Ad Katak Ej Keboj Kij Einwõt Ri Kaki Ro

“Kwon owõn ilo men kein, im mõke lelok yuk ñõn ir, bwe am wõnmanlok en alikar ñõn ro otemjej. Kwon kejbãrok yuk, im men in katakin ko am.”​—1 Timote 4:​15, 16.

1. Ta eo emol kin ien im katak ibbed make?

“EOR ien ñõn jabrewõt men,” Bible ej ba ilo Ekklisiastis 3:1. Menin ej mol ilo an juõn armij katak. Elõñ rej lo bwe ebin ñan lukkun lemnak kin men ko ilo jitõb elañe ien eo ejjab jejjet ak ebwid jikin eo. Ñan wanjoñok, elikin an lap am jerbal ilo juõn ran im lap mõñã ilo ien kejota eo, kwon kar eñjake ke am kõnan katak, elaptata elañe kwoj jijet im atõrakliklok ilo juõn jea ekanuij emõn iman juõn TV? Einwõt eban. Inem, ta eo ej mejelan? Alikar, jej aikwij kãlet ñããt im ia eo jej aikwij katak ie kin lemnak in ñan tõbar juõn joñan tokjen eo elap jen jibadbad ko ad.

2. Ien et eo ekkã an emõntata ñan an kajjojo armij katak?

² Elõñ rej lo bwe ien eo air emõntata ñan katak ej men eo moktata ilo jibboñ im ekkã air bojak ñane. Ro jet rej kajerbal ien kakije eo ilo raelep ñan juõn ien katak ekadu. Lale ien eo rej jitõñlok kin ien ñan makitkit ko elap tokjeir ilo jitõb ilo joñok kein tok ilokan. King David in Israel eo etto ear je: “Kwon kõmõn bwe in roñjake Am joij ke ejiboñ; bwe ij liki Yuk. Kwon kõmõn bwe in jela ial eo emõn in etal iloan, bwe ij leliñwoj aõ ñan Kwe.” (Sam 143:8) Ri Kanan Isaiah ear kwalok an kile aorõk in katak ke ear ba: “Jeova e ar letok ñõn iõ loin ro emwij katakin ir, bwe in jela ekijkan in jibañ eo e mõk kin nan ko: Ej kworuj jiboñ otemjej, Ej kworuj lojilñiõ bwe en roñ einwõt ro emwij katakin ir.” Un eo ej bwe jej aikwij katak im konono ibben Jehovah ilo ad jelã, ilo jabdewõt ien ilo ran eo.​—Aiseia 50:4, 5; Sam 5:3; 88:13.

3. Ta wãwen ko remõn ñan katak eo ebolemen?

³ Bar juõn men eo emol ilo katak eo ebolemen ej bwe jej aikwij jab kãlet ad jijet ilo jea ak sofa eo elap an emõn kõjeied ilo ad jijet ie. Menin ejjab wãwen eo ñan ad bed wõt im bojak. Ñe jej katak, lemnak eo ad ej aikwij jerbal, ak elañe elap an emõn kõjeied einwõt ejamin wõr tõbrak. Bareinwõt kõnan eo ñan katak im kalmenlokjen joñair wõt juõn ñan jokane im anemkwoj jen men ko renaj kõmman an wõr mad. Kajeoñ katak ibben an wõr radio, TV, ak ajiri ro rej kamad yuk inem ejamin tõbrak tokjen ko remõntata. Ke Jesus ear kõnan kalmenlokjen, ear ilok ñan juõn jikin ejokane. E ar bareinwõt konono kin aorõkin lo juõn jikin ej makelok ian ñan jar.​—Matu 6:6; 14:13; Mark 6:​30-​32.

Ad Katak ej Keboj Kij ñan Uak

4, 5. Ilo wãwen et ko brochure eo Jen Kõmmane ej juõn jibañ emõn?

