“Komin Ekil”!

“Im nan eo Ij ba ñõn kom, Ij ba ñõn otemjelok, Komin ekil.”​—Mark 13:37.

1, 2. (a) Ta eo juõn emaan ear katak kin kejbãrok men ko mweien? (b) Jen wanjoñok eo an Jesus kin juõn ri kwot, ta eo jej katak kin mimij im ekkõl?

AOLEP men ko raorõk mweien Juan rar bed ilo mweo imõn. Ear kakoni iumin jikin kiki eo an​—ilo lemnak eo an kar jikin eo ekon ilo mweo imõn. Bõtab, juõn boñ, ke e im lio belen rar kiki, juõn ri kwot ear deloñ ilo jikin kiki eo air. Alikar, ri kwot eo ear jelã ia eo en bukõti ie. Ilo ejelok keroro ear bõk aolep men ko raorõk jen iumin jikin kiki eo im bareinwõt money ko Juan ear likiti ilo ekekaak in table eo iturin bed eo. Jibboñ in ran eo juõn, Juan ear lo bwe ear jako aolep men ko mweien. Etto an naj kememej men in kaeñtan eo ear katak: Juõn emaan ej kiki ejjab maroñ kejbãrok men ko mweien.

² Men in ej mol bareinwõt ikijen men ko ilo jitõb. Jejjab maroñ kejbãrok kejatdikdik im tõmak eo ad elañe jej kiki. Kin men in, Paul ear kakabilek: “Inem jen jab kiki einwõt ro jet, a jen mmij im jadõr.” (1 Dri Tessalonika 5:6) Ñan kwalok aorõkin ad mimij im ekkõl wõt, Jesus ear kajerbal wanjoñok eo kin juõn ri kwot. Ear kwalok kin men ko rewalok me renaj tellok ñan an itok einwõt juõn Ri Ekajet, inem ear kakkõl: “Inem komin ekil; bwe kom jaje ilo ran õt Iroij e naj itok. A komin jela men in, elañe ãtõk in mweo e ar jela ilo mmij õt dri kwot ej itok, e naj kar ekil, im jamin kar kõtlok bwe en rupe mweo imõn. Kin men in komin bareinwõt pojõk: bwe ilo auõ komij jab lemnok, Nejin armij ej itok.” (Matu 24:42-​44) Juõn ri kwot ejjab kejelã lok iman kin ñããt ej itok. Ej kejatdikdik in itok ilo juõn ien ejelok juõn ej kõtmene kake. Eindein, einwõt Jesus ear ba, jemlokin jukjuk im bed in enaj itok ilo ‘juõn awa jejjab lemnak kake.’

“Komin Ekil, Jutõk Bin ilo Tõmak”

3. Ewi wãwen Jesus, ilo an kajerbal wanjoñok eo kin ri karejar ro rej kõttar roltok eo an master eo air jen juõn kwojkwoj in belele, ear kwalok kin aorõkin air mimij im ekkõl?

³ Ilo nan ko kar je ilo Gospel eo an Luke, Jesus ear keidi Ri Christian ro ñan ri karejar ro rej kõttar an master eo air itok jen juõn kwojkwoj in belele. Rej aikwij ekkõl wõt bwe ilo ien eo ej itok ren bojak ñan karuwaineneik e. Ilo juõn wãwen einlok wõt, Jesus ear ba: “Bwe Nejin armij E naj itok ilo auõ eo ñe kom jab lemnok kake.” (Luk 12:​40) Jet ro rar karejar ñan Jehovah iumin elõñ yiõ ko, rar luji eñjake in ekaiuriur eo air ikijen ien ko jej bed ie. Remaroñ kar bõk lemnak eo bwe etto wõt an itok jemlokin. Ak lemnak rot in emaroñ ukõt kij jen ad bukõt men ko ilo jitõb im oktak im jibadõk mejenkajjik ko lor kanniek, men in kamad ko me remaroñ kõmman ad mejki ilo jitõb.​—Luk 8:​14; 21:​34, 35.

