Ewi Wãwen Ad Maroñ Kaddek Yokwe eo Emol

“Yokwe ej kein kamadmõde nañinmij otemjej ñan mour; yokwe ej mour.”​—Bõk Men eo Emõntata ilo Mour, an ri jeje eo Joseph Johnson, 1871.

EWI wãwen an juõn armij katak kin yokwe? Ilo an katak kin psychology ke? Ilo an readi book ko ñan katakin emake kin kilen kakõmanmanlok mour eo an ke? Ilo an aluij movie ko kin mijkaie ke? Jaab. Armij ro rej katak ñan yokwe moktata jen joñok im katakin ko jen jemeir im jineir. Ajiri ro renaj katak kin ta melelen yokwe elañe, rej bed ilo juõn family ewõr juõn mejatoto emãnãn ie, rej lo an jemeir im jineir najidik im kejbãrok ir, bwebwenato jen burueir ibbeir, im rej lukkun itoklimo kin ir. Bareinwõt rej katak kin yokwe ñe jemeir im jineir rej katakin ir ñan bokake kien ko remõn kin ta eo emõn im nana.

Yokwe eo emol ej juõn kadkad eo elaplok jen ad baj kwalok juõn eñjake ñan bar juõn armij. Ej jerbal ien otemjej ilo wãwen eo emõntata ñan ro jet, meñe rejjab kamolol kake ilo ien eo, im ekkã an eindein ibben ajiri ro ñe ej kitibuj air bõk kaje ilo yokwe. Joñok eo emõntata kin juõn eo ej kwalok yokwe kin aolepen buruen ej Ri Kõmanman eo. Ri jilek Paul ear je: “Nejiõ, kwon jab kejekron kaje an Iroij im jab kijelok ñe Ej enoik yuk; Bwe Iroij ej kajeik eo Ej yokwe im dreñlokwe jabrewõt nejin Ej bõk e.”​—Dri Hibru 12:​5, 6.

Ro Jemen im jinen, ewi wãwen kwomaroñ kajeoñe Jehovah im kwalok yokwe ñan family eo am? Im ewi aorõkin joñok eo kwoj likit ikõtam im ri belele eo mõttam?

Katakin kin Yokwe ilo Joñok

Elañe kwe juõn emaan ewõr beleõm, kwoj kaorõk ke lio im kautieje? Elañe kwe juõn kõrã ewõr beleõm, kwoj yokwe im jurake ke leo ibbam? Bible eo ej ba bwe leo im lio ri belele rej aikwij yokwe im kautiej don. (Dri Epesõs 5:​28; Taitõs 2:4) Ñe rej kõmman eindein, ajiri ro nejiir rej lo bwe yokwe eo an Christian ej jerbal iman mejeir. Men in emaroñ juõn katak ebolemen im elap tokjen ñan bõke!

Jemen im jinen ajiri ro rej bareinwõt kowõnmanlok yokwe ilo mweo ñe rej debij im lor kien ko reutiej ilo family eo ikijen men ko einwõt men in kamõnõnõ ko, mour erreo, im mejenkajjik ko im men ko raorõktata. Ibelakin lal, armij ro rar lo Bible eo einwõt juõn men in jibañ elap ñan likit kien ko an family eo, im ilo wãwen in rar einwõt juõn joñok emour ñan kamol bwe Bible eo ej “kakõrmol an Anij, im or tokje[n] kin katakin, im kowe, im kajimwe, im kajelaik armij ilo kwojarjar; bwe armij korijeran Anij en wãppen im emwij kõkõmõnmõn e ñõn jerbal emõn otemjej.” (2 Timothy 3:​16) Emol, kien ko ñan mour erreo im nan in tel ko ilo Katak eo ion Tol eo elõñ rar watõki ejej uair.​—Matu, chapter 5 ñan 7.