⁴ Ad katak ej kajuburoõd ñe jej kajerbal menin jibañ ko ñan melele Bible bwe en mũlal lok ad tõbar juõn unintel in katak, elaptata ñe jej kõmman eindein ñan uak kajitõk ko an juõn e emol an kajitõk. (1 Timote 1:4; 2 Timote 2:​23) Einwõt juõn ijjino, elõñ ro rekãl rej katak brochure eo Ta eo Anij Ekõnan bwe Jen Kõmmane?,a kiõ ewõr ilo 261 kajin ko. Ej juõn brochure eo ekanuij bidodo im jimwe im aolepen ej bedbed ion Bible. Ej jibañ ro rej readi im emõkaj air melele menin aikwij ko Anij ej aikwiji ñan ri kabuñ ro remol. Bõtab, wãwen kar eiki ejjab kõtlok jikin ñan katak ilo tibdikin aolepen juõn unintel in katak. Elañe ri katak Bible eo am ej bõkliñtak jet kajitõk ko kin unintel in katak ko ilo Bible komij katak kaki, ewi wãwen am maroñ bukõt elõñlok melele ko ilo Bible me renaj jibañ e uak kajitõk kein?

⁵ Ñan ro ewõr air Watchtower Library ilo CD-ROM ilo kajin eo air, ebidodolok bukõt unjen melele ko ilo juõn computer. Ak ta kin ro ejelok air computer im CD-ROM in? Jen etale ruo unintel ko rej walok ilo book eo Jen Kõmmane in lale ewi wãwen ad maroñ kalaplok ad melele im maroñ uak ilo tibdikin eo elap​—elaptata ñe juõn ej jarõk kajitõk kein einwõt, Wõn Anij, im ta eo Jesus ear lukkun einwõt?​—Exodus 5:2; Luk 9:​18-​20; 1 Piter 3:​15.

Wõn Anij?

6, 7. (a) Ta kajitõk eo ej wanliñtak kin Anij? (b) Ta ennan eo elap juõn ri kaki in kabuñ ear kwalok ilo juõn an ennan in kamelele?

⁶ Katak 2 ilo book eo Jen Kõmmane (Aikwij) ej uak kajitõk eo elap tokjen, Wõn Anij? Ewõr juõn un eo ewõr bedbedin kinke juõn armij ejjab maroñ kabuñ ñan Anij eo emol elañe ejjab jelã kin E ak bõlen bere bwe Ej bed. (Dri Rom 1:​19, 20; Dri Hibru 11:6) Ak, armij ro ibelakin lal rej bõk elõñ buki lemnak ko kin wõn Anij. (1 Dri Korint 8:​4-6) Jabdewõt tõmak ko an kabuñ ewõr juõn un eo einjuõn kin kajitõk in kin kile Anij. Ilo Christendom elõñ wõt kabuñ rej lemnak kin Anij einwõt Trinity (Jilu ilo juõn) Juõn ri kaki in kabuñ ebuñbuñ ilo U.S. ear kwalok juõn konono eo title in “Kwo Jelã Ke Anij?” ak ejelok juõn alen ilo ennan eo an ear kwalok kin ãt eo ekwojarjar etan Anij, meñe elõñ alen ear elij jen Jeje ko ilo Hebrew. Bwebõta, ear read jen juõn ukok in Bible eo ear kajerbale elõñlok jen ruo kain melele ko ie im ãt eo ejelok etan “Iroij” jen an kajerbal Jehovah ak Yahweh.

⁷ Juõn un eo elap tokjen ri kaki in kabuñ eo ear likjap kake ke ear eliji Jeremiah 31:33, 34 (NW): “‘Ejelok jabdewõt armij enaj katakin ri turin, im jabdewõt armij ñan jein im jatin, ej ba “Jelã Iroij” [Hebrew, “Jelã Jehovah”], bwe ir otemjej renaj jelã kin Ña, jen eo ediktata ñan eo elaptata,’ Iroij ej ba [Hebrew, Jehovah].” Ukok eo ear kajerbale ear jolok ãt eo ejenolok im ekwojarjar, Jehovah.​—Sam 103:​1, 2.

