“Komij Jebar Elõñ Leen”

“Komij jebar elõñ leen; im ein drein kom naj dri kalora.”​—Jon 15:⁠8.

1. (a) Ta men in aikwij eo Jesus ear jiroñ ri kalor ro an rar aikwiji kin bedwõt einwõt ri kalor ro an? (b) Ta kajitõk eo jej aikwij kajitõk ibbed make?

ILO boñin eo mokta jen an kar Jesus mij. Jesus ear bõk elap ien ñan rejañ ri jilek ro an ilo an konono ilo juõn wãwen ejoij im alikar. Kiõ, ear le jen lukkun boñ, ak Jesus, kin an yokwe ro jeran ebak kõtan eo an ibbeir, ear wõnmanlok im konono ñan ir. Inem, ilo ien eo ear bwebwenato ibbeir, ear kakememej ir bwe mõttan juõn men in aikwij eo rar aikwiji ñan berwõt einwõt ri kalor ro an. Ear ba: “Ilo men in Jema ej aibujuij, bwe komij jebar elõñ leen; im ein drein kom naj dri kalora.” (Jon 15:⁠8) Emwij ke ad kõtõbrak aikwij in einwõt ri kalor ro? Ta melelen “jebar elõñ leen”? Ñan jelã kin men in, jen jeblak ñan bwebwenato eo ear walok ilo boñin eo.

2. Ta wanjoñok eo kin jebar leen Jesus ear konono kake ilo boñin eo mokta jen an kar mij?

² Nan in kakabilek eo ñan jebar elõñ leen ej mõttan wanjoñok eo Jesus ear kwalok ñan ri jilek ro an. Ear ba: “Ña Ij vain emol, im Jema e Dri kallip. Jabrewõt ra ilo Ña e jab jebar leen, Ej bõklok; im ra jabrewõt ej jebar leen, Ej karreoik e, bwe en orlok an jebar leen. Kiõ kom erreo kin nan eo I ar konono ñõn kom. Komin ber ilo Ña, im Ña ilo kom. Einwõt ra e ban mõke jebar leen, elañe e jab ber ilo vain; ein drein bareinwõt kom bane, elañe kom jab ber ilo Ña. Ña vain, kom ra ko. . . . Ilo men in Jema ej aibujuij, bwe komij jebar elõñ leen im ein drein kom naj dri kalora. Einwõt Jema e ar yokwe Iõ, bareinwõt I ar yokwe kom; komin berwõt ilo Aõ yokwe.”​​—⁠Jon 15:​1-​10.

3. Ta eo ri kalor ro an Jesus rar aikwij kõmmane ñan jebar leen?

³ Ilo wanjoñok in Jehovah ej ri kallip eo, Jesus ej vine (vain) eo, im ri jilek ro me Jesus ear bwebwenato ibbeir rej ra ko. Toan wõt an ri jilek ro “berwõt” ibben Jesus, renaj kar jebar leen. Jesus ear kamelele kin ewi wãwen an ri jilek ro an maroñ kar lo tõbrak ilo burukuk in air eaorõk: “Elañe komij berwõt ilo kien ko Aõ, kom naj ber ilo Aõ yokwe.” Tokelik, ri jilek John ear jeje nan ko einlok wõt ñan Ri Christian ro mõttan: “Eo ej kejbãrok kien ko An [Christ] ej berwõt ilo E, im E ilo e.”a (1 Jon 2:​24; 3:​24) Inem, ilo air kejbãrok kien ko an Christ, ri kalor ro an renaj kar burueir wõt juõn ibben, im burukuk in, jeltokin, enaj kamaroñ ir ñan jebar elõñ leen. Ta leen ko jej aikwij jebar?

Ien Eo Emõn ñan Eddeklok

4. Ta eo jemaroñ katak kake jen mol eo bwe Jehovah ej “bõklok” ra otemjej ejjab jebar leen?

⁴ Ilo wanjoñok eo kin vine eo, Jehovah ej “bõklok” ak juok, juõn ra ñe ejjab jebar leen. Ta eo men in ej jiroñ kij? Ejjab jiroñ kij bwe aolep ri kalor ro rej aikwij jebar leen wõt ak bwe aolep ewõr air maroñ ñan kõmman eindein, jekdon ta wãwen ak melejoñ ko rej jelmae. Emol, ejjab juõn wãwen yokwe ibben Jehovah ñan ‘bõklok,’ ak kabõjrak juõn ri kaloran Christ kin an likjap in jibadõk juõn men eo ellã jen joñan an maroñ jibadõke.​​—⁠Sam 103:14; Dri Kolosse 3:​23; 1 Jon 5:⁠3.

