Christian Ro Rej Aikwiji Don

“Bwe kij ran dron.”​—DRI EPESÕS 4:​25.

1. Ta eo juõn encyclopedia ej ba kake kin enbwinin armij?

ENBWINNIN armij ej juõn menin kõmanman ekabwilõñlõñ! The World Book Encyclopedia ej ba: “Jet ien armij rej naetan enbwinin armij juõn machine​—juõn eo ekanuij emõn im ejañin kar ejaak. Bwebõta, enbwinin armij ejjab juõn machine. Ak jemaroñ kõkkar kake ñan juõn ilo elõñ wãwen ko. Einwõt juõn machine, enbwin eo ej ejaak kin elõñ mõttan ko, einwõt juõn mõttan in machine, ej kõmman bwe enbwin eo ak machine eo en meoeo an jo.”

2. Ilo wãwen et eo enbwinin armij im congregation eo an Christian rej eierlok wõt juõn?

² Aet, enbwinin armij elõñ mõttan ko ie, ak uan, im kajjojo iair ej kõtõbrak juõn men eo ej menin aikwij. Ejelok juõn eke, muscle ak mõttan enbwin ko jet ejjab wõr tokjen. Einlok wõt, kajjojo uan congregation eo an Christian emaroñ kobaiklok juõn men ñan ejmour im aibujuij eo an ilo jitõb. (1 Dri Korint 12:14-​26) Meñe juõn uan congregation eo ej aikwij jab eñjake an utiejlok jen ro jet, ak en kar bar ejelok juõn ej watõk e make bwe ejelok tokjen.​—Dri Rom 12:3.

3. Ewi wãwen an Dri Epesõs 4:​25 kalikar bwe Christian ro rej aikwiji don?

³ Einwõt an mõttan ko ilo enbwinin armij aikwij atartar ion don, eindein Christian ro rej aikwiji don. Ri jilek Paul ear jiroñ ri tõmak im ri kabit ro mõttan ilo jitõb: “Kin men in, ke emwij ami jolok riõp, komin konono mol, kom otemjej, ñõn dri turumi: bwe kij ran dron.” (Dri Epesõs 4:​25) Ke rej ‘ran dron,’ ewõr konono mol im karejar eo eyu ibwiljin ro uan Israel eo ilo jitõb​—“enbwinin Kraist.” Aet, kajjojo iair rej aolep ran don. (Dri Epesõs 4:​11-​13) Ekamõnõnõ ñan burukuk lok ibbeir bwe rej Christian ro remol, rej karejar im ewõr juõn air kejatdikdik kin lal.

4. Ilo wãwen et ko ro rekãl remaroñ bõk jibañ?

⁴ Yiõ otemjej, thousand rej kejatdikdik ñan mour ilo juõn paradise ilal im rej baptais. Ro jet uan congregation eo rej mõnõnõ in jibañ ir ñan “jibarbar ñõn men in wãppen.” (Dri Hibru 6:​1-3) Menin jibañ in emaroñ kitibuj uaki kajitõk ko ilo Jeje ko ak lelok jibañ ilo jerbal in kwalok nan. Jemaroñ jibañ ro rekãl ilo ad likit juõn joñok emõn ilo ekkeini bõk kunad ilo kwelok ko an Christian. Ilo ien eñtan ko, jemaroñ bareinwõt lelok kakajur ak kainemõn. (1 Dri Tessalonika 5:​14, 15) Jej aikwij bukõt wãwen ko ñan jibañ ro jet ñan “etetal ilo mol.” (3 Jon 4) Meñe jej dik ak ritto, im jej kab iten jino etetal ilo mol eo ak etto ad etetal ilo elõñ yiõ ko, jemaroñ kalaplok tokjen eo ilo jitõb an ri tõmak ro mõttad​—im rej aikwiji kij.