8. Ta eo ej kalikar aorõkin kajerbal etan Anij?

⁸ Sam 8:9 ej wanjoñok kin unin an lap an aorõk kajerbal etan Jehovah: “O Jeova aõ Iroij, e nañin aibujuij etõm i aolepen lõl!” Keidi ibben “O IROIJ, amuij Iroij, e nañin emõntata etõm i aolepen lõl!” (King James Version; bareinwõt lale The New American Bible, The Holy Bible​—New International Version, Tanakh​—The Holy Scriptures) Ak, einwõt kar kwalok ilo katak eo lok iman, jemaroñ bõk “jelalokjen eo kin Anij” elañe jej kõtlok Nan eo an bwe en kameram ad lemnak ilo jitõb. Ak jibañ et eo ilo katak Bible enaj bojak in uak kajitõk ko kin aorõkin ãt eo ekwojarjar?​—Jabõn Kennan Ko 2:​1-6.

9. (a) Brochure et eo emaroñ jibañ kameleleik aorõk in kajerbal ãt eo ekwojarjar? (b) Ewi wãwen an elõñ ri ukok ro kar likjap in kwalok air kautiej etan Anij?

⁹ Jemaroñ oktaklok ñan brochure eo The Divine Name That Will Endure Forever, (Ãt eo Ekwojarjar Me Enaj Kijenmij Ñan Indio), eo emwij ukõte ñan 69 kajin ko.b Mõttan eo me title in “Etan Anij​—Melelen im Wãwen Ba” (page ko 6-​11) ej kwalok ilo alikar bwe nan in Hebrew eo Tetragrammaton (jen nan in Greek eo, melelen “letter ko emen”) ej walok 7,000 alen ilo eon in Hebrew ko etto. Ak, ri kaki in kabuñ im ri ukok ro an kabuñ in Judia im Christendom rar karõk bwe ren jolok jen elõñ wõt ian ukok in Bible ko air.c Ewi wãwen air maroñ ba bwe rejelã Anij im ewõr juõn air kõtan emõn ibben elañe rar makoko in kir e kin ãt eo etan? Ãt eo etan emol ej kabellok ial eo ñan melele ta karõk ko an im wõn e. Bareinwõt, ta eo ej aorõkin mõttan joñok in jar eo an Jesus “Jememuij i lõñ, En kwojarjar Etõm” elañe etan Anij rejjab kajerbale?​—Matu 6:9; Jon 5:​43; 17:6.

Wõn Jesus Christ?

10. Ilo wãwen et ko jemaroñ bõk juõn bwebwenato kin mour eo an Jesus im jerbal in kwalok nan eo an?

¹⁰ Katak 3 ilo brochure eo Jen Kõmmane title in “Wõn Jesus Christ?” Ilo jiljino wõt paragraph ko, ej letok juõn lajrak ekanuij kadu kin Jesus, unjen, im unin itok eo an ñan lal. Bõtab, elañe kwo kõnan juõn bwebwenato eo ededelok kin mour eo an, ejelok juõn emõnlok ijellokin bwebwenato ko ilo Gospel ko make​—jen The Greatest Man Who Ever Lived, (Armij Eo Elaptata E ar Mour) eo ewõr ilo 111 kajin ko. Book in ej kwalok juõn lajrak ededelok kin ien ko bwebwenato in mour eo an Christ im katak ko an, rej bedbed ion emen Gospel ko. Chapter ko 133 ie rekitibuj wãwen ko rar walok ilo mour eo an Jesus im jerbal in kwalok nan eo an. Ñan kajenolok mõttan ko jen don, kwo maroñ jitõñlok ñan Insight, Volume 2, iumin title eo “Jesus Christ.”