5. (a) Ewi wãwen wanjoñok eo an Jesus ear kalikar bwe jemaroñ wõnmanlok im jebar leen? (b) Ta leen ko ruo jenaj etali?

⁵ Wanjoñok eo an Jesus kin vine eo ej kwalok bareinwõt bwe ekkar ñan joñan maroñ ko ad, jej aikwij kõmman ien ñan ad kalaplok jerbal ko ad einwõt juõn ri kalor. Lale kin ewi wãwen an kar Jesus kamelele kin men in: “Jabrewõt ra ilo ña e jab jebar leen, Ej bõklok: im ra jabrewõt ej jebar leen, Ej karreoik e, bwe en orlok an jebar leen.” (Jon 15:⁠2) Ilo tujemlokin wanjoñok eo, Jesus ear rejañ ri kalor ro an bwe ren jebar “elõñ leen.” (8 eon) Ta melelen ennan eo ijin? Einwõt ri kalor ro, jejjab kõnan bed bajjek. (Reveles̃õn 3:​14, 15, 19) Jen men in, jej aikwij bukõt wãwen ko ñan wõnmanlok im jebar leen. Kain leen rot eo jej aikwij kate im orlok? Ewõr (1) “leen Jitõb Kwojarjar eo” im (2) leen Ailiñ eo.​​—⁠Dri Galetia 5:​22, 23; Matu 24:⁠14.

Leen Kadkad ko an Christian

6. Ewi wãwen an kar Jesus Christ kalikar kin aorõkin leen eo kein kajuõn leen jitõb?

⁶ Leen moktata ian “leen jitõb” ej yokwe. Jitõb kwojarjar eo an Anij ej kaddek iloan Ri Christian ro kadkadin yokwe, kinke rej bokake kien eo Jesus ear lelok ñan ir mokta wõt jen an kar konono kin wanjoñok eo kin vine eo ej jebar leen. Ear jiroñ ri kalor ro an: “Kien ekãl Ij lewõj ñõn kom, Komin yokwe dron; einwõt I ar yokwe kom, komin bareinwõt yokwe dron.” (Jon 13:34) Ilo mol, ilo aolep bwebwenato eo an ilo boñin eo eliktata in an mour ion lal, elõñ alen Jesus ear kakememej ri jilek ro bwe ren kwalok kadkadin yokwe.​​—⁠Jon 14:​15, 21, 23, 24; 15:​12, 13, 17.

7. Ewi wãwen an kar ri jilek Peter kwalok bwe jebar leen ej ekkeijaklok ñan kwalok kadkad ko kadkadin Christ?

⁷ Peter, eo ear bed ilo boñin eo, ear melele bwe ri kalor ro remol an Christ rar aikwij kwalok yokwe im kadkad ko jet kadkadin Christian. Elõñ yiõ ko tokelik, Peter ear rejañ Ri Christian ro bwe ren kaddek kadkad ko einwõt jatõr, joij, im yokwe. Ear ba bareinwõt bwe ilo ad kõmman eindein jejamin “jowan ak jowa.” (2 Piter 1:​5-8) Jekdon ta wãwen ko ad, jemaroñ kwalok leen jitõb. Inem, jen kate wõt kij im kalaplok ad kwalok yokwe, joij, meanwõd, im kadkad ko jet an Christ, kinke “ejelok kien nae men rot kein” ak joñan. (Dri Galetia 5:​23) Emol, jen jebar “elõñ leen.”

Jebar Leen Ailiñ eo

8. (a) Ta kõtan eo ewõr ikõtan leen jitõb im leen Ailiñ eo? (b) Ta kajitõk eo ej tellokin ñan ad lemnak kake?