4. Tõmak ta eo enaj kamakit kij ñan mimij im ekkõl, im ewi wãwen an kar Jesus kwalok kin men in?

⁴ Jemaroñ bõk bar juõn katak jen wanjoñok eo an Jesus. Meñe ri karejar ro rar jaje kin jejjet in awa eo ñe master eo air enaj kar itok, ej alikar rar jelã kin boñin ta eo. Enaj kar bin ñan air mimij aolepen juõn boñ elañe rar lemnak bwe master eo air emaroñ itok ilo boñin bar juõn ran. Ak jaab, rar jelã kin boñin ta eo enaj itok, im men in ear lelok ñan ir un eo ekajur unin air aikwij mimij wõt. Ilo juõn wãwen einlok wõt, kanan ko ilo Bible rej kwalok ilo alikar bwe jej bed ilo ran ko eliktata; ak rejjab jiroñ kij kin ran eo ak awa eo enaj itok jemlokin. (Matu 24:36) Tõmak eo ad bwe jemlokin ej itok ej jibañ kij ñan mimij wõt, ak elañe jej tõmak bwe ran eo an Jehovah elukkun ebak, enaj wõr ibbed un eo ekajurlok ñan ad ekkõl.​—Zephaniah 1:​14, NW.

5. Ewi wãwen ad maroñ uake nan in rejañ eo an Paul ñan “ekil” wõt?

⁵ Paul, ke ear jeje ñan ro ri Corinth, ear rejañ ir: “Komin ekil, jutõk bin ilo tõmak.” (1 Dri Korint 16:13) Aet, ad mimij wõt ej koba ad bin wõt ilo tõmak in Christian. Ewi wãwen jemaroñ mimij? Ilo ad bõk juõn jelãlokjen emũlallok kin Nan eo an Anij. (2 Timote 3:​14, 15) Manit ko remõn ñan katak ibbed make im keini ad bed ilo kwelok ko rej jibañ ñan kakajurlok tõmak eo ad, im ad likit ilo lemnak eo ad bwe ran eo an Jehovah ebak ej juõn wãwen eaorõk ilo tõmak eo ad. Inem ilo ad elij jen ien ñan ien kin men in kamol ko jen Jeje ko bwe jej bed ebak ñan jemlokin jukjuk im bed in enaj jibañ kij ñan kememej wõt mol ko raorõk ikijen jemlok eo ej itok.a Ej bareinwõt wõr tokjen ñan lale men ko rej walok ilo lal in me rej kajejjet kitien kanan ko ilo Bible. Juõn brother ilo Germany ear je: “Ien otemjej ñe ij aluij news eo​—kin tarinae ko, makitkit lal ko, kowadoñ ko, im katton in lal eo ad⁠—rej kalikar ñan iõ kin an ebak jemlokin.”

6. Ilo wãwen et eo Jesus ear wanjoñok kake maroñ eo ñan luji ekkõl eo ilo jitõb ke ej motlok ien?

⁶ Ilo Mark chapter 13, jej lo bar juõn bwebwenato kin kakabilek eo an Jesus ñan ri kalor ro an bwe ren ekkõl. Ekkar ñan chapter in, Jesus ej keidi wãwen eo ibbeir ñan juõn ri bar kejam eo ej kõttar an itok master eo an eo ear etal ñan juõn ene etolok. Ri bar kejam eo ear jaje kin awa in rol an master eo an. Ear aikwij ekkõl wõt. Jesus ear kwalok kin emen ien mimij ko reinjuõn jen don me master emaroñ tõkeãktok. Ien mimij eo kein kemen ear jino jen jilu awa jimmarok ñan rantak. Ilo mimij in eliktata, ear bin ñan an ri bar kejam eo anjo ion an mejki. Ekkar ñan report ko, ri tarinae ro rar watõk awa ko iman rantak einwõt ien eo emõntata ñan kailbõk ri kijirãt ro. Eindein, ilo mõttan in ilo tu-jemlokin ran kein eliktata, ke lal in ibelakid ej ettoñ ilo jitõb, jemaroñ aikwij in kalaplok ad kate ñan mimij im ekkõl. (Dri Rom 13:​11, 12) Kin men in, ilo wanjoñok eo an, elõñ alen Jesus ear rejañ: “Komin kejbãrok kom, komin ekil . . . Inem komin ekil . . . Im nan eo Ij ba ñõn kom, Ij ba ñõn otemjelok, Komin ekil.”​—Mark 13:32-​37.

7. Men in kauwatata et eo emol an bed, im ilo ad lemnak kin men in, ta nan in rejañ eo ekkã ad konono kake ilo Bible?

⁷ Elõñ alen ilo jerbal in kwalok nan eo an im elikin an kar jerkakbiji, Jesus ear rejañ bwe ren ekkõl. Ilo mol, enañin aolep ien ke Jeje ko rej konono kin jemlokin jukjuk im bed in, jej lo nan in kakkõl eo ñan mimij ak ñan ekkõl.b (Luk 12:​38, 40; Reveles̃õn 3:2; 16:14-​16) Alikar bwe mejki ilo jitõb ej juõn men in kauwatata emol. Kij aolep jej aikwiji nan in kakkõl kein!​—1 Dri Korint 10:12; 1 Dri Tessalonika 5:​2, 6.

