ear kõmmane ñan kwe. Bõlen kwoj aikwij lemnak liklok juõn week, juõn alliñ, juõn yiõ, ak elõñlok. Elañe ej eindein, etke kwojjab kate yuk im ruaklok ñan Jehovah im lale wãwen an tel yuk? Ri jilek Peter ear rejañ Ri Christian ro: “Komin kõtaik kom iomin pein Anij ekajur . . . komin likit ami inebata otemjej na iben, bwe Ej ierki kom.” (1 Piter 5:6, 7) Emol, kwonaj bwilõñ kin joñan an kejbãrok yuk!—Sam 73:28.
Wõnmanlok im Bukõt Jehovah
17. Ta eo jej aikwiji elañe jekõnan bukõt wõt Jehovah?
17 Kejbãrok kõtan eo ad ibben Jehovah ej juõn men jej aikwij wõnmanlok im kõmmane. Jesus ear ba ilo jar eo an ñan Jemen: “Men in mour in drio, bwe ren jela Kwe juõn wõt Anij emol, im Jisõs Kraist, eo Kw’ar jilkintok.” (Jon 17:3) Jej aikwij kate wõt kij ñan bõk jelãlokjen eo kin Jehovah im Nejin. Jej aikwij jibañ jen jar im jitõb kwojarjar eo ñan melele kin “men ko re mwũlõl an Anij.” (1 Dri Korint 2:10; Luk 11:13) Bareinwõt jej aikwiji nan in kakabilek ko jen “dri korijer eo etiljek im meletlet” ñan najidik lolãtãt ko ad kin ekan ko lor jitõb rej litoki ilo “ien emõn.” (Matu 24:45) Ikijen ial in, Jehovah ear kakabilek kij bwe jen konono Nan ko an ran otemjej, keini in bed ilo kwelok ko an Christian, bõk kunad ilo jerbal in kwalok nan kin “gospel in an Ailiñ” eo kin aolepen buruõd. (Matu 24:14) Ilo ad kõmman eindein, jenaj etal wõt im bukõt Anij in yokwe eo ad, Jehovah.
18, 19. (a) Ta eo jej aikwij bebe kake ilo buruõd bwe jen kõmmane? (b) Elañe jej jutak bin nae Devil eo im bukõt wõt Jehovah, ewi wãwen ad naj bõk jerammõn?
18 Satan ej kamaat kajur eo an ñan bõktok matõrtõr, jumae, im eñtan ko jen jabõn ko otemjej jabõn lal ion armij ro an Jehovah. Ej kajeoñ in kokkure ainemõn eo ad im kõtan eo emõn ad ibben Anij. Ejjab kõnan bwe jen wõnmanlok wõt ilo jerbal eo ad ñan kabukõt ro emol burueir im jibañ ir ñan rejetak Jehovah ilo aitwerõk eo kin wõn eo eutiejtata ilañ im lal. Ak jej aikwij beek ilo buruõd bwe jen tiljek wõt ñan Jehovah, liki e bwe en kanemkwoj kij jen ri nana eo. Ilo ad kõtlok bwe Nan in Anij en tel kij im ilo kijejeto wõt im bed ibben dolul eo an jemaroñ lo kin mejed, jemaroñ tõmak bwe enaj jurake kij ien otemjej.—Aiseia 41:8-13.
19 Inem, kij aolep, jej aikwij jutak bin nae Devil eo im etao ko an, im ilo ejja ien eo wõt bukõt wõt Anij eo ad eo jej ebak ñan e, Jehovah, eo ejamin likjap in ‘kabin tõmak eo ad, im kakajur kij.’ (1 Piter 5:8-11) Men in enaj ‘kejbãrok kij ilo yokwe eo an Anij, ñe jej ‘kõtmene kin tiriamokake an Iroij eo ad Jesus Christ ñan mour indio.’—Jud 21.
Ewi Wãwen Am Naj Kar Uak?
• Ta melelen “Devil” eo, im ewi wãwen an Devil eo kajejjet kitien men in?
• Ewi wãwen an Jehovah einjuõn jen Devil eo ñe ej kalimjeke armij ro ion lal?
• Etke juõn armij ej aikwij tõmak ilo binmour eo ñe ej kebak Jehovah?
• Ta melelen “edrep” ñan Jehovah, im ewi wãwen ad maroñ bukõt wõt e?
[Pija eo ilo peij 15]
Meñe elõñ melejoñ ko, Job ear jelã bwe Jehovah ear ierki e
[Pija ko ilo peij 16, 17]
Konono Bible, keini in bed ilo kwelok ko an Christian, im ilo kijejeto bõk kunad ilo jerbal in kwalok nan rej kakememej kij bwe Jehovah ej ierki kij