Rej Lelok Jibañ eo ej Menin Aikwij

5. Ewi wãwen Aquila im Priscilla rar kamol air jibañ Paul?

⁵ Christian ri belele ro rej ibwiljin ro rej lo mõnõnõ ilo jibañ ri tõmak ro mõttair. Ñan wanjoñok, Aquila im lio belen, Priscilla (Prisca), rar jibañ Paul. Rar karuwaineneik e ñan loan mweo imwiir, jerbal ibben einwõt ri kõmman em nuknuk, im jibañ e kalek juõn congregation ekãl ilo Corinth. (Jerbal 18:​1-4) Ilo jet wãwen ko rar jab alikar, rar likit mour ko air ilo kauwatata kin tokjen eo ñan Paul. Rar jokwe ilo Rome ke Paul ear jiroñ Christian ro ijo: “Komin yokyokwe Priska im Akula, ro dri jerbal iba ilo Kraist Jisõs, ro r’ar janilik kin kenwair bwe in mour wõt; e jab ña wõt ij kamolol ir, a bareinwõt eklisia otemjej an dri ailiñ ko.” (Dri Rom 16:​3, 4) Einwõt Aquila im Priscilla, jet Christian ro ilo elõñ kajjo wãwen ko, meñe jet ien ekauwatata ñan mour ko air make ñan bõprae an kauwatata ñan ri karejar ro jet an Anij kin eñtan ak mij ilo pein ro rej kõmman eñtan.

6. Ta jibañ eo Apollos ear bõke?

⁶ Aquila im Priscilla rar bareinwõt jibañ Christian eo ewejebedik an konono Apollos, eo ear katakin armij in Ephesus ro kin Jesus Christ. Ilo ien eo, Apollos ear jelã wõt kin baptais eo John ear kõmmane im ej kakõllan ukwelok kin jerawiwi ko nae bujen Kien eo. Ilo air jelã bwe Apollos ear aikwij jibañ, Aquila im Priscilla rar “kalikarlok ial in Anij ñõn e.” Bõlen rar kamelele bwe baptais eo an Christian ekitibuj jakolok iumin den im bõk lutõktok eo an jitõb kwojarjar. Apollos ear jerbale men eo ear katak. Tokelik ilo Achaia ear “lap an jibõñ ro r’ar tõmak kin bwebwenato in joij eo an Anij; bwe kin kijejeto ear kamol an Ri Jew ro bwid ilobwilij, ke ear kalikar jen Jeje ko bwe Jesus kar e eo Christ.” (Acts 18:24-​28, NW) Ennan ko an ri kabuñ ro mõttad emaroñ ekkã air jibañ ñan an laplok ad melele kin Nan in Anij. Ilo wãwen in bareinwõt, jej aikwiji don.

Lelok Mweiuk in Jibañ

7. Ewi wãwen an kar Ri Pilippai ro emmakit ke Christian ro mõttair rar aikwij jibañ kin mweiuk?

⁷ Ro uan congregation eo an Christian ilo Philippi rar kanuij yokwe Paul im rar jilkinlok ñan e men in aikwij ko an ilo ien eo ke ear bed ilo Thessalonica. (Dri Pilippai 4:​15, 16) Ke ro jeiir im jatiir ilo Jerusalem rar aikwij jibañ kin mweiuk, Ri Pilippai ro rar bojak in lelok air jabawõt meñe ear ellãlok jen joñan eo ear wõr ibbeir. Joñan an kar lap an Paul kamolol kin jitõb in inemõn eo an ro jein im jatin maan im kõrã ilo Pilippai ear jitõñlok ñan ir einwõt juõn joñok emõn ñan ri tõmak ro jet.​—2 Dri Korint 8:​1-6.

8. Ta jitõbõn eñjake eo Epaphroditus ear kalikare?

⁸ Ke Paul ear bed ilo lokjak ko ilo kalbuj, Ri Pilippai ro rar jab jilkinlok menin lelok ko air kin mweiuk wõt ak rar bareinwõt jilkinlok ri keañ eo air Epaphroditus. “Bwe kin jerbal an Kraist [Epaphroditus] e ar ebak ñõn mij,” Paul ear ba, “im jab lemnok kin an mour, bwe en kõke matõn ami jerbal ñõn iõ.” (Dri Pilippai 2:​25-​30; 4:​18) Rejjab jiroñ kij elañe Epaphroditus kar juõn elder ak juõn ministerial servant. Mekarta ear juõn eo ear karmijeteik e make im jibañ Christian ro, im Paul ear lukkun aikwiji e. Ewõr ke juõn eo einwõt Epaphroditus ilo congregation eo am?