Ri Jilek Ro Jilu Me Rar Jab Maroñ Mimij

8. Ilo jikin kallip in Gethsemane, ewi wãwen jilu ian ri jilek ro an Jesus emmakit ñan kajitõk eo an Jesus bwe ren ekkõl wõt?

⁸ Ad maroñ mimij wõt elõñlok men ko jej aikwiji jen bebe ko remõn wõt, einwõt jej loe jen wanjoñok eo an Peter, James, im John. Rein jilu rar emaan ro rekajur ilo jitõb me rar tiljek in lor Jesus im emũlal air kar yokwe. Ijoke, ilo boñin Nisan 14, 33 C.E., rar likjap in mimij wõt. Elikin air ilok jen bo jabeo elap ijo rar kememe Kwojkwoj in Kijone eo, ri jilek rein jilu rar etal ibben Jesus ñan jikin kallip in Gethsemane. Ijo Jesus ear ba ñan erjil: “Aõ e kanuij buromõj einwõt ñõn mij: komin ber ijin im ekil iba.” (Matu 26:38) Jilu alen Jesus ear jar ñan Jemen ilañ, im jilu alen ear jeblak ñan ro jeran, im lo air kiki.​—Matu 26:​40, 43, 45.

9. Ta eo ear kõmman an ri jilek ro mejki?

⁹ Etke emaan rein retiljek rar likjap in bokake Jesus ilo boñin eo? Kinke rar mõk. Ear motlok awa eo, bõlen elikin lukwon boñ, im “erro mejeir” kin air kõnan kiki. (Matu 26:43) Ak, Jesus ear ba: “Komin ekil im jar, bwe komin jab dreloñ ilo kabo: an e kõnan, a kõniek emõjino.”​—Matu 26:41.

10, 11. (a) Meñe ear mõk, ta eo ear jibañ Jesus ñan an ekkõl wõt ilo jikin kallip in Gethsemane? (b) Ta eo jemaroñ katak jen men eo ear walok ñan ri jilek ro jilu ke Jesus ear kajitõk ibbeir ñan air mimij im ekkõl wõt?

¹⁰ Ejelok bere, Jesus bareinwõt ear mõk ilo boñin eo eaorõk. Bõtab, jen an kiki, ear kajerbal awa kein eliktata in an anemkwoj ñan jar. Jet ran ko mokta, ear rejañ ri kalor ro an ñan air jar, ilo an ba: “A komin ekil im jar ien otemjej, bwe komin maroñ in ko jen men otemjej men ko re naj walok, im bwe komin jutõk iman mejen Nejin armij.” (Luk 21:36; Dri Epesõs 6:​18) Elañe jej bokake nan in kakabilek eo an Jesus im lor wanjoñok eo an emõn ikijen jar, akwelap ko ad jen buruõd ñan Jehovah renaj jibañ kij ñan mimij im ekkõl ilo jitõb.

¹¹ Emol, Jesus ear melele​—ak ilo ien eo ri kalor ro an rar jab​—bwe ejjabto renaj jibwe e im liakelok e ñan mij. Ekajet eo an enaj tõbar ien eo elaptata) ñe enaj toto ion alal in kaeñtan eo. Jesus ear kakkõl ri jilek ro an kin men kein, ak rar jab melele kin ta eo ear ba. Kin men in, rar kiki ke ear mimij im jar. (Mark 14:27-​31; Luk 22:15-​18) Einwõt ear mol ibben ri jilek ro, kannieked bareinwõt emõjno im ewõr men ko jejañin melele kaki. Ak, elañe jejjab kile aorõkin ien eo jej bed ie, jenaj kiki ilo jitõb. Ilo ad ekkõl wõt jenaj maroñ mimij.

Jilu Kadkad ko Raorõk

12. Kadkad ta ko jilu Paul ear kwalok bwe ewõr kõtair ñan ad jatõr?

¹² Ewi wãwen ad maroñ kejbãrok eñjake in ekaiuriur eo ad? Emwij ad lo aorõkin ad jar im aikwij eo ñan ad likit ilo lemnak eo ad ran eo an Jehovah. Bareinwõt, Paul ear kwalok kin jilu kadkad ko raorõk jej aikwij kaddeki. Ej ba: “A kij, bwe jej armij in ran, jen jadõr, im kõnõk tõmak im yokwe, ken kõrape enbwiner, im kejatrikrik in lomor, ken kõrape bõrer.” (1 Dri Tessalonika 5:8) Jen etale ilo tu-kadu jerbal eo an tõmak, kejatdikdik, im yokwe ilo ad mimij im ekkõl ilo jitõb.