11. (a) Ta eo ej kõmman an Ri Kennan ro an Jehovah einjuõn ilo tõmak eo air kin Jesus? (b) Ta jet ian eon ko ilo Bible rej kalikar an riap tõmak eo kin Trinity, im brochure et eo ej jibañ ilo menin?

¹¹ Ilo Christendom men eo iolaplap in akwel eo kin Jesus ej elañe “Nejin Anij” im bareinwõt “Anij Nejin”​—einwõt ba, iakwelel eo kin Kajitõk im uak ko ñan katakin tõmak an Kabuñ in Catholic im rej naetan “men eo ettino an tõmak in Christian,” Trinity. Ilo an einjuõn jen kabuñ ko an Christendom, Ri Kennan ro an Jehovah rej tõmak bwe Jesus kõmanman in Anij ak e ejjab Anij. Juõn nan in konono emõn kin unintel in jej lo ilo book eo Should You Believe in the Trinity?, (Kwoj Aikwij Tõmak Ke ilo Trinity?, (Jilu Anij ilo Juõn) emwij ukõte ilo 95 kajin ko.d Ibwiljin eon ko rej kajerbali ñan kalikar an bwid tõmak eo kin Trinity rej Mark 13:32 im 1 Dri Korint 15:24, 28.

12. Ta bar kajitõk eo ej tellokin ad kanuij lale?

¹² Konono kein ilañ kin Anij im Jesus Christ rej jerbal ñan kalikar wãwen ko jej maroñ kõmmani ilo ad katak kin lemnak in ñan jibañ ro ejjab kanuij lap air melele kin mol eo ilo Bible ñan air bõk jelãlokjen eo ejimwe. (Jon 17:3) Ak, ta, kin ro rej tel air ibben congregation eo an Christian iumin elõñ yiõ ko? Kin jelã eo air rar ejaake ion Bible eo, rej aikwij wõt ke kanuij lale air katak kin Nan eo an Jehovah?

Etke “Kwon Kejbãrok Yuk”?

13. Ta lemnak eo ebwid emaroñ wõr ibben jet kin katak eo an kajjojo armij?

¹³ Jet ro rej uan congregation eo iumin elõñ yiõ ko emwij air wõtlok ñan loan manit eo ñan baj atartar wõt ion jelãlokjen eo kin Bible rar bõke ilo jejjo yiõ ko jinointata in air einwõt Ri Kennan ro an Jehovah. Ebidodo ñan bõk lemnak in: “Ij jab aikwij kanuij katak joñan wõt ro rekãl. Bwe baj lale mõk oran ien ko I ar read Bible eo im Bible book ko iumin yiõ ko.” Menin enañin einlok wõt ba: “Ij jab aikwij kanuij lemnak kin ewi joñan aõ mõñã kiõ, kinke lale mõk aolep mõñã ko I ar mõñã ilo ien ko remotlok.” Jejelã bwe enbwin eo ej aikwij ũn ko jen mõñã ko elap ũn ie, mõñã ko ejimwe keboji ñan kejbãrok an ejmour im niknik. Elaplok an eindein an mol ilo ad kejbãrok ejmour im kajur eo ad ilo jitõb!​—Dri Hibru 5:​12-​14.

14. Etke jej aikwij kanuij lale kij make?

¹⁴ Kin menin, kij otemjej, meñe etto ad ri school in Bible ak jab, jej aikwij kanuij lale nan in kakabilek eo an Paul ñan Timothy, eo ear tok ñan ien eo ear tõbar an ritto ilo men ko ilo jitõb, juõn overseer eo ear bõk eddo: “Kwon kejbãrok yuk, im men in katakin ko am. Kwon berwõt ilo men kein; bwe ilo am kõmõn ein drein, kwo naj mõke lomoren yuk, kab ro rej roñjake yuk.” (1 Timote 4:​15, 16) Etke jej aikwij bõk ñan buruõd nan in kakabilek kein an Paul? Kememej, Paul ear bareinwõt kalikar bwe ewõr juõn ad tarinae nae “etao ko an devil,” im “iben jeran jitõb renana ijo ko i lõñ.” Im ri jilek Peter ear kakkõl bwe Devil eo ej “bukõt eo ej maroñ in kõñi,” im bwe “armij in” emaroñ jabdewõt iad. Eñjake in juburu eo ad make koba ibben kauwatata eo ejelok ad jelã kake emaroñ baj juõn ien eo emõn ej bukõte.​—Dri Epesõs 6:​11, 12; 1 Piter 5:8.

