Nan eo an Jehovah Ej Mour Wõt

Point Ko Relap Jen Book in Bwinbwin

ELIKIN air diojlok jen Egypt, Ri Israel ro rar erom juõn ailiñ. Ejjabto tokelik, renaj kar deloñlok iloan Enen Kallimur eo, ak rar jab. Ak, rar jebwãbwe iumin eñoul yiõ ko ilujen “ene jemaren eo elap im men in lelñoñ.” (Duteronomi 8:15) Etke? Bwebwenato eo ilo book Bwinbwin ilo Bible eo ej jiroñ kij kin ta eo ear walok. Ej kalikar ñan kij bareinwõt kin aikwij eo ñan bokake Jehovah Anij im kautiej ro rej jerbal ilo etan.

Moses ear jeje book in ilo ene jemaden eo ilo ene jemaden in Moab, im ear koba aolep bwebwenato ko kar walok iumin 38 yiõ im ratimjuõn alliñ ko​—jen 1512 B.C.E. ñan 1473 B.C.E. (Bwinbwin 1:1; Duteronomi 1:3) Etan book in ear itok jen air bwini Ri Israel ro ruo alen, 38 yiõ ko kõttair. (Chapter 1-4, 26) Bwebwenato eo emwij ajeje ñan jilu mõttan ko. Mõttan eo kein kajuõn ej ikijen bwebwenato ko rar walok iturin Tol Sinai. Kein karuo kar ikijen men ko rar walok ilo ien eo Ri Israel ro rar jebwãbwe ilujen ene jemaden eo. Im kein kajilu kar ikijen men ko rar walok ilo Ene jemaden eo an Moab. Ñe kwoj reade bwebwenato in, kwomaroñ kajitõk ibbam make, ‘Ta eo bwebwenato kein rej katakin iõ kake? Ewõr ke kien ko ilo book in imaroñ bõk tokjen jen e ilo ran kein?’

ITURIN TOL SINAI

(Bwinbwin 1:1–10:10)

Alen eo kein kajuõn ian bwinbwin ko ruo ear walok ke Ri Israel ro rar bed itulal in Tol Sinai. Oran maan ro 20 air yiõ im rittolok, ejjab koba Ri Levi ro, kar 603,550. Rar kõmman bwinbwin in kinke rar aikwiji iko karõk ko an tarinae. Oran aolepen armij ro ilo camp eo, ekoba kõrã ajiri, im Ri Levi ro, kar lõñlok jen jilu million armij ro.

Elikin air bwini armij ro, Ri Israel ro rar bõk nan in jiroñ ko ikijen karõk ko kin ewi wãwen air naj maaj, nan in jiroñ ko ilo tibdikin kin jerbal do an Ri Levi ro im jerbal ilo imõn kabbed eo, kien ko ñan kajenolok ro rej bõk nañinmij ekabobo jen ro jet, kien ko ñan ekajete ro rejunmad, im kallimur ko an Ri Nazirite ro. Chapter 7 ewõr kamelele ko kin men in lelok ko me iroij ro an bwij ko rar ajelok lokatok eo, im chapter 9 ej bwebwenato kin kwojkwoj in Kijone eo. Jar in armij ro rej bõk nan in jiroñ ko bareinwõt kin kilen kalek im rupe camp eo.

Emwij Uaki Kajitõk ko Rej Bedbed ion Bible:

Bwinbwin 2:1, 2​—Kar ta “kakõle” ko rar bed ibelakin bwij ko emwij ajej ñan jilu mõttan ke rar jokwe ilo ene jemaden do? Bible eo ejjab kalikar kin ta in kakõlle kein. Bõtab, rar jab annañ ko rekwojarjar ak men ko raorõk ilo kabũn. Kakõlle kein rar kajerbali ilo juõn wãwen ekeie​—ñan jibañ juõn armij ñan bukõt camp eo an ijo.

Bwinbwin 5:27​—Kar ta melelen ‘neen [kõrã eo ear lũñ] e naj mõlok’? Nan eo “neen” ak murin kar kajerbale ñan melelen mõttan enbwin ko enbwinin armij rej kõmman ajiri. (Jenesis 46:26) ‘Mõlok’ ej melelen emij lok mõttan enbwin kein enbwinin armij, inem eban bar kõmman niñniñ.