⁸ Leen wijki ko renno im elõñ color rej kaibujuij keinikkan ko. Bõtab, tokjen leen kein rej ellã jen air enno im aibujuij. Leen keinikkan ko rej aorõk bareinwõt ñan bar kõmman keinikkan ko jet ikijen inne ko air. Eindein, leen jitõb elaplok jen an kaibujuij wõt kadkadin Christian eo ad. Kadkad ko einwõt yokwe im tõmak rej lujure kij ñan kajededlok ennan eo an Ailiñ eo einwõt ine ko jej loe ilo Nan in Anij. Lale kin ewi wãwen an ri jilek Paul kalikar men in ekkejel in eaorõk. Ej ba: “Kim bareinwõt tõmak, inem bareinwõt kimij konono.” (2 Dri Korint 4:​13) Ilo wãwen in, Paul ej kamelelelok, jej “katok ñõn Anij kin wijtak ien otemjej, eñin leen tier ko”​​—⁠leen eo kein karuo jej aikwij kwalok. (Dri Hibru 13:15) Ewõr ke ien ilo mour eo am ñan korlok leen, aet ñan jebar “elõñ leen,” einwõt ri keañ ro an Ailiñ in Anij?

9. Jebar leen ej melelen ke bwe jen kõmman ri kalor ro? Kamelele.

⁹ Ñan uak ilo jimwe, moktata jej aikwij melele kin ta in leen Ailiñ eo. Ñan jebar leen emaroñ kar melelen ke bwe jen kõmman ri kalor ro? (Matu 28:19) Leen ko jej kõmman rej jitõñlok ke ñan armij ro jar jibañ ir ñan erom ri kabuñ ro emwij baptais an Jehovah? Jaab. Elañe ear eindein, men in enaj kar kabwer Ri Kennan ro rar kwalok nan kin ennan eo an Ailiñ eo ilo tiljek iumin elõñ yiõ ko ilo jikin ko eiet armij rar tõmak ie. Aet, elañe leen Ailiñ eo ej jitõñlok wõt ñan ri kalor ro rekãl, Ri Kennan rein reniknik renaj kar einwõt ra ko ejelok leen ilo wanjoñok eo an Jesus! Emol, ejjab eindein. Inem, ta in leen eo elap an Ailiñ eo ilo jerbal eo ad?

Jebar Leen ilo Ad Kajededlok Ine ko an Ailiñ eo

10. Ewi wãwen wanjoñok eo an Jesus kin ri kallip eo im bũdej ko rekajju jen don rej kalikar kin ta eo leen Ailiñ eo im ta eo ejjab?

¹⁰ Wanjoñok eo an Jesus kin ri kallip eo im bũdej ko emen reoktak jen don ej jitõñlok ñan uak eo​​—⁠juõn uak in kõketak ñan ro rej kwalok nan ilo jikin ko eiet armij ro rej itoklimo ie. Jesus ear ba bwe ine eo ej ennan eo an Ailiñ eo im bũdej ko rej kõkkar kin buruen armij. Jet ine ko rar “buñõt ion brij emõn, im edrek, im jebar leen.” (Luk 8:⁠8) Ta leen? Eokwe, elikin an juõn kããn wheat jul im eddek, ejjab jebar kããn wheat ko, ak juõn ine ekãl. Eindein, juõn Ri Christian ejjab jebar leen, einwõt ri kalor ro rekãl, ak inen Ailiñ eo ekãl.

11. Ewi wãwen ad maroñ kamelele kin ta in leen Ailiñ eo?

¹¹ Kin men in, ilo wãwen in leen in ejjab ri kalor ro rekãl im kadkad ko kadkadin Christian. Kinke ine eo emwij jeore ej nan in Ailiñ eo, leen ej jerbal ñan elõñ wãwen kwalok kin Ailiñ eo. (Matu 24:14) Ad jebar kain leen rot in kin Ailiñ eo​​—⁠kwalok nan kin news eo emõn kin Ailiñ eo​​—⁠ej bed ke ilo maroñ ko ad, jekdon ta abañ ko jej jelmae? Aet, ej! Ilo ejja wanjoñok in wõt, Jesus ej kamelele kin etke.