13. Ta jerbal eo an tõmak ilo ad ekkõl?

¹³ Ej aikwij wõr ibbed juõn tõmak ebin bwe Jehovah ej mol an bed im ej “lelok jinekjij ñõn ro rej kabukot E.” (Dri Hibru 11:6) Jejjet in kitien jinoin kanan eo an Jesus kin jemlokin ebeben eo kein kajuõn ej kakajurlok tõmak eo ad kin jejjet in kitien eo elaplok ilo ien eo ad. Im tõmak eo ad ej kõmman bwe jen kijoror wõt kake ran eo an Jehovah, im liki bwe “[vision in kanan eo] ejamin likjap an jejjet kitien. Ejamin rumijtok.”​—Habakkuk 2:​3, NW.

14. Ewi aorõkin kejatdikdik elañe jekõnan mimij?

¹⁴ Kejatdikdik eo ad ebin ej einwõt “ankõr in ar” eo ej kamaroñ kij ñan kijenmij iumin abañ ko meñe jej aikwij kõttar jejjet in kitien kallimur ko an Anij. (Dri Hibru 6:​18, 19) Margaret, juõn sister ri kabit an jitõb kwojarjar eo ej 90 jima an yiõ im ear baptais elõñlok jen 70 yiõ ko remotlok, ear ba: “Ke leo ibba ear iten mij kin cancer ilo 1963, iar eñjake bwe enaj kar emõn elañe jemlok eo ear mõkaj an itok. Ak kiõ ij kile bwe iar lemnak kin kõnan ko aõ wõt. Ilo ien eo kar ejelok ad lemnak kin ewi joñan eo jerbal in enaj kar jededlok ibelakin lal. Kiõ bareinwõt, ej wõr wõt jikin ko ijo jerbal in ej kab bellok ie. Inem I lukkun mõnõnõ bwe Jehovah ear kwalok an meanwõd.” Ri jilek Paul ear kamol: “Kijenmij [ej kwalok] juõn bed emõn ibben Anij; bed emõn in, ilo oktan, kejatdikdik, im kejatdikdik ejjab tellok ñan buromõj.”​—Dri Rom 5:​3-5.

15. Ewi wãwen yokwe ej kamakit kij meñe etto ad kar kõttar?

¹⁵ Yokwe an Christian ej juõn kadkad ekabwilõñlõñ kinke ej unin men otemjej jej kõmmani. Jej karejar ñan Jehovah kinke jej yokwe e, jekdon ta lajrak in ien eo ej kõmman men ko. Yokwe ri turid ej kamakit kij ñan kwalok kin news eo emõn kin Ailiñ eo, jekdon ewi aetokin jej aikwij in kõmmane ekkar ñan ankil an Anij im meñe ej aikwij elõñ alen ad bar jeblak ñan ejja moko wõt. Einwõt Paul ear je, “kiõ e berwõt tõmak, kejatrikrik, im yokwe, men kein jilu; im eo elap iair yokwe.” (1 Dri Korint 13:13) Yokwe ej jibañ kij ñan kijenmij im kõmman ad mimij wõt. “[Yokwe] ej kejatrikrik e kin men otemjej, ej niknik ilo men otemjej. Yokwe e jamin joko.”​—1 Dri Korint 13:​7, 8.

“Kwon Drebij Men eo Ibõm”

16. Jen ad kadiklok ad jerbal, lemnak ta eo jej aikwij kaddeke?

¹⁶ Jej mour ilo ien ko raorõk ke men ko rej walok ilo lal in ien otemjej rej kakememej kij bwe jej bed ilo tu-jemlokin ran ko eliktata. (2 Timote 3:​1-5) Kiõ ejjab ien ñan kadiklok ad jerbal ak ñan ‘debij wõt men eo ibbed.’ (Reveles̃õn 3:​11) Ilo ad “jadõr im jar” im ilo ad kaddeklok tõmak, kejatdikdik, im yokwe, jenaj bojak ilo awa in melejoñ eo. (1 Piter 4:7) Elõñ men ko jej aikwij kõmmani ilo jerbal eo an Iroij. Ad boub kin jerbal in kabuñ ko rekwojarjar naj jibañ kij ñan ad mimij wõt.​—2 Piter 3:​11.