Ir Rar Menin ‘Jibañ ñan Kakajur’

9. Ta joñok eo ewõr ibbed einwõt eo kar ibben Aristarchus?

⁹ Yokwe eo an jeid im jatid maan im kõrã ro, einwõt Aquila, Priscilla, im Epaphroditus, elap aorõkiir ilo jabdewõt congregation. Jet ian ri kabuñ ro mõttad remaroñ einwõt Christian eo Aristarchus ilo ebeben eo kein kajuõn. E im ro jet rar “juõn jibañ ñan kakajur,” bõlen juõn unjen bedbed in kainemõn ak jibañ, ilo men ko remõn. (Colossians 4:​10, 11, NW) Ilo an jibañ Paul, Aristarchus ear kamol an juõn jeran eo emol ilo ien ko ien aikwij. E kar kain armij rot eo rar kwalok kake ilo Jabõn Kennan Ko 17:17: “Juõn jeran ej yokwe ien otemjej, im juõn jein im jatin, e ar lotak bwe en dri jibañ ilo ien jorran.” Kij otemjej jej aikwij jab kate kij ke bwe jen ‘jibañ ñan kakajur’ Christian ro mõttad? Elaptata ilo ien aikwij lelok jibañ ñan ro rej eñtan kin jorrãn.

10. Ta joñok eo Peter ear lelok ñan Christian elder ro?

¹⁰ Christian elder ro elaptata rej aikwij jibañ ñan kakajur ro jeiir im jatiir maan im kõrã ilo jitõb. Christ ear jiroñ ri jilek Peter: “Kwon kakajur ro jeõm im jãtõm.” (Luk 22:32) Peter ear maroñ kõmmane menin kinke ear kalikar kadkad ko rebin im mejojo, einwõt dekãlol, elaptata elikin jerkakbiji eo an Jesus. Elder ro, ikijen aolep wãwen ko ñan kate ir kõmmane ejja wãwen in wõt ilo mõnõnõ im yokwe, bwe ri tõmak ro mõttami rej aikwiji kom.​—Jerbal 20:28-​30; 1 Piter 5:​2, 3.

11. Ewi wãwen ad maroñ bõk tokjen jen ad lemnak kin jitõb eo ear wõr ibben Timothy?

¹¹ Ri itoitak eo rejetan Paul Timothy kar juõn elder eo ear kanuij lap an lemnak kin Christian ro jet. Meñe ear wõr jet abañ ko an ikijen ejmour, Timothy ear kalikar wõt tõmak eo an ebin im ‘ri kamakoko ibben Paul ilo kajededlok news eo emõn.’ Kin menin ri jilek in ear maroñ jiroñ Ri Pilippai ro: “Bwe ejelok armij iba ein buruen wõt, eo e naj kanuij lemnok kin men ko ami ilo mol.” (Dri Pilippai 2:​20, 22; 1 Timote 5:​23; 2 Timote 1:5) Emaroñ wõr tokjen ñan dri kabuñ ro mõttad an Jehovah ilo ad kalikar juõn jitõb einwõt eo an Timothy. Emol, ej aikwij juburuõd ilo kijenmij kin mõjno ko ad make im melejoñ ko kajjo wãweiir, ak kij bareinwõt jemaroñ im jej aikwij kalikar tõmak eo ekajur im yokwe eo kin ro jeiir im jatiir maan im kõrã ilo jitõb. Jej aikwij kememej ien otemjej bwe rej aikwiji kij.