15. Ta jojomar eo ilo jitõb ewõr ibbed, im ewi wãwen ad maroñ debij wõt?

¹⁵ Inem, ta jojomar eo ewõr ibbed? Ri jilek Paul ej kakememej kij: “Kin menin komin bõk ñõn kom aolepen ken tõrinae an Anij, bwe komin maroñ in jumae ilo ran eo enana, im mõjen kõmõn otemjej jutõk.” (Dri Epesõs 6:​13) An keie kein tarinae in ilo jitõb ejjab atartar wõt ion wãwen eo an jinointata ak ej bareinwõt atartar ion ekkein kejbãrok. Kin menin, kein tarinae in ededelok jen Anij, ej aikwij kitibuj jelãlokjen eo tok ñan rainin kin Nan in Anij. Menin ej jitõñlok ñan aorõkin melele eo tok ñan rainin ibben ad melele kin mol eo einwõt an Jehovah kalikare ikijen Nan eo an im ikijen class in ri karejar eo etiljek im meletlet. Ekkeini katak Bible im Bible book ko elap tokjen ñan debij wõt kein tarinae eo ad ilo jitõb.​—Matu 24:45-​47; Dri Epesõs 6:​14, 15.

16. Ta eo jemaroñ kõmmane ñan ad tõmak bwe “ken tõrak in tõmak” eo ad ej bed wõt ilo an emõn an jerbal?

¹⁶ Paul ej kwalok kin “ken tõrak in tõmak,” eo einwõt juõn mõttan eo elap tokjen ñan jojomar eo ad ilo tarinae, eo jemaroñ ikir kũrõn im kune made kijeek ko an Satan ikijen naruõn ko reriap im katak ko an ro rar buñ jen tõmak. (Dri Epesõs 6:​16) Inem elap tokjen bwe jen etale joñan kajur in ken tõrak in tõmak eo ad im ta buñten nee ko jej bõki ñan kejbãrok wõt im kakajure. Ñan wanjoñok, kwo maroñ kajitõk: ‘Ewi wãwen aõ kebojak ñan katak Bible week otemjej ilo aõ kajerbal Imõniaroñroñ eo? Ebwe ke aõ katak ñan aõ maroñ “kõkãtak dron ñõn yokwe im jerbal ko remõn” ikijen kwalok uak ko emõn kar lemnak kaki ilo ien kwelok eo? Ij kabellok ke Bible eo aõ im readi eon ko rej jitõñlok ñani ilo book in Bible eo, chapter im eon eo ak Ij jab eliji? Ij kõketak ke ro jet ilo aõ bõk kunaõ ilo kwelok ko?’ Mõñã eo kijed ilo jitõb ebin, im ad lukkun meme ej menin aikwij ñan bõk tokjen.​—Dri Hibru 5:​14; 10:24.

17. (a) Ta poison eo Satan ej kajerbale ñan kajeoñ in kamõjnoik mour in jitõb eo ad? (b) Ta kamadmõd eo ñan poison eo an Satan?