Tokjen Katak ko ñan Kij:

Bwinbwin 6:1-7. Ri Nazirite ro rar aikwij kwalok juõn jitõbõn karmijeteik kõnan ko air ñan kejbãrok ir jen wain im aolep den in kadõk ko. Rar aikwij kaetoklok kalon bõrair​—juõn kakõllan kõttãik ir ñan Jehovah, einwõt ñe kõrã ro rej kõttãik ir ñan lõmaro beleir ak jemeir. Ri Nazirite ro rar aikwij erreo ilo air bed etolok jen enbwinin ro remij, meñe rar nukiir. Ilo ran kein ri kwalok ro rej kwalok nan full-time rej kwalok juõn jitõbõn in karmijeteik kõnan ko air make im kõttãik ir ñan Jehovah im karõk ko an. Jet jerbal ko emaroñ koba air etal ñan juõn ene etolok, im emaroñ bin air jeblak ñan kabijuknen eo air ñe emij juõn uan family eo air.

Bwinbwin 8:25, 26. Ñan kabwe ri jerbal ro rekabel ilo jerbal in Levi eo, im ilo air lemnak kin air bwijwõlã, rar kaiñi bwe ro rej lõllab ren to jen jerbal eo air. Bõtab, remaroñ kar jibañ Ri Levi ro jet. Meñe ejelok joñan ritto ñan jerbal in kwalok nan kin Ailiñ eo ilo ran kein, kien in ej katakin kij kin juõn katak eaorõk. Elañe juõn Ri Christian ej bwijwõlã im eban lolorjake jerbal ko an, emaroñ bõk juõn jerbal joñan wõt an maroñ.

JEN JIKIN ÑAN JIKIN ILO ENE JEMADEN EO

(Bwinbwin 10:11–21:35)

Ke kõdo eo ilõñin imõn kabbed eo ear kãliñlok tokelik, Ri Israel ro rar jino maajlok ñan ene jemaden eo an Moab 38 yiõ im juõn ak ruo alliñ ko tokelik. Kwomaroñ lo tokjen ñan lore ial eo air ilo map eo ilo page 9 ilo brochure eo “See the Good Land,” eo me Ri Kennan ro an Jehovah rar kõmmane.

Ilo ien eo rar etal ñan Kadesh, ilo Ene Jemaden eo an Paran, jilu alen rar abõnõnõ. Ien eo kein kajuõn Jehovah ear kabõjrake ke ear jilkintok juõn kijeek ñan tili jet armij ro. Inem tokelik, Ri Israel ro rar abõnõnõ ñan mõñã kanniek, im Jehovah ear jilkintok bao ko. Miriam im Aaron rar abõnõnõ nae Moses im ilo jemlokin Miriam ear bõk nañinmij in leper iumin jidik ien.

Ke rar jokwe ilo Kadesh, Moses ear jilkinlok 12 ri iaroñroñ ro ilo Enen Kallimur eo. 40 ran ko tokelik rej jeblak. Kin air tõmak ilo report ko an joñoul ri iaroñroñ ro, armij ro rar kõnan kade Moses, Aaron, im ri iaroñroñ ro retiljek Joshua im Caleb. Jehovah ej beek in bõktok juõn nañinmij ekabobo ñan kokkure armij ro, ak Moses ej jojomare ir, im Anij ej kalikar bebe eo an bwe ren jebwãbwe ilo ene jemaden eo iumin 40 yiõ ko​—mae ien aolep ro me etair bed ilo bwinbwin eo rar mij.

Jehovah ej letok kien ko jet. Korah im ro jet rej jumae Moses im Aaron, ak ri jumae rein rar mij ilo kijeek eo ak lal eo ear wõrañlok ir. Juõn ran tokelik aolepen Ri Israel ro rar abõnõnõ nae Moses im Aaron. Kin men in, 14,700 rar mij ilo juõn nañinmij jen Jehovah. Ñan kalikar wõn eo ear kãlet einwõt priest eo elap, Anij ej kõmman bwe jokon eo an Aaron en jul. Inem Jehovah ej bar letok kien ko ikijen jerbal ko an Ri Levi ro ñan kejbãrok erreo eo an armij ro. Air kajerbal melkwaarar eo an kau-bũrõrõ eo ej annañelok kajurin katok eo an Jesus ñan karreoik armij.​—Dri Hibru 9:13, 14.