Kõrã Ro Rej Kea Kin Ro Jet

12. Ta eo jemaroñ katak jen joñok eo an Dorcas?

¹² Ibwiljin kõrã ro rar karejar ñan Anij im rar kea kin ro jet kar Dorcas. Ke ear mij, ri kalor ro rar kirtok Peter im tellok e ñan bo eo itulañ. Ijo “kõrã ro otemjej ejoko beleir rej jutõk iben im jõñ, im kwalok nuknuk ko im kobe ko Dorcas e ar kõmõni ke e kar ber ibeir.” Dorcas rar kajeblaktok ñan mour im ejelok bere ear etal wõt im ‘lap ilo jerbal ko remõn im menin tiriamokake ko.’ Ilo ran kein ilo congregation eo an Christian, ewõr kõrã ro rej einwõt Dorcas ro remaroñ kõmman nuknuk ko ak kõmman ñan ro jet men ko rej menin yokwe ñan ro rej bed ilo aikwij. Bwebõta, jerbal ko air remõn elaptata kilair ñan kalaplok tokjen ko an Ailiñ eo im bõk kunair ilo jerbal in kõmman ri kalor.​—Jerbal 9:​36-​42; Matu 6:​33; 28:19, 20.

13. Ewi wãwen an kar Lydia kwalok an lemnak kin Christian ro mõttan?

¹³ Juõn kõrã eo ej mijak Anij etan Lydia ear kea kin ro jet. Juõn armij in Thyatira, ear jokwe ilo Pilippai ke Paul ear kwalok nan ijo ilo 50 C.E. Lydia bõlen juõn eo ear oktak ñan tõmak eo an Ri Ju ro im ejelok air imõn kwelok ilo Pilippai. E im kõrã ro jet rar kweloktok ibben don ñan kabuñ iturin juõn river ke ri jilek eo ear keañ kin news eo emõn ñan ir. Bwebwenato eo ej ba: “Jehovah ear kabellok buruen [Lydia] bwe en kanuij roñjake men ko Paul ear konono kaki. Kiõ ke emwij an baptais im ro ilo mweo imõn, ear akwelap im ba: ‘Elañe komij lemnak bwe ij tiljek ñan Jehovah, komin deloñ iloan mweo imõ, im bedwõt.’ Im ear debij kim.” (Acts 16:12-​15, NW) Kinke Lydia ear kõnan kõmmani men ko remõn ñan ro jet, ear lo tõbrak ilo an akwelap ñan Paul im ro rejetan bwe ren bed ibben. Ej menin ad kamolol ñe kain karuwainene rot in rej kwalok ilo joij im yokwe eo an Christian ro rainin!​—Dri Rom 12:13; 1 Piter 4:9.

Jej Aikwiji Kom Jodikdik Ro Bareinwõt

14. Ewi wãwen an kar Jesus Christ kõmman ñan ajiri ro?

¹⁴ Congregation eo an Christian ear ijjino kin joij im buru mãnãn eo an Nejin Anij, Jesus Christ. Armij ro rar lo jokane ibelakin kinke ear yokwe im joij. Ke jet rar jino bõktok ajiri jidik ro nejiir ñan Jesus ilo juõn ien, ri kalor ro an rar kajeoñ in jilkinlok aolepeir. Ak Jesus ear ba: “Komin likit ajiri rõn bwe ren itok ñõn iba; komin jab bõprae ir; bwe ro eirwõt, air ailiñ in Anij. Emol Ij ba ñõn kom, Jabrewõt eo e jab bõk ailiñ in Anij im einwõt ajiri erik, e jamin dreloñ iloan.” (Mark 10:13-​15) Ñan bõk jerammõn ko an Ailiñ eo, jej aikwij ettã buru im maroñ katakin ajiri jidik ro. Jesus ear kwalok an yokwe ro redik ilo an bõk ir ilo pein im kajerammõn ir. (Mark 10:16) Ak ta kin ro redik rainin? Kamol bwe rej yokwe im aikwiji yuk ilo congregation eo.