17. (a) Etke likjap in jejjet in kitien men ko jaar kõtmene kaki jen ien ñan ien ren jab kabwer kij? (Lale box eo ilo page 21.) (b) Ewi wãwen jemaroñ kajeoñe Jehovah, im jerammõn ta ko rej kõttar ro rej kõmman eindein?

¹⁷ “Jehovah ej bed ibba,” Jeremiah ear je, “eñin unin e wõt ij kejatdikdik kake. Jehovah ej kwalok an emõn ñan eo ej kejatdikdik ilo e, ñan aan eo ej bukõte wõt e. Emõn bwe juõn en kõttar, meñe ilo ikõñ, kin lomor eo an Jehovah.” (Lamentations 3:​24-​26, NW) Jet iad ar kadu ien ad kõttar. Ro jet rar kõttar iumin elõñ yiõ ko ñan lo lomor eo an Jehovah. Ak, elukkun kadu ien ad kõttar ñe keidi ibben ien indio eo ej bed imad! (2 Dri Korint 4:​16-​18) Im ñe jej kõttar ien eo ejejjet an Jehovah, jemaroñ kaddeklok kadkad ko raorõk kadkadin Christian im jibañ ro jet ñan kortokjen meanwõd eo an Jehovah im bõk mol eo. Inem, kimij kejatdikdik bwe kij aolep jenaj ekkõl wõt. Jen kajeoñe Jehovah im kwalok ad meanwõd, im kamolol e kin kejatdikdik eo ear letok ñan kij. Im ñe jej ekkõl wõt ilo tiljek, jen debij wõt kejatdikdik eo kin mour indio. Inem, kallimur in kanan kein renaj mol air jerbal ilo mour eo am: “[Jehovah] E naj koutiej yuk in jolit ene eo. Ñe bukwelok ro dri nana kwo naj loe.”​—Sam 37:⁠34.

[Kamelele ko itulal]

Ewi Wãwen Kwonaj Uak?

• Ewi wãwen jemaroñ kakajurlok tõmak eo ad bwe jemlokin jukjuk im bed in ebak?

• Ta eo jemaroñ katak jen wanjoñok ko an Peter James, im John?

• Kadkad ta ko jilu renaj jibañ kij ñan ad ekkõl wõt ilo jitõb?

• Etke e ien ñan ‘debij wõt men eo ibbed’?

[Bo̦o̦k/Pija eo ilo peij 29]

“Emõnõnõ Eo Ej Kõtmene Wõt.”​—Daniel 12:​12, NW

Lemnak bwe juõn ri waj ej ekiljake bwe juõn ri kwot enaj itok im kwot jen ijo ej lale. Ñe e boñ, ri waj eo enaj lukkun roñjake kin jabdewõt ainikien ko me rej kalikar bwe juõn ri kwot ebed. Jen awa ñan awa ej kate e in kajerbal lojilñin im mejen. Ebidodo ad melele kin ewi wãwen juõn kakkõl ewan emaroñ mone e​—ainikien kõdo eo ilo wijki ko ak juõn kuuj eo ej kowõtlok juõn men.​—Luk 12:39, 40.

Juõn men einlok wõt emaroñ walok ñan ro rej “kõtar an itok ar Iroij Jisõs Kraist.” (1 Dri Korint 1:7) Ri jilek ro rar lemnak bwe Jesus enaj kar ‘karol ailiñ eo ñan Israel’ ejjabto elikin an kar jerkakbiji. (Jerbal 1:6) Elõñ yiõ ko tokelik, rar aikwij kakememej Ri Christian ro ilo Thessalonica bwe bed eo an Jesus ej itok wõt. (2 Dri Tessalonika 2:3, 8) Ak, kõtmene ko rejjab jejjet kitieir kin ran eo an Jehovah rar jab kõmman bwe ri kalor rein jinoin an Jesus ren ilok jen ial eo ej tellok ñan mour.​—Matu 7:​13.

Ilo ran kein ad, jitõb in ebwer kin an rumij tok jemlokin jukjuk im bed in en jab kõmman bwe en bõjrak ad ekkõl wõt. Juõn kakkõl ewan emaroñ mone juõn ri waj eo ej ekkõl, ak ej aikwij ekkõl wõt! Eñin jerbal eo an. Ejja einwõt ibben Ri Christian ro.

[Pija eo ilo peij 26]

Kwoj tõmak ke bwe ran eo an Jehovah ebak?

[Pija ko ilo peij 27]

Kwelok ko, jar, im manit ko remõn ñan katak rej jibañ kij ñan ad ekkõl wõt

[Pija eo ilo peij 30]

Einwõt Margaret, ilo meanwõd im ilo niknik jen ekkõl wõt