Ro nejin Israel rej jeblak ñan Kadesh, im Miriam ej mij ilo. Bar juõn alen aolep jar in Israel ej abõnõnõ nae Moses im Aaron. Unin air abõnõnõ: ejelok aebõj. Kinke Moses im Aaron rejjab kokwojarjar etan Jehovah ke aebõj eo ear tortok ilo juõn wãwen ekabwilõñlõñ, rar jab maroñ deloñlok ñan loan Enen Kallimur eo. Israel ej emmakitlok jen Kadesh, im emij Aaron iturin Tol Hor. Ke rar kabole Edom, Ri Israel ro rar mõk im konono nae Anij im Moses. Jehovah ej jilkinlok serpent ko repoison ñan kiji ir. Moses ej bar jojomare ir, im Anij ej jiroñ e bwe en kõmman juõn serpent jinibõrõrõ im likiti ion juõn joor bwe ren kalimjeke im mour. Serpent eo ej annañelok ien eo Jesus Christ ear toto ilo alal in eñtan eo bwe jen bõk tokjen ñan indio. (Jon 3:14, 15) Israel ej nitbwili Sihon im Og King ro an Ri Amor im rej bõk ene ko air.

Emwij Uaki Kajitõk ko Rej Bedbed ion Bible:

Bwinbwin 12:1​—Etke Miriam im Aaron rar abõnõnõ nae Moses? Un eo emol unin airro abõnõnõ ej kinke Miriam ear kõnan kalaplok kajur ak maroñ eo an. Ke lio belen Moses, Zipporah, ear kobalok ibben ilo ene jemaden eo, Miriam ear mijak bwe armij ro rejamin kautiej e einwõt juõn kõrã eutiej ilo camp eo.​—Exodus 18:1-5.

Bwinbwin 12:9-11​—Etke Miriam wõt ear bõk nañinmij im leper? Emaroñ bwe, ear bõk eddo eo ñan abõnõnõ nae e im ear karel buruen Aaron ñan bõk kunan ilo men in. Aaron ear kwalok juõn lemnak ejimwe ilo an ukwelok jen bwid eo an.

Bwinbwin 21:14, 15​—Kar ta book eo ear konono kake ilo eon in? Jeje ko ilo Bible rej jitõñlok ñan elõñ book ko ri jeje Bible ro rar kajerbali ñan bõk kamelele ko ke rar jei Bible eo. (Joshua 10:12, 13; 1 Kiñ Ro 11:41; 14:19, 29) “Buk in tõrinae ko an Jehova” kar juõn ian book kein. Ear obrak kin bwebwenato ko kin tarinae ko an armij ro an Jehovah.

Tokjen Katak ko ñan Kij:

Bwinbwin 11:27-29. Moses ej letok juõn joñok emõn ikijen ewi wãwen jej aikwij uak ñe armij ro jet rej bõk jerammõn ko ilo jerbal eo an Jehovah. Jen an bukõt wãwen kautiej e make, Moses ear mõnõnõ ke Eldad im Medad rar jino jerbal einwõt ri kanan ro.

Bwinbwin 12:2, 9, 10; 16:1-3, 12-14, 31-35, 41, 46-50. Jehovah ej kõtmene bwe ri kabuñ ro an ren kautiej ri utiej ro Anij ear kãleti.

Bwinbwin 14:24. Juõn ki ñan jumae men ko an lal rej jibede kij ñan kõmman nan ej ñan ejaak juõn “jitõb” einjuõn, ak lemnak. Ej aikwij juõn eo ejjab einwõt an lal in.

Bwinbwin 15:37-41. Tõrerein nuknuk ko ejejuan Ri Israel ro rar kõmmane ñan kakememej ir bwe rar einwõt juõn jar in armij ejenolok jen ro jet ñan kabuñ ñan Anij im bokake kien do an. Ejjab ke bwe kij bareinwõt jen mour ekkar ñan kien ko an Anij im kalikar bwe jej einjuõn jen lal in?

ILO ENE JEMADEN KO AN MOAB

(Bwinbwin 22:1–36:13)

Ko ro nejin Israel rar jokwe ilo ene jemaden ko an Moab, Ri Moab ro rar lelñoñ kin ir. Kin men in, Balak, King in Moab ear nawõnãn Balaam ñan kaliaik Ri Israel ro. Ak Jehovah ear iun Balaam bwe en kajermmõn ir. Rar kajerbal ri Moab im Midian kõrã ro ñan karel buruen Ri Israel maan ro bwe ren lũñ im kabuñ ñan ekjap. Kin men in, Jehovah ear kokkure 24,000 ri nana ro. Kaje eo ear jemlok ke Phinehas ear jab kõtlok jabdewõt aitwerõk eo nae Jehovah.