15. Ta mol ko kin mour eo an Jesus emwij jei ilo Luk 2:​40-​52, im ta joñok eo ear likit ñan jodikdik ro?

¹⁵ Ke Jesus ear juõn ajiri wõt, ear kwalok an yokwe Anij im Jeje ko. Ke ear 12 yiõ dettan, e im jemen in jinen, Joseph im Mary, rar etal jen bukwon eo air Nazareth ñan Jerusalem in kememe Kwojkwoj in Kijone eo. Ilo ien jeblak eo air, jemen im jinen Jesus rar lo bwe Jesus ear jako ibwiljin jar eo rar etal ibben don lok. Rar loe ej jijet ilo juõn ian temple ko, ej roñjake ri kaki ro an Ri Ju im ej kajitõkin ir kajitõk ko. Ilo an ilbõk bwe Joseph im Mary rar jab jelã ia eo ren loe ie, Jesus ear kajitõk: “Kom ar jaje ke bwe emõn In ber ilo imõn Jema?” E ar jeblak ñan mweo imõn ibben jemen im jinen, bed wõt ibbeir, im wõnmanlok wõt ilo meletlet im rittolok. (Luk 2:​40-​52) Juõn joñok emõn Jesus ear likit ñan ajiri ro nejid redik! Emol rej aikwij bokake jemeir im jineir im wõr air itoklimo ilo katak kin men ko ilo jitõb.​—Duteronomi 5:​16; Dri Epesõs 6:​1-3.

16. (a) Ta eo jet ladik rar lamõj kake ke Jesus ear kennan ilo temple eo? (b) Ta jerammõn eo ewõr ibben jodikdik ro rainin?

¹⁶ Einwõt juõn jodikdik, kwo maroñ kwalok nan kin Jehovah ilo school im jen em ñan em ibben jemõm im jinõm. (Aiseia 43:10-​12; Jerbal 20:20, 21) Ke Jesus ear kwalok nan im kemour armij ilo temple eo moktalok wõt jidik jen an mij, jet ladik rar lamõj: “Lomor, kemij jar, Nejin David!” Kin air illu kin menin pris ro relap im scraib ro rar jumae im ba: “Kwoj roñ ke men ko re ba?” “Aet,” Jesus ear uak. “Kom ar jab konono ilo buk ke, Kw’ar kowãppen nebar jen loñin niñniñ ro im ro rej ninnin’?” (Matthew 21:15-​17 NW) Einwõt ajiri rein, ro redik ilo congregation eo ewõr jerammõn eo elap ibbeir ñan nebar Anij im Nejin. Kim kõnan im aikwiji kom ñan ami jerbal ibbem einwõt ri keañ ro an Ailiñ eo.

Ñe Jerata Ej Walok

17, 18. (a) Etke Paul ear kõmman karõk kin jabawõt ñan Christian ro ilo Judea? (b) Ta tokjen eo ear walok jen mõnõnõ in lelok jabawõt ko ñan ri tõmak ro ilo Judea im ear jelet Christian Ri Ju ro im Gentile ro?

¹⁷ Jabdewõt wãwen ko jej bed ie, yokwe ej kamakit kij ñan jibañ Christian ro mõttad rej bed ilo aikwij. (Jon 13:34, 35; Jemes 2:​14-​17) Yokwe eo an ñan ro jein im jatin maan im kõrã ilo Judea ear kamakit Paul ñan kõmman karõk ñan ae jabawõt ñan ir ibwiljin congregation ko ilo Achaia, Galatia, Macedonia, im Asia. Matõrtõr, bwoktak, im ñitta ko ri kalor ro ilo Jerusalem rar ioni emaroñ kar walok tokjen ilo men eo Paul ear naetan “iñtan ko,” “jorrãn ko,” im “rakimi mweiuk ko mweiemi.” (Dri Hibru 10:32-​34; Jerbal 11:⁠27–​12:1) Kin menin ear bõk eddon lale juõn money ñan Christian ro rejeramel ilo Judea.​—1 Dri Korint 16:​1-3; 2 Dri Korint 8:​1-4, 13-​15; 9:​1, 2, 7.