Lelok Men ko Ad Remõntata ñan Aibujuij eo an Anij

12. Ri Christian ro otemjej remaroñ ke jebar leen Ailiñ eo? Kamelele.

¹² “Eo ar jeor e na ilo brij emõn,” Jesus ear ba, “ej jebar im elle, jet jibuki kin juõn, jet jiljinoñoul kin juõn, jet jilñoul kin juõn.” (Matu 13:23) Ine ko ar jeori na ilo melaj eo remaroñ einjuõn jen don ilo joñair ekkar ñan wãwen ko air. Eindein lok wõt, men eo jemaroñ kõmmane ilo jerbal in kwalok nan kin news eo emõn emaroñ kajju jen don ekkar ñan wãwen ko ad, im Jesus ear kwalok bwe ear melele kin men in. Emaroñ laplok ien ko remõn ibben jet; emaroñ emõnlok ejmour im elaplok kajur ibben ro jet. Inem, men eo jemaroñ kõmmane emaroñ laplok ak diklok jen ta eo armij ro jet remaroñ kõmmani, ak elañe jej kõmmane joñan wõt ad maroñ, men in Jehovah ej buñburuen kake. (Dri Galetia 6:⁠4) Meñe rittolok ak mõjno kin nañinmij emaroñ kadiklok ad bõk kunad ilo jerbal in kwalok nan, ejelok bere bwe Jemed Jehovah eo ej tiriamokake, ej watõk kij einwõt juõn ian ro rej “jebar elõñ leen.” Etke? Kinke jej lelok ñan e ‘men ko ad otemjej’​​—⁠jerbal kin aolepen ad.b​​—⁠Mark 12:​43, 44; Luk 10:⁠27.

13. (a) Ta un eo elaptata unin ad “ilok” im jebar leen Ailiñ eo? (b) Ta eo enaj jibañ kij jebar leen ilo territory ko eiet armij rej itoklimo ie? (Lale box eo ilo page 19.)

¹³ Joñan wõt ad maroñ jebar leen Ailiñ eo, jenaj emmakit im “jebar elõñ leen” ñe jej kememej kin unin ad kõmman eindein. (Jon 15:16) Jesus ear kwalok un eo elaptata: “Ilo men in Jema ej aibujuij, bwe komij jebar elõñ leen.” (Jon 15:⁠8) Aet, jerbal eo ad ñan kwalok nan ej kokwojarjar etan Jehovah iman mejen armij otemjej. (Sam 109:30) Juõn Ri Kennan eo etiljek, etan Honor eo ej 70 jima an yiõ, ej ba: “Meñe ilo territory ko eiet armij rej itoklimo ie, ej juõn jerammõn elap ñan jutak ibben Eo Eutiejtata.” Ke rar kajitõk ibben Claudio, eo ear juõn Ri Kennan ekijejeto jen 1974, kin etke ear wõnmanlok im kwalok nan meñe eiet armij ilo territory eo an rar jab itoklimo, ear kwalok Jon 4:​34, ijo jej konono nan ko an Jesus: “Kijiõ bwe In kõmõnmõn ankil an Eo e ar jilkintok Iõ, im bwe In kamwijlok jerbal eo An.” Bareinwõt Claudio ear ba: “Einwõt Jesus, Ijjab kõnan jinoe wõt ak kamwijlok bareinwõt jerbal eo aõ einwõt juõn ri keañ eo an Ailiñ eo.” (Jon 17:⁠4) Ri Kennan ro an Jehovah ibelakin lal rej errã.​​—⁠Lale box eo “Ewi Wãwen Ad Maroñ ‘Jebar Leen ilo Kijenmij,’” ilo page 19.

Ñan Kwalok Nan im Katakin

14. (a) Ta jerbal ko ruo Ri Baptais eo Jon im Jesus rar kõmmani? (b) Ewi wãwen am maroñ kamelele kin jerbal eo an Christian ilo ran kein?

¹⁴ Gospel ko rar kwalok bwe ri keañ eo an Ailiñ eo kein kajuõn kar Ri Baptais eo Jon. (Matu 3:​1, 2; Luk 3:​18) Jerbal eo an elap kar “kennan,” im ear kõmman eindein kin juõn tõmak jen buruen im kin an kejatdikdik “bwe armij otemjej ren tõmak kin e.” (Jon 1:​6, 7) Emol, jet ian ro Jon ear kwalok nan ñan ir rar erom ri kalor ro an Christ. (Jon 1:​35-​37) Kin men in, Jon ear juõn ri kwalok nan im ri kõmman ri kalor ro. Bareinwõt Jesus ear juõn ri kwalok nan im ri kaki. (Matu 4:​23; 11:⁠1) Inem, jejjab bwilõñ bwe, Jesus ear kaiñi ri kalor ro an ñan jab kwalok nan wõt kin Ailiñ eo ak ñan jibañ armij ro rej tõmak kake bareinwõt ñan jutak einwõt ri kalor ro an. (Matu 28:​19, 20) Inem jerbal eo ad ilo ran kein ej ñan kwalok nan im katakin.

