Ñan Bõk Ãjinkij Eo, Komin Jerbale Jatõr!

“Jabrewõt armij eo ej iaikwij kin mejenkajik e jadõr ilo men otemjej.”​—1 Dri Korint 9:​25.

1. Ekkar ñan Dri Epesõs 4:​22-​24, ewi wãwen elõñ million armij ro rar ba aet ñan Jehovah?

ELAÑE emwij am baptais einwõt juõn ian Ri Kennan ro an Jehovah, kwar kamol iman mejen armij bwe kwoj mõnõnõ in bed ilo iaikwij eo ñan bõk ãjinkij in mour indio. Emwij am ba aet ñan kõmanman ankil an Jehovah. Mokta jen ad kar wujleplok mour eo ad ñan Jehovah, elõñ iad jaad aikwij kõmman elõñ oktak ko relap bwe wujleplok mour eo ad en mol, im juõn men Anij ej buñburuen kake. Jej lor nan in kakabilek eo an ri jilek Paul ñan Ri Christian ro: “Komin wutik armij emor ekar ñõn ami etetal mokta, eo e nanalok ekar ñõn mõm ko in mon, . . . komin kõnõk armij ekãl, eo ekar ñõn Anij emwij kõmõne ekãl ilo wãnik im kwojarjar im mol.” (Dri Epesõs 4:​22-​24) Melelen men in bwe, mokta jen ad ba aet im wujleplok mour eo ad ñan Anij, jen kar aikwij ba jaab ak karmijeteik wãwen mour eo enana.

2, 3. Ewi wãwen 1 Dri Korint 6:​9-​12 ej kalikar bwe ewõr ruo kain oktak ko jej aikwij kõmmani bwe jen kabuñburuen Anij?

² Jet wãwen ko ekkar ñan armij eo emor me Ri Kennan ro an Jehovah rej aikwij wutike Nan in Anij ej kananaiki ilo alikar. Paul ear kilajrak jet iair ilo letter eo an ñan Ri Korint ro, im ba: “Ejelok dri lũñ, ak dri kabuñ ñõn ekjõp, ak dri lejen, ak dri ejej, ak dri Sodõm, ak dri kwot, ak dri ankwõnak, ak dri karek, ak dri kajirere, ak dri koaroñ, e naj bõk an jolit ailiñ in Anij.” Inem ear kwalok bwe Ri Christian ro ilo ebeben eo kein kajuõn rar kõmman oktak ko ilo mour eo air, ilo an ba: “jet iami kar eirwõt.” Lale mõk rar eirwõt, ak rar ukõt ak kajimwe mour eo air.​—1 Dri Korint 6:​9-​11.

³ Paul ear ba bwe rar aikwij kajimwe mour eo air ilo wãwen ko jet bareinwõt, kinke ear wõnmanlok im ba: “Men otemjej remelim ñõn iõ, a jab men otemjej rej kakajuror. Men otemjej remelim ñõn iõ, a jamin kõtãik iõ ilo maroñ an jabrewõt.” (1 Dri Korint 6:⁠12) Inem, elõñ armij ilo ran kein rekõnan erom Ri Kennan ro an Jehovah rej lo aikwij eo ñan ba jaab ak karmijeteik men ko me meñe jemaroñ kõmmani ak ejelok tokjen ko ñan indio. Remaroñ kautameik ir im kamade ir jen air jibadõk men ko elaplok tokjeir.

4. Kin ta men eo Ri Christian ro emwij air wujleplok air mour rej errã ibben Paul?

⁴ Jej aikwij mõnõnõ in wujleplok mour eo ad ñan Anij, jab ilo makoko, ak einwõt juõn men in lelok elap jej katok ñan e. Ri Christian ro emwij air wujleplok air mour rej errã ibben Paul, eo ear ba elikin an erom juõn ri kalor an Christ: “Kin aõ kanuij emõn aõ jela Kraist Jisõs aõ Iroij, kin Eo men ko otemjej aõ re joko, im ij watõki kwobij, bwe in jibarek Kraist.” (Dri Pilippai 3:8) Ilo mõnõnõ Paul ear karmijeteik men ko jidik wõt tokjeir bwe en ba aet ñan Anij.