¹⁸ Jabawõt ko ñan ro remõn ilo Judea ear kamol juõn lokjen jimjãn jimjatin ikõtan ri kabuñ ro an Jehovah Ri Ju im Ri Gentile (ri ailiñ ko) Lelok jabawõt ko ear bareinwõt kamaroñ Christian Gentile ro ñan kwalok ñan ri kabuñ in Judea ro mõttair air kamolol kin meram eo elap ilo jitõb rar bõk jen ir. Eindein, rar ajej ñan don kin men ko ilo mweiuk im men ko ilo jitõb jimor. (Dri Rom 15:26, 27) Jabawõt ko rej lilok ilo mõnõnõ ñan ri tõmak ro mõttad rej bed ilo aikwij rainin rej jebar jen yokwe. (Mark 12:28-​31) Jej aikwiji don ilo wãwen in bareinwõt bwe en wõr joñan wõt juõn ‘im eo edik ibben ejjab lukkun dik.’​—2 Dri Korint 8:​15.

19, 20. Kwalok juõn wanjoñok ñan kwalok kin wãwen an armij ro an Jehovah lelok jibañ ñe ej walok jorrãn ko.

¹⁹ Ilo ad jelã bwe Christian ro rej aikwiji don, jej bojak in jibañ ro jeid im jatid maan im kõrã rej bed ilo tõmak eo. Ñan wanjoñok, lemnak kin men eo ear walok ke jorrãn jen makitkit lal im an rõmlaltak bũdej ear jelet El Salvador ilo jinoin 2001. Juõn report ear ba: “Jibadbad ko ñan jibañ kin menin aikwij ko jimjãn jimjatin ro ilo aolep mõttan ko ilo El Salvador rar kõmmani. Kumi in jimjãn jimjatin ro jen Guatemala, United States, im Canada rar itok im letok jibañ. . . . Elõñlok jen 500 em ko im 3 Kingdom Hall ko raibujuij ear mõkaj air kaleki ilo juõn ien ekadu. Juõn kennan elap ear walok jen jerbal eo ebin im karejar eo an jimjãn jimjatin rein rar karmijeteik ir make.”

²⁰ Juõn report jen South Africa ear ba: “Ibwijleplep ko rekamijak me rar kokkure elõñ wõt mõttan ko ilo Mozambique rar bareinwõt jelet elõñ wõt ian Christian jimjãn jimjatin ro. Ra eo ilo Mozambique ear kõmman karõk ñan kejbãrok elõñ wõt ian aikwij ko air. Bõtab jimjãn jimjatin ro ilo ra eo rar kajitõk bwe kimin jilkinlok nuknuk ko remor ak remõn ñan jimjãn jimjatin ro rar bed ilo aikwij. Kim ar aini nuknuk ko im jilkinlok ilo juõn container 40-ne eobrak kin nuknuk ñan ro jeim im jatim ilo Mozambique.” Aet, ilo wãwen kein bareinwõt, jej aikwiji don.

21. Ta eo jenaj etale ilo katak in tok juõn?

²¹ Einwõt ad kar lo ijin ituman, mõttan ko otemjej ilo enbwinin armij elap tokjeir. Ejja menin wõt ej bar mol ilo congregation eo an Christian. Aolep ro uan rej aikwiji don. Rej bareinwõt aikwij in etal wõt ilo air jerbal ilo burukuk ibben don. Katak in tok juõn enaj etale jet mol ko rej kõmman an menin maroñ tõbrak.

Ewi Wãwen Am Naj Kar Uak?

• Ta eo ej einlok wõt ikõtan enbwinin armij im congregation eo an Christian?

• Ewi wãwen an kar Christian ro jinoin emmakit ke ri tõmak ro mõttair rar aikwij jibañ?

• Ta jet ian wanjoñok ko ilo Jeje ko rej kwalok bwe Christian ro rej aikwiji im jibañ don?

[Pija eo ilo peij 10]

Aquila im Priscilla rar kea kin ro jet

[Pija ko ilo peij 12]

Armij ro an Jehovah rej jibañ don im ro jet ñe jorrãn ej walok