Kajitõk ko Jen Ro Rej Read
Ebwid ke ad bõk mour an juõn men in mour eo enañinmij ak ritto?
Enañin aolep armij ro rej itoklimo im mõnõnõ kin elõñ kain men in mour ko. Jet men in mour ko rawie remõn einwõt nejiir. Ñan wanjoñok, kidu ko rebuñbuñ kin air kiblie im yokwe master ro air. Eñin unin, armij ro rej yokwe men in mour ko nejiir, elaptata juõn eo ear to an bed ibbeir.
Bõtab, aetokin mour eo an men in mour ko rejjab kanuij aetok. Kidu ko remaroñ mour iumin 10 ñan 15 air yiõ, im eindein ibben kuuj. Ñe rej rittolok, men in mour ko remaroñ bõk nañinmij ko rej kainebataik master ro air, me rej kememej wõt ien ko ke men in mour kein rar emõn dettair im kajur. Inem enana ke mõn men in mour ko rej eñtan kin nañinmij ko air?
Juõn Ri Christian ekõnan kõmman ekkar ñan ankil an Anij ñe ej lemnak kin men in mour ko. Alikar bwe kaeñtan men in mour ko ej nae ankil an Anij, kinke Nan eo an ej ba: “Juõn dru wãnik, ej lale mour an kiru eo an; a tiriamokake an ro dri nana, re lej.” (Jabõn Kennan Ko 12:10) Bõtab, men in ejjab melelen bwe Anij ej watõk men in mour ko joñan wõt armij. Ke Anij ear kõmanman armij ro, ear kalikar oktak eo ikõtair im men in mour ko. Ñan wanjoñok, ear lelok kejatdikdik in mour indio ñan armij, ak ear jab lelok kejatdikdik in ñan men in mour ko. (Dri Rom 6:23; 2 Piter 2:12) Kinke e ej Ri Kõmanman eo, ewõr an maroñ ñan kalikar ta kõtan eo ikõtan armij ro im men in mour ko.
Jenesis 1:28 ej jiroñ kij kin ta kõtan in. Anij ear ba ñan armij ro moktata: “Komin iroij ion iik in lojit, im ion bao in mejatoto, im ion men otemjej rej mour im makõtkit ion lõl.” Eindein lok wõt, ilo Sam 8:6-8 ej ba: “Kw’ar likit men otemjej iomin neen. S̃ip otemjej, im kau ko, kab kiro ko rawia i ene jemaren; bao ko imejatoto, im iik ko i lojit, im jabrewõt men eo ej itoitõk ilo ial ko in lojit.”
Anij ear kalikar bwe armij ro rar maroñ kajerbal im mõn men in mour ko ilo jimwe. Ñan wanjoñok, rar maroñ kajerbal kil ko kiliir einwõt ballir. Bareinwõt Anij ear kõtlok bwe armij ro ren mõñã kanniekin men in mour ko elikin ien Ibwijleplep eo ilo ran ko an Noah, im koba ibben men in eddek ko rar mõñã ilo jinoin.—Jenesis 3:21; 4:4; 9:3.
Men in ear jab kamelim ir ñan air mõn men in mour ko ilo air ikkure kaki. Ilo Jenesis 10:9, Bible eo ej kwalok bwe Nimrod ear einwõt juõn “dri kakiruru e kajur.” Ak ilo ejja eon eo wõt ej ba bwe men in ear likit e einwõt juõn eo ear “iman mejen [ilo an jumae] Jeova.”
Inem, meñe armij ro rej iroij ion men in mour ko, ren jab le jen joñan maroñ eo air ak rej aikwij kajerbali ekkar ñan Nan in Anij. Men in emaroñ koba air jab kõtlok bwe men in mour ko nejiir ren eñtan le jen joñan kinke rej ritto, bed ilo jorrãn, ak bõk juõn nañinmij eban kamadmõde. Kin men in, juõn Ri Christian ej aikwij inek eddo eo im beek kin ta eo ej aikwij kõmmane. Elañe ej bebe bwe ej juõn men in tiriamo bwe men in mour eo nejin en jab mour manlok ilo eñtan meñe ejelok jabdewõt kejatdikdik ñan bar ejmour, emaroñ beek in kakiki e bwe en mij.