5. Kain iaikwij rot eo Paul ear anjo ion, im ewi wãwen jemaroñ kõmman eindein?

⁵ Paul ear jerbale jatõr ilo iaikwij eo an ilo jitõb im ilo jemlokin ear maroñ in ba: “I ar tõrinae tõrinae emõn, I ar kamwijlok aõ elulu, I ar drebij tõmak eo. Jen ien in beliõ in kwojarjar ej kõtar iõ, eo Iroij, Dri ekajet e wãnik E naj letok ñõn iõ ilo ran eo, im jab ñõn iõ wõt, a ñõn ro otemjej r’ar yokwe An weaktok.” (2 Timote 4:​7, 8) Jemaroñ ke ba eindein tokelik? Jenaj elañe jej jerbale jatõr ilo tõmak ñe jej etõr wõt ilo iaikwij eo an Christian ñan jemlokin.

Jej Aikwij Jatõr ñan Kõmman Emõn

6. Ta in jatõr, im ilo wãwen et ko ruo jemaroñ jerbali?

⁶ Nan eo jatõr ilo kajin Hebrew im Greek ilo Bible eo ej jitõñlok ñan juõn armij eo ej kajur ion wãwen mour eo an. Ekkã an jitõñlok ñan juõn eo ej debij e jen an kõmman nana. Ak ej alikar bwe jej aikwij jerbale jatõr bareinwõt elañe jekõnan kajerbal enbwinid ñan kõmman jerbal ko remõn. Emakijkij an armij ro rejjab wãppen kõmman bwid, inem ewõr ruo wãwen tarinae ibbed. (Ekklisiastis 7:​29; 8:​11) Meñe jej kejbãrok kij jen ad kõmman nana, jej aikwij kamakit buruõd ñan kõmman emõn. Emol, ñan kajur ion enbwinid ej juõn ian wãwen ko remõntata ñan kejbãrok kij jen ad kõmman nana.

7. (a) Jej aikwij jar kin ta, einwõt an kar David kõmmane? (b) Kalmenlokjen ilo ta enaj jibañ kij kalaplok ad jerbale jatõr?

⁷ Alikar, jatõr ej aorõk elañe jekõnan kajejjet kitien kallimur eo ñan wujleplok mour eo ad ñan Anij. Jej aikwij jar einwõt an kar David kõmmane: “Kwon kõmõnmõn buruõ erreo ilo ña, O Anij, im kõkal aõ ejime iloan.” (Sam 51:10) Jemaroñ kalmenlokjen kin tokjen ko ñan ad kejbãrok kij jen men ko rej katton mour erreo ak kajorrãn enbwinid. Baj lemnak mõk kin jorrãn ko rej waloktok jen men kein renana: nañinmij ko rekauwatata, bwoktak ko ikõtan don, im elaptata mij ilo mõkaj. Ijo turãjet, lemnak kin tokjen ko rej waloktok jen ad debij ial in mour eo Jehovah ej kwaloke. Bõtab, ilo mol, jejjab kõnan meloklok bwe buruõd ej jelã mon. (Jeremiah 17:⁠9, NW) Jej aikwij jek ilo buruõd bwe jen jumae jabdewõt wãwen ko buruõd ej mone kij ñan ad lemnak bwe ejjab kanuij aorõk ad kautiej kien ko an Jehovah.

8. Ta mol eo jemaroñ katak kake jen iminene eo ad? Kwalok wanjoñok.

⁸ Enañin aoleped jejelã bwe mour eo ad ejjab wãppen ekkã an kõnan kamõjnoik jitõbõn mõnõnõ in lelok kij make. Ñan wanjoñok, ikijen jerbal in kwalok nan kin Ailiñ eo. Jehovah emõnõnõ ñe armij ro rej mõnõnõ in bõk kunair ilo jerbal in lomoren armij. (Sam 110:3; Matu 24:14) Enañin aoleped, ear jab bidodo ad katak ñan kwalok nan iman mejen armij ro. Ear aikwiji​—im bõlen ej aikwiji wõt​—bwe jen jatõr, “jekanunõk” enbwinid im “kamakokoik e,” im jab kõtlok bwe jen bõk juõn ial ebidodo melelen jab kwalok nan..​—1 Dri Korint 9:​16, 27; 1 Dri Tessalonika 2:2.