Ñe aolep ro uan family eo rej reilok ñan Anij ñan tel ir im lor kien ko an, armij ro kajjojo rej jokane im ajiri ro renaj kalaplok air yokwe im kautiej jemeir im jineir. Ilo oktan, ilo juõn em ewõr ruo kain kien rej kajju jen don, ak ewõr likjap ilo air lor kien ko, ajiri ro renaj ebwer, illu, im jumae.​—Dri Rom 2:​21; Dri Kolosse 3:​21.

Ta kin jemen ak jinen ajiri ro ejelok mõttair? Ewõr ke juõn likjap elap ibbeir ñan katakin ajiri ro nejiir kin yokwe? Jaab. Meñe ejelok bar juõn wãwen emõnlok jen an jemen im jinen ro remõn jerbal ibben don, ealikar bwe emõnin kõtan ko ikõtan ro uan juõn family emaroñ kabwe aikwij in ñan juõn joñan emõn meñe ejako jemen ak jinen. Elañe kwe juõn ian ro ewõr ajiri im ejelok rejetam, kwon kate yuk im jerbale kien ko an Bible ilo mweo imõm. Aet, juõn jabõn kennan ej jiroñ kij: “Kwon liki Jeova kin aolepem buruõm, im kwon jab atartar ion jelalokjen eo am. Kwon kwalok E ilo ial ko am otemjelok, inem E naj bakajen ial ko am.”​—ekoba ial eo einwõt jemen im jinen.​—Jabõn Kennan Ko 3:​5, 6; Jemes 1:5.

Elõñ jodikdik ro rar eddeklok ilo jimwe ilo family ko ejako jemeir ak jineir im kiõ rej jerbal ilo tiljek ñan Anij ilo elõñ thousand congregation ko an Ri Kennan ro an Jehovah ibelakin lal. Men in ej kamol bareinwõt bwe jemen ak jinen ajiri ro ejelok mõttair rej lo tõbrak ilo air katakin ajiri ro nejiir kin yokwe.

Ewi Wãwen Aolep Remaroñ Kaddek Yokwe

Bible eo ear kanan bwe ilo “ran ko eliktata” enaj alikar bwe enaj wõr “ro re jab yokwe ro nukiir,” einwõt ba, naj ejelok juõn kõtan emõn ikõtan ro uan family ko. (2 Timote 3:​1, 3) Ak, meñe armij ro rar eddeklok ilo juõn jikin rar likjap in kwalok yokwe ñan don remaroñ kar katak ñan kaddek yokwe. Ewi wãwen? Ilo air katak jen Jehovah, eo ej Unjen yokwe im eo ej kwalok yokwe ñan aolep ro rej reilok ñan e kin aolepen burueir. (1 Jon 4:​7, 8) “Bwe jema im jinõ r’ar illok jen ña, a Jeova e naj bõk iõ,” juõn ri jeje sam ear ba.​—Sam 27:10.

Jehovah ej kwalok yokwe ñan kij ilo elõñ wãwen ko rekajju jen don. Rej koba nan in tel ko ilo Bible, jibañ eo an jitõb kwojarjar, im jibañ eo emãnãn jen ro jeid im jatid ilo congregation eo an Christian. (Sam Ko 119:97-​105; Luk 11:13; Dri Hibru 10:24, 25) Lemnak kin ewi wãwen men in letok kein jilu remaroñ jibañ yuk ñan kaddeklok yokwe eo am ñan Anij im ro ri turõm.

Nan in Tel ko an Jemed Rekakõrmol

Ñan kaddeklok juõn lukluk emãnãn ibben juõn armij, jej aikwij lukkun jelã kajjen. Ilo an kwalok emake ilo Bible eo, Jehovah ej kir kij ñan ruaklok ñan e. Bõtab, ejabwe konono wõt Bible. Jej aikwij jerbali katakin ko an im lo tokjen ko rej waloktok jene. (Sam Ko 19:​7-​10) “Ña Jeova an Anij, Eo eor tokjen An katakin yuk, Eo ej tel yuk ilo ial eo emõn kwon etal ie,” Aiseia 48:17 ej ba. Aet, Jehovah, eo ej make wõt yokwe, ej katakin kij bwe jen bõk tokjen​—jab kinke ekõnan kadiklok anemkwoj eo ad ilo an letok elõñ kien ko jidik wõt tokjeir.

