“Komin Druaklok Ñõn Anij, Im E Naj Druakwoj Ñõn Kom”
Mokata Im Elikin An Oktaklok Mour eo An
MOUR eo an Matsepang ear oktak im lap an kar nana im ejelok tokjen! Ear juõn ledik ilo Lesotho, juõn ailiñ itu-iolapen South Africa. Matsepang ear rittolok ilo kabuñ in Catholic. Bõtab, jen air jibañ e ñan an ruaklok ñan Anij, iumin elõñ yiõ ko virgin ro rar kokkure e ilo air wiaik buruen im kabo e ñan an bõk kunan ilo manit ko retton.
Tokjen men in, Matsepang ear rup buruen kin kabuñ im ear jab maroñ tõmak kin juõn Ri Kõmanman eyokwe im emol an kea kin men in kõmanman ko an. Kin jerwan im jorrãn ko ear eñtan kaki, ear wõr ibben Matsepang kinej in eñjake ko remũlal im eñjake ko kin ejelok tokjen an mour. Ear rittolok im lukkun illulu im lej. Men in ear tellok e ñan an bõk manit ko kin kowadoñ.
Matsepang ear erom mõttan juõn kumi me ear kwot jen armij ro ilo train ko. Rar jibwe e im ekajete ñan bed ilo kalbuj ilo South Africa. Tokelik, kar karol e ñan kabijuknen, Lesotho, ijo ear wõnmanlok ilo juõn mour in kowadoñ, kadõk, lej, im lũñ.
Ke ear lukkun buromõj, Matsepang ear jar ñan Anij kin jibañ. Ear kallimur, “Anij, elañe ij elle im mour, I naj kõmman joñan wõt aõ maroñ ñan karejar ñan yuk.”
Ejjabto tokelik, missionary ro an Ri Kennan ro an Jehovah rar kebak Matsepang. Rar tilmake juõn katak kin Bible ibben. Jen katak eo an, ear kile bwe Anij ej itoklimo im kea kake armij. Ilo mol, ear kile bwe Satan, “jemen riõp,” ej kajerbal kõl ko retao im ittino ñan kõmman bwe jet ren eñjake bwe ejelok tokjen air mour im bwe ren tõmak bwe Jehovah ejamin yokwe ir.—Jon 8:44; Dri Epesõs 6:11.
Ilo oktak, ear lap an kainemõn Matsepang ke ear katak bwe emaroñ wõr ad kautiej kij make elañe jej ukwelok jen mour in jerawiwi ko ad mokta, bukõt jeorlok bwid jen Anij, im kate kij ñan kabuñburuen! Kar jibañ e ñan melele bwe “Anij elap jen buruer” im ej lemnak kin kij ilo juõn wãwen eoktak jen ad make kõmmane.—1 Jon 3:19, 20.
Matsepang ear mõnõnõ in konono nan kein an ri jeje psalm David: “Jeova ej ebak ñõn ro eruj burueir, im Ej lomoren ro retã wõt ilo air.” (Sam 34:18) Einwõt juõn ian ro “retã wõt ilo air,” ear kile bwe Jehovah ejjab ilok jen ro ri karejaran, meñe jet iair rej oktak im buromõj ak eñjake bwe ejelok tokjeir. Ear kõmãnãn buruen ñan jelã bwe Anij ej kea kake aolep sheep ro an im ej kejbãrok ir ilo ien abañ ko. (Sam 55:22; 1 Piter 5:6, 7) Nan kein elaptata air kar jelet buruen: “Komin druaklok ñõn Anij, im E naj druakwoj ñõn kom.”—Jemes 4:8.
Kajur in Nan eo an Anij, Bible eo, ejjabto ear alikar ilo mour eo an Matsepang. Ear jino an keini bed ilo kwelok ko an Christian im ilok jen manit ko an rejakkar. Kin ta tokjen eo? Ejako an eñjake an jab tellokin bõk yokwe in buñburu an Anij. Jen ien eo ear baptais einwõt juõn ian Ri Kennan ro an Jehovah, ear kajerbal elõñ thousand awa ko ilo jerbal in kwalok nan an Christian einwõt juõn ri keañ kin news eo emõn an Ailiñ eo. Meñe ear wõr kinej in eñjake ko kin mour eo an mokta, mour eo an Matsepang ej kiõ mõnõnõ im ewõr melelen. Elap an men in kwalok kin kajur eo an Bible eo ñan kakõmanmanlok mour!—Dri Hibru 4:12.
[Naan ko ilo peij 31]
“Anij, elañe ij elle im mour, I naj kõmman joñan wõt aõ maroñ ñan karejar ñan yuk”
[Bo̦o̦k eo ilo peij 31]
Kakabilek ko ilo Bible Rej Jerbal
Kakabilek ko ilo Bible me rar kainemõn ro rar jorrãn rej koba men kein:
“Ke elõñ lemnok ilo buruõ, Am nan in kainemõn ej kalõñliñ aõ.” (Sam 94:19) “Nan in kainemõn” ko an Jehovah jej loi ilo Nan eo an rej juõn unjen kainemõn elap. Ilo ad lemnak kaki ilo ien ad kalmenlokjen im jar ej jibañ ñan kadiklok inebata ko im ej kalaplok ad liki Anij einwõt juõn Jerad ewõr an melele.
“Ej [Jehovah] kãejmour ro erup burueir; Ej kitimi kinej ko kinjeir.” (Sam 147:3) Elañe jej kamolol kin tiriamokake eo an Jehovah im men in letok eo ñan kalibubu jerawiwi ko ad ikijen katok in binmour eo an Jesus, ilo liki jemaroñ kebak Anij ilo an buruõd jab liakelok kij. Men in emaroñ bõktok kainemõn elap im ainemõn ilo lemnak.
“Ejelok armij ej maroñ itok ñõn iba [Jesus Christ] elañe Jema eo E ar jilkintok Iõ E jab ibertok e: im I naj kejerkak e ilo ran eo eliktata.” (Jon 6:44) Ikijen jitõb kwojarjar eo an im jerbal in kwalok nan kin Ailiñ eo, Jehovah ej ibertok kij ñan Nejin im letok ñan kij kejatdikdik eo kin mour indio.