“Ilo Men Otemjej”?

9, 10. Ta eo ej kitibuj ad jerbale “jadõr ilo men otemjej”?

⁹ Nan in kakabilek eo an Bible ñan jerbale “jadõr ilo men otemjej” ej melelen elaplok jen ad baj debij wõt ad illu im kejbãrok kij jen mour etton. Jemaroñ lemnak bwe jej jatõr ilo wãwen kein, im elañe ej eindein, jemaroñ kamolol kake men in. Ak, ta kin wãwen ko jet rejjab alikar ilo mour eo ad im jej aikwij kwalok jatõr ie? Ñan wanjoñok, ta elañe jej bed ilo juõn ailiñ eo emweie im ewõr juõn kien eutiej kin wãwen mour. Enaj kar juõn men in meletlet ke ñan ba jaab ñe kwokõnan wiaik elõñ men ko kwojjab aikwiji? Jemen im jinen ajiri ro rej aikwij katakin ajiri ro nejiir bwe ren jab wiaik aolep men ko rej loi bajjek kinke rej bed, rej itoklimo kake, ak kinke ebwe money ibbeir ñan wiaiki. Emol bwe, elañe rekõnan bwe nan in jiroñ kein ren tõbar burueir, jemen im jinen ajiri ro rej aikwij likit juõn joñok emõn ñan kõmmane men in.​—Luk 10:38-​42.

¹⁰ Katak ñan mour meñe ejelok juõn men kwokõnan, ak kwoj aikwiji, emaroñ kakajur men eo kwar bebe kake ilo buruõm. Bareinwõt emaroñ kalaplok kamolol eo am kin men ko ilo kanniek ibbed im tiriamokake ro rej aikwij mour meñe ejelok men kein ibbeir kinke rej jeramel. Emol, juõn ial eainemõn ej idaptõk ibben lemnak ko ibben elõñ armij einwõt “kwon joij ñan kwe make” ak “ej tellokim bõk men eo emõntata.” Men in kareelel ko an lal rej rejañ armij bwe ren kamõnõnõik ir ilo mõkaj, ak rej kõmmane men in bwe ren kamweie ir make. Men in emaroñ bõprae kij jen ad kwalok jatõr. Juõn magazine jen juõn ailiñ emweie ilo Europe ej kab mwij an kejelã: “Elañe ebwe an bin ro relukkun jeramel kwalok jatõr, elaplok an naj bin kõmman men in ibben ro rej jokwe ilo juõn ailiñ emweie ilo ran kein!”

11. Etke katak ñan mour jab le jen joñan aikwij ko ad ej juõn katak elap tokjen, ak ta eo ej kabañ men in?

¹¹ Elañe ebin ad kile ta eo jekõnan bõki im ta eo jej aikwiji, emaroñ emõn elañe jej emmakit ilo juõn wãwen jejjab jerbal ilo jabde. Ñan wanjoñok, elañe jekõnan kadiklok kõnan eo ñan wiaik men ko ilo ejelok joñan, emaroñ emõn elañe jejjab kajerbal credit card, ak ñe jej kaikujkuj, jen karõk lok iman joñan money eo jej bõk ibbed. Kememej bwe Paul ear ba “mwilin ekwojarjar im jokane” ej “lap air nawõnan.” Ilo kõmmanwa ear ba: “J’ar jab bõktok jabrewõt ñõn lõl in, im bareinwõt je ban bõklok jabrewõt jen e. A elañe eor mõña im nuknuk ko iber, jen jokõne kaki.” (1 Timote 6:⁠6-8) Jej jokane ke? Ilo ad katak ñan bõk juõn mour elamwan, eo eanemkwoj jen aolep men ko rej kabañ kij jen ad kõmman men eo eaorõktata kin ad tõr​—ilo jabdewõt wãwen​—jej aikwij kate wõt im jatõr. Bõtab, ej juõn katak ewõr tokjen ibben.