Bwinbwin eo kein karuo ej kalikar bwe ejelok maan ro etair rar bed ilo bwinbwin eo kein kajuõn rar mour, ak Joshua im Caleb wõt. Joshua ear bõk jikin Moses einwõt ri kanan eo. Ri Israel ro rej bõk nan in jiroñ ko ikijen kilen lelok elõñ kain men in lelok ko im nan in jiroñ ko ikijen kõmman kallimur do. Armij ro an Israel re bareinwõt idenwõne ion Ri Midian ro. Reuben, Gad, im jimettan in bwij eo an Manasseh rej bed iturear in River Jordan. Israel ear bõk nan in jiroñ ko ñan kijone Jordan im bok anjo ion ene eo. Rej ajej men jolet eo ilo kũbwen kijidik. Rej karõk bwe Ri Levi ro ren jokwe ilo 40 jikin kwelok ko, im 6 iair rar karõki einwõt jikin kone ko.

Emwij Uaki Kajitõk ko Rej Bedbed ion Bible:

Bwinbwin 22:20-22​—Etke Jehovah ear illu ibben Balaam? Jehovah ear jiroñ ri kanan eo Balaam bwe en jab kaliaik Ri Israel ro. (Bwinbwin 22:12) Bõtab, ri kanan in ear etal ñan lõmaro mõttan Balak bwe en kaliaik Israel. Balaam ear kõnan kabuñburuen king in Moab im bõk wõnãn jen e. (2 Piter 2:15, 16; Jud 11) Meñe ear iun Balaam bwe en kajerammõn im jab kananaik Israel, ear kõnan kabuñburuen king eo ilo an ba bwe en kajerbal kõrã ro rej kabuñ ñan Baal bwe ren kabo Ri Israel maan ro. (Bwinbwin 31:15, 16) Inem, unin an Anij illu Balaam ej kinke ri kanan in ear lukkun kibbon.

Bwinbwin 30:6-8​—Juõn Christian maan emaroñ jolok ke kallimur ko an lio belen? Ikijen kallimur ko, Jehovah ej etale ri kabuñ ro an kajjojo. Ñan wanjoñok, ñan wujleplok mour eo ad ña Jehovah ej aikwij juõn bebe ibben kajjojo armij. (Dri Galetia 6:5) Juõn ri belele leo eban jolok kallimur eo an ñan lio belen. Bõtab, juõn kõrã ejjab kõnan kallimur kin juõn men ejõkkar ñan Nan in Anij ak jerbal ko an ñan leo belen.

Tokjen Katak ko ñan Kij:

Bwinbwin 25:11. Phinehas ear juõn joñok emõn ilo kijejeto ñan kabuñ ñan Jehovah! Ejjab ke bwe kõnan eo ad ñan kejbãrok erreo eo an congregation en kamakit kij ñan kwalok ñan Christian elder ro ñe jej jelã bwe juõn ilo congregation eo ej katton mour erreo?

Bwinbwin 35:9-29. Kinke juõn ri kalanwõtwõt ear aikwij illok jen mweo imõn im ko ñan jikin kone eo im bed ie iumin juõn ien ej katakin kij bwe mour ej kwojarjar im jej aikwij kautiej e.

Bwinbwin 35:33. Lal in etton kin bõtõktõkin ro ejelok rueir emaroñ karreoiki wõt kin bõtõktõkin ro rar katorlok. Elap an ekkar bwe Jehovah en kokkure ri nana ro mokta jen an lal in erom juõn paradise!​—Jabõn Kennan Ko 2:21, 22; Daniel 2:44, NW.

Nan in Anij Ej Kakajuror

Jej aikwij kautiej Jehovah im ro ear kãlet ir ñan bõk jerbal ko an ibwiljin armij ro an. Book in Bwinbwin ej kalikarlok mol eo. Ej juõn katak eaorõk ñan kejbãrok ainemõn im burukuk ilo congregation eo ilo ran kein!

Bwebwenato do ilo book in Bwinbwin rej kwalok kin ewi joñan an bidodo an ro rej kajettokjen mour in jitõb maroñ jerawiwi, einwõt abõnõnõ, mour etton, im kabuñ ñan ekjap. Jet ian wanjoñok im katak ko jen book in ilo Bible eo remaroñ einwõt juõn bedbed ñan katak ko ekkar ñan aikwij ko ad ilo Service Meeting eo ilo congregation ko an Ri Kennan ro an Jehovah. Emol bwe, “nan in Anij ej mour im jerbal wõt” ilo mour eo ad.​—Dri Hibru 4:12.

[Pija eo ilo peij 28, 29]

Ikijen juõn kõdo ear waloktok ilo juõn wãwen ekabwilõñlõñ ion imõn kabbed eo, Jehovah ear tel armij ñan kalek im rupe camp eo an Israel

[Pija ko ilo peij 30]

Jehovah ej tellokin bõk bokake jen kij im kõtmene bwe jen kautiej ro rej jutak ilo etan