¹⁷ Satan ejelã kin mõjno ko an armij jab wãppen, im etao ko an ebin ad kile. Juõn ian wãwen ko ej kajededlok kareelel nana eo an ikijen picture in kelwan ko rej walok ilo TV, Internet, video ko, im book ko. Jet Christian rej kõtlok bwe menin epoison en toloñe kein jojomar ko air remõjno, im ej tellok ñan air luji tokjen ko ilo congregation eo ak meñe bõk tokjen ko jet elaplok air kauwatata. (Dri Epesõs 4:​17-​19) Ta eo ej einlok wõt ñan poison eo an Satan ilo jitõb? Jej aikwij jab kajekdon ad ekkeini katak Bible, kwelok in Christian ko ad, im kõnak kein tõrak in tarinae eo jen Anij. Men kein jimor, rej letok ñan kij maroñ eo ñan kile oktak eo ikõtan jimwe im bwid im ñan kijirãte men eo Anij ej kijirãte.​—Sam 97:10; Dri Rom 12:9.

18. Ewi wãwen “jãji an jitõb” emaroñ jibañ kij ilo tarinae eo ad ilo jitõb?

¹⁸ Elañe jej debij wõt manit ko kin ekkeini ad katak Bible, ejamin wõr wõt ibbed jojomar eo ekajur jej bõke jen jelãlokjen eo ad ejimwe kin Nan in Anij ak bareinwõt ikijen “jãji an Jitõb, eo nan in Anij.” Nan in Anij “ekõñ jen jabrewõt jãji ruo mejen, im ej wie im bukwe an armij im jitõb, im mokwõj ko im nononmej, im e mõkõj an kile lemnok ko im bebe ko an buru.” (Dri Epesõs 6:​17; Dri Hibru 4:​12) Elañe jej oktak im kabel ilo kajerbal “jãji,” in, inem ñe jej jelmae kabo ko, jejamin bo ilo men eo emaroñ walok im einwõt ejamin kõmman jorrãn, ak meñe eowor, im kajedmatmate einwõt juõn aujid in mij an eo enana. Imõn kakonkon eo ad kin jelãlokjen im melele kin Bible enaj jibañ kij ñan kajekdon men eo enana im ñan kõmman men eo emõn. Inem kij otemjej jej aikwij kajitõkin kij make: ‘Jãji eo aõ ekañ ke ak ejjo ke? Ebin ke aõ kememej eon ko ilo Bible me remaroñ kakajurlok aõ tarinae? Jen debij wõt manit ko remõn ilo ad katak Bible im kin menin jumae Devil eo.​—Dri Epesõs 4:​22-​24.

19. Ta tokjen ko jemaroñ tõbari elañe jej kajerbal kij make ilo katak eo an Kajjojo armij?

¹⁹ Paul ear je: “Jeje ko otemjej emwij letok kin kakõrmol an Anij, ej bareinwõt or tokjeir kin katakin, im kowe, im kajime, im kajelãik armij ilo kwojarjar, bwe armij korijeran Anij en wãppen im emwij kõmõnmõn e ñõn jerbal emõn otemjej.” Elañe jej bõk ñan buruõd nan ko an Paul ñan Timothy, jemaroñ kakajurlok mour in jitõb eo ad make im jemaroñ kõmman bwe jerbal in kwalok nan eo ad en laplok an bolemen. Elder ro im ministerial servant ro ilo jitõb emaroñ laplok tokjeir ñan congregation eo, im jemaroñ bed wõt im bin ilo tõmak eo.​—2 Timote 3:​16, 17; Matu 7:​24-​27.

[Kamelele ko itulal]

Kwoj Kememej Ke?

• Ta wãwen ko ewõr kilair ñan katak eo ebolemen ñan kajjojo armij?

• Ta bwid eo elõñ ri ukok in Bible ro rar kõmmane kin etan Anij?

• Ta eon ko ilo Bible kwo naj kar kajerbali ñan kariap katak eo kin Trinity?

• Ta eo jej aikwij kõmmane ñan kejbãrok kij make jen etao ko an Satan, meñe kij jaar Christian ro remol iumin elõñ yiõ ko?

[Pija ko ilo peij 27]

Ñan katak eo ebolemen an kajjojo armij, kwoj aikwij jikin eo ejimwe im belakin eainemõn joñan wõt an maroñ

[Pija ko ilo peij 30]

“Jãji” eo am tellokin liki ke ak ejjo?