12, 13. (a) Ilo wãwen et ko kwelok ko an Christian rej kitibuj jatõr? (b) Ta jet ian wãwen ko jej aikwij jerbale jatõr?

¹² Bed ilo kwelok ko an congregation, assembly im convention ko ej kitibuj ad kwalok jatõr ilo juõn wãwen ejejuan. Ñan wanjoñok, jatõr ej juõn kadkad jej aikwiji bwe lemnak eo ad en jab belok ilo kwelok eo. (Jabõn Kennan Ko 1:5) Jemaroñ aikwij kwalok jatõr bwe jen jab kabañ ri kwelok ro jet ilo ad unojdikdik ñan ro rej jijet iturid jen ad liñõre eo ej kwalok katak eo. Jej aikwij jatõr ñan ukõt schedule eo ad bwe jen itok ñan kwelok ko ilo awa eo ejejjet. Bareinwõt, jemaroñ aikwij jatõr ñan karõk ien ñan kebojak kin kwelok ko im bõk kunad ie.

¹³ Jerbale jatõr ilo men ko redik rej kakajur maroñ eo ad ñan kõmman eindein ilo men ko relap. (Luk 16:10) Kin unin, ej juõn men emõn ñan katakin kij make ñan keini ad konono Nan in Anij im book ko an Society eo, katak im kalmenlokjen kin ta eo jaar katak kaki! Ej juõn men in meletlet ñan katakin kij ñan bõprae jerbal ko rejõkkar, jimjera, im manit ko rejõkkar ak ñan katakin kij make bwe jen ba jaab ñan makitkit ko remaroñ kwote ien ko jej aikwij lelok ñan jerbal ñan Anij! Boub wõt ilo jerbal eo an Jehovah ej juõn wãwen emõn ñan kejbãrok kij nae men ko remaroñ karuaklok kij jen paradise eo ilo jitõb ilo congregation eo an Jehovah ibelakin lal.

Komin Ritto ilo Jitõb Ikijen Jatõr

14. (a) Ewi wãwen an kar ajiri ro katak ñan jerbale jatõr? (b) Ta tokjen ko rej waloktok ñe ajiri ro rej katak kin kain katak rot kein ilo jinoin mour eo air?

¹⁴ Juõn niñniñ eo ej kab lotak ejañin iminene in kwalok jatõr. Juõn book jidik ro rekabel in katak kin mwilin ajiri rar kamelele: “Jatõr ejjab baj walok wõt. Niñniñ ro rej aikwij jibañ jen jemeir im jineir ñan katak kin jatõr. . . . Ñe jemen im jinen ajiri ro rej tel ir iumin aolepen yiõ ko rej school jatõr ej laplok wõt.” Juõn ekkatak ikijen ajiri ro emen-air-yiõ ear kalikar bwe ro rar katak ñan jerbale jatõr “rar rittolok einwõt jodikdik ro emõnlok air mour, elaplok air buñbuñ iman mejen armij, reberan, im tiljek ilo air jerbal.” Ro rar jab jino katak kin jatõr “elaplok air makelok iair, ebidodolok air ebwer im bõt. Rar ebwer iumin melejoñ ko im bed etolok jen aitwerõk ko.” Alikar, ñan jutak einwõt juõn ritto emõn, juõn ajiri ej aikwij jerbale jatõr mokta.

15. Ñe juõn ejaje jatõr men in ej kalikar ta, ñe jej keidi ibben ta mejenkajjik eo Bible eo ej likite?

¹⁵ Eindein, elañe jekõnan jutak einwõt Ri Christian ro reritto ilo jitõb, jej aikwij katak ñan jerbale jatõr ilo mour eo ad. Ad likjap in kwalok men in ej kalikar bwe jej niñniñ wõt ilo jitõb. Bible eo ej rejañ kij bwe “ilo lolãtãt komin ridto ro.” (1 Dri Korint 14:20) Mejenkajjik eo ad ej bwe jen “tõbar juõn wõt tõmak, im jela Nejin Anij, ñõn armij eridto, ñõn joñõn ridtõn an Kraist obrõk.” Etke? “Bwe jen kiõ jen jab ajiri, im jibliklik einwõt no ko, im makõtkit kin jabrewõt kõto im katak, ilo jela mon an armij, ilo etao eo ej tellok ñõn keien bwir.”” (Dri Epesõs 4:​13, 14) Alikar, katak ñan jerbale jatõr ej juõn men eaorõk ñan ejmour eo ad ilo jitõb.