15. Ta wãwen eo kin jerbal in kwalok nan ilo ebeben eo kein kajuõn C.E. ear einlok wõt ilo ran kein ad?

¹⁵ Jen ian armij ro ilo ebeben eo kein kajuõn C.E. rar roñjake Paul ke ear kwalok nan im katakin armij, “jet rej tõmak men ko ej konono kaki, im jet re jab tõmak.” (Jerbal 28:24) Ilo ran kein, ejja wãwen dein air uak. Ekaburomõj bwe, enañin aolep inen Ailiñ eo ej buñõt bũdej eo enana. Meñe eindein, jet ine ko rej buñõt bũdej eo emõn, ewõr okrair, im jul, einwõt an kar Jesus kanan kaki. Emol, ibelakin lal, juõn joñan kin elõñlok jen 5,000 armij ro rej erom ri kalor ro remol an Christ ilo kajjojo week ilo juõn yiõ! Aolep ri kalor rein rekãl rej “tõmak men ko [rej] konono kaki,” meñe elõñ armij ro jet rejjab. Ta eo ear jibañ burueir ñan bõk ennan eo an Ailiñ eo? Ekkã an walok bwe wãwen an Ri Kennan ro kwalok air itoklimo​​—⁠utdikdik ine eo rej kab jeore ilo kõkkar​​—⁠ear jelet unin air oktak. (1 Dri Korint 3:⁠6) Lale kin wanjoñok ko ruo ian elõñ wanjoñok kin men in.

Itoklimo eo Ad Ej Jelet Unin Air Oktak

16, 17. Etke eaorõk bwe jen kwalok ad itoklimo kin armij ro jej ion ir ilo jerbal in kwalok nan?

¹⁶ Karolien, juõn Ri Kennan jodikdik ilo Belgium, ear lolok ibben juõn lellab eo ear jab itoklimo kin ennan eo an Ailiñ eo. Ke rar lo bwe pein lellab eo emwij an rooje, Karolien im ri jerbal eo mõttan rar mõnõnõ in jibañ e, ak lellab eo ear jab kõnan bõk jibañ jen e. Ruo ran ko tokelik ejja Ri Kennan rein wõt rar jeblak ñan mweo imõn lellab eo im kajitõk ibben kin ewi wãwen an mour. “Men in ear ukõt buruen,” Karolien ear ba. “Ear bwilõñ kin an lo bwe kim ar itoklimo kin mour eo an einwõt juõn armij. Ear kadeloñ kimro, im kimar jino katak Bible ibben.”

¹⁷ Sandi, juõn Ri Kennan ilo United States, ej bareinwõt kwalok an itoklimo kin ro ej kwalok nan ñan ir. Ej bukõt ilo newspaper eo ilo bukwon eo an kin kejelã ko kin niñniñ ro rej kab lotak inem ej lolok ibben ro rekãl jemeir im jineir ibben book eo Aõ Buk in Bwebwenato eo an Baibel.c Kinke ekkã an jineir bedwõt ilo moko imwiir im rej mõnõnõ im kwalok niñniñ eo ekãl nejiir ñan ri lotok ro, ekkã an walok juõn bwebwenato ibben don. “Ij bwebwenato ibben jemen im jinen ajiri ro kin aorõkin air jino ejaak juõn kõtan ebak ibben niñniñ eo ekãl ilo air read ñan e,” Sandi ear kamelele. “Tokelik Ij bwebwenato ibbeir kin aitwerõk ko rej walok ilo air lale im katakin ajiri ro ilo jukjuk im bed eo an lal in.” Ilo ien eo ej kab motlok, kin ien lotok in, juõn jinen im jiljino ajiri ro nejin rar jino jerbal ñan Jehovah. Ilo ad bõk eddo eo mokta im kwalok itoklimo kin ir emaroñ jemlok ilo tõbrak ko rekalañliñ ilo jerbal in kwalok nan.

18. (a) Etke kij aolep jemaroñ ‘jebar elõñ leen’? (b) Ta aikwij ko jilu kin kõmman ri kalor Gospel eo an John emwij am beek ñan kõtõbraki?