Jelãlokjen eo ejejjet ilo Bible ej bareinwõt jibañ kij ñan kaddeklok yokwe eo ad ibben armij ro mõttad. Ej eindein kinke mol eo an Bible ej katakin kij kin lemnak eo an Anij kin armij im kwalok kien ko ñan kij bwe ren tel kij ñe jej jerbal ibben don. Kinke ewõr kain kamelele ko ibbed, ewõr juõn bedbed ebin ibbed ñan kaddeklok yokwe kin ro ri turud. Ri jilek Paul ear ba: “Im ij jare men in, bwe ami yokwe en ke im õkekelok wõt ilo jela im ilo kili otemjej.”​—Dri Pilippai 1:9.

Ñan kwalok juõn wanjoñok kin ewi wãwen jemaroñ kajerbal “jelãlokjen eo ejejjet” ñan tel yokwe jej aikwij lemnak kin mol eo ilo Jerbal 10:34, 35: “Anij e jab lemnok kin okõtõn armij: a ilo ailiñ otemjej eo ej mijõk E, im jerbale kwojarjar, ej kabuñburuen.” Elañe Anij ej ekajete armij ekkar ñan jerbal ko air rewãnik im mijak eo ejimwe, im jab ekkar ñan ailiñ ko air ak kiliir, ejjab jimwe ke bwe jen jab kalijeklok armij ro mõttad?​—Jerbal 17:26, 27; 1 Jon 4:​7-​11, 20, 21.

Yokwe​—Juõn Leen Jitõb Kwojarjar

Einwõt ñe ewut ilo ien eo ekkar ion juõn jikin kallip enaj wõr juõn jonikõn ekouwa, jitõb eo an Anij emaroñ kaddek ilo armij ro emol burueir kadkad ko Bible eo ej naetan “leen jitõb.” (Dri Galetia 5:​22, 23) Leen eo elaptata ej yokwe. (1 Dri Korint 13:13) Ak ewi wãwen jej bõk jitõbõn Anij? Juõn wãwen eaorõk ej ikijen jar. Elañe jej jar kin jitõbõn Anij, enaj letoke. (Luk 11:​9-​13) Kwoj “wõnmanlok” ke im jar ñan bõk jitõb kwojarjar? Elañe aet, inem leen ko raorõk, ekoba yokwe, renaj alikarlok ilo mour eo am.

Bõtab, ewõr bar juõn kain jitõb ej jumae jitõbõn Anij. Bible ej naetan “jitõb õn lõl.” (1 Dri Korint 2:​12; Dri Epesõs 2:2) Ej juõn men in kareelel enana, im unjen ej Satan Devil eo, “iroij in lõl in” an armij eo ej jenolok jen Anij. (Jon 12:31) Einwõt kõto eo ej bwoktake bũñalñal im menoknok, “jitõb õn lõl” ej bwoktake kõnan ko renana rej kokkure yokwe im jurak mõjno ko ilo kanniek.​—Dri Galetia 5:​19-​21.

Armij ro rej bõk jitõb in enana ñe rej kajerwawaik ir ñan arõk mweiuk, lemnak in ña-mokta ak kibbon, lemnak ko relej, im lemnak eo ejõkkar kin yokwe im ej juõn lemnak ekkã an walok ibelakin lal. Elañe kwokõnan kalaplok yokwe in emol, kwoj aikwij jutak bin nae jitõbõn lal in. (Jemes 4:7) Bõtab, jab atartar wõt ion kajur eo am make; kwon kajitõk ibben Jehovah bwe en jibañ yuk. Jitõb eo an​—kajur eo elaptata ijoko otemjej ilañ im ion lal​—emaroñ kakajur yuk im lo tõbrak.​—Sam Ko 121:2.