Kaddek Jatõr

16. Ewi wãwen an Jehovah letok jibañ?

¹⁶ Ñan kaddek jatõr, jej aikwij jibañ jen Anij, im jemaroñ bõke. Nan in Anij, einwõt juõn kapjur ewãppen, ej kwalok ñan kij tu ia eo jej aikwij kõmman oktak ko ilo mour eo ad, im ej kakabilek kij kin ewi wãwen ad maroñ kõmman eindein. (Jemes 1:​22-​25) Juõn dolul in jimjãn jimjatin ej bojak in lelok jibañ bareinwõt. Christian elder ro rej mõnõnõ in lelok jibañ. Jehovah ej make lelok jitõb kwojarjar ilo mõnõnõ elañe jej kajitõk kake ilo jar. (Luk 11:13; Dri Rom 8:​26) Kin men in, jen kajerbal men in letok kein ilo mõnõnõ. Nan in jibañ ko ilo page 27 remaroñ jibañ.

17. Ta nan in rejañ eo jej bõk jen Jabõn Kennan Ko 24:16?

¹⁷ Ej juõn men in kainemõn elap ñan jelã bwe Jehovah ej kaorõk jerbal ko ad ñe jej kajeoñ in kabuñburuen! Men in en kar lujur kij bwe jen wõnmanlok im jerbale jatõr. Jekdon ewi joñan emakijkij in ad lõkatip, jejjab kõnan ebwer jen ad kate im jerbale jatõr. “Bwe dru wãnik ej buñ jiljilimjuõn alen, im ej bar jerkak; a ukõji ro dri nan kin jorran.” (Jabõn Kennan Ko 24:​16) Ilo ien ko kajjojo jej bõk anjo, ewõr unin ad aikwij mõnõnõ ibbed make. Bareinwõt jemaroñ liki bwe Jehovah ej buñburuen kake kij. Juõn Ri Kennan ej ba bwe mokta jen an kar wujleplok mour eo an ñan Jehovah, ien ko kajjojo ear jab kõbatat ilo juõn week, ear kamõnõnõik emake ilo an wiaik juõn men ewõr tokjen ñan e jen money eo jatõr ear jibañ e ñan kejbãroke jen an wiaik jikka.

18. (a) Bar ta eo ej kitibuj ad jerbale jatõr? (b) Ta kallimur eo Jehovah ej letok ñan kij?

¹⁸ Ilõñin men otemjej, jej aikwij kememej bwe jatõr ej kitibuj lolãtãt im eñjake ko an armij. Jemaroñ lo men in ilo nan ko an Jesus: “Jabrewõt eo ej kalimjek kõra im mijkaiye emwij an lũñ iben ilo buruen.” (Matu 5:​28; Jemes 1:​14, 15) Eo ear katak im anjo ion lolãtãt im eñjake ko an en lo an bidodo anjo ion aolepen enbwinin. Inem jej aikwij kabin bebe eo ad ñan jab kejbãrok kij jen ad kõmman nana wõt ak elaptata jab lemnak kake ñan jidik. Elañe lemnak ko renana renaj walok, jen karmijeteik i ilo mõkaj. Jemaroñ ko jen men in kabo ko ilo ad jar im reilok wõt ñan Jesus. (1 Timote 6:​11; 2 Timote 2:​22; Dri Hibru 4:​15, 16) Ñe jej kamaat ad maroñ ñan kõmmane men in, jenaj lor nan in kakabilek eo ilo Sam 55:22: “Kwon jolok inek eo am ion Jeova, im E naj baur yuk: E jamin likit ro remõn bwe ren makõtkit.”

Kwoj Kememej Ke

• Ilo wãwen et ko ruo jej aikwij jerbale jatõr?

• Ta melelen “jadõr ilo men otemjej”?

• Ta wãwen ko rekeie ñan kaddek jatõr kwar loi ilo katak in ad?

• Jatõr ej jino jen ia?