¹⁸ Ej juõn men in rejañ elap ñan jelã bwe aikwij eo ñan “jebar elõñ leen” jemaroñ kõmmane! Jekdon elañe jej dik ak ritto, jekdon elañe ej emõn wõt ad mour ak jab, jekdon elañe jej kwalok nan ilo territory ko elõñ rej itoklimo ie ak jab, kij aolep jemaroñ jebar elõñ leen. Ewi wãwen? Ilo ad kalaplok ad kwalok leen jitõb joñan wõt ad maroñ im kajededlok ennan eo an Ailiñ in Anij ñan joñan eo emõntata jemaroñ kõmmane. Ilo ejja ien eo wõt, jej kate wõt kij ñan ‘berwõt ilo nan eo an Jesus’ im ‘yokwe don.’ Aet, ilo ad tõbar aikwij kein jilu raorõk ñan kõmman ri kalor ro ekkar ñan Gospel eo an John, jej kamol bwe jej “dri kalor ro an [Christ].”​​—⁠Jon 8:​31; 13:⁠35.

[Kamelele ko itulal]

Kajitõk ko ñan Elij

• Kain leen rot ko jej aikwij korlok?

• Etke mejenkajjik eo ñan “jebar elõñ leen” jemaroñ kõtõbraki?

• Ta aikwij ko jilu ñan kõmman ri kalor emwij ad etale kaki ilo Gospel eo an John?

[Bo̦o̦k/Pija eo ilo peij 19]

EWI WÃWEN “JEBAR LEEN ILO KIJENMIJ”

TA EO ej jibañ yuk ñan wõnmanlok ilo tiljek im kwalok nan kin Ailiñ eo ilo territory ko eiet armij rej itoklimo ie? Erkein jet uak ko ñan kajitõk in.

“Ad jelã bwe Jesus ej lukkun rejetak jerbal eo ad ej kakajur im lujur kij ñan kijenmij, jekdon ta lemnak eo an armij ilo territory eo.”​​—⁠Harry, 72 an yiõ; ear baptais ilo 1946.

“Eon eo 2 Dri Korint 2:​17 ej rejañ iõ ien otemjej. Ej ba bwe jej bõk kunad ilo jerbal in kwalok ‘iumin mejen Anij, im ibben Christ.’ Ñe ij kwalok nan, ij lañliñ kin aõ jerbal ibben ro jera remõntata.”​​—⁠Claudio, 43 an yiõ; ear baptais ilo 1974.

“Emol, jerbal in kwalok nan ebwe an bin ñan aõ kõmmane. Aet, Ij lo mol in nan ko ilo Sam 18:29: ‘Ilo aõ Anij Imaroñ tallõñ worwor eo.’”​​—⁠Gerard, 79 an yiõ; ear baptais ilo 1955.

“Elañe imaroñ konono juõn wõt eon ilo jerbal in kwalok nan, ij juburuõ kinke Bible eo ear etale buruen juõn armij.”​​—⁠Eleanor, 26 an yiõ; ear baptais ilo 1989.

“Ij kajeoñ in kajerbali nan in kabellok ko reinjuõn jen don. Joñan an lõñ nan in kabellok ko iban kajerbal aolepeir ilo bwen yiõ ko in aõ mour.”​​—⁠Paul, 79 an yiõ; ear baptais ilo 1940.

“Ij jab lõkatip ñe armij ro rejjab mõnõnõ ak itoklimo kake. Ij kajeoñ in kwalok joij ñan ir, bwebwenato ibben armij ro im roñjake ta lemnak eo air.”​​—⁠Daniel, 75 an yiõ; ear baptais ilo 1946.

“Emwij aõ wõnmae ro rej kab baptais im rar jiroñ iõ bwe jerbal in kwalok nan ear wõr kunan ñan air erom juõn ian Ri Kennan ro an Jehovah. Meñe iar jaje kake, bar juõn ri kwalok ear katak Bible ibbeir tokelik im jibañ ir bwe ren wõnmanlok ilo jitõb. Ij lañliñ in jelã bwe jerbal eo ad ñan kwalok nan ej juõn jerbal elõñ rej bõk kunair kake.”​​—⁠Joan, 66 an yiõ; ear baptais ilo 1954.

Ta eo ej jibañ yuk bwe kwon “jebar leen ilo kijenmij”?​​—⁠Luk 8:​15.

[Pija ko ilo peij 18]

Ilo ad kwalok leen jitõb im kwalok nan kin Ailiñ eo, jej jebar elõñ leen

[Pija eo ilo peij 21]

Ta melelen nan ko an Jesus ke ear jiroñ ri jilek ro an: “Komij jebar elõñ leen”?