Katak kin Yokwe Jen Christian Jimjãn Jimjatin

Einwõt ñe ajiri ro rej katak ñan kwalok yokwe ilo air loe ilo mweo imwiir, kij aolep​—ro redik im ritto​—jemaroñ kaddeklok yokwe ilo ad kobalok ibben Ri Christian ro jet. (Jon 13:34, 35) Emol, juõn ian jerbal ko raorõk ilo congregation eo an Christian ej ñan ejaak juõn mejatoto eo me armij ro kajjojo remaroñ “lujur don ñan kwalok yokwe im kõmman men ko remõn.”​—Hebrews 10:24, New International Version.

Ro rar “jibliklik” elaplok air kaorõk kain yokwe rot in ilo lal in ejelok yokwe ie. (Matu 9:​36) Emwij an kamol bwe kõtan ko ewõr yokwe ie ilo ien eo ñe rej rittolok remaroñ anjo ion elõñ abañ ko rar waloktok jen ke rar ajiri im kar ejelok yokwe ie. Inem, eaorõk bwe aolep Ri Christian ro emwij air wujleplok im baptais bwe ren karuwaineneik ro rekãl rej kab jino kobalok ibbeir!

“Yokwe E Jamin Joko”

Bible eo ej ba bwe “yokwe e jamin joko.” (1 Dri Korint 13:8) Ewi wãwen ej eindein? Ri jilek Paul ej jiroñ kij: “Yokwe e meanwõr, im e joij; yokwe e jab junmare; yokwe e jab mõke kimjãje, e jab jua; e jab kõmõn men ko jakkar, e jab kabukot men ko an, re jab kaillu e, e jab lemnok nana.” (1 Dri Korint 13:4, 5) Alikar, yokwe in ejjab juõn kadkad bajjek. Jen men in​—ro rej kwalok e rej jelã im kile men ko rekaburomõjmõj im eñtan ko an mour, ak rejjab kõtlok bwe men kein ren kokkure yokwe eo air kin armij ro mõttair. Kain yokwe rot in ej “ken lukwoj ej [kowãppen armij].”​—Dri Kolosse 3:​12-​14.

Lemnak kin wanjoñok eo an juõn Christian jiroñ ej 17-an-yiõ ilo Korea. Ke ear jino jerbal ñan Jehovah Anij, family eo an ear jumae e im ear aikwij emmakit jen mweo imwiir. Bõtab, jen an illu, ear jar kin abañ eo, im kõtlok bwe Nan in Anij im jitõb eo an ren nalõmen lemnak eo an. Tokelik, ekkã an kar jejelok ñan family eo an, ear kobrak letter ko an kin yokwe eo an kin ir. Tokjen men in, ruo ian likao ro jein rar jino katak Bible eo im rej Ri Christian ro emwij air wujleplok. Jinen im ladik eo jatin bareinwõt rar tõmak ilo Bible eo. Eliktata, jemen, eo ear lukkun jumae mokta, ear ukõt buruen. Ri Kennan jiroñ eo ear je: “Kim aolep kim ar mare Ri Christian ro mõttam, im family eo am rej buru wõt juõn ilo kabuñ rej 23 koba aolep.” Juõn anjo elap kin yokwe!

Kwokõnan ke kaddek yokwe eo emol im jibañ ro jet bwe ren kõmman eindein? Inem kwon reilok ñan Jehovah, eo ej Unjen kadkad in eaorõk. Aet, kwon kõmman bwe Nan eo an en bed ilo buruõm, kwon jar kin jitõb kwojarjar eo, im keini am kobalok ibben Ri Christian ro jeid im jatid. (Aiseia 11:9; Matu 5:5) Ej juõn men ekamãnãn buruõd ñan jelã bwe mõttan jidik nana otemjej renaj jako, im ro wõt im rej kwalok yokwe eo emol an Christian renaj bed! Emol, yokwe ej key eo ñan mõnõnõ im mour.​—Sam Ko 37:10, 11; 1 Jon 3:​14.

[Pija ko ilo peij 6]

Jar im katak Nan in Anij renaj jibañ kij ejaak